ກອງປະຊຸມໃຫຍ່ ຄັ້ງທີ X ຂອງພັກ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 18/03/2020 09:30:58 ຈຳ​ນວນ​​ຢ້ຽມ​ຊົມ 571 ຄັ້ງ

ກອງ​ປະ​ຊຸມ​ໃຫຍ່​ຜູ້​ແທນ ທົ່ວ​ປະ​ເທດ ຄັ້ງ​ທີ X ຂອ​ງ​ພັກ ປ​ປ ລາວ ໄດ້​ຈັດ​ຂຶ້ນ​ໃນ​ຄັ້ງ​ວັນ ທີ 18-22/1/2016 ທີ່​ນະຄອນ​ຫຼວງວຽງ​ຈັນ ຊຶ່ງ​ມີ​ຜູ້​ແທນ​ເຂົ້າ ຮ່ວມ​ຈຳ​ນວນ 684 ສະ​ຫາຍ ມີ ຜູ້​ແທນ​ບົ່ງ​ຕົວ 1 ສະ​ຫາຍ ຍິງ 82 ສະ​ຫາຍ ທີ່​ເປັນ​ຕົວ​ແທນ​ໃຫ້ແກ່​ສະ​ມາ​ຊິກ​ພັກທົ່ວ​ປະ​ເທດ 268.000 ກວ່າ​ສະ​ຫາຍ.
ກອງ​ປະ​ຊຸມ​ຄັ້ງ​ນີ້​ໄດ້​ເລືອກ​ຕັ້ງ​ຄະ​ນະ​ບໍ​ລິ​ຫານ​ງານ ສູນ​ກາງ​ພັກ ສະ​ໄໝທີ X ຊຶ່ງ​ປະ ກອບ​ມີ​ກຳ​ມະ​ການ​ສູນ​ກາງ​ພັກ​ສົມ​ບູນ ຈຳ​ນວນ 69 ສະ​ຫາຍ ຍິງ 7 ສະ​ຫາຍ ແລະ ກຳ​ມະ ການ ​ສູນ​ກາງ​ພັກ​ສຳ​ຮອງ 8 ສະ​ຫາຍ, ຍິງ 3 ສະ​ຫາຍ.
ກອງ​ປະ​ຊຸມ​ຄັ້ງ​ປະ​ຖົມມະ​ລືກ​ຂອງ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ ສະ​ໄໝ​ທີ X ໄດ້​ເປັນເອ​ກະ​ສັນ​ກັນ​ຢ່າງ​ສົມ​ບູນ​ເລືອກຕັ້ງ​ ສະ​ຫາຍ ບຸນ​ຍັງ ວໍ​ລະ​ຈິດ ທີ່ເຄົາ​ລົບ​ຮັກ ເປັນ​ເລ​ຂາ​ທິ​ການໃຫຍ່ ຄະ​ນະ​ບໍ​ລິ​ຫານ​ງານ​ສູນກາງ​ພັກ ສະ​ໄໝ​ທີ X; ເລືອກຕັ້ງ​ກົມ​ການ​ເມືອງ​ສູນ​ກາງ​ພັກ ຊຶ່ງ​ປະ​ກອບ​ມີ 11 ສະ​ຫາຍ, ເລືອກ​ຕັ້ງ​ຄະ​ນະ​ເລ​ຂາ​ທິ​ການ​ສູນ​ກາງ​ພັກ ຊຶ່ງ​ປະ​ກອບ​ມີ 9 ສະ​ຫາຍ, ເລືອກ​ຕັ້ງ​ສະ​ຫາຍ ພັນ​ຄຳ ວິ​ພາວັນ ເປັນ​ຜູ້​ປະ​ຈຳ​ການ​ຄະ​ນະ​ເລ​ຂາ​ທິ​ການ​​ສູນ​ກາງພັກ; ເລືອກ​ຕັ້ງ​ສະຫາຍ ບຸນ​ທອງ ຈິດ​ມະ​ນີ ເປັນປະ​ທານ​ຄະ​ນະ​ກວດ​ກາ​ສູນ​ກາງພັກ ແລະ ເລືອກ​ຮອງປະ​ທານ​ຄະ​ນະ​ກວດ​ກາ​ສູນ​ກາງ​ພັກ 8 ສະ​ຫາຍ.
ກອງ​ປະ​ຊຸມ​ໃຫຍ່ ຄັ້ງ​ທີ X ຂອງ​ພັກ ມີ​ແນວ​ຄິດ​ຊີ້​ນຳ​ກວມ ລວມ​ພາຍ​ໃຕ້​ຄຳ​ຂວັນ: “ຍົກ​ສູງ ຄວາມ​ສາ​ມາດ​ນຳ​ພາ ແລະ ລັກ​ສະ​ນະ​ນຳ​ໜ້າ​ຂອງ​ພັກ, ເພີ່ມ ທະ​ວີ​ມະ​ຫາ​ສາ​ມັກ​ຄີ​ທົ່ວ​ປວງ​ຊົນ​ທັງ​ຊາດ, ຢຶດ​ໝັ້ນ​ແນວ​ທາງ​ປ່ຽນ​ແປງ​ໃໝ່​ຮອບ​ດ້ານ ແລະ ມີ​ຫຼັກ​ການ, ປົກ​ປັກ​ຮັກ​ສາ ແລະ ພັດ​ທະ​ນາ​ປະ​ເທດ​ຊາດ​ຕາມ​ທິດ​ຍືນ​ຍົງ​ສູ່​ຈຸດ​ໝາຍ​ສັງ​ຄົມ​ນິ ຍົມ​ຢ່າງ​ໜັກ​ແໜ້ນ.
ກອງ​ປະ​ຊຸມ​ໄດ້​ຄົ້ນ​ຄວ້າ ແລະ ຮັບ​ຮອງ​ເອົາ​ລາຍ​ງານ ການ​ເມືອງ​ຂອງ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ, ໄດ້​ຄົ້ນ​ຄວ້າ​ປະ​ກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ​ຕໍ່​ຂໍ້​ຄົງ​ຄ້າງ​ໃນ​ການ​ຊີ້​ນຳໆ​ພາຂອງ​ພັກ, ຮັບ​ຮອງ​ເອົາ​ຂໍ້​ສະຫຼຸບ 7 ປະ​ການ ຊຶ່ງ​ເປັນ​ບົດ​ຮຽນ​ອັນ​ປະ​ເສີດ​ທີ່​ຖອດ​ຖອນ​ໄດ້​ຈາກ​ພຶດ​ຕິ​ກຳ​ແຫ່ງ​ການ​ຈັດ​ຕັ້ງ​ນຳ​ພາ​ປະ​ຕິ​ບັດ​ມະ​ຕິ​ກອງ​ປະຊຸມ​ໃຫຍ່ ຄັ້ງ​ທີ IX ຂອງ​ພັກ. ກອງ​ປະ​ຊຸມ​ໃຫຍ່​ ຄັ້ງ​ທີ X ຂອງ ພັກ​ໄດ້​ກຳ​ນົດ​ທິດ​ທາງ​ລວມ ແລະ ຄາດ​ໝາຍ​ໃຫຍ່​ໃນ​ແຕ່​ລະ​ໄລ​ຍະ​ໃຫ້​ສຳ​ເລັດ​ດັ່ງ​ນີ້:
1. ທິດ​ທາງ​ໜ້າທີ່​ລວມ ແລະ ຄາດໝາຍ​ໃຫຍ່​ສໍາ​ລັບ​ໄລຍະ​ປີ 2020.
ໄລຍະ 5 ປີ​ (2016 - 2020) ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ໄດ້ກໍາ​ນົດທິດ​ທາງ​ໜ້າທີ່​ລວມ ແລະ ຄາດໝາຍ​ໃຫຍ່​ຈໍາ​ນວນ​ໜຶ່ງດັ່ງນີ້:
- ຢຶດ​ໝັ້ນ ແລະ ເສີມ​ຂະຫຍາຍ​ແນວທາງ​ປ່ຽນແປງ​ໃໝ່​ຮອບດ້ານ ແລະ ມີຫຼັກການ​ ຂອງ​ພັກ​ໃຫ້​ເລິກເຊິ່ງ​ເຖິງ​ຖອງ ດ້ວຍ​ການ​ສືບຕໍ່​ບຸກ​ທະລຸ​ທັງ 4 ດ້ານ ຢ່າງແຂງແຮງ​ຕໍ່​ເນື່ອງ​ໃຫ້​ເຫັນ​ຜົນ​ອັນ​ເປັນ​ຮູບ​ປະ​ທໍາ.
- ປັບປຸງ, ກໍ່ສ້າງ​ພັກ​ໃຫ້​ມີ​ຄວາມ​ໜັກ​ແໜ້ນ​ທາງ​ດ້ານ​ການ​ເມືອງ​-​ແນວ​ຄິດ, ເຂັ້ມ ແຂງ ແລະ ປອດ​ໃສ​ທາງ​ດ້ານ​ການຈັດຕັ້ງ ແລະ ແບບແຜນ​ການ​ນໍາ​ພາ, ມີ​ຄວາມສາ​ມາດ​ນໍາ​ພາ​ສູງ​ຂຶ້ນ ເພື່ອ​ເປັນ​ກອງ​ນໍາ​ໜ້າ ແລະ ເປັນ​ແກນ​ນໍາ​ທີ່​ໝັ້ນຄົງ​ໃນ​ລະບົບການເມືອງ​ປະຊາທິປະໄຕ​ປະຊາ​ຊົນ.
- ບູລະນະ​ລະ​ບົ​ບອໍາ​ນາດ​ແຫ່ງ​ລັດ ກໍ​ຄື​ການ​ຄຸ້ມຄອງ​ ບໍລິຫານ​ຕາມ​ທິດ​ສ້າງ​ລັດປະ ຊາ​ທິ​ປະ​ໄຕ​ປະຊາຊົນ​ທີ່​ປົກ ຄອງ​ດ້ວຍ​ກົດໝາຍໃຫ້​ມີ​ຄວາມ​ສັກສິດ​ຕິດ​ພັນ​ກັບການເສີມ​ຂະຫຍາຍ​ສິດ​ເປັນ​ເຈົ້າ​ຂອງ​ປະຊາຊົນ, ສ້າງ​ເງື່ອນໄຂ​ສະ ດວກ ແລະ ສະພາບແວດ​ລ້ອມ​ອັນ​ອໍາ​ນວຍ​ໃຫ້​ແກ່​ການ​ທໍາ​ມາ​ຫາ​ກິນ​ຂອງ​ພົນລະເມືອງ ເພື່ອ​ສ້າງ​ຄວາມ​ຮັ່ງມີ​ໃຫ້​ແກ່​ຄອບຄົວ ແລະ ປະເທດ​ຊາດ, ປະຕິບັດ​ຄວາມ​ສະເໝີພາບກ່ຽວ​ກັບ​ບົດບາດ ຍິງ​-​ຊາຍ, ຮັບປະກັນ​ສິດ​ສະເໝີພາບຕໍ່ ໜ້າ​ກົດໝາຍ ແລະ ມີ​ຄວາມ​ເຊື່ອ​ໝັ້ນ​ຕໍ່​ການ ນໍາ​ພາ​ຂອງ​ພັກ ແລະ ອະ ນາຄົດ​ອັນ​ສົດໃສ​ຂອງ​ປະເທດ​ຊາດ.
- ປະຕິບັດ​ແນວທາງ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ຮອບດ້ານ, ຮັບປະກັນ​ສະຖຽນ​ລະ​ພາບ​ທາງ​ການເມືອງ, ຄວາມ​ສະຫງົບ ແລະ ຄວາມ​ເປັນລະບຽບ​ຮຽບ ຮ້ອຍ​ໃນ​ສັງຄົມ​ຢ່າງ​ໜັກ​ແໜ້ນ.
- ເສີມ​ຂະ​ຫຍາ​ຍກໍາ​ລັງ​ແຮງ​ຂອງ​ບັນດາ​ພາກສ່ວນ​ເສດຖະກິດ ກໍ​ຄື​ຊັ້ນ​ຄົນຕ່າງໆ​ເຂົ້າ​ໃນ​ການ​ປົກ​ປັກ​ຮັກສາ ແລະ ພັດທະນາ​ປະເທດ​ຊາດ​ຢ່າງ​ຕັ້ງໜ້າ, ເຮັດ​ໃຫ້ເສດຖະກິດ​ແຫ່ງ​ຊາດ​ຂະຫຍາຍຕົວ​ໄປ​ຕາມ​ທິດ​ພັດທະນາ​ແບບ​ຍືນ​ຍົງ​ຢ່າງ​ຕໍ່​ເນື່ອງ, ເສດຖະກິດ​ມະຫາ​ພາກ​ມີ​ຄວາມ​ໝັ້ນ​ທ່ຽງ, ໜັກ​ແໜ້ນ.
- ການ​ພົວພັນ ແລະ ຮ່ວມ​ມື​ກັບ​ສາກົນ​ສືບຕໍ່​ເປີດ​ກວ້າງ​ອອກ​ບົນ​ພື້ນຖານ​ຄວາມ​ເປັນ​ເຈົ້າ​ການ ແລະ ເສີມ​ຂະຫຍາຍ​ບົດບາດ​ການ​ເປັນ​ຄູ່​ຮ່ວມ​ມືຂອງ ​ປະເທດ​ເຮົາ​ກັບ​ເພື່ອນ​ມິດໃນ​ພາກ​ພື້ນ ແລະ ສາກົນ​ຢ່າງຕັ້ງໜ້າ.
2. ທິດ​ທາງ​ໜ້າທີ່​ລວມ ແລະ ຄາດໝາຍ​ໃຫຍ່​ສໍາ​ລັບ​ໄລຍະ​ປີ 2025.
- ເມື່ອ​ຮອດ​ປີ 2025 ປະເທດ​ເຮົາ​ຈະ​ກາຍເປັນ​ປະເທດ​ທີ່​ມີ​ລາຍ​ຮັບ​ປານ​ກາງ ລວມ​ຍອດ​ມູນ​ຄ່າ​ຜະລິດ​ຕະ​ພັນ​ພາຍ​ໃນ (GDP) ຈະ​ລື່ນ​ປີ 2015 ຫຼາຍ​ກວ່າ 2 ເທົ່າ ລະບອບ​ການເມືອງ​ປະຊາທິ ປະໄຕ​ປະຊາຊົນ​ມີ​ຄວາມ​ໜັກ​ແໜ້ນ ແລະ ເຂັ້ມ​ແຂງ.
- ລະບົບ​ການ​ປົກຄອງ ແລະ ການ​ຄຸ້ມ​ຄອງ​ບໍລິຫານ​ລັດ​ດ້ວຍ​ກົດໝາຍ​ມີຄວາມ​ສັກ ສິດ​ຕາມ​ທິດ​ເສີມ​ສ້າງ​ຄວາມ​ສາມາດ​ຂອງ​ການ​ຄຸ້ມ​ຄອງ​ມະ ຫາ​ພາກ ແລະ ການ​ແບ່ງ​ຂັ້ນ​ຄຸ້ມ​ຄອງ​ໃຫ້​ທ້ອງຖິ່ນ​ຮາກ​ຖານ​ຫຼາຍ​ຂຶ້ນ​ກວ່າ​ເກົ່າ.
- ໂຄງ​ປະກອບ​ເສດຖະກິດ​ມີ​ການ​ຫັນປ່ຽນ​ໄປ​ຕາມ​ທິດ​ຫັນ​ເປັນ​ອຸດ​ສາ​ຫະ​ກໍາ ແລະ ທັນ​ສະໄໝ, ມີ​ຖານະ​ການ​ເງິນ​ແຫ່ງ​ຊາດ​ເປັນ​ເຈົ້າ​ຕົນ​ເອງ​ໂດຍ​ພື້ນຖານ ທັງ​ມີພື້ນຖານ​ຄວາມ​ໝັ້ນຄົງ​-​ຍືນ​ຍົງ​ຈໍາ​ນວນ​ໜຶ່ງ.
- ປະຊາຊົນ​ສ່ວນ​ໃຫຍ່​ມີ​ ຖານະ​ພໍ​ກິນ​ພໍໃຊ້, ບັນລຸ​ຄາດ ໝາຍ​ສະຫັດ​ສະ​ວັດ ດ້ານ​ການ​ພັດທະນາ​ຢ່າງ​ສົມ​ບູນ.
- ຄວາມ​ເປັນ​ປຶກ​ແຜ່ນ​ພາຍ​ໃນ​ຊາດ ແລະ ຄວາມ​ສາມັກຄີ​ປອງ​ດອງ​ລະ​ຫວ່າງ ເຜົ່າ​ມີ​ຄວາມ​ໜັກ​ແໜ້ນ ແລະ ເຂັ້ມແຂງ​ຍິ່ງ​ຂຶ້ນ.
- ສັງຄົມ​ມີ​ຄວາມ​ສະຫງົບ ແລະ ມີ​ຄວາມ​ເປັນ​ລະບຽບ​ຮຽບຮ້ອຍ​ດີກ​ວ່າເກົ່າ ໄດ້​ມີ​ຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ​ເປົ້າ​ໝາຍ​ການ​ພັດ ທະນາ​ແບບ​ຍືນ​ຍົງ (SDGs).
- ສປປ ລາວ ມີ​ເພື່ອນ​ມິດສາ​ກົນ​ຢ່າງ​ກວ້າງຂວາງ, ສາມາດ​ເຂົ້າ​ຮ່ວມ ແລະ ເພີ່ມ​ທະວີ​ຄວາມ​ສາມາດ​ແຂ່ງຂັນໃນ​ຂະບວນ​ວິວັດ​ແຫ່ງ​ການ​ເຊື່ອມ​ໂຍງ​ພາກພື້ນ ແລະ ສາກົນ​ຢ່າງ​ເປັນ​ເຈົ້າ​ການ ສາມາດ​ປະ ກອບສ່ວນ​ເຂົ້າ​ໃນ​ພາລະກິດ​ສັນຕິພາບ, ມິດຕະພາບ ແລະ ການ​ຮ່ວມ​ມື​ພັດທະນາ​ໃນ​ພາກ​ພື້ນ ແລະ ໃນ​ໂລກ​ຢ່າງ​ເປັນເຈົ້າ ​ການກວ່າ​ເກົ່າ.
3. ທິດ​ທາງ​ໜ້າທີ່​ລວມ ແລະ ຄາດໝາຍ​ໃຫຍ່​ສໍາ​ລັບ​ໄລຍະ​ປີ 2030.
- ເມື່ອ​ຮອດ​ປີ 2030 ຕ້ອງ​ສືບຕໍ່​ຮັບປະກັນ​ໃຫ້​ປະເທດ​ເຮົາ​ມີ​ສະຖຽນ​ລະ​ພາບທາງ​ດ້ານ​ການເມືອງ​ທີ່​ໝັ້ນຄົງ ແລະ ມີ​ຄວາມ​ສະຫງົບ​ປອດ​ໄພ​ທາງ​ສັງຄົມ​ຢ່າງ​ໜັກແໜ້ນ, ມີ​ຂະໜາດ​ເສດຖະກິດ ຫຼື ລວມ​ຍອດ​ມູນ​ຄ່າ​ຂອງ​ຜະລິດ​ຕະ​ພັນ​ພາຍ​ໃນ (GDP) ຫຼາຍ​ກວ່າ​ປີ 2015 ເຖິງ 4 ເທົ່າ​ກວ່າ.
- ການ​ພັດທະນາ​ແບບ​ຍືນ​ຍົງ​ໄດ້​ເຂົ້າ​ສູ່​ລວງ​ເລິກ, ເສດຖະກິດ​ມີ​ການ​ເຕີບ​ໂຕ​ທີ່ ໝັ້ນ​ທ່ຽງ, ໜັກ​ແໜ້ນ​ຕໍ່​ເນື່ອງ ແລະ ມີ​ຄວາມ​ຍືນ​ຍົງ.
- ເປັນ​ປະເທດ​ທີ່​ມີ​ລາຍ​ຮັບ​ປານ​ກາງ​ສູງ ແລະ ບັນລຸ​ບັນດາ​ເປົ້າ​ໝາຍ​ການພັດທະນາ​ແບບ​ຍືນ​ຍົງ (SDGs) ໂດຍ​ພື້ນຖານ​ມີ​ຄວາມ​ສາມາດ​ເປັນ​ເຈົ້າ​ຕົນ​ເອງ​ທາງດ້ານ​ການ​ເງິນ​ຢ່າງ​ໜັກ​ແໜ້ນ, ລະບົບ​ການ​ເງິນ​-​ເງິນຕາ​ທັນ​ສະໄໝ, ມີ​ປະສິດທິພາບ, ສະດວກ​ຄ່ອງ​ຕົວ ແລະ ເອື້ອ​ອໍາ​ນວຍ ໃຫ້ແກ່​ ການ​ບໍລິການ​ດ້ານ​ການ​ເງິນ, ການ​ລົງທຶນ ແລະ ການ​ຜະ​ລິດ​-​ທຸລະ​ກິດ.
- ເສດຖະກິດ​ຕະຫຼາດ​ຕາມ​ທິດ​ສັງຄົມ​ນິຍົມ​ໄດ້​ຮັບ​ການ​ພັດທະນາ​ຢ່າງ​ເປັນລະ ບົບ, ບັນດາ​ພາກສ່ວນ​ເສດ ຖະກິດ​ທີ່​ເປັນ​ກໍາ​ລັງ​ແຮງໃຫ້​ແກ່​ເສດຖະກິດ​ແຫ່ງ​ຊາດ​ມີ ຄວາມ​ໜັກ​ແໜ້ນ, ມີ​ລະບົບໂຄງ​ລ່າງ​ພື້ນຖານ​ເສດຖະກິດ​ທີ່​ເຂັ້ມແຂງ, ສ້າງໂຄງ​ປະກອບ​ເສດຖະກິດ​ທີ່​ຖື​ເອົາ​ກະ​ສິ​ກໍາ​ຕິດ​ແໜ້ນ​ກັບ​ອຸດ​ສາ​ຫະ​ກໍາ ແລະ ການ​ບໍລິການ.
- ການ​ພັດທະນາ​ເຂດ​ແຄວ້ນ​ໄດ້​ຮັບ​ການ​ເອົາໃຈໃສ່, ເຮັດ​ໃຫ້​ຄວາມ​ແຕກ​ຕ່າງກັນ​ຂອງ​ການ​ພັດທະນາ​ຫຼຸດ​ລົງ​ຢ່າງ​ຈະແຈ້ງ, ສາມາດ​ປົກ​ປັກ​ຮັກສາ​ສິ່ງແວດລ້ອມ ແລະ ນໍາ​ໃຊ້​ຊັບ​ພະຍາ​ກອນ​ທໍາ​ມະ​ຊາດ​ໄດ້​ຢ່າງ​ມີ​ປະສິດ​ທິ​ຜົນ.
- ເສດຖະກິດ​ພັດທະນາ​ໄປ​ຕາມ​ທິດ​ເສດຖະກິດ​ພູມ​ປັນຍາ, ຫັນ​ເປັນ​ອຸດ​ສາ​ຫະກໍາ ແລະ ທັນ​ສະໄໝ​ຕາມ​ທິດ​ຫັນ​ເປັນ​ສີຂຽວ ແລະ ເປັນ​ມິດ​ກັບ​ສິ່ງ​ແວດ​ລ້ອມ.
- ປະຊາຊົນ​ສ່ວນ​ໃຫຍ່​ມີ​ຊີວິດ​ການ​ເປັນ​ຢູ່​ທີ່​ດີ ແລະ ມີ​ຄວາມຜາ​ສຸກ, ຄຸນ​ຄ່າມູນເຊື້ອ​ວັດ​ທະ​ນະ​ທໍາ​ທີ່​ເປັນ​ເອກະລັກ​ດີງາມ​ຂອງ​ຊາດ ແລະ ຂອງ​ແຕ່ລະ​ເຜົ່າ​ໄດ້​ຮັບ​ການ​ປົກ​ປັກ​ຮັກ​ສາ, ເສີມ​ຂະຫຍາຍ ແລະ ພັດທະນາ​ໃຫ້​ອຸດົມ​ຮັ່ງມີ​ຍິ່ງ​ຂຶ້ນ.
- ການ​ພັດທະນາ​ມີຄວາມ ​ສົມ​ດູ​ນ​ລະຫວ່າງ​ການ ພັດທະ ນາເສດ​ຖະກິດກັບ​ການພັດທະ ນາ​ວັດ​ທະ​ນະ​ທໍາ-​ສັງຄົມ ແລະ ການ​ປົກ​ປັກ​ຮັກ ສາ​ສິ່ງ ແວດລ້ອມ​ ຕາມ​ທິດ​ເຕີບໂຕ​ສີຂຽວ ແລະ ມີ​ຄວາມ​ຍືນ​ຍົງ, ສາມາດ​ຮັບ​ມື​ໄດ້​ຢ່າງ​ຄ່ອງຕົວ​ ກັບ​ການປ່ຽນ​ແປງດິນ​ຟ້າອາ ກາດ ແລະ ວິ​ກິດ​ການ​ພາຍ​ນອກ.
- ລັກສະນະ​ລັດ​ປະຊາ ທິປະໄຕ​ປະຊາຊົນ ໂດຍ​ປະ ຊາຊົນ ແລະ ເພື່ອ​ປະ​ຊາຊົນ​ສະແດງ​ອອກ​ຢ່າງ​ຈະແຈ້ງ, ລະ ບົບ​ການ​ປົກຄອງ​ໄດ້​ຮັບ​ການ​ບູລະນະ​ໄປ​ຕາມ​ທິດເສີມ​ສ້າງ​ຄວາມ​ສາມາດ​ຂອງ​ການ​ຄຸ້ມ​ຄອງ​ມະຫາ​ພາກ​ຂອງ​ສູນ​ກາງ ແລະ ຄວາມ​ເປັນເຈົ້າ​ການ​ຂອງ​ທ້ອງຖິ່ນ​ຮາກ​ຖານ.
- ສິດທິ​ຂອງ​ພົນລະເມືອງ​ມີ​ການ​ຮັບປະກັນ​ດ້ວຍ​ການ​ຄຸ້ມ​ຄອງ​ລັດຕາມກົດໝາຍ​ທີ່​ສັກສິດ, ປະຊາຊົນ​ບັນດາເຜົ່າ​ມີ​ຄວາມ​ສາມັກຄີ​ປອງ​ດອງ​ເປັນ​ປຶກ​ແຜ່ນ, ສັງຄົມ​ມີ​ປະ ຊາທິປະໄຕ, ມີ​ຄວາມ​ຍຸ​ຕິ​ທໍາ ແລະ ສີ​ວິ​ໄລ.
- ຊັບພະຍາກອນ​ມະນຸດ​ໄດ້​ຮັບ​ການ​ພັດທະນາ​ໃກ້ຄຽງ ​ກັບ​ພາກ​ພື້ນ ແລະ ສາກົນ, ເປັນ​ກໍາ​ລັງ​ການ​ຜະລິດ​ທີ່​ເຂັ້ມແຂງ, ຕອບ​ສະໜອງ​ໄດ້​ຕາມ​ຄວາມ​ຕ້ອງການ​ພັດທະ​ນາ​ເສດ​ຖະ​ກິດ​-​ສັງຄົມ​ແຫ່ງ​ຊາດ​ຫຼາຍ​ຂຶ້ນ.
- ການ​ເຊື່ອມ​ໂຍງ ແລະ ເຊື່ອມ​ຈອດ​ກັບ​ພາກ​ພື້ນ ແລະ ສາກົນ​ຕ້ອງກວ້າງຂວາງ ແລະ ໃຫ້​ມີ​ຄວາມ​ສາມາດ​ແກ້ງ​ແຍ້ງ​ແຂ່ງຂັນ​ໃນ​ດ້ານ​ຕ່າງໆ​ກັບ​ພາຍ​ນອກ​ຫຼາຍຂຶ້ນ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110