ໜັງສືພິມ ປະຊາຊົນ

ຄຕພ ມອບ-ຮັບ ໜ່ວຍພັກປອດໃສ ເຂັ້ມແຂງ ໜັກແໜ້ນ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 19/03/2020 08:25:32 ຈຳນວນຢ້ຽມຊົມ 807 ຄັ້ງ

    ຄະນະພົວພັນຕ່າງປະ ເທດສູນກາງພັກ (ຄຕພ) ໄດ້ຈັດພິທີມອບຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ແກ່ 5 ໜ່ວຍພັກ ທີ່ຂຶ້ນກັບ ຄະນະພັກ ຄະນະພົວພັນຕ່າງປະເທດສູນກາງພັກ ໃນວັນທີ 17 ມີນາຜ່ານມາ ທີ່ຄະນະພົວພັນຕ່າງປະເທດສູນກາງພັກ ໂດຍການເປັນກຽດເຂົ້າຮ່ວມຂອງ ສະຫາຍ ນາງ ສູນທອນ ໄຊຍະຈັກ ກຳມະການສູນກາງພັກ ເລຂາຄະນະພັກ ຫົວໜ້າ ຄະນະພົວພັນຕ່າງປະເທດສູນກາງພັກ, ມີຮອງເລຂາ ແລະ ພາກສ່ວນກ່ຽວຂ້ອງເຂົ້າຮ່ວມນຳ.
   ໃນພິທີ ສະຫາຍ ນາງ ພອນດາວັນ ພິນສະຫວັນ ຫົວ ໜ້າຫ້ອງການພັກ, ຫົວໜ້າກົມ ຈັດຕັ້ງ-ພະນັກງານ ໄດ້ຂຶ້ນ ຜ່ານບົດລາຍງານສະພາບການ ເຄື່ອນໄຫວວຽກງານການຈັດ ຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ຜ່ານມາ ຊຶ່ງສາມາດຮັບຮອງໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈຳນວນ 5 ໜ່ວຍ ກວມເອົາ 90% ຂອງໜ່ວຍພັກ ທີ່ຂຶ້ນກັບຄະນະພັກ, ອັນເປັນຂີດໝາຍອັນສຳຄັນໃຫ້ແກ່ຄະນະພັກ ຄະນະພົວພັນຕ່າງ ປະເທດສູນກາງພັກ. ກອງປະ ຊຸມ ໄດ້ຜ່ານທິດທາງແຜນການ ສືບຕໍ່ສ້າງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020.
    ໃນພິທີມອບ-ຮັບດັ່ງກ່າວ ສະຫາຍ ນາງ ສູນທອນ ໄຊຍະຈັກ ໄດ້ໃຫ້ກຽດໂອ້ລົມ ໂດຍໄດ້ສະແດງຄວາມຊົມເຊີຍຕໍ່ຜົນສຳເລັດຂອງ 5 ໜ່ວຍພັກ ທີ່ໄດ້ມີຄວາມພະຍາຍາມ ແລະ ຄວາມຮັບຜິດຊອບ ໃນການສ້າງໜ່ວຍພັກຂອງຕົນໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕະຫຼອດໄລຍະ 1 ປີທີ່ຜ່ານມາ ຊຶ່ງໄດ້ຮັບການເຫັນດີຈາກຄະນະຈັດຕັ້ງສູນກາງພັກໃຫ້ ໜ່ວຍພັກຫ້ອງການ ຄະນະພົວພັນຕ່າງປະເທດສູນກາງພັກ, ໜ່ວຍພັກກົມຈັດຕັ້ງ-ພະນັກງານ, ໜ່ວຍພັກກົມຄົ້ນຄວ້າ-ສັງລວມ, ໜ່ວຍພັກກົມອາຊີ-ປາຊີຟິກ ແລະ ອາຟຣິກາ ແລະ ໜ່ວຍພັກກົມພົວພັນສາກົນຂອງອົງການຈັດຕັ້ງມະຫາຊົນໄດ້ຮັບນາມມະຍົດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມີຄວາມເຊື່ອໝັ້ນວ່າ ບັນດາຄະນະໜ່ວຍພັກດັ່ງກ່າວ ຈະສືບຕໍ່ນຳພາໜ່ວຍພັກຂອງຕົນໃຫ້ຮັກສານາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີຕໍ່ໄປ, ສ່ວນໜ່ວຍພັກທີ່ຍັງບໍ່ໄດ້ຮັບນາມມະຍົດໃນຄັ້ງນີ້ຈະໄດ້ສືບຕໍ່ປະຕິບັດແຜນການກໍ່ສ້າງໜ່ວຍພັກ ປອດໃສ, ເຂັ້ມ ແຂງ, ໜັກແໜ້ນ ໃນຕໍ່ໜ້າ ແລະ ໄດ້ຮຽກຮ້ອງໃຫ້ບັນດາພະນັກງານ-ສະມາຊິກພັກທຸກສະຫາຍສືບຕໍ່ເປັນ ແບບຢ່າງນຳໜ້າ, ມີສະຕິຕໍ່ການຈັດຕັ້ງ ເພື່ອປະຕິບັດມະຕິ ກອງປະຊຸມໃຫຍ່ຂອງອົງຄະນະພັກ ຄະນະພົວພັນຕ່າງ ປະເທດສູນກາງພັກ ຄັ້ງທີ I ໃຫ້ມີຜົນສຳເລັດ ແລະ ກ້າວໄປເຖິງການກະກຽມກອງປະຊຸມໃຫຍ່ 3 ຂັ້ນ ໃຫ້ສຳເລັດ ເພື່ອກ້າວໄປສູ່ການກະກຽມກອງປະຊຸມໃຫຍ່ ຄັ້ງທີ II ຂອງ ອົງຄະນະພັກຄະນະພົວພັນຕ່າງປະເທດສູນກາງພັກ ໃຫ້ສຳເລັດໃນຕໍ່ໜ້ານີ້.
   (ຂ່າວ: ຄຕພ)