ຫົວ​ຂໍ້ : ກະຊວງການຕ່າງປະເທດ ແຂ່ງຂັນກິລາເຕະບານ ເພື່ອສ້າງຂະບວນການຮັບຕ້ອນກອງປະຊຸມ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 19/03/2020 08:56:24 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1691 ຄັ້ງ

  ເມື່ອ​ບໍ່​ດົນ​ຜ່ານ​ມາທີ່​ເດີ່ນ​ບານເຕະ​ເທບ​ປັນຍາ ນະຄອນຫຼວງ​ວຽງ​ຈັນ, ກະຊວງການ​ຕ່າງປະເທດ ໄດ້​ຈັດ​ກິດຈະກຳ​ແຂ່ງຂັນ​ກິລາ​ເຕະບານ​ຊາຍ ຊີງ​ຂັນ​ເລຂາ​ຄະນະພັກ​ກະຊວງ​ການຕ່າງປະເທດ ເພື່ອ​ສ້າງ​ຂະບວນ​ການ​ຂໍ່າ​ນັບ​ຮັບ​ຕ້ອນ​ກອງ​ປະຊຸມ​ໃຫຍ່ 3 ຂັ້ນ ຂອງ​ອົງຄະ​ນະພັກ ກະຊວງ ການ​ຕ່າງປະເທດ ຄັ້ງ​ທີ IV ແລະ ກອງ​ປະຊຸມ​ໃຫຍ່​ຂອງ​ສາມ​ອົງການ​ຈັດ​ຕັ້ງ​ມະຫາຊົນ ກະຊວງ​ການ​ຕ່າງປະເທດ,  ໃຫ້​ກຽດ​ເຂົ້າ​ຮ່ວມ​ຂອງ ທ່ານ ສະເຫຼີມ​ໄຊ ກົມ​ມະ​ສິດ  ເລຂາ​ຄະນະ​ພັກ  ລັດຖະມົນຕີ​ກະຊວງ​ການ​ຕ່າງປະເທດ  ພ້ອມ​ດ້ວຍ​ນັກ​ກິລາເຂົ້າ​ຮ່ວມ.
  ການ​ແຂ່ງຂັນ​ເຕະບານ​ໃນ​ຄັ້ງ​ນີ້ ໄດ້​ດຳເນີນ​ມາ​ຕັ້ງແຕ່​ວັນ​ທີ 24 ກຸມພາ  ທີ່​ຜ່ານ​ມາ ຊຶ່ງ ມີ​ທີມ ນັກ​ກິລາ​ທັງ​ໝົດ ຈຳນວນ 8 ທີມ ຈາກ 17 ກົມ​ພາຍ​ໃນ​ກະຊວງ ໂດຍ​ແຍກ​ເປັນ 2 ສາຍ ຄື: ສາຍ A ແລະ B. ພາຍຫຼັງ​ສຳເລັດ​ການ​ແຂ່ງຂັນ, ທ່ານ ສະເຫຼີມ​ໄຊ ກົມ​ມະ​ສິດ  ກໍ​ໄດ້​ໃຫ້​ກຽດມອບຂັນລາງວັນ​ໃຫ້​ແກ່​ທີ​ມ​ຊະນະ​ເລີດ ຊຶ່ງ​ຜົນ​ຂອງ​ການ​ແຂ່ງຂັນມີ​ດັ່ງນີ້: ທີ 1 ທີ​ມ​ກົມ​ອົງ ການຈັດຕັ້ງ​ສາກົນ + ທີ​ມ​ກົມ​ເອີ​ຣົບ ແລະ ອາ​ເມ​ຣິ​ກາ; ທີ 2 ທີ​ມ​ກົມ​ຈັດ​ຕັ້ງ​ພະນັກງານ + ທີ​ມ​ກົມ​ພົວພັນ​ຄົນ ເຊື້ອ​ຊາດລາວ​ຢູ່​ຕ່າງປະເທດ, ທີ 3  ທີ​ມ​ກົມ​ການ​ຂ່າວ + ທີ​ມ​ກົມ​ອາຊີ+  ປາ​ຊີ​ຟິກ ແລະ ອາ​ຟຣິກາ ແລະ ທີ 4 ທີ​ມ​ຫ້ອງການ+ ທີ​ມ​ຫ້ອງການ​ຄະນະ​ກຳມະການ​ຊາຍ​ແດນ​ແຫ່ງ​ຊາດ + ທີ​ມ​ກົມ​ການ​ເງິນ, 
  ກິດຈະກຳ​ດັ່ງກ່າວ, ນອກຈາກ​ເປັນ​ການ​ສ້າງ​ຂະບວນ​ການ ເພື່ອ​ຂໍ່າ​ນັບ​ຮັບ​ຕ້ອນ​ກອງ​ປະຊຸມໃຫຍ່​ທີ່​ສຳຄັນຂອງ​ກະຊວງ​ການ​ຕ່າງປະເທດ​ແລ້ວ ກໍ​ຍັງ​ເປັນ​ການ​ສ້າງ​ຄວາມ​ສາມັກຄີ ແລະ ຄວາມ​ຮັກແພງຊຶ່ງ​ກັນ ແລະ ກັນ ໃຫ້​ແກ່​ພະນັກງານ​ທັງ​ໝົດ​ພາຍ​ໃນ​ກະ​ຊວງ.  ໃນ​ກິດຈະ​ກໍາ​ດັ່ງກ່າວ ຍັງ​ມີ​ການ​ແຂ່ງຂັນ​ເຕະ​ບານຊາຍ​ມິດຕະພາບ ລະຫວ່າງ ບັນດາ​ຄະນະ​ກົມ ແລະ ພະນັກງານ​ອາວຸໂສ​ອ້ອມ​ຂ້າງກະຊວງ​ການ​ຕ່າງປະເທດ ອີກ​ດ້ວຍ. ການ​ແຂ່ງຂັນ​ກິລາ ເຕະບານ ໃນ​ຄັ້ງ​ນີ້, ແມ່ນ​ດໍາ​ເນີນ​ໄປ​ດ້ວຍ​ບັນຍາກາດ​ແຫ່ງ​ໄມຕີ​ຈິດ​ມິດຕະພາບ, ມີ​ຄວາມ​ຟົດຟື້ນ​ມ່ວນ ຊື່ນ ແລະ ເຕັມ​ໄປ​ດ້ວຍ​ຄວາມ​ໝາຍ​ຄວາມ​ສຳ​ຄັນ.
(ກົມ​ຂ່າວ: ກະຊວງການ​ຕ່າງ ປະເທດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110