ໜັງສືພິມ ປະຊາຊົນ

ບັນຫາຊັບພະຍາກອນນຳ້ເຊື່ອມໂຍງກັບປະຊາກອນໂລກ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 20/03/2020 08:41:27 ຈຳນວນຢ້ຽມຊົມ 1059 ຄັ້ງ

(ເນື່ອງໃນໂອກາດ ວັນນຳ້ໂລກ 22 ມີນາ 2020)

ຮຽບຮຽງໂດຍ: ລຸ້ງດາວ ບຸນມີ

ວັນນຳ້ໂລກ ຫຼື World Water Day ກົງກັບວັນທີ 22 ມີນາຂອງທຸກປີ. ເນື່ອງຈາກອົງການສະຫະປະຊາຊາດ ຫຼື ສປຊ ໄດ້ຄຳນຶງເຖິງບັນຫາການຂາດແຄນນຳ້ ທີ່ທະວີຄວາມຮຸນແຮງຂຶ້ນ ແລະ ອາດກໍ່ໃຫ້ເກີດບັນຫາການຍາດຊີງນຳ້ຂຶ້ນໄດ້ໃນອະນາຄົດ.
ໃນປີ 1992 ສະມັດຊາສະຫະປະຊາຊາດ ໄດ້ປະກາດໃຫ້ວັນທີ 22 ມີນາ ຂອງທຸກປີ ເປັນ “ວັນນຳ້ໂລກ” ແລະ ເພື່ອລະນຶກເຖິງຄວາມສໍາຄັນຂອງນຳ້ ຊຶ່ງເປັນຄວາມສໍາຄັນຂັ້ນພື້ນຖານຂອງສິ່ງທີ່ມີຊີວິດທຸກຊະນິດໃນໂລກ ທັງຍັງເປັນການ ກະຕຸ້ນໃຫ້ເກີດການຕື່ນຕົວໃນມວນມະນຸດ ໃນເລື່ອງການອະນຸລັກຮັກສານຳ້ ແລະ ການພັດທະນາແຫຼ່ງນຳ້ ຕະຫຼອດຮອດດຳເນີນການຕາມຂໍ້ສະ ເໜີແນະນໍາຂອງກອງປະຊຸມ ສປຊ ໃນປີ 1992 ວ່າດ້ວຍສິ່ງ ແວດລ້ອມ ແລະ ການພັດທະ ນາ ຫຼື Agenda 21 ຈັດໂດຍອົງການນຳ້ແຫ່ງ ສປຊ (UN Water) ຊຶ່ງໃນແຕ່ລະປີ ຈະມີໜ່ວຍງານໃນສັງກັດອົງການ ສປຊ ຮັບຜິດຊອບໃນການຮ່ວມຈັດງານ.
ວັນອະນຸລັກນຳ້ໂລກ ມີຈຸດເລີ່ມຕົ້ນຈາກກອງປະຊຸມເລື່ອງສິ່ງແວດລ້ອມ ແລະ ການພັດທະນາແຫ່ງ ສປຊ ທີ່ເມືອງຣິໂອ ເດີ ຈາເນໂຣ ປະເທດເບຣຊິນ ໃນວັນທີ 22 ມີນາ ປີ 1992 ທີ່ມີເນື້ອໃນສຳຄັນ ໂດຍຄຳນຶງເຖິງການໃຊ້ຊັບພະຍາກອນນຳ້ຂອງມະນຸດ ຈຶ່ງມີແນວຄິດທີ່ຈະຈັດກິດຈະກຳທີ່ຈະເປັນແມ່ບົດ ໃຫ້ປະເທດຕ່າງໆທົ່ວໂລກ ໄດ້ເຝົ້າລະວັງຊັບພະຍາກອນນຳ້ ໃນປະເທດຕ່າງໆ ແລະ ໃນວັນດຽວກັນນັ້ນ, ສະມັດຊາ ແຫ່ງ ສປຊ ໄດ້ອອກປະກາດແຈ້ງການ ໃນວັນທີ 22 ມີນາ ຂອງທຸກປີ ເປັນວັນນຳ້ໂລກ World Water Day ຫຼື ວັນອະນຸລັກນຳ້ໂລກ. ໂດຍອົງການ ສປຊ ຈະກຳນົດຫົວຂໍ້ຂອງວັນອະນຸລັກນຳ້ໂລກ ໃນແຕ່ລະປີຈະແຕກຕ່າງກັນ. ເຖິງແມ່ນວ່າ, ການໂຄສະນາໃນວັນນຳ້ໂລກ ຈະບໍ່ສາມາດປະສົບ ຄວາມສຳເລັດໃນການແກ້ບັນ ຫາໄດ້, ແຕ່ການກຳນົດຫົວຂໍ້ຂອງວັນນຳ້ໂລກໃນແຕ່ລະປີ ຖືເປັນການສະທ້ອນໃຫ້ເຫັນເຖິງບັນຫາສຳຄັນ ກ່ຽວກັບຊັບພະຍາກອນນຳ້ ທີ່ເຊື່ອມໂຍງກັບປະຊາກອນໂລກໄດ້ເປັນຢ່າງດີ ເພາະນຳ້ມີຄວາມຈຳເປັນຕໍ່ຮ່າງກາຍຂອງມະນຸດ. ນໍ້າມີຄວາມສຳຄັນຢ່າງຫຼວງ ຫຼາຍ ໂດຍສະເພາະໃຊ້ເຂົ້າໃນການອຸປະໂພກ ແລະ ບໍລິໂພກ, ພຽງແຕ່ເຮົາຂາດນຳ້ໄປໜຶ່ງມື້ ຄວາມຫິວ ແລະ ຄວາມທໍລະ ມານກໍ່ເກີດຂຶ້ນ ແລະ ເຮັດໃຫ້ຄິດເຖິງປະເທດທີ່ປະສົບກັບໄພແຫ້ງແລ້ງ. ຖ້າຫາກບໍ່ມີນຳ້ພຽງມື້ດຽວ ເຮົາຈະຢູ່ໄດ້ ຫຼື ບໍ່. ພຽງເທົ່ານີ້ ກໍຍິ່ງເຫັນຄວາມສຳຄັນຂອງນຳ້ ແຕ່ເຖິງຢ່າງໃດ ກໍຕາມ ປັດຈຸບັນ, ຫຼາຍຄົນຍັງ ໃຊ້ນຳ້ແບບຟຸມເຟືອຍ ໂດຍບໍ່ໄດ້ຄໍານຶງກ່ຽວກັບສະຖານະການຂາດແຄນນຳ້ຈາກໂລກ.
ເຖິງວ່າພື້ນທີ່ 2 ສ່ວນ 3 ຂອງໂລກຈະເປັນນຳ້, ແຕ່ສ່ວນໃຫຍ່ເປັນນຳ້ເຄັມທີ່ພົບໄດ້ໃນທະເລ ແລະ ມະຫາສະໝຸດ, ຄິດສະເລ່ຍ 97,5%. ສ່ວນອີກ 2,5% ເປັນນຳ້ຈືດ ຊຶ່ງສ່ວນ ໃຫຍ່ເປັນນຳ້ກ້ອນບໍລິເວນແອນຕາກຕິກາ ແລະ ກຣີນແລນ ລວມໄປເຖິງນຳ້ໃຕ້ດິນທີ່ບໍ່ສາມາດນຳມາໃຊ້ໄດ້ອີກ. ແຫຼ່ງນຳ້ຈືດທີ່ນຳມາດື່ມ ແລະ ນຳມາໃຊ້ປະໂຫຍດ ຈຶ່ງໄດ້ມາຈາກທະເລສາບ, ອ່າງເກັບນຳ້, ແມ່ນຳ້ ແລະ ຫ້ວຍນຳ້ ຊຶ່ງມີຈຳ ນວນພຽງ 0,26% ຂອງນຳ້ຈືດທີ່ມີຢູ່ທັງໝົດ ແລະ ນຳ້ຈືດໃນປະລິມານດັ່ງກ່າວ ຍັງມີສ່ວນໜຶ່ງທີ່ຢູ່ໃນສະພາບປົນເປື້ອນ ແລະ ມີສານພິດ ຕ້ອງແມ່ນນ້ຳ ມາບຳບັດກ່ອນນຳມາໃຊ້. ໃນປັດຈຸບັນ, ມີປະຊາຊົນເກືອບ 1.400 ລ້ານຄົນໃນທົ່ວໂລກທີ່ຂາດແຄນນຳ້ສະອາດສຳລັບບໍລິໂພກ.
ເນື່ອງໃນໂອກາດວັນນຳ້ ໂລກ ປະຊາຊົນລາວ ກໍຄືພົນ ລະເມືອງທົ່ວໂລກ ຕ່າງກໍຫວັງທີ່ຈະໄດ້ເຫັນແຫຼ່ງນຳ້ຕ່າງໆ ໄດ້ຮັບການປົກປ້ອງ, ໄດ້ເຫັນແຫຼ່ງນຳ້ສະອາດຢູ່ໃນທຸກໆບ່ອນ ແລະ ໄດ້ເຫັນຄວາມອຸດົມສົມບູນຂອງແຫຼ່ງນຳ້ ທີ່ເຕັມໄປດ້ວຍອາຫານ ແລະ ສາ ມາດໃຊ້ປະໂຫຍດ ຈາກແຫຼ່ງນຳ້ຢ່າງເຕັມສ່ວນ. ເຖິງວ່າຄວາມຫວັງເຫຼົ່ານີ້ ເບິ່ງຄືວ່າຈະເປັນໄປບໍ່ໄດ້ທີ່ຈະສາມາດເປັນຈິງ, ແຕ່ຖ້າທຸກຄົນມີຄວາມຫວັງ ແລະ ຊ່ວຍກັນປັບປຸງແກ້ໄຂ, ສິ່ງດັ່ງກ່າວກໍຈະສາມາດບັນລຸຜົນ ແລະ ເກີດຂຶ້ນໄດ້ບໍ່ຍາກ. ການຈັດກິດຈະກໍາຕ່າງໆ ດ້ວຍການອະນຸລັກແຫຼ່ງນຳ້ ແລະ ພັດທະນາແຫຼ່ງນຳ້ ໃຫ້ສາມາດນຳມາໃຊ້ປະໂຫຍດໄດ້ ແລະ ບໍ່ກໍ່ໃຫ້ເກີດມົນລະພິດຕໍ່ແຫຼ່ງນຳ້, ຈະເຮັດໃຫ້ປະຊາຊົນໄດ້ມີນຳ້ທີ່ໃສສະອາດໄວ້ໃຊ້ອຸປະໂພກ ແລະ ບໍລິໂພກ ໂດຍບໍ່ກໍ່ໃຫ້ເກີດອັນຕະລາຍ. ພ້ອມທັງຄວບຄຸມດູແລການໃຊ້ນຳ້ຈາກແຫຼ່ງຕົ້ນນຳ້ໃຫ້ເໝາະສົມ ເພື່ອບໍ່ໃຫ້ເກີດຜົນກະທົບຕໍ່ສຸຂະພາບ ແລະ ປະລິມານການໃຊ້ນຳ້ຢູ່ແຫຼ່ງປາຍນຳ້ ລວມເຖິງການຈັດການກັບປັດໄຈອື່ນໆ ໂດຍເບິ່ງແຍງດູແລປັດໄຈຕ່າງໆ ທີ່ອາດຈະມີຜົນກະທົບຕໍ່ແຫຼ່ງນຳ້ ແລະ ການຈັດການໃຫ້ສອດຄ່ອງກັບສະຖານະການທີ່ເກີດຂຶ້ນຕາມຄວາມເໝາະສົມ. ນຳ້ຈືດ ທີ່ມີຄຸນນະພາບດີ ຈະກາຍເປັນຊັບພະຍາກອນທີ່ຂາດແຄນໃນອະນາຄົດ. ການປ່ຽນແປງສະພາບອາກາດ ສົ່ງຜົນໃຫ້ເກີດຄວາມປ່ຽນແປງຂອງລະດູການໃນບາງພື້ນທີ່ອາດມີຝົນຕົກໜັກ ແລະ ໃນບາງພື້ນທີ່ອາດເກີດຄວາມແຫ້ງແລ້ງ. ການວາງແຜນກ່ຽວກັບການຈັດການນຳ້ໃນຫຼາຍໆພື້ນທີ່ອາດບໍ່ຄືກັນ, ເນື່ອງຈາກມີບັນຫາການປ່ຽນແປງສະພາບອາກາດເຂົ້າມາກ່ຽວຂ້ອງ. ດັ່ງນັ້ນ, ການໃຊ້ນຳ້ໃຫ້ເກີດປະສິດທິພາບສູງສຸດ ຈະເປັນທາງໜຶ່ງທີ່ຈະເຮັດໃຫ້ນຳ້ຕົ້ນທຶນມີພຽງພໍທີ່ຈະໃຊ້ແບບຍືນຍົງ.