ຫົວ​ຂໍ້ : ຊຽງຂວາງ ແລະ ທະຫານເຂດ 4 ສສ ຫວຽດນາມ ກວດກາໂຄງການກໍ່ສ້າງ ໂຮງຮຽນພອນສະຫວັນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 20/03/2020 08:55:34 ຈຳ​ນວນ​ຜູ້​ເຂົ້າ​ຢ້ຽມ​ຊົມ 844 ຄັ້ງ

  ພິທີ​ເຊັນ​ບົດ​ບັນທຶກ​ກວດກາ​ໂຄງການ​ກໍ່ສ້າງ​ໂຮງຮຽນ​ພອນ​ສະຫວັນ​ ຢູ່​ເຂດ​ເທດສະບານ​ໂພນ​ສະຫວັນ ແຂວງ​ຊຽງ​ຂວາງ  ສປປ ລາວ ໄດ້​ສໍາ​ເລັດ 100% ລະຫວ່າງແຂວງ​ຊຽງ​ຂວາງ ແລະ ກອງ​ບັນຊາ​ການທະ ຫານ​ເຂດ 4 ສສ ຫວຽດນາມ ໄດ້​ຈັດ​ຂຶ້ນ​ຫວ່າງ​ແລ້ວນີ້ ທີ່​ໂຮງຮຽນ​ພອນສະຫວັນແຂວງ​ຊຽງ​ຂວາງ, ຕາງໜ້າ​ເຂົ້າ​ຮ່ວມ​ຝ່າຍ​ລາວ ໂດຍ​ແມ່ນ​ທ່ານ ບົວ​ສອນ ສີນວນ​ທອງ ຮອງເຈົ້າແຂວງຊຽງຂວາງ ພ້ອມ​ຄະນະ ແລະ ຕາງໜ້າ​ຝ່າຍ ສສ ຫວຽດນາມ  ໂດຍແມ່ນທ່ານ ພັອ ພິເສດ ຫ​ງວຽນ ຫວຽດ ອ່ຽນ ຫົວໜ້າ​ພະ​ແນ​ກ​ເສດຖະກິດທະຫານ​ເຂດ 4 ກອງທັບ​ປະຊາຊົນ​ຫວຽດນາມ  ພ້ອມ​ຄະນະ ແລະ ພາກສ່ວນ​ທີ່​ກ່ຽວຂ້ອງ​ທັງ​ສອງ​ຝ່າຍ.
  ໂຄງການ​ກໍ່ສ້າງໂຮງຮຽນດັ່ງ​ກ່າວ, ແມ່ນ​ທຶນຊ່ວຍເຫຼືອ​ຂອງ​ລັດຖະບານ ສສ ຫວຽດນາມດ້ວຍ​ມູນ​ຄ່າ 134.767.069.000 ດົງ.  ນອກ​ນັ້ນ,  ຍັງ​ມີ​ທຶນສົມທົບຂອງລັດຖະບານລາວ  2.713.017.000 ດົງ   ຊຶ່ງ​ໄດ້​ເລີ່ມ​ລົງມື​ກໍ່ສ້າງ​ມາ​ ແຕ່​ວັນ​ທີ 3 ກັນຍາ 2018 ໂດຍ​ແມ່ນ​ກຸ່ມ​ບໍລິສັດ​ຮ່ວມມືເສດຖະ ກິດ​ຫວຽດນາມ​ເປັນ​ຜູ້​ຮັບ​ເໝົາ​ກໍ່ສ້າງ ແລະ ໄດ້​ວາງ​ຄາດໝາຍ​ສັນຍາ​ເບື້ອງ​ຕົ້ນຈະໃຫ້ສໍາເລັດ​ການ​ກໍ່ສ້າງ​ໃນ​ວັນ​ທີ 24 ກຸມ ພາ 2021, ຜ່ານ​ການ​ດຳເນີນ​ການ​ກໍ່ສ້າງ​ຕົວ​ຈິງ​ເຫັນວ່າ ສໍາ​ເລັດ​ກ່ອນ​ສັນຍາ 11 ເດືອນ. ໂຮງຮຽນ​ແຫ່ງ​ດັ່ງກ່າວ​ນີ້, ປະ ກອບ​ດ້ວຍ​ຕຶກ​ອາຄານ​ຮຽນ 2 ຫຼັງ 2 ຊັ້ນ, ຕຶກ​ບໍລິຫານ​-​ຄະນະ​ ອໍາ​ນວຍ​ການ​-​ຫ້ອງ​ອ່ານ-​ສະ ໂມສອນຊັ້ນ​ດຽວ 1 ຫຼັງ, ຕຶກ ​ເຮືອນ​ຄົວ​-​ຫ້ອງ​ອາຫານ 1 ຫຼັງ 2 ຊັ້ນ, ຕຶກ​ຫໍ​ພັກ 1 ຫຼັງ 4 ຊັ້ນ ແລະ ຕຶກສະໂມສອນອອກກໍາລັງກາຍ ຊັ້ນ​ດຽວ 1 ຫຼັງ, ແຕ່ລະ​ຕຶກ​ກໍ່​ດ້ວຍ​ເບ​ຕົ່ງ​ເສີມ​ເຫຼັກມຸງ​ດ້ວຍ​ກະເບື້ອງ​ທີ່​ໄດ້​ມາດຕະຖານປະ ກອບ​ດ້ວຍ​ອຸປະກອນໄຟຟ້າ, ນໍ້າ​ປະປາ, ໂຕະ, ຕັ່ງ, ຕູ້, ກະດານ ຄົບ​ຊຸດ ພ້ອມ​ນັ້ນ, ຍັງໄດ້​ຕິດ​ຕັ້ງ​ລະບົບ​ເຕືອນ​ໄພ  ແລະ  ລະບົບ​ປ້ອງ​ກັນ​ອັກຄີ​ໄພ​ຢູ່​ແຕ່​ລະ​ຈຸດ​ຢ່າງ​ຖືກ​ຕ້ອງ. ນອກ​ນັ້ນ, ບັນດາ​ພື້ນຖານ​ໂຄງ​ລ່າງ​ພາຍ​ນອກ​ເຊັ່ນ: ປະຕູ,  ປ້ອມ​ຍາມ,  ກໍາ​ແພງ, ບ່ອນ ​ຈອດ​ລົດ, ຫ້ອງ​ນໍ້າ​ລວມ, ລະບຽງ​ຕໍ່​ລະຫວ່າງ​ບັນດາ​ຕຶກ,  ປູກ​ຫຍ້າ,  ປູກ​ດອກ​ໄມ ້ ແລະ ປູກຕົ້ນ ໄມ້ມາ​ຮອດ​ປັດຈຸບັນໂຄງການ​ ກໍ່ສ້າງ​ທັງ​ໝົດ​ແມ່ນ​ສໍາ​ເລັດ 100%. ດັ່ງນັ້ນ, ຄະນະຜູ້​ແທນ ທັງ​ສອງ​ຝ່າຍ​  ຈຶ່ງ​ໄດ້ລົງນາມ​ເຊັນ​ບົດ​ບັນທຶກ​ຮ່ວມ​ກັນ​ໃນ​ການ​ກວດກາ​ໂຄງການ​ກໍ່ສ້າງ​ໂຮງຮຽນ​ພອນ​ສະຫວັນທີ່​ແຂວງ ຊຽງ​ຂວາງ​ຄັ້ງ​ນີ້ ເພື່ອເປັນຂໍ້ມູນ ​ອ້າງ​ອີງ​ໃຫ້​ແກ່​ຄະ​ນະ​ນໍາ​ສອງ ປະເທດ​ທີ່​ຈະ​ເປີດ​ພິທີ​ມອບ​-​ຮັບ​ເປັນ​ທາງ​ການ  ​ໃນຂັ້ນຕອນຕໍ່​ ໄປ.   
(ຂ່າວ-ພາບ: ຄານ​ສີສະ​ຫວັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110