ຫົວ​ຂໍ້ : ຫວຽດນາມ ຍູ້ແຮງການສົ່ງອອກກຸ້ງ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 23/03/2020 08:44:59 ຈຳ​ນວນ​ຜູ້​ເຂົ້າ​ຢ້ຽມ​ຊົມ 439 ຄັ້ງ

  ວິທະຍຸ​ກະຈາຍສຽງ​ຫວຽດນາມ​ລາຍ​ງານ​ວ່າ: ປີ 2019 ບັນດາ​ຜະລິດ​ຕະ​ພັນ​ກຸ້ງ​ຂອງ​ຫວຽດນາມ ບັນລຸ​ມູນ​ຄ່າ​ສົ່ງ​ອອກ​ເກືອບ 4 ຕື້​ໂດ​ລາ. ໃນ​ນັ້ນ, ເຂດ​ທົ່ງພຽງ​ແມ່​ນໍ້າ​ຂອງ​ທາງ​ພາກ​ໃຕ້​ຫວຽດນາມ ແມ່ນ​ເຂດ​ຈຸດ​ສຸມ​ການ​ລ້ຽງ​ກຸ້ງ​ນ້ຳ​ຈືດ​ປະສົມ​ເຄັມ​ຂອງ​ທົ່ວ​ປະ​ເທດ. ບັນດາ​ແຂວງ​ໃນ​ພາກ​ພື້ນ ພິເສດ ເຂດ​ແຫຼມ ກາ​ເມົາ ພວມ​ພະຍາຍາມ​ສູ້​ຊົນ​ບັນລຸ​ປະລິມານ​ການ​ຜະລິດ​ໃຫ້​ໄດ້​ຫຼາຍ​ກວ່າ 1,1 ລ້ານ​ໂຕນ ແລະ ວົງ​ເງິນ​ການ​ສົ່ງ​ອອກ​ໃຫ້​ບັນລຸ 10 ຕື້​ໂດ​ລາ, ໃນ​ປີ 2025.
  ທ່ານ ເຢືອງ​ແທ່ງ​ຈູງ ປະທານ​ຄະນະ​ກຳມະການ​ປະຊາຊົນ ແຂວງ ບາກ​ລຽວ ໃຫ້​ຮູ້​ວ່າ: ນອກຈາກ​ເອົາໃຈໃສ່​ການ​ລ້ຽງ​ກຸ້ງ​ຕາມ​ທິດ​ຮ່ວມ​ສຳ ພັນ ​ລະບົບ​ມູນ​ຄ່າ​ເພີ່ມ, ທາງ​ແຂວງ ໄດ້​ເລີ່ມ​ກໍ່ສ້າງ​ເຂດ​ກະ​ສິ​ກໍາ​ໝູນ​ໃຊ້​ເຕັກ​ໂນ​ໂລ​ຊີ​ສູງ ສຳລັບ​ຂະແໜງ​ກຸ້ງ ໃນ​ເນື້ອທີ່ 418 ເຮັກຕາ ດ້ວຍ​ຍອດ​ຈຳນວນ​ເງິນ​ລົງທຶນ​ປະມານ 1.000 ຕື້​ດົງ (ສະກຸນ​ເງິນ​ດົງ​ຫວຽດນາມ). ເຄື່ອງໝາຍ ກຸ້ງ ຫວຽດນາມ ໄດ້​ຮັບ​ການ​ຮັບຮອງ​ຈາກ​ຫຼາຍ​ປະເທດ​ໃນ​ໂລກ. ປັດຈຸບັນ, ຜະລິດ​ຕະ​ພັນ​ກຸ້ງ ຫວຽດນາມ ໄດ້​ສົ່ງ​ອອກ​ເກືອບ 80 ປະເທດ ແລະ ເຂດ​ແຄວ້ນ, ໄດ້​ປະກອບສ່ວນ​ເຂົ້າ​ວົງ​ເງິນ​ສົ່ງ​ອອກ​ປະມານ 4 ຕື້​ໂດ​ລາ​ຕໍ່​ປີ. ເຖິງ​ຢ່າງໃດ​ກໍ​ຕາມ ໄລຍະ​ຜ່ານ​ມາ, ຕະຫຼາດ​ສົ່ງ​ອອກ ຍັງ​ປະສົບ​ກັບ​ຄວາມ​ຫຍຸ້ງຍາກ​ຫຼາຍ​ຢ່າງ ຊຶ່ງ​ຄວນ​ໄດ້​ຮັບ​ການ​ແກ້​ໄຂ.
  ຂະນະ​ດຽວ​ກັນ, ທ່ານ ຫ​ງວຽນ​ຫວຽດ​ຈູງ ຫົວຫນ້າ​ຫ້ອງການ​ການ​ຄ້າ - ພະ​ແນ​ກ​ອຸດ​ສາ​ຫະ​ກໍາ​ການ​ຄ້າ ແຂວງ​ກາ​ເມົາ ຊຶ່ງ​ເປັນ​ແຂວງ​ທີ່​ມີ​ເນື້ອທີ່​ລ້ຽງ​ກຸ້ງ​ຫຼາຍ​ທີ່​ສຸດ​ຂອງ​ຫວຽດນາມ ກ່າວ​ວ່າ: ຮົ້ວ​ກີດ​ກັ້ນ​ດ້ານ​ເຕັກນິກ​ຂອງ​ຕະຫຼາດ​ບັນດາ​ປະເທດ​ນັບ​ມື້​ນັບ​ສູງ. ໃນ​ຂະນະ​ນັ້ນ, ສິນ​ທະເລ​ຂອງ​ຫວຽດນາມ ຖືກ​ບັດ​ເຫຼືອງ​ຈາກ ເອີ​ຣົບ ແລະ ສິນຄ້າ​ປະເພດ​ກຸ້ງ​ກໍຖືກ​ຜົນ​ກະທົບ​ເຊັ່ນ​ກັນ ຊຶ່ງ​ຖືກ​ກວດກາ​ຢ່າງ​ເຄັ່ງ​ຄັດ​ກວ່າ. ເຖິງ​ຢ່າງໃດ​ກໍ​ຕາມ, ໃນ​ໄລຍະ​ຈະ​ມາ​ເຖິງຂະແໜງ​ກຸ້ງ​ຂອງ​ແຂວງ​ກາ​ເມົາ ເວົ້າ​ສະເພາະ ແລະ ຫວຽດນາມ ເວົ້າ​ລວມ ຈະ​ພັດທະນາ​ຫຼາຍ​ກວ່າ​ເກົ່າ ຍ້ອນ​ມີ​ການ​ປ່ຽນແປງ​ຢ່າງ​ຕັ້ງໜ້າ​ຂອງ​ບັນດາ​ວິ​ສາ​ຫະ​ກິດ​ໃນ​ການ​ລ້ຽງ​-​ປູກ, ປຸງ​ແຕ່ງ ຈະ​ສ້າງ​ຕະຫຼາດ​ສົ່ງ​ອອກ​ໃຫ້​ຍືນ​ຍົງ​ໃນ​ອະ​ນາ​ຄົດ. ຄຽງ​ຄູ່​ກັບ​ບັນດາ​ຕະຫຼາດ​ເດີມ​ຄື: ອາ​ເມ​ຣິ​ກາ, ຈີນ, ຍີ່ປຸ່ນ, ສ.ເກົາຫຼີ ແລ້ວ, ບັນດາ​ວິ​ສາ​ຫະ​ກິດ ກໍໄດ້​ເປີດ​ກວ້າງ​ຕະຫຼາດ​ສົ່ງ​ອອກ​ໄປ​ຍັງ ຣັດ​ເຊຍ, ອັງກິດ ລວມ​ທັງ​ຕະຫຼາດ​ພາຍ​ໃນ​ປະ​ເທດ. 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110