ຫົວ​ຂໍ້ : ເມືອງສະໜາມໄຊ ປະກາດຈົບຊັ້ນ ມ ຕົ້ນ ບຳລຸງ ສຳລັບປະຊາຊົນ

ເຜີຍ​ແຜ່​ໂດຍ​: admin ເວ​ລາ: 25/12/2019 16:26:55 ຈຳ​ນວນ​ຜູ້​ເຂົ້າ​ຢ້ຽມ​ຊົມ 386 ຄັ້ງ

ເມືອງສະໜາມ​ໄຊ ແຂວງ​ ອັດ​ຕະ​ປື ໄດ້​ປະກາດຈົບ​ຊັ້ນ​ ມັດທະຍົມ​ສຶກສາ​ຕອນຕົ້ນ (ມ.ຕົ້ນ) ບຳລຸງ​ສຳລັບ​ປະຊາ ຊົນ, ພາຍ​ຫຼັງ​ທີ່​ໄດ້​ດຳເນີນ​ການຮຽນ​-​ການ​ສອນ​ບຳລຸງ​ຍົກ​ລະ ດັບ​ການ​ສຶກສາ​ຂັ້ນ​ພື້ນຖານ​ຊັ້ນ​ມັດທະຍົມ​ຕອນ​ຕົ້ນ​ໃຫ້​ກັບ​ປະຊາຊົນ​ບັນດາເຜົ່າ ໃນ​ເກນ​ອາຍຸ 15-30 ປີ ທົ່ວ​ເມືອງສະ ໜາມ​ໄຊ ແລະ ຜ່ານ​ການ​ປະ​ເມີນ​ສາມາດ​ບັນລຸ​ໄດ້​ຕາມຄາດ ໝາຍ ແລະ ມາດຖານ ທີ່​ກະຊວງ​ສຶກສາ​ທິ​ການ ແລະ ກິລາ ໄດ້​ກຳນົດ​ໃຫ້.
    ພິທີ​ປະກາດ​ຈົບ​ຊັ້ນ ມ.ຕົ້ນ ບຳລຸງ​ສຳລັບ​ປະຊາຊົນຂອງ​ເມືອງ​ສະໜາມ​ໄຊ ໄດ້​ຈັດ​ຂຶ້ນ​ໃນ​ວັນ​ທີ 12  ທັນວາ​ຜ່ານ​ມາ​ທີ່​ ໂຮງຮຽນ ມສ ສະໜາມ​ໄຊ ເມືອງ ​ດັ່ງກ່າວ ໂດຍ​ການ​ເຂົ້າຮ່ວມ ແລະ ມອບ​ໃບຢັ້ງຢືນຂອງ​ທ່ານ ພຸດ ສິມ​ມາ​ລາວົງ ຮອງ​ລັດຖະ ມົນຕີ​ກະຊວງ​ສຶກສາທິການ ແລະ ກິລາ ແລະ ກ່າວ​ຮັບໂດຍທ່ານ ບຸນ​ໂຮມ ພົມ​ມະສານ ເລຂາ​ພັກ​ເມືອງ ເຈົ້າເມືອງ ສະໜາມ​ໄຊ, ມີ​ທ່ານ ອຸ່ນ​ຫຼ້າ ໄຊ​ຍະ​ສິດ ຮອງ​ເຈົ້າແຂວງ​ອັດ​ຕະ​ປື.
    ໃນ​ໂອກາດ​ນີ້ ທ່ານ ທອງ​ໄຊ ບຸດ​ທອງ​ດີ ຫົວໜ້າ​ຫ້ອງການ​ສຶກສາ​ທິ​ການ ແລະ ກິລາ ເມືອງ​ສະໜາມ​ໄຊ ໄດ້​ໃຫ້​ຮູ້​ວ່າ: ເມືອງ​ສະໜາມ​ໄຊ ແມ່ນ​ເມືອງ​ໜຶ່ງ ໃນ​ບັນດາ 5 ເມືອງ ຂອງ​ແຂວງ​ອັດ​ຕະ​ປື ທີ່​ສາມາດ​ປະກາດ​ເປັນ​ເມືອງ ຈົບ​ຊັ້ນ ມ.ຕົ້ນ​ບຳລຸງ​ສຳລັບ​ປະຊາຊົນ ເປັນ​ເມືອງ​ທີ 4 ຖັດ​ຈາກເມືອງ​ພູ​ວົງ; ເມືອງ ສະໜາມ​ໄຊ ມີ 40 ບ້ານ, ມີ​ໂຮງຮຽນ​ອະນຸບານ​ທັງ​ໝົດ 3 ແຫ່ງ, ໂຮງຮຽນ​ປະຖົມ​ສຶກສາ 47 ແຫ່ງ, ໂຮງຮຽນ ມັດ​ທະ​ຍົມ​ສຶກສາ 8 ແຫ່ງ. ໃນ​ນັ້ນ, ມັດທະຍົມ​ສົມບູນ 2 ແຫ່ງ, ມີ​ປະຊາກອນ​ທັງ​ໝົດ 36.674 ຄົນ, ຍິງ 18.212 ຄົນ, ປະກອບ​ມີ 8 ຊົນເຜົ່າ ຄື: ເຜົ່າ ຢຣຸ, ເຈັງ, ເບ​ຣົາ, ຍະ​ເຫີນ, ຕະ​ຫຽງ, ໂອຍ, ຕະ​ໂອ້ຍ ແລະ ລາວ​ລຸ່ມ. 
    ໃນ​ພິທີໄດ້​ມອບ​ໃບຢັ້ງຢືນ ເມືອງ​ສະໜາມ​ໄຊ ເປັນ​ເມືອງ​ຈົບ​ຊັ້ນ​ມັດທະຍົມ​ຕອນ​ຕົ້ນ​ບຳລຸງ​ສຳລັບ​ປະຊາ​ຊົນ ຂອງ​ກະຊວງ​ສຶກສາ​ທິ​ການ ແລະ ກິລາ, ມອບ​ໃບ​ຍ້ອງຍໍ ຂອງ​ທ່ານ ເຈົ້າແຂວງ, ທ່ານເຈົ້າເມືອງ ແລະ ຂອງຂວັນ​ຕ່າງໆ, ໃຫ້​ຜູ້​ທີ່​ມີ​ຜົນງານ​ດີເດັ່ນ​ປະກອບສ່ວນ​ເຫື່ອ​ແຮງ ແລະ ສະຕິປັນຍາ ເຂົ້າ​ໃນ​ການ​ພັດທະນາ​ການ​ສຶກສາ ຢ່າງ​ຕັ້ງ​ໝ້າຢ່າງ​ສົມ​ກຽດ ແລະ ໃນ​ຕອນ​ທ້າຍ​ພິທີ ທ່ານ ພຸດ ສິມ​ມ​າ​ລາ​ວົງ ແລະ ທ່ານ ອຸ່ນ​ຫຼ້າ ໄຊ​ຍະ​ສິດ ກໍໄດ້​ຮ່ວມ​ເປີດ​ປ້າຍ ເມືອງ​ສະໜາມ​ໄຊ ເປັນ​ເມືອງ​ຈົບ​ຊັ້ນ ມັດທະຍົມ​ຕອນ​ຕົ້ນ​ບຳລຸງ​ສຳລັບ​ປະຊາຊົນ  ແລະ ຕີ​ຄ້ອງ 9 ບາດ ເປັນ​ການ​ປະກາດ ແລະ ຢັ້ງຢືນ​ຜົນສຳເລັດ​ດັ່ງກ່າວ ໃຫ້ ສັງຄົມ​ຮັບ​ຮູ້​ຢ່າງ​ກວ້າງ​ຂວາງ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ສຳນັກງານເລກທີ66 ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110