ຫົວ​ຂໍ້ : ເປີດກອງປະຊຸມຄົບຄະນະບໍລິຫານງານ ສນຫລ

ເຜີຍ​ແຜ່​ໂດຍ​: admin ເວ​ລາ: 08/01/2020 08:37:51 ຈຳ​ນວນ​ຜູ້​ເຂົ້າ​ຢ້ຽມ​ຊົມ 2087 ຄັ້ງ

       ກອງ​ປະຊຸມ​ສະໄໝ​ສາ ມັນ​ຄົບ​ຄະນະ​ບໍລິຫານ​ງານ​ສະຫະພັນ​ນັກຮົບ​ເກົ່າ​ແຫ່ງ​ຊາດ​ລາວ (ສນຫລ) ຄັ້ງ​ທີ 5 ສະໄໝ​ທີ III ໄດ້​ຈັດ​ຂຶ້ນ​ໃນ​ວັນ​ທີ 7 ມັງກອນ​ນີ້  ທີ່​ໂຮງແຮມ​ແສງ​ແກ້ວ  ນະຄອນຫຼວງ​ວຽງ​ຈັນ  ໂດຍ​ເປັນ​ກຽດ​ເຂົ້າ​ຮ່ວມ​ເປັນ​ປະທານ​ຂອງ​ທ່ານ ​ບຸນ​ຍັງ​ວໍລະ​ຈິດ  ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ   ປະທານປະເທດ​ ແຫ່ງ ສປປ​ລາວ, ທ່ານ  ພົນ​ຈັດຕະວາ   ສົມ​ພອນ  ແກ້ວ​ມີ​ໄຊ ເລຂາ​ພັກ ປະ ທານສະຫະພັນ​ນັກຮົບ​ເກົ່າ​ແຫ່ງ​ຊາດ​ລາວ,  ມີ​ຄະນະ​ບໍລິຫານ​ງານ  ສນຫລ  ແລະ ແຂກ​ຖືກ​ເຊີນ​ ເຂົ້າ​ຮ່ວມ.
    ທ່ານ ພົນ​ຈັດຕະວາ ຄຳ​ຫອມ  ແສງ​ບົວ​ລົມ  ຮອງ​ປະທານ ສນຫລ ໄດ້​ຜ່ານ​ບົດ​ສະຫຼຸບ​ການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ສະໄໝ​ສາມັນ​ຄົບ​ຄະນະ​ບໍລິຫານ​ງານ​ສະຫະພັນ​ນັກຮົບ​ເກົ່າ​ແຫ່ງ​ຊາດ​ລາວ​ ຄັ້ງ​ທີ 4 ສະ ໄໝ​ທີ III ແລະ ທິດ​ທາງ​ວຽກ​ງານ​ປີ 2020 ໃນ​ການຈັດຕັ້ງ​ປະຕິບັດ​ທ່ານໄດ້​ຍົກ​ໃຫ້​ເຫັນ​ຜົນງານ​ອັນ​ພົ້ນ​ເດັ່ນ​ຫຼາຍ​ດ້ານ​ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ  ໄດ້​ເອົາໃຈໃສ່​ຕິດຕາມກວດ ກາ ແລະ ຂະບວນ​ການ​ແຂ່ງຂັນ 3 ດີ 6 ຮັກສາ ຕິດ​ພັນກັບການ​ ແຂ່ງຂັນ​ຮັກ​ຊາດ ແລະ ພັດທະ ນາມາ​ຮອດ​ປັດຈຸບັນສາມາດ​ ຄັດ​ເລືອກ ແລະ ມອບໃບຢັ້ງ ຢືນ 3 ດີ 6 ຮັກສາ​ໃຫ້​ບຸກຄົນ ​ໄດ້ 6.209 ຄົນ ແລະ ກົມ​ກອງ ​ລວມ​ໝູ່ 361 ກົມ​ກອງ. ສະຫະພັນ​ນັກຮົບ​ເກົ່າ​ແຕ່​ລະ​ຂັ້ນ​ໄດ້​ຖື​ສຳຄັນ ແລະ ເອົາໃຈໃສ່ປັບປຸງການ ຈັດຕັ້ງກໍ່ສ້າງ​ພັກໃຫ້​ປອດ​ໃສ​ເຂັ້ມແຂງ​ໜັກແໜ້ນ,  ກໍ່ສ້າງ​ພະນັກງານ ແລະ ປະຕິບັດນະ ໂຍບາຍ​ຕໍ່​ພະນັກງານ​ອາວຸໂສ ກໍຄື​ພະນັກງານ​ລັດຖະກອນ​ໄດ້​ດີ  ໃນ​ທົ່ວ​ປະເທດ​ມີ​ຄະນະ​ບໍລິຫານ​ງານ​ຂັ້ນ​ແຂວງ  221 ຄົນ. ມີ​ຄະນະ​ບໍລິຫານ​ງານ​ຂັ້ນ​ເມືອງ​ມີ 1.507 ຄົນ ແລະ ຄະນະ​ໜ່ວຍ​ຮາກ​ຖານ​ມີ 3.407 ຄົນ ທົ່ວ​ປະເທດ​ມີ​ສະ​ມາ​ຊິກ​ນັກຮົບ​ເກົ່າ 59.736 ຄົນ.
     ໃນ​ໂອກາດ​ນີ້  ທ່ານ  ບຸນຍັງ​ ວໍລະ​ຈິດ  ໄດ້​ໃຫ້​ກຽດ​ໂອ້​ລົມ​ຊີ້​ນຳ​ຕໍ່​ຜູ້​ແທນ​ກອງ​ປະຊຸມ  ​ຊຶ່ງ​ກ່ອນ​ອື່ນ​ໝົດ​ທ່ານ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ​ຜົນສຳເລັດ​ທີ່  ສນຫລ  ຍາດມາ ​ໄດ້​ໃນ​ໄລຍະ​ຜ່ານ​ມາ​ ແລະ ໄດ້​ ມີ​ຄຳ​ເຫັນ​ຊີ້​ນຳ​ໃຫ້ຄະນະ​ບໍລິ ຫານ​ງານສະຫະພັນ​ນັກຮົບ​ເກົ່າ​ແຫ່ງ​ຊາດ​ລາວ​ເອົາໃຈໃສ່ຄື: 1/. ຄະນະ​ພັກ ຄະນະ​ບໍລິຫານ ​ງານ​ສະຫະພັນ​ນັກຮົບ​ເກົ່າ​ແຕ່​ລະ​ຂັ້ນເອົາໃຈໃສ່​ຄົ້ນ​ຄວ້າຮູບ​ ແບບ​ການ​ໂຄສະ​ນາ​ສຶກສາອົບ ຮົມ​ການ​ເມືອງ​-​ແນວ​ຄິດຕໍ່​ສະ ມາຊິກ​ນັກຮົບ​ເກົ່າ​ໃຫ້ແທດ ເໝາະ ແລະ ສອດຄ່ອງ​ແຕ່​ລະ​ເປົ້າ​ໝາຍ ໃນ​ແຕ່​ລະ​ໄລຍະ​ເພື່ອ​ໃຫ້​ເຂົາເຈົ້າ​ກຳ​ໄດ້  ແລະ ເຂົ້າ​ຮ່ວມ​ການຈັດຕັ້ງ​ປະຕິບັດ​ຕົວ​ຈິງ,  2/. ຄະນະ​ພັກ ຄະນະ​ບໍລິຫານ​ງານ​ສະຫະພັນນັກຮົບ ​ເກົ່າ​ແຕ່​ລະ​ຂັ້ນ ຕ້ອງ​ເພີ່ມທະ ວີ​ ໃນ​ການ​ຫັນ​ລົງ​ຮາກ​ຖານ ເພື່ອ​ຕິດຕາມ​ກວດກາ ກຳ​ແໜ້ນ ສະພາບ​ການ ແນວ​ຄິດ ແລະ ​ຮັບ​ຟັງ​ຄວາມ​ຄິດ​ເຫັນ​ຂອງ​ສະມາຊິກ ແລະ ​ຊັ້ນ​ຄົນ ​ໃນ​ສັງຄົມ​ຕໍ່​ການ​ນຳພາ​ຂອງ​ພັກການ​ຄຸ້ມ​ຄອງ​ຂອງ​ລັດ. 3/. ປັບປຸງ​ເນື້ອ​ໃນ​ ແລະ ​ຮູບ​ແບບ​ເຄື່ອນ​ໄຫວ​ນຳພາ ເຮັດ​ແນວໃດ​ໃຫ້​ສອດຄ່ອງ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ໜ້າທີ່​ການເມືອງ​ໃນ​ໄລຍະ​ໃໝ່ ເພື່ອ​ຍົກ​ສູງ​ບົດບາດ ແລະ​ ໜ້າທີ່​ຂອງ​ສະຫະພັນ​ນັກຮົບ​ເກົ່າ ທັງ​ຮັບປະກັນ​ການເຄື່ອນໄຫວ​ວຽກ​ງານ​ລວມ​ສູນ​ປະຊາທິປະໄຕ ຄວາມ​ເປັນ​ແບບຢ່າງ​ນຳພາ​ມະຫາຊົນ ແລະ​ສັງ​ຄົມ. ແລະ​ເອົາໃຈໃສ່​ປະສານ​ສົມທົບ​ແໜ້ນ​ກັບ​ບັນດາ​ກະຊວງ ອົງ ການຂັ້ນ​ສູນ​ກາງ​ກໍຄື​ອົງການ​ປົກຄອງ​ທ້ອງ​ຖິ່ນ ​ເພື່ອ​ເຮັດ​ໜ້າ​ທີ່​ໃນ​ການ​ຄຸ້ມ​ຄອງ ເບິ່ງ​ແຍງ​ດູແລ​  ແລະ ​ ປະຕິບັດ​ນະໂຍ ບາຍ​ຕໍ່​ສະມາຊິກ​ນັກຮົບ​ເກົ່າ ນັກຮົບ​ກໍຄື​ພະນັກງານ​ປະຕິວັດ​ອາວຸໂສ​ໃຫ້​ດີ.
     ກອງ​ປະຊຸມ​ຄັ້ງ​ນີ້​ຈະ​ໄດ້​ດຳເນີນ​ໄປ​ເປັນ​ເວລາ 3 ວັນ (ວັນ​ທີ 7-10 ມັງກອນ) ຊຶ່ງ​ຜູ້​ແທນ​ກອງ​ປະຊຸມ​ຈະ​ໄດ້​ຮັບ​ຟັງ​ການ​ສະເໜີການ​ປະກອບ​ຄຳ​ເຫັນ​ຂອງ​ຜູ້​ຕາງ​ໜ້າ​ພາກສ່ວນ​ຕ່າງໆ ​ແລະ​ ຕາງ​ໜ້າ​ສະຫະພັນ​ນັກຮົບ​ເກົ່າ​ຂອງ​ແຕ່​ລະ​ແຂວງ.
(ຂ່າວ​-​ພາບ: ມະ​ລິ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110