ຫົວ​ຂໍ້ : ອຸທົກກະໄພ ອິນໂດເນເຊຍ ເສຍຫາຍ 71,91 ລ້ານໂດລາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 08/01/2020 09:14:23 ຈຳ​ນວນ​ຜູ້​ເຂົ້າ​ຢ້ຽມ​ຊົມ 154 ຄັ້ງ

   ຮຽບຮຽງ​ໂດຍ: ວິ​ໄ​ລພ​ອນ

   ຂ່າວ​ຕ່າງປະເທດ​ລາຍ​ງານ, ສະມາຄົມ​ການ​ຄ້າ​ຍ່ອຍ​ຂອງ​ອິນ​ໂດ​ເນ​ເຊຍ ລາຍ​ງານ​ໃນ​ວັນ​ທີ 4 ມັງກອນ​ຜ່ານ​ມາ​ວ່າ: ຕາມ​ການ​ປະ​ເມີນ​ຄວາມ​ສູນ​ເສຍ​ລາຍ​ໄດ້​ຈາກ​ພາກ​ທຸລະ​ກິດ​ການ​ຄ້າ​ຍ່ອຍ​ສູງ​ເຖິງ 71,91 ລ້ານ​ໂດ​ລາ ຈາກ​ເຫດການ​ອຸ​ທົກ​ກະ​ໄພ​ຄັ້ງ​ໃຫຍ່​ໃນ​ນະຄອນຫຼວງ​ຈາ​ກາ​ຕາ ເປັນ​ສາເຫດ​ໃຫ້​ບັນດາ​ຮ້ານ​ຄ້າຂາຍ​ຍ່ອຍ​ໃນ​ພື້ນ​ທີ່​ຕ່າງໆ​ຕ້ອງ​ພາກັນ​ປິດ​ຮ້ານ​ເພາະ​ນ້ຳ​ຖ້ວມ.
ທ່ານ ລອຍ ແມນ​ເດ ປະ ທານ​ສະມາຄົມ​ການ​ຄ້າຂາຍ​ຍ່ອຍ​ຂອງ​ອິນ​ໂດ​ເນ​ເຊຍ ກ່າວ​ວ່າ: ປີ​ນີ້​ເກີດ​ເຫດການ​ນ້ຳ​ຖ້ວມ​ໃຫຍ່​ໃນ​ນະຄອນຫຼວງ​ຈາ​ກາ​ຕາ ແລະ ພື້ນ​ທີ່​ໃກ້​ຄຽງ ເຮັດ​ໃຫ້​ຮ້ານ​ສັບພະ​ສິນຄ້າ, ຕະຫຼາດ ແລະ ຮ້ານ​ຄ້າ​ຕ່າງໆ​ຕັ້ງ​ຢູ່​ທົ່ວ​ເມືອງ​ປະມານ  400 ແຫ່ງ ຕ້ອງ​ປິດ​ຮ້ານ​ຍ້ອນ​ຖືກ​ນ້ຳ​ຖ້ວມ. ສະ ເພາະ​ໃນ​ນະຄອນຫຼວງ​ຈາ​ກາ​ ຕາມີ​ຮ້ານ​ຄ້າຂາຍ​ຍ່ອຍ​ປະ ມານ 300 ແຫ່ງ ຕ່າງ​ກໍ​ພາກັນ​ປິດ​ຮ້ານ ຊຶ່ງ​ຄາດ​ວ່າ​ມີ​ການ​ສູນ​ເສຍ​ລາຍ​ໄດ້​ປະມານ 960 ລ້ານ​ຣູ​ເປຍ (ສະກຸນ​ເງິນ​ຣູ​ເປຍ​ອິນ​ໂດ​ເນ​ເຊຍ). ຄວາມ​ເສຍ​ຫາຍ​ດັ່ງກ່າວ ຍັງ​ບໍ່​ລວມ​ຮ້ານ​ສັບພະ​ສິນຄ້າ 10 ແຫ່ງ ແລະ ບັນດາ​ຕະຫຼາດ​ຕ່າງໆ ທີ່​ຕັ້ງ​ຢູ່​ທົ່ວ​ທຸກ​ພື້ນ​ທີ່​ໃນ​ນະຄອນຫຼວງ​ຈາ​ກາ​ຕາ. ທ່ານ ລອຍ ແມນ​ເດ ກ່າວ​ຕື່ມ​ວ່າ: ເຫດ​ອຸ​ທົກ​ກະ​ໄພ​ຄັ້ງ​ນີ້, ສົ່ງ​ຜົນ​ຕໍ່​ການ​ໃຊ້​ຈ່າຍ​ໃນ​ພາກ​ຄົວ​ເຮືອນ ຊຶ່ງ​ເປັນ​ປັດ​ໄຈ​ສຳຄັນ​ຕໍ່​ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP). ດັ່ງນັ້ນ ຈຶ່ງ​ຫວັງ​ວ່າ: ກຸ່ມ​ຜູ້​ບໍລິຫານ​ຈະ​ໃຫ້​ຄວາມ​ສໍາ​ຄັນ​ກັບ​ເລື່ອງ​ນີ້​ຫຼາຍ​ກວ່າ​ເກົ່າ ພ້ອມ​ທັງ​ຮຽກຮ້ອງ​ໃຫ້​ເຈົ້າ​ຄອງ​ນະຄອນຫຼວງ​ຈາ​ກາ​ຕາ ແລະ ຄະນະ​ຜູ້​ບໍລິຫານ​ກຽມ​ແຜນ​ສຸກ​ເສີນ​ຮັບ​ມື​ກັບ​ໄພ​ນ້ຳ​ຖ້ວມ​ໃຫ້​ດີກ​ວ່າ​ນີ້ ແລະ ຫວັງ​ວ່າ: ເຫດການ​ໂສກ​ນາດຕະກຳ​ຄັ້ງ​ນີ້ ຈະ​ເປັນ​ບົດຮຽນ​ຄັ້ງ​ສຳຄັນ​ຕໍ່​ການ​ຮັບ​ມື​ຄັ້ງ​ຕໍ່​ໄປ. 
ປະລິມານ​ນ້ຳ​ຝົນ​ທີ່​ຕົກ​ໜັກ​ຕັ້ງແຕ່​ຕົ້ນ​ອາທິດ​ທີ່​ຜ່ານ​ມາ ກໍໃຫ້ເກີດ​ນ້ຳ​ຖ້ວມ​ໃຫຍ່​ໃນ​ຫຼາຍ​ພື້ນ​ທີ່​ຂອງ​ນະຄອນຫຼວງ​ຈາ​ກາ​ຕາ. ສຳນັກງານ​ອຸຕຸນິຍົມ​ວິທະຍາ, ພູມີອາກາດ​ວິທະຍາ ແລະ ທໍລະນີ​ຟີ​ຊິກ​ຂອງ ອິນ​ໂດ​ເນ​ເຊຍ ໄດ້​​ບັນ​ທຶກ​ປະລິມານ​ນ້ຳ​ຝົນ​ສະ​ສົມ​ສູງ​ສຸດ​ໃນ​ວັນ​ສົ່ງ​ທ້າຍ​ປີ​ເກົ່າ​ຕ້ອນຮັບ​ປີ​ໃໝ່ ຊຶ່ງ​ມີ​ລະດັບ​ສູງ​ເຖິງ 377 ມິນ​ລີ​ແມັດ​ຕໍ່​ວັນ ຖື​ວ່າ​ຮ້າຍ​ແຮງ​ທີ່​ສຸດ​ໃນ​ຮອບ​ທົດ​ສະ​ວັດ. ການ​ປ່ຽນແປງ​ຂອງ​ສະພາບ​ດິນ​ຟ້າ​ອາກາດ​ໄດ້​ເພີ່ມ​ຄວາມ​ສ່ຽງ​ໃຫ້​ເກີດ​ໄພພິບັດ​ທາງ​ທຳ​ມະ​ຊາດ​ທີ່​ຮຸນ​ແຮງ​ຫຼາຍ​ຂຶ້ນ. ໃນ​ບົດ​ລາຍ​ງານ​ພະຍາກອນ​ອາກາດ​ຊີ້​ໃຫ້​ເຫັນ​ວ່າ: ນະຄອນຫຼວງ​ຈາ​ກາ​ຕາ ກໍາ​ລັງ​ປະ​ເຊີນ​ກັບ​ສະຖານະ​ການ​ຝົນຕົກ​ໜັກ​ໃນ​ໄລຍະ​ນີ້ ແລະ ສະຖານະ​ການ​ຝົນຕົກ​ໜັກ​ຈະ​ຕໍ່​ເນື່ອງ​ໄປ​ເຖິງ​ເດືອນ​ກຸມ​ພາ.
       ຂະນະ​ດຽວ​ກັນ, ສຳນັກ ງານ​ບັນເທົາ​ໄພພິບັດ​ແຫ່ງ​ຊາດ ອິນ​ໂດ​ເນ​ເຊຍ ໄດ້​ເປີດ​ໃຫ້​ປະຊາຊົນ​ໃນ​ນະຄອນຫຼວງ​ຈາ​ກາ​ຕາ ຕິດຕາມ​ສະຖານະ​ການ​ນ້ຳ​ຖ້ວມ​ຫຼ້າ​ສຸດ​ໄດ້​ຜ່ານເວັ​ບ​ໄຊ  PetaBencana.id  ຊຶ່ງຈະ​ສະແດງ​ແຜນທີ່​ແຈ້ງ​ເຕືອນ​ພື້ນ​ທີ່​ນ້ຳ​ຖ້ວມ ແລະ ພື້ນ​ທີ່​ປອດ​ໄພ ໂດຍ​ມີ​ລະດັບ​ການ​ແຈ້ງ​ເຕືອນ​ພື້ນ​ທີ່​ແຕ່​ລະ​ແຫ່ງ​ຈະ​ແຕກ​ຕ່າງ​ກັນ​ຕາມ​ສີ, ເມື່ອ​ເຂົ້າ​ໄປ​ເບິ່ງ​ຕາມ​ເວັບ​ໄຊ ຈະໃຫ້​ຂໍ້​ມູນ​ຕາມ​ແຕ່​ລະສະ​ຖານ​ທີ່​ສະ ແດງ​ເຖິງ​ລະດັບ​ນ້ຳ ແລະ ອັບ​ເດດ​ສະຖານະ​ການ​ນ້ຳ​ຖ້ວມ​ຫຼ້າ​ສຸດ​ຂອງ​ພື້ນ​ທີ່​ນັ້ນ. ກໍລະນີ​ພື້ນ​ທີ່​ແຈ້ງ​ເຕືອນ​ໄພ​ນ້ຳ​ຖ້ວມ​ສູງ​ຈະ​ສະແດງ​ໃຫ້​ເຫັນເປັນ​ສີ ແດງ ຊຶ່ງ​ໝາຍ​ເຖິງ​ມີ​ລະດັບ​ນ້ຳ​ຖ້ວມ​ໃນ​ພື້ນ​ທີ່​ສູງ​ກວ່າ 150 ຊັງ​ຕີ​ແມັດ, ພື້ນ​ທີ່​ເຕືອນ​ໄພ​ນ້ຳ​ຖ້ວມ​ລະດັບ​ປານ​ກາງ​ສະແດງ​ເປັນ​ສີ​ສົ້ມ ມີ​ລະດັບ​ນ້ຳ​ຖ້ວມ​ສູງ​ລະຫວ່າງ 71-150 ຊັງ​ຕີ​ແມັດ. ຂະນະດຽວ​ກັນ, ພື້ນທີ່​ ທີ່​ສະແດງ​ເປັນ ​ສີຂຽວ​ໝາຍ​ເຖິງ​ປະຊາຊົນຕ້ອງ​ ກຽມພ້ອມ​ສຳລັບ​ມວນ​ນ້ຳ​ທີ່​ອາດ​ຈະ​ກຳລັງ​ໄຫຼ​ເຂົ້າ. ນອກຈາກ​ນີ້, ເວັ​ບໄຊ ຍັງ​ໃຫ້​ຂໍ້​ມູນ​ໃນ​ພື້ນ​ທີ່​ເມືອງ​ອື່ນໆ ທີ່ຢູ່​ໃກ້​ຄຽງ​ລວມ​ເຖິງ​ສຸ​ຣາ​ບາ​ຍາ, ບັນ​ດຸງ ແລະ ເຊ​ມາ​ຣັງ ອີກ​ດ້ວຍ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ສຳນັກງານເລກທີ66 ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110