ຫົວ​ຂໍ້ : ປະກາດ 26 ບ້ານ ເມືອງສາລະວັນ ເປັນບ້ານໜັກແໜ້ນ ເຂັ້ມແຂງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 09/01/2020 10:20:44 ຈຳ​ນວນ​ຜູ້​ເຂົ້າ​ຢ້ຽມ​ຊົມ 564 ຄັ້ງ

ເມືອງ​ສາລະ​ວັນ ແຂວງ​ສາລະ​ວັນ​ໄດ້​ຈັດ​ພິທີ​ປະກາດ 26 ບ້ານ ເປັນ​ບ້ານ​ໜັກ​ແໜ້ນ​ເຂັ້ມແຂງ ຄື: ບ້ານ​ໂພນ​ທັນ, ເລີນ​ສຳພັນ, ຕົ້ງ​ວິໄລ, ນາ​ດອນ​ຂວາງ, ໂຄກ​ໃໝ່, ໝາກ​ນາວ​ໃຫຍ່, ຄັນ​ຈົມ, ສອງ​ຄອນ, ໂຄກ​ເກົ່າ, ແກ້ງ​ເມືອງ​ລາວ, ດົງ​ໜ້ອງ, ນາ​ທານ​ກ້ວຍ, ສະ​ໂປນ, ໂພນ​ຕານ, ກະຊະ​ໃຫຍ່, ສູງ, ໂພນ​ບົກ, ລະ​ວາງ, ນາ​ແພງ​ໃຫຍ່, ຄຽງ​ໂຄ້ງ, ນາ​ຕຶມ, ນາ​ໄຊ​ນ້ອຍ, ດອນ​ຂາວ, ແສນ​ວັງ​ນ້ອຍ, ນາ​ທ່ອນ, ບ້ານ​ແບ່ງ​ອຸດົມ ແລະ ຮັບຮອງ 5 ບ້ານ ເປັນ​ບ້ານ​ວັດທະນະທຳ ຊຶ່ງ​ໄດ້​ຈັດ​ຂຶ້ນ​ໃນ​ວັນ​ທີ 7 ມັງກອນ ທີ່​ບ້ານ​ກະຊະ​ໃຫຍ່ ໂດຍ​ໃຫ້​ກຽດ​ເຂົ້າ​ຮ່ວມ​ເປັນ​ປະທານ​ຂອງ​ທ່ານ ບຸນ​ມາກ ພອນ​ທິບ​ສະ​ຫວັດ ຮອງ​ເລຂາ​ພັກ​ເມືອງ ປະທານ​ກວດກາ​ພັກ​-​ລັດ​ເມືອງ,  ທ່ານ ນາງ ບຸນ​ຖັນ ແກ້ວ​ມາລາ ກຳມະການ​ພັກ​ເມືອງ ຫົວໜ້າ​ຫ້ອງການ​ພາຍ​ໃນ​ເມືອງ ຕະຫຼອດ​ຮອດ​ການຈັດຕັ້ງ​ບ້ານ 26 ບ້ານ​ເຂົ້າ​ຮ່ວມ.
ທ່ານ ແສງ​ສຸລະ​ຈັນ  ພິມ​ມະວັນ ເລຂາ​ໜ່ວຍ​ພັກ​-​ນາຍ ບ້ານ​ກະຊະ​ໃຫຍ່ ຕາງໜ້າ​ອົງການ​ປົກຄອງ​ບ້ານ​ທັງ 26 ບ້ານ ໄດ້​ລາຍ​ງານ​ການຈັດຕັ້ງ​ປະຕິບັດບ້ານໜັກແໜ້ນ​ເຂັ້ມແຂງ​ໃນ​ໄລຍະ​ຜ່ານ​ມາ ແມ່ນ​ໄດ້​ເອົາໃຈໃສ່​ປະຕິບັດ​ແຕ່​ລະບາດ​ກ້າວ, ຂັ້ນ​ຕອນ ໂດຍ​ການ​ໂຄສະນາ, ສຶກສາ​ອົບຮົມ​ການເມືອງ​ແນວ​ຄິດ, ປຸກລະດົມ​ຂົນຂວາຍ​ຢ່າງ​ເປັນ​ຂະບວນ, ຕໍ່​ເນື່ອງ​ຕາມ 3 ທິດ​ນຳ ແລະ 10 ມາດຖານ​ຂອງ​ການ​ສ້າງ​ບ້ານ​ໜັກ​ແໜ້ນ​ເຂັ້ມແຂງ​ເປັນຕົ້ນ ຮັບປະກັນ​ຄວາມ​ເປັນ​ເອກະ​ພາບ​ຖືກຕ້ອງ​ຕາມ​ກົດໝາຍ ແລະ ລະບຽບ​ການ, ຮັກສາ​ໄດ້​ຄວາມ​ສະຫງົບ, ຄວາມ​ເປັນ​ລະບຽບ​ຮຽບຮ້ອຍ ແລະ​ຄວາມ​ສາມັກຄີ, ຈັດ​ຕັ້ງ​ປະຕິບັດ​ໃຫ້​ມີ​ລັກສະນະ​ຕໍ່​ເນື່ອງ ແລະ ມີ​ສະຖຽນ​ລະ​ພາບ, ອົງການ​ປົກຄອງ​ບ້ານ​ມີ  5 ໜ່ວຍ​ງານ​ຊ່ວຍ​ວຽກບ້ານ, ມີ​ການ​ປະກອບ​ບຸກ​ຄະລາ​ກອນ​ຕາມ​ລະບຽບ​ການ, ມີ​ລະບຽບ​ວິໄນ​ການ​ຄຸ້ມ​ຄອງ​ບ້ານ, ມີ​ຫ້ອງການ​ບ້ານ​ຖາວອນ, ການ​ປະຈຳການ​ຂອງ​ອົງການ​ປົກຄອງ​ບ້ານ​ເປັນ​ປົກກະຕິ, ມີແຜນ​ພັດທະນາ​ຂອງ​ບ້ານ, ມີ​ລາຍ​ຮັບ​ສາມາດ​ກຸ້ມ​ຈ່າຍ​ຄ່າ​ບໍລິຫານ​ປົກກະຕິ, ມີ​ການ​ເຊື່ອມ​ທະບຽນ​ການ ຢ່າງ​ໜ້ອຍ 80% ແລະ ມີ​ການ​ບໍລິການ​ຂອງ​ອົງການ​ປົກຄອງ​ບ້ານ. 
ຈາກ​ນັ້ນ​ໃນ​ພິທີ​ກໍໄດ້​ຜ່ານ​ຂໍ້​ຕົກລົງ ສະບັບ​ເລກ​ທີ 05/ຈມ.ສວ ສາລະ​ວັນ, ລົງ​ວັນ​ທີ 6 ມັງກອນ 2020 ວ່າ​ດ້ວຍ ການ​ອະນຸມັດ​ປະກາດ 26 ບ້ານ ເປັນ​ບ້ານ​ໜັກ​ແໜ້ນ​ເຂັ້ມແຂງ ປີ 2019 ແລະ ຜ່ານ​ຂໍ້​ຕົກລົງ​ມອບ​ໃບຢັ້ງຢືນ​ບ້ານ​ວັດທະນະທຳ 5 ບ້ານ ພ້ອມ​ທັງ​ມອບ​ໃບຢັ້ງຢືນ​ໃຫ້​ແກ່ 26 ບ້ານ​ເປັນ​ບ້ານ​ໜັກ​ແໜ້ນ​ເຂັ້ມແຂງ ໂດຍ​ເປັນ​ກຽດ​ມອບ​ໃບຢັ້ງຢືນ​ຂອງ ທ່ານ ບຸນ​ມາກ ພອນ​ທິດ​ສະ​ຫວັດ ແລະ ທ່ານ ນາງ ບຸນ​ຖັນ ແກ້ວ​ມາ​ລາ.  
(ພາບ​-​ຂ່າວ: ທິດ​ລາ​ນີ ໂຄດ​ໂຍທາ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ສຳນັກງານເລກທີ66 ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110