ຫົວ​ຂໍ້ : ຊາວໜຸ່ມກະຊວງການຕາ່ງປະເທດ ໄດ້ຮັບທຸງໄຊ ນຳໜ້າ ໃນຂະບວນການແຂ່ງຂັນ 4 ບຸກ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 10/01/2020 10:04:13 ຈຳ​ນວນ​ຜູ້​ເຂົ້າ​ຢ້ຽມ​ຊົມ 321 ຄັ້ງ

ພິທີ ມອບ​-​ຮັບ ທຸງໄຊ​ນຳ​ໜ້າ​ຂະບວນ​ການ​ຂໍ້​ແຂ່ງຂັນ 4 ບຸກ ໃຫ້​ແກ່ ຄະນະ​ຊາວ​ໜຸ່ມ​ປະຊາຊົນ ປະຕິວັດ​ລາວ ກະຊວງ​ການ​ຕ່າງປະເທດ ໄດ້​ຈັດ​ຂຶ້ນ​ໃນ​ວັນ​ທີ 8 ມັງກອນ ທີ່​ກະຊວງ​ການ​ຕ່າງປະເທດ ໂດຍ​ການ​ເປັນ​ປະທານ​ຮ່ວມ​ຂອງ ສະຫາຍ ທອງ​ສະຫວັນ ພົມວິຫານ ຄະນະ​ປະຈຳ​ພັກ ຮອງ​ລັດຖະມົນຕີ​ກະຊວງ​ການ​ຕ່າງປະເທດ, ສະຫາຍ ນາງ ວິລະ​ວອນ ພັນທະ​ວົງ ຮອງ​ເລຂາ​ຄະນະ​ພັກ ປະທານ​ກວດກາ​ພັກ​-​ລັດ ຮອງ​ເລຂາ​ຄະນະ​ບໍລິຫານ​ງານ​ສູນ​ກາງ​ຊາວ​ຫນຸ່ມ​ປະຊາຊົນ​ປະຕິວັດ​ລາວ, ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
ໂອກາດ​ດັ່ງກ່າວ, ສະຫາຍ ອານຸພາບ ວົງ​ໜໍ່ແກ້ວ ເລຂາ​ຄະນະ​ບໍລິຫານງານ​ຊາວ​ໜຸ່ມ ກະຊວງ​ການ​ຕ່າງ​ປະເທດ ໄດ້​ຂຶ້ນ​ກ່າວ​ສະຫຼຸບ​ລາຍ​ງານ​ວຽກ​ງານ 4 ບຸກ ຄັ້ງ​ທີ 3 ແລະ ທິດ​ທາງໃນຕໍ່ຫນ້າ ໂດຍ​ໄດ້​ຍົກ​ໃຫ້​ເຫັນ​ວ່າ: ຄະນະ​ຊາວ​ໜຸ່ມ ປປລ ກະຊວງ​ການ​ຕ່າງ​ປະເທດ ເຄື່ອນ​ໄຫວ​ວຽກ​ງານ​ຊາວ​ໜຸ່ມ​ພາຍ​ໃຕ້​ການ​ຊີ້​ນຳ​-​ນຳພາ​ຂອງ​ອົງຄະ​ນະ​ພັກ​ກະຊວງ​ການ​ຕ່າງປະເທດ ແລະ ທັງ​ເປັນ​ກໍາ​ລັງ​ແຮງ​ທີ່​ສໍາ​ຄັນ​ໃນ​ການ​ດໍາ​ເນີນ​ພາລະກິດ​ວຽກ​ງານການ​ຕ່າງ​ປະ​ເທດ.  ປັດຈຸບັນ, ຄະນະ​ບໍລິຫານ​ງານ​ຊາວ​ໜຸ່ມ​ກະຊວງ​ການ​ຕ່າງປະເທດ ໄດ້​ຄຸ້ມ​ຄອງ​ສະມາຊິກ​ຊາວ​ໜຸ່ມ​ພາຍ​ໃນ​ກະຊວງ​ການ​ຕ່າງປະເທດ​ທັງ​ໝົດ​ມີ 17 ໜ່ວຍ, ມີ​ສະມາຊິກ​ທັງ​ໝົດ 462 ສະຫາຍ ຍິງ 203 ສະຫາຍ ແລະ ໜ່ວຍ​ຊາວ​ໜຸ່ມ​ຂອງ​ບັນດາ​ສຳນັກງານ​ການ​ທູດ ຂອງ ສປປ ລາວ ທີ່​ຕ່າງປະເທດ ຈຳນວນ 173 ໜ່ວຍ ແລະ 8 ຮາກ​ຖານ; ໃນ​ນີ້, ຈໍາ​ນວນ​ສະມາຊິກ​ຊາວ​ໜຸ່ມ​ທັງ​ໝົດ 4.728  ສະຫາຍ  ຍິງ 1.924 ສະຫາຍ, ແຕ່​ຈໍາ​ນວນ​ດັ່ງກ່າວ​ມີ​ການ​ເພີ່ມ​ຂຶ້ນ  ຫຼື  ຫຼຸດ​ລົງ​ເປັນ​ປະຈຳ, ເນື່ອງ​ຈາກ​ຊາວ​ໜຸ່ມ​ທີ່​ເປັນ​ນັກ​ສຶກສາ​ຢູ່​ຕ່າງປະເທດ ທີ່​ຂຶ້ນ​ກັບ​ໜ່ວຍ ແລະ ຮາກ​ຖານ​ຂອງ​ພວກ​ເຮົາ ແມ່ນ​ຈະ​ຍົກຍ້າຍ​ກັບ​ຄືນ​ປະເທດ  ຫຼື   ກົມ​ກອງ​ທີ່​ຕົນ​ເອງ​ສັງກັດ ພາຍ​ຫຼັງ​ສໍາ​ເລັດ​ການ​ສຶກສາ. 
ໃນ​ໄລຍະ​ຜ່ານ​ມາ, ຄະນະ​ຊາວ​ໜຸ່ມ ປປລ ກະຊວງ​ການ​ຕ່າງ​ປະເທດ ໄດ້​ປະຕິບັດ​ຂໍ້​ແຂ່ງຂັນ 4 ບຸກ ທີ່​ສູນ​ກາງ​ຊາວ​ໜຸ່ມ ປປລ ວາງ​ອອກ​ໂດຍ​ພາຍ​ໃຕ້​ການ​ຊີ້​ນຳ​-​ນຳພາ ຢ່າງ​ໃກ້​ຊິດ ຂອງ​ຄະນະ​ພັກ​ກະຊວງ​ການ​ຕ່າງ​ປະເທດ ແລະ ຄະ​ນະ​ນໍາ​ຂອງ​ສູນ​ກາງ​ຊາວ​ໜຸ່ມ ປປລ, ພ້ອມ​ທັງ​ປະກອບສ່ວນ​ໃນ​ການຈັດຕັ້ງ​ຜັນ​ຂະຫຍາຍ​ເນື້ອ​ໃນ​ມະຕິ​ກອງ​ປະຊຸມ​ຜູ້​ແທນ​ຊາວ​ໜຸ່ມ​ທົ່ວ​ປະເທດ​ສະໄໝ​ທີ VII. ຄຽງ​ຄູ່​ກັບ​ວຽກ​ງານ​ວິຊາ​ສະເພາະ, ຄະນະ​ຊາວ​ໜຸ່ມ ປປລ ກະຊວງ​ການ​ຕ່າງ​ປະເທດ ຍັງ​ໄດ້​ໃຫ້​ຄວາມ​ສໍາ​ຄັນ​ການເຄື່ອນໄຫວ​ຂອງ​ວຽກ​ງານ​ຊາວ​ໜຸ່ມ, ເປັນຕົ້ນ​ແມ່ນ​ການ​ປະຕິບັດ​ຂໍ້​ແຂ່ງຂັນ 4 ບຸກ ຂອງ​ຊາວ​ໜຸ່ມ​ປະຊາຊົນ​ປະຕິວັດ​ລາວ. ໃນ​ໄລຍະ​ໃນ​ການ​ປະຕິບັດ​ຂໍ້​ແຂ່ງຂັນ​ດັ່ງກ່າວ ຄະນະ​ຊາວ​ໜຸ່ມ ປປລ ກະຊວງ​ການ​ຕ່າງ​ປະເທດ ແມ່ນ​ມີ​ຄວາມ​ເອົາໃຈໃສ່ ແລະ ໜັກ​ແໜ້ນ​ໃນ​ການ​ແຂ່ງຂັນ​ຈົນ​ໄດ້​ຮັບ​ນາມມະຍົດ​ຊາວ​ໜຸ່ມ ປປລ 4 ບຸກ ເຖິງ 3 ສະໄຫມ​ຕິດຕໍ່​ກັນ ຊຶ່ງ​ປະກອບ​ມີ ບຸກ​ດ້ານ​ການເມືອງ​ແນວ​ຄິດ, ບຸກ​ດ້ານ​ການ​ຝຶກ​ຝົນ​ຫຼໍ່​ຫຼອມ​ການ​ຮຽນ, ບຸກ​ດ້ານ​ການຈັດຕັ້ງ ແລະ ບຸກ​ດ້ານ​ວິຊາ​ສະເພາະ ຕາມ​ມາດຕະຖານ ແລະ ເງື່ອນໄຂ​ຂອງ​ສູນ​ກາງ​ຊາວ​ໜຸ່ມ ປປລ ວາງ​ອອກ ແລະ ຜົນງານ​ດັ່ງກ່າວ​ນັ້ນ ລ້ວນ​ແລ້ວແຕ່​ແມ່ນ​ການ​ປະກອບສ່ວນ​ຂອງ​ຊາວ​ໜຸ່ມ​ແຕ່​ລະ​ໜ່ວຍ​ພ້ອມ​ດ້ວຍ​ສະມາຊິກ​ທຸກ​ສະຫາຍ ທີ່​ມີ​ຄວາມ​ສາມັກຄີ​ເປັນ​ເອກ​ກະ​ພາບ​ກັນ​ປະຕິບັດ​ຂໍ້​ແຂ່ງ​ຂັນ 4 ບຸກ ຢ່າງ​ຕັ້ງໜ້າ.
ໃນໂອກາດ​ດັ່ງກ່າວນີ້, ສະຫາຍ ທອງ​ສະຫວັນ ພົມ ວິຫານ ໄດ້​ສະແດງຄວາມ ​ຍ້ອງຍໍ​ຊົມເຊີຍ​ຕໍ່​ຜົນງານ​ທີ່​ພົ້ນ​ເດັ່ນ​ດັ່ງກ່າວ ທີ່​ຊາວ​​ໜຸ່ມ​ກະຊວງ​ການ​ຕ່າງປະເທດ​ຍາດ​ມາ​ໄດ້ໃນ​ການ​ປະກອບສ່ວນ​ດ້ວຍ​ຄວາມ​ຮັບຜິດຊອບ​ສູງ​ເຂົ້າ​ໃນ​ການ​ຜັນ​ຂະຫຍາຍ​ແນວທາງ ແລະ ນະໂຍບາຍ​ການ​ຕ່າງປະເທດ​ຂອງພັກ ເພື່ອ​ສ້າງສາ ແລະ ພັດທະ ນາ​ປະເທດ​ຊາດ ແລະ ຮຽກ ຮ້ອງ​ໃຫ້​ຊາວ​ໜຸ່ມ​ໃນຂະ ແໜງການຕ່າງປະເທດ ເອົາ ໃຈໃສ່ເຮັດວຽກງານການ ເມືອງ-ແນວຄິດໃຫ້ເຂັ້ມແຂງ​ຂຶ້ນ ເພື່ອ​ສຶກສາອົບຮົມໃຫ້ສະ ມາຊິກ​ຊາວ​ໜຸ່ມໃຫ້​ກຳແໜ້ນ ເຊື່ອມຊຶມແນວທາງປ່ຽນແປງ​ໃ​ໝ່ອັນຖືກຕ້ອງ ແລະ ມີຫຼັກ ການຂອງພັກ.
 ໃນ​ພິທີ​ດັ່ງກ່າວ​ນີ້, ສະຫາຍ ນາງ ວິລະ​ວອນ ພັນທະ​ວົງ ໄດ້​ຕາງໜ້າ​ໃຫ້​ຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ ປປລ ມອບ​ທຸງ​ໄຊ​ນໍາ​ໜ້າ​ຂະບວນ​ການ​ແຂ່ງຂັນ 4 ບຸກ ໃຫ້​ແກ່ຊາວ​ໜຸ່ມ​ກະຊວງ​ການ​ຕ່າງ​ປະ​ເທດ.
(ຂ່າວ: ກະຊວງ​ການ​ຕ່າງ ປະເທດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ສຳນັກງານເລກທີ66 ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110