ຫົວ​ຂໍ້ : ເມືອງໃໝ່ເປີດກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ XIV

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 10/01/2020 10:07:23 ຈຳ​ນວນ​ຜູ້​ເຂົ້າ​ຢ້ຽມ​ຊົມ 528 ຄັ້ງ

ກອງ​ປະຊຸມ​ໃຫຍ່​ ຄັ້ງ​ທີ XIV  ຂອງ​ອົງຄະ​ນະ​ພັກ ເມືອງ​ໃໝ່ ແຂວງ​ຜົ້ງ​ສາລີ ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ ໃນວັນ​ທີ 8 ມັງກອນ ຜ່ານ​ມາ   ທີ່​ສະໂມສອນ​ຂອງ​ເມືອງ​ໃໝ່ ໂດຍ​ການ​ເປັນ​ປະທານ​ຂອງ ສະຫາຍ ສົມ​ຈິດ ສິດທິ​ວົງ ກຳມະການ​ພັກ​ແຂວງ ເລຂາ​ຄະນະ​ບໍລິຫານ​ງານ​ພັກ​ເມືອງ ເຈົ້້າ​ເມືອງໆ​ໃໝ່, ເປັນ​ກຽດ​ເຂົ້າ​ຮ່ວມ​ຂອງ​ສະຫາຍ ຄຳ​ຜອຍ ວັນນະ​ສານ ຮັກສາ​ການ​ເລຂາ​ພັກ​ແຂວງ ຮັກສາ​ການ​ເຈົ້າແຂວງ​ຜົ້ງ​ສາລີ, ມີ​ສະຫາຍ ທອງ​ສີ ເສົາ​ສຸ​ລີ​ພົມ ຄະນະ​ປະຈຳ​ພັກ​ແຂວງ ຮອງ​ເຈົ້າແຂວງ ຜູ້​ຊີ້​ນຳ​ວຽກ​ງານ​ຮອບດ້ານ​ຂອງ​ເມືອງ​ໃໝ່, ມີ​ບັນດາ​ສະຫາຍ ຮອງ​ເລຂາ​ພັກ​ເມືອງ, ຄະນະ​ປະ​ຈໍາ​ພັກ​ເມືອງ, ກໍາ​ມະ​ການ​ພັກ​ເມືອງ, ແຂກ​ຖືກ​ເຊີນ​ຈາກ​ເມືອງ​ໂພນ​ທອງ,ເມືອງ​ງອຍ ແຂວງ​ຫຼວງ​ພະ​ບາງ ແລະ ການ​ນໍາ​ເມືອງ​ອ້ອມ​ຂ້າງ​ໃນ​ທົ່ວ​ແຂວງ ພ້ອມ​ຜູ້​ແທນ​ສົມບູນ 145 ສະຫາຍ​ ຍິງ 44 ສະຫາຍ ທີ່​ເປັນ​ຕົວ​ແທນ​ໃຫ້​ແກ່​ສະມາຊິກ​ພັກ​ທົ່ວ​ເມືອງ 1347  ສະ​ຫາຍ.
ໃນ​ໄລຍະ 5 ປີ​ ທີ່​ຜ່ານ​ມາ ອົງຄະ​ນະ​ພັກ​ເມືອງ​ໃໝ່ ໄດ້​ເອົາໃຈໃສ່​ຊີ້​ນໍາ-ນໍາ​ພາ​ໃນ​ການ​ພັດທະນາ​ເສດຖະກິດ ແລະ ແກ້​ໄຂ​ຄວາມທຸກ​ຍາກ ໂດຍ​ຢຶດ​ຖື​ເອົາ​ການ​ພັດ​ທະ​​ນາເສດຖະກິດ​ເປັນໃຈ​ກາງ ເພື່ອ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາເຜົ່າ​ຢູ່​ພາຍ​ໃນ​ເມືອງ​ໃຫ້​ນັບ​ມື້​ດີ​ຂຶ້ນ, ໄດ້​ສຸມ​ໃສ່​ຊີ້​ນໍາ-​ນຳພາ​ການຈັດຕັ້ງ​ປະຕິບັດ​ຕາມ​ທິດ​ທາງ ແລະ ຄາດໝາຍ​ທີ່​ມະຕິ​ກອງ​ປະຊຸມ​ຄັ້ງ​ທີ XIII ໄດ້​ຮັບຮອງ ໂດຍ​ໄດ້​ສຸມ​ໃສ່ ການ​ລົງທຶນ​ຂອງ​ນັກທຸລະກິດ​ທັງ​ພາຍ​ໃນ ແລະ ຕ່າງປະເທດ, ກໍ່ສ້າງພື້ນຖານ​ໂຄງ​ລ່າງ ໂດຍ​ສະເພາະ​ເສດຖະກິດ​ຂອງ​ເມືອງ ມີ​ການ​ຂະຫຍາຍຕົວ​ຕໍ່​ເນື່ອງ ລວມ​ຍອດ​ຜະລິດ​ຕະ​ພັນ​ພາຍ​ໃນ​ເມືອງ ໃນ 5 ປີ ບັນລຸ 204,68  ຕື້​ກີບ​ ທຽບໃສ່ ປີ 2014 ເພີ່ມ​ຂຶ້ນ 56,42% ສະເລ່ຍ​ໃສ່​ຫົວ​ຄົນ​ບັນລຸ 914 ໂດ​ລາ/ຄົນ/ປີ, ໃນ​ນີ້​ລວມ​ຍອດ​ຜະລິດ​ຕະ​ພັນ​ກະສິກຳ​ກວມ​ເອົາ 4,94%, ອຸດ​ສາ​ຫະ​ກຳ​-​ຫັດຖະກຳ​ກວມ​ເອົາ 6,80% ການ​ບໍລິການ​ກວມ​ເອົາ 22,33% ເຮັດ​ໃຫ້​ປະຊາຊົນ​ມີ​ຊີວິດ​ການ​ເປັນ​ຢູ່​ດີ​ຂຶ້ນ ແລະ ມີ​ທ່າ​ອ່ຽງຫຼຸດ​ພົ້ນ​ຈາກ​ຄວາມທຸກ​ຍາກ​ເທື່ອ​ລະ​ກ້າວ ແລະ ຜ່ານ​ການ​ເກັບ​ກຳ​ຂໍ້​ມູນ​ຕາມ​ດຳລັດ 348/ລບ ຍັງ​ເຫຼືອ​ບ້ານ​ທຸກ​ຍາກ​ກວມ 95,06% ຂອງ​ບ້ານ​ທັງ​ໝົດ ຈຳ​ນວນ​ຄອບຄົວ​ທຸກ​ຍາກ​ຍັງ​ເຫຼືອ 87,23%.
ກອງ​ປະຊຸມ​ຍັງ​ໄດ້​ວາງ​ຄາດໝາຍ​ສູ້​ຊົນ ປີ  2020-2024 ຕິດ​ພັນ​ກັບ​ການ​ພັດທະນາ​ຊົນນະບົດ​ຮອບດ້ານ, ຮັບ ປະກັນ​ໃຫ້​ແກ່​ການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ຕາມ 4 ເນື້ອ​ໃນ 4 ຄາດໝາຍ ຮອດ​ປີ 2024. ພ້ອມ​ນີ້​ບັນດາ​ຜູ້​ແທນ​ທີ່​ເຂົ້າ​ຮ່ວມ​ກອງ​ປະຊຸມ ຍັງ​ໄດ້​ເປັນ​ເອກະສັນ​ກັນ​ຮັບຮອງ​ເອົາບົດ​ສຳ​ຫຼວດ​ການ​ຊີ້​ນຳ-ນຳ​ພາ​ຂອງ​ອົງຄະ​ນະ​ພັກ, ບົດ​ລາຍ​ງານ​ການເມືອງ ແລະ ແຜນ​ພັດທະນາ​ເສດຖະກິດ-ສັງຄົມ 5 ປີ​ ໃນຕໍ່ໜ້າ ເພື່ອ​ເຮັດ​ໃຫ້ການ​ຈັດ​ຕັ້ງ​ປະຕິບັດ​ວຽກ​ງານ​ຂອງ​ອົງຄະ​ນະ​ພັກ​ເມືອງ​ຄັ້ງ​ທີ XV ໄດ້​ຮັບ​ການຈັດຕັ້ງ​ປະຕິບັດ​ໃຫ້​ປະກົດ​ຜົນ​ເປັນ​ຈິງ ແລະ ໄດ້​ຕາມ​ແຜນທີ່​ວາງ​ໄວ້.
(ຂ່າວ: ສົມ​ຈັນ)

 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110