ຫົວ​ຂໍ້ : ສປປ ລາວ ຍ້ອງຍໍກົມກອງ ແລະ ບຸກຄົນ ດີເດັ່ນ ຂອງສະພາແຫ່ງຊາດຫວຽດນາມ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 13/01/2020 10:19:40 ຈຳ​ນວນ​ຜູ້​ເຂົ້າ​ຢ້ຽມ​ຊົມ 295 ຄັ້ງ

ໂດຍ​ໄດ້​ຮັບ​ການ​ມອບ​ໝາຍ​ຈາກ​ສະຫາຍ​ປະທານ​ປະເທດ ແຫ່ງ​ ສປປ ລາວ, ຕາງໜ້າ​ໃຫ້​ພັກ, ລັດ, ສະພາ​ແຫ່ງ​ຊາດ ແລະ ປະຊາຊົນ​ລາວ​ບັນດາເຜົ່າ, ຄະນະ​ຜູ້​ແທນ​ຂັ້ນ​ສູງ​ຂອງ​ສະພາ​ແຫ່ງ​ຊາດ ນຳ​ໂດຍ ສະຫາຍ ນາງ ປານີ ຢາ​ທໍ່​ຕູ້  ກຳມະການ​ກົມ​ການເມືອງ​ສູນ​ກາງ​ພັກ ປະທານ​ສະພາ​ແຫ່ງ​ຊາດ ແຫ່ງ ສປປ ລາວ ໄດ້​ປະດັບ​ຫຼຽນ​ໄຊ​-​ຫຼຽນ​ກາ ຂອງ ສປປ ລາວ ໃຫ້​ແກ່​ບັນດາ​ກົມ​ກອງ​ລວມ​ໝູ່  ແລະ  ບຸກຄົນ​ຂອງ​ສະພາ​ແຫ່ງ​ຊາດ​ຫວຽດນາມ.
ພິທີ​ດັ່ງກ່າວ​ໄດ້​ຈັດ​ຂຶ້ນ​ໃນ​ວັນ​ທີ 9 ມັງກອນ ຜ່ານ​ມາ ທີ່່​ນະຄອນຫຼວງ​ຮ່າ​ໂນ້ຍ ສສ ຫວຽດນາມ ສະຫາຍ ນາງ ປານີ ຢາ​ທໍ່​ຕູ້ ໄດ້​ໃຫ້​ກຽດ​ປະດັບ​ຫຼຽນ​ໄຊ ແລະ ຫຼຽນ​ກາ  ໃຫ້​ແກ່​ບັນດາ​ກົມ​ກອງ​ລວມ​ໝູ່ ແລະ​ບຸກຄົນ​ດີເດັ່ນ ຂອງ​ສະພາ​ແຫ່ງ​ຊາດ​ຫວຽດນາມ ຊຸດ​ທີ 13 ແລະ ຊຸດ​ທີ 14 ຈໍາ​ນວນ  12 ກົມ​ກອງ​ລວມ​ໝູ່ ແລະ 52 ບຸກ​ຄົນ. ທີ່​ໄດ້​ປະກອບສ່ວນ​ສຸມ​ເຫື່ອແຮງ, ສະຕິປັນຍາ, ຄວາມ​ຮູ້​ຄວາມ​ສາມາດ​ໃນ​ການ​ປະຕິບັດ​ໜ້າທີ່​ຂອງ​ຕົນ​ເຂົ້າ​ໃນ​ການ​ຊຸກຍູ້ ແລະ ເສີມ​ຂະຫຍາຍ​ສາຍ​ພົວພັນ​ມິດຕະ​ພາບ ແລະ ການ​ຮ່ວມ​ມື​ຮອບດ້ານ​ລະຫວ່າງ​ສອງ​ສະພາ​ແຫ່ງ​ຊາດ​ລາວ ແລະ ຫວຽດນາມ​ໃຫ້​ນັບ​ມື້​ນັບ​ແໜ້ນ​ແຟ້ນ ແລະ ມີ​ບາດກ້າວ​ໃໝ່​ຢ່າງ​ບໍ່​ຢຸດ​ຢັ້ງ. ໃນ​ນັ້ນ​ໄດ້​ປະດັບ​ຫຼຽນ​ໄຊ​ອິດສະຫຼະ​ຊັ້ນ 1 ໃຫ້​ແກ່ 5 ກົມ​ກອງ​ລວມ​ໝູ່ ແລະ ບຸກຄົນ​ດີເດັ່ນ 2 ສະ​ຫາຍ. ປະດັບ​ຫຼຽນ​ໄຊ​ອິດສະຫຼະ​ຊັ້ນ 2 ໃຫ້​ແກ່​ບຸກຄົນ​ດີເດັ່ນ 6 ສະ​ຫາຍ.
 ນອກຈາກ​ນີ້ ຍັງ​ປະດັບ​ຫຼຽນ​ໄຊ​ອິດສະຫຼະ​ຊັ້ນ 3 ໃຫ້​ແກ່​ບຸກຄົນ​ດີເດັ່ນ ຈໍາ​ນວນ 17 ສະຫາຍ, ປະດັບ​ໂດຍ​ສະຫາຍ ເອກ​ສະຫວ່າງ ວົງ​ວິຈິດ ກໍາ​ມະ​ການ​ສູນ​ກາງ​ພັກ ຄະນະ​ປະ​ຈໍາ ປະ​ທານ​ກໍາ​ມາ​ທິ​ການ​ການ​ຕ່າງປະເທດ ສະພາ​ແຫ່ງ​ຊາດ​ລາວ. ປະດັບ​ຫຼຽນ​ໄຊ​ມິດ​ຕະພາບ​ໃຫ້​ແກ່ 7 ກົມ​ກອງ​ລວມ​ໝູ່ ແລະ ບຸກຄົນ​ດີເດັ່ນ ຈໍາ​ນວນ 15 ສະຫາຍ, ປະດັບ​ໂດຍ​ສະຫາຍ ນາງ ສວນ​ສະຫວັນ ວິ​ຍະ​ເກດ ກໍາ​ມະ​ການ​ສໍາ​ຮອງ​ສູນ​ກາງ​ພັກ, ຄະນະ​ປະ​ຈໍາ, ເລຂາທິການ​ສະພາ​ແຫ່ງ​ຊາດ​ລາວ. ປະດັບ​ຫຼຽນ​ກາ​ມິດ​ຕະ ພາບ ໃຫ້​ແກ່​ບຸກຄົນ​ດີເດັ່ນ​ຂອງ​ສະພາ​ແຫ່ງ​ຊາດ​ຫວຽດນາມ ຈໍາ​ນວນ 12 ສະຫາຍ, ປະດັບ​ໂດຍ​ສະຫາຍ ພົຈວ ຄໍາ​ສຸກ ວີ​ອິນ​ທະ​ວົງ ຄະນະ​ປະ​ຈໍາ ປະ​ທານ​ກໍາ​ມາ​ທິ​ການ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະ​ຫງົບ.
ການ​ປະດັບ​ຫຼຽນ​ໄຊ ແລະ ຫຼຽນ​ກາ​ໃຫ້​ແກ່​ກົມ​ກອງ​ລວມ​                                                                ໝູ່ ແລະ ບຸກຄົນ​ດີເດັ່ນ​ຂອງ​ສະພາ​ແຫ່ງ​ຊາດ​ຫວຽດນາມ​ຄັ້ງ​ນີ້ ເປັນ​ຫຼຽນ​ສູງ​ສຸດ​ ຂອງ​ສາທາລະນະ​ລັດ ປະຊາທິປະ ໄຕ ປະຊາຊົນ​ລາວ ແລະໄດ້​ຈັດ​ຂຶ້ນ​ໃນ​ທ່າມກາງ​ບັນ​ຍາກາດ ​ແຫ່ງ​ຜົນ​ສໍາ​ເລັດ​ຂອງ​ກອງ​ປະຊຸມ​ພົບ​ປະລະ​ຫວ່າງ ການ​ນໍາ​ຂັ້ນ​ສູງ​ຂອງ​ສອງ​ພັກ​-​ສອງ​ລັດ ລາວ​-​ຫວຽດນາມ; ຜົນ​ສໍາ​ເລັດ​ກອງ​ປະຊຸມ​ຄັ້ງ​ທີ 42 ຂອງ​ຄະ​ນະ​ກໍາ​ມະ​ການ​ຮ່ວມ​ມື​ລາວ​-​ຫວຽດນາມ ແລະ ງານ​ສະເຫຼີມສະຫຼອງ​ວັນ​ມູນເຊື້ອ​ທະຫານ​ອາສາ​ສະໝັກ ແລະ ຊ່ຽວຊານ​ຫວຽດນາມ ທີ່​ໄດ້​ປະ ຕິບັດ​ພັນທະ​ສາກົນ​ຢູ່ ສປປ ລາວ ຄົບຮອບ 70 ປີ ການ​ສະ ເຫຼີມສະຫຼອງ​ຄົບຮອບ 74 ປີ ເລືອກ​ຕັ້ງ​ຄັ້ງ​ທຳອິດ ເພື່ອ​ເລືອກ​ຕັ້ງ​ສະພາ​ແຫ່ງ​ຊາດ ຫວຽດນາມ ທີ່​ຫາ​ກໍ່​ສໍາ​ເລັດ​ໃນ​ຫວ່າງ​ບໍ່​ດົນ​ມາ​ນີ້. ພິທີ​ປະດັບ​ຫຼຽນ​ໃນ​ຄັ້ງ​ນີ້ ມີ​ຄວາມ​ໝາຍ​ສໍາ​ຄັນ​ຢ່າງ​ຍິ່ງ, ເປັນ​ການ​ປະກອບສ່ວນ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ ສາຍ​ພົວພັນ​ມິດຕະພາບອັນ​ຍິ່ງ​ໃຫຍ່, ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ ລາວ​-​ຫວຽດນາມ ນັບ​ມື້​ແໜ້ນ​ແຟ້ນ​ຍິ່ງ​ຂຶ້ນ.
ໃນ​ໂອ​ກາ​ດັ່ງກ່າວ​ນີ້ ສະ ຫາຍ ນາງ ປານີ ຢາ​ທໍ່​ຕູ້ ໄດ້​ນໍາ​ພາຄະ​ນະ​ຜູ້​ແທນ​ລາວ ເຂົ້າ​ພົບ​ປະ​ກັບ​ສະ​ຫາຍ ນາງ ຫ​ງວຽນ ທິ ກິ​ມ​ເງິນ ກໍາ​ມະ​ການ​ກົມ​ການເມືອງ​ສູນ​ກາງ​ພັກ​ກອມ​ມູ​ນິດ​ຫວຽດນາມ ປະທານ​ສະພາ​ແຫ່ງ​ຊາດ ແຫ່ງ ສສ ຫວຽດນາມ, ໃນ​ການ​ພົບ​ປະ ສອງ​ຝ່າຍ​ໄດ້​ຕີ​ລາຄາ​ສູງ​ການ​ພົວພັນ​ຮ່ວມ​ມື​ລະຫວ່າງ ສອງ​ສະພາ​ແຫ່ງ​ຊາດ​ລາວ ແລະ ​ຫວຽດນາມ ແມ່ນ​ມີ​ການ​ພົວພັນ​ຮ່ວມ​ມື​ຊຶ່ງ​ກັນ ແລະ ກັນ​ຢ່າງ​ໃກ້ຊິດ​ສະໜິດສະໜົມ ແລະ ມີ​ຫຼາຍ​ດ້ານ​ທີ່​ພົ້ນ​ເດັ່ນ ເປັນຕົ້ນແມ່ນ​ການ​ແລກປ່ຽນ​ການ​ຢ້ຽມຢາມ ນັບ​ແຕ່​ການ​ນຳ​ຂັ້ນ​ສູງ​ສຸດ ຈົນ​ຮອດ​ລະດັບ​ວິຊາ​ການ​ເປັນ​ຈຳນວນ​ຫຼາຍ​ຄະນະ, ມີ​ການ​ຈັດ​ກອງ​ປະ​ຊຸມ​ສໍາ​ມະ​ນາ ແລະ ແລກປ່ຽນ​ບົດຮຽນ​ຮ່ວມ​ກັນ ກ່ຽວ​ກັບ​ການຈັດຕັ້ງ​ປະຕິບັດ​ພາລະ​ບົດບາດ ນິຕິ​ບັນຍັດ, ໃນ​ຫົວຂໍ້​ວິທະຍາສາດ​ຕ່າງໆ, ມີ​ການ​ແລກປ່ຽນ​ທັດສະນະ, ຂໍ້​ມູນ​-​ຂ່າວສານ ແລະ ສະໜັບ​ສະໜັບ ເຊິ່ງ​ກັນ ແລະ​ກັນ, ໃນ​ການ​ສ້າງ​ຄວາມ​ອາດ​ສາມາດ​ໃຫ້​ແກ່​ສະມາຊິກ​ສະພາ​ແຫ່ງ​ຊາດ, ສະພາ​ປະຊາຊົນ​ຂັ້ນ ທ້ອງຖິ່ນ ແລະ ວິຊາ​ການ​ຂອງ​ສອງ​ສະພາ​ແຫ່ງ​ຊາດ​ລາວ​-​ຫວຽດນາມ; ການ​ຮ່ວມ​ກັນ​ຕິດຕາມ​ກວດກາ ການຈັດຕັ້ງ​ປະຕິບັດ​ບັນດາ​ສັນຍາ, ຂໍ້​ຕົກ ລົງ​ການ​ຮ່ວມ​ມື​ຕ່າງໆ ລະຫວ່າງ ສອງ​ລັດຖະບານ ເພື່ອ​ຊຸກຍູ້​ວຽກ​ງານ​ຂອງ​ສອງ​ຝ່າຍ​ມີ​ປະສິດ​ທິ​ຜົນ​ກວ່າ​ເກົ່າ. ພ້ອມ​ດຽວ​ກັນ​ນີ້, ກໍ່​ໄດ້​ພົວພັນ​ຮ່ວມ​ມື​ກັນ ໃນ​ການເຄື່ອນໄຫວ​ວຽກ​ງານ ຢູ່​ເວທີ​ລັດ​ຖະ​ສະພາ​ພາກ​ພື້ນ ແລະ​ສາ​ກົນ. ເວົ້າ​ລວມ​ແລ້ວ, ການ​ພົວພັນ​ຮ່ວມ​ມື​ຜ່ານ​ມາ ຂອງ​ສອງ​ອົງການ​ນິຕິບັນຍັດ ກໍ​ໄດ້​ປະກອບສ່ວນ​ສຳຄັນ ແລະ ມີ​ຜົນ​ປະໂຫຍດ​ອັນ​ລ້ຳ​ຄ່າ​ຕໍ່​ການ​ພົວພັນ​ສອງ​ຝ່າຍ ລະຫວ່າງ ສອງ​ພັກ, ສອງ​ລັດ ແລະ​ປະຊາຊົນ​ສອງ​ຊາດ                        ​ລາວ​-​ຫວຽດນາມ ໃຫ້​ນັບ​ມື້​ສືບຕໍ່​ໄດ້​ຮັບ​ການ​ເພີ່ມ​ພູນ​ຄູນ​ສ້າງ ແລະ​ເປັນ​ຮູບ​ປະ​ທຳ​ຂຶ້ນ​ເປັນ​ກ້າວໆ​ມາ.
(ຂ່າວ+ພາບ: ພອນ​ໄຊ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110