ຫົວ​ຂໍ້ : ສະພາ ສ້າງຄວາມເຂັ້ມແຂງການບໍລິຫານພິທີການໃຫ້ພະນັກງານ ລັດຖະກອນ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 14/01/2020 10:25:37 ຈຳ​ນວນ​ຜູ້​ເຂົ້າ​ຢ້ຽມ​ຊົມ 147 ຄັ້ງ

ຄະນະ​ເລຂາທິການສະ ພາ​ແຫ່ງ​ຊາດ (​ຄ​ລ​ສ) ໄດ້​ຈັດ​ກອງ​ປະຊຸມ​ຝຶກອົບຮົມ ກ່ຽວ​ກັບ​ການ​ສ້າງ​ຄວາມ​ເຂັ້ມແຂງ​ໃຫ້​ພະນັກ​ງານ​-​ລັດຖະກອນ​ພາຍ​ໃນ​ກົມ​ບໍລິຫານ​-​ພິທີການ ຂຶ້ນ​ໃນ​ວັນ​ທີ 11-12 ມັງກອນ​ຜ່ານ​ມາ ທີ່​ແຂວງ​ບໍ​ລິ​ຄຳ​ໄຊ ໂດຍ​ການ​ເປັນ​ປະທານ​ຂອງ​ທ່ານ ນາງ ສວນ​ສະຫວັນ ວິ​ຍະ​ເກດ ເລຂາທິການ​ສະພາ​ແຫ່ງ​ຊາດ, ມີ​ວິທະຍາກອນ​ຈາກ​ກະຊວງ​ການ​ເງິນ, ກະຊວງ​ການ​ຕ່າງປະເທດ, ມີ​ບັນດາ​ຫົວ​ໜ້າ​-​ຮອງ​ຫົວໜ້າ​ກົມ, ຫົວ​ໜ້າ​-​ຮອງ​ຫົວໜ້າ​ພະ​ແນກ ຕະຫຼອດ​ຮອດ​ພະນັກງານ​ວິຊາ​ການ​ພາຍ​ໃນ​ກົມ​ບໍລິຫານ​-​ພິທີການ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
ຈຸດປະສົງ​ຂອງ​ການ​ຈັດ​ກອງ​ປະຊຸມ​ຝຶກອົບຮົມ​ໃນ​ຄັ້ງ​ນີ້ ເພື່ອ​ແນໃສ່​ສ້າງ​ຂີດ​ຄວາມ​ສາມາດ​ໃນ​ການຈັດຕັ້ງ​ປະຕິບັດ​ວຽກ​ງານ​ຕາມ​ພາລະ​ບົດບາດ, ການ​ເປັນ​ເສນາ​ທິ​ການ​ໃຫ້​ແກ່​ຄະນະ​ເລຂາທິການ​ສະພາ​ແຫ່ງ​ຊາດ ທາງ​ດ້ານ​ວຽກ​ງານ​ການ​ຄຸ້ມ​ຄອງ​ການ​ປະມູນ​ຈັດ​ຊື້​ສິນຄ້າ, ການ​ກໍ່ສ້າງ, ສ້ອມແປງ ແລະ ຕິດຕາມ​ກວດກາ ການຈັດຕັ້ງ​ປະຕິບັດ​ວຽກ​ງານ​ຈັດ​ຊື້​-​ຈັດ​ຈ້າງ ດ້ວຍ​ທຶນ​ຂອງ​ລັດ, ຫຼັກການ​ລວມ​ຂອງ​ວຽກ​ງານ​ພິທີການ ແລະ ລະບຽບ​ການ​ຕ້ອນຮັບ​ແຂກ​ພາຍ​ໃນ ແລະ ຕ່າງປະເທດ, ວຽກ​ງານ​ການ​ຄຸ້ມ​ຄອງ​ຊັບ​ສິນ​ຂອງ​ລັດ, ວິທີ​ເກັບ​ກໍາ​ຂໍ້​ມູນ​ຊັບ​ສິນ, ຂຶ້ນ​ບັນຊີ ແລະ ວຽກ​ງານ​ອື່ນໆ ທີ່​ປິ່ນ​ອ້ອມ​ນັບ​ມື້​ດີ​ຂຶ້ນ.
ກອງ​ປະຊຸມ​ໄດ້​ຮັບຟັງ ​ການ​ນໍາ​ສະເໜີ​ກ່ຽວ​ກັບບົດ ຮຽນ​ຄຸ້ມ​ຄອງ​ການ​ປະມູນ​ຈັດ​ຊື້​ສິນຄ້າ ການ​ກໍ່ສ້າງ ແລະ ການ​ສ້ອມແປງ ແລະ ຕິດຕາມ​ກວດກາ​ການ​ຈັດ​ຕັງ​ປະຕິບັດ​ວຽກ​ງານ​ຈັດ​ຊື້​ຈັດ​ຈ້າງ ດ້ວຍ​ທຶນ​ຂອງ​ລັດ ຈາກ​ຮັກສາ​ການ​ຫົວໜ້າ​ພະ​ແນ​ກ​ຈັດ​ຊື້​-​ຈັດ​ຈ້າງ​ຂອງ​ລັດ ກົມ​ງົບປະມານ​ແຫ່ງ​ລັດ ກະຊວງ​ການ​ເງິນ; ບົດຮຽນ​ກ່ຽວ​ກັບ​ວຽກ​ງານ​ຄຸ້ມ​ຄອງ​ຊັບ​ສິນ​ຂອງ​ລັດ, ວິທີ​ການ​ເກັບ​ກໍາ​ຂໍ້​ມູນ​ຊັບ​ສິນ, ຂຶ້ນ​ບັນຊີ, ຂຶ້ນ​ທະ​ບຽນ​ກໍາ​ນົດ​ເລກ​ລະຫັດ, ເລກ​ທະບຽນ​ສັງ​ລວມ​ຊັບ​ສິນ, ການ​ເຂົ້າ​ລະຫັດ​ຕາຕະລາງ ແລະ   ການ​ສະ​ສາງ​ຊັບ​ສິນ ແລະ ບົດຮຽນ​ກ່ຽວ​ກັບ​ຫຼັກການ​ລວມ​ຂອງ​ວຽກ​ງານ​ພິທີການ ແລະ ລະບຽບ​ການ​ທີ່​ກ່ຽວຂ້ອງ​ໃນ​ການ​ຕ້ອນຮັບ​ແຂກ​ພາຍ​ໃນ ແລະ ແຂກ​ຕ່າງປະເທດ ຈາກ​ຫົວໜ້າ​ກົມ​ພິທີການ​ທູດ​ກະຊວງ​ການ​ຕ່າງປະເທດ ນອກຈາກ​ນີ້ ຄະນະ​ກົມ ແລະ ຄະນະ​ພະ​ແນກ ​ກົມ​ບໍລິຫານ​-​ພິທີການ​ຍັງ​ໄດ້​ປຶກສາ​ຫາລື​ກ່ຽວ​ກັບ​ວຽກ​ງານ​ບໍລິຫານ​ພິທີການ, ການ​ຄຸ້ມ​ຄອງ​ພາຫະນະ, ການ​ຄຸ້ມ​ຄອງ​ເຄຫາ​ສະຖານ ແລະ ຊັບ​ສິນ ແລະ ນັກ​ສໍາ​ມະ​ນາ​ກອນ​ໄດ້​ຜັດປ່ຽນ​ກັນ​ປະ​ກອບ​ຄໍາ​ຄິດ​ເຫັນ​ໂອ້​ລົມ​ສົນທະນາ​ໃສ່​ບັນຫາ​ທີ່​ຕົນ​ເອງ​ໃຫ້​ຄວາມ​ສົນໃຈ​ໃສ່​ຫົວຂໍ້​ບົດ​ດັ່ງກ່າວ ເພື່ອ​ໃຫ້​ໄດ້​ບົດຮຽນ​ທີ່​ນໍາ​ມາ​ໃຊ້​ປະຕິບັດ​ເຂົ້າ​ໃນ​ວຽກ​ງານ​ຕົວ​ຈິງ.
ໂອກາດ​ດັ່ງກ່າວ ທ່ານ ນາງ ສວນ​ສະ​ວັນ ວິ​ຍະ​ເກດ​ ໄດ້​ມີ​ຄໍາ​ເຫັນ​ກ່າວ​ເປີດ​ຕໍ່​ກອງ​ປະຊຸມ​ວ່າ: ວຽກ​ງານ​ບໍລິຫານ​-​ຈັດການ, ພິທີການ, ການ​ຄຸ້ມ​ຄອງພາ ຫະນະ, ການ​ຄຸ້ມ​ຄອງ​ເຄຫາ​ສະຖານ ແລະ ຊັບ​ສິນ ພາຍ​ໃນ​ສະພາ​ແຫ່ງ​ຊາດ ເປັນ​ວຽກ​ງານ​ໃຈກາງ​ທີ່​ສໍາ​ຄັນ​ໃນ​ການ​ຂັບ​ເຄື່ອນ​ການເຄື່ອນໄຫວ​ວຽກ​ງານ​ຂອງ​ພາກສ່ວນ​ຕ່າງໆ ພາຍ​ໃນ​ສໍາ​ນັກ​ງານ ຜ່ານ​ການຈັດຕັ້ງ​ປະຕິບັດ​ໃນ​ໄລຍະ​ຜ່ານ​ມາ​ເຫັນ​ວ່າ​ພົບ​ຄວາມ​ຫຍຸ້ງຍາກ​ຫຼາຍ​ບັນຫາ ໂດຍ​ສະເພາະ​ວຽກ​ງານ​ຈັດ​ຊື້​-​ຈັດ​ຈ້າງ, ການ​ບໍລິການ​ດ້ານ​ພິທີການ ເຊັ່ນ: ຮັບ​ໃຊ້​ການເຄື່ອນໄຫວ​ຂອງ​ການ​ນໍາ ພາຍ​ໃນ ແລະ ຕ່າງປະເທດ, ການ​ຄຸ້ມ​ຄອງ​ພາຫະນະ​ເຊັ່ນ: ການ​ປະກອບ​ລົດ​ໃຫ້​ແກ່​ການ​ນໍາ, ການ​ຈັດ​ສັນ​ລົດ​ລົງ​ເຄື່ອນ​ໄຫວ​ວຽກ​ງານ ແລະ ການ​ສ້ອມ​ແປງ​ບໍາ​ລຸງ​ຮັກສາ​ລົດ, ການ​ຄຸ້ມ​ຄອງ​ເຄຫາ​ສະຖານ ແລະ ຊັບ​ສິນ​ເຊັ່ນ: ການ​ສ້ອມແປງ​ອາຄານ​ເກົ່າ, ການ​ຕິດຕາມ​ກວດກາ ແລະ ປ່ຽນ​ຖ່າຍ​ອຸປະກອນ​ຮັບ​ໃຊ້​ພາຍ​ໃນ​ອາຄານ, ການ​ເກັບ​ກໍາ​ບັນຊີ​ຊັບ​ສິນ ເຄື່ອງໃຊ້​ພາຍ​ໃນ​ຫ້ອງການ ແລະ ອື່ນໆ ຍັງ​ເຮັດ​ບໍ່​ທັນ​ໄດ້​ດີ​ເທົ່າ​ທີ່​ຄວນ ດ້ວຍ​ເຫດ​ນັ້ນ ຈຶ່ງ​ໄດ້​ຈັດ​ກອງ​ປະຊຸມ​ຝຶກອົບຮົມ​ນີ້​ຂຶ້ນ ເພື່ອ​ພ້ອມ​ກັນ​ແລກ​ປ່ຽນ​ຄໍາ​ຄິດ​ຄໍາ​ເຫັນ ແລະ ສ້າງ​ຄວາມ​ເຂົ້າໃຈ ຕໍ່​ບັນດາ​ເອກະສານ​ທີ່​ນໍາ​ສະເໜີ​ນີ້ ລ້ວນ​ແລ້ວແຕ່​ມີ​ຄວາມ​ສໍາ​ຄັນ​ຫຼາຍ ເນື່ອງ​ຈາກ​ມັນ​ກ່ຽວ​ພັນ​ໂດຍ​ກົງ ຕໍ່​ການ​ຍົກ​ສູງ​ການ​ປະຕິບັດ​ພາລະ​ບົດບາດ, ສິດ ແລະ ໜ້າທີ່​ຂອງ​ຄະນະ​ເລຂາທິການ​ສະພາ​ແຫ່ງ​ຊາດ ໃຫ້​ມີ​ປະສິດທິພາບ ແລະ ປະສິດ​ທິ​ຜົນ ເວົ້າ​ລວມ, ເວົ້າ​ສະເພາະ ຂອງ​ກົມ​ບໍລິຫານ​-​ພິທີ​ການ.
(ຂ່າວ: ສະພາ​ແຫ່ງ​ຊາດ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ສຳນັກງານເລກທີ66 ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110