ຫົວ​ຂໍ້ : ຍທຂ ເມືອງເງິນ ເຜີຍແຜ່ ແລະ ປູກຈິດສຳນຶກຄວາມປອດໄພ ຕາມທາງຫຼວງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 14/01/2020 10:33:47 ຈຳ​ນວນ​ຜູ້​ເຂົ້າ​ຢ້ຽມ​ຊົມ 410 ຄັ້ງ

ເມືອງ​ເງິນ ແຂວງໄຊ​ຍະ​ບູ​ລີ  ​ຫ້ອງການ​ໂຍທາ​ທິ​ການ ແລະ ຂົນສົ່ງ ເມືອງ​ເງິນ ໄດ້​ສົມທົບ​ກັບ​ພາກສ່ວນ​ທີ່​ກ່ຽວຂ້ອງ ໄດ້​ຈັດຝຶກ​ອົບຮົມ​ໂຄສະນາ​ເຜີຍແຜ່ ແລະ ປູກ​ຈິດ​ສຳນຶກ​ຄວາມ​ປອດ​ໄພ​ຕາມ​ທາງ​ຫຼວງ ໃຫ້​ແກ່​ພະນັກ​ງານ​-​ລັດຖະກອນ ທົ່ວ​ເມືອງ​ເງິນ ຂຶ້ນ​ໃນ​ວັນ​ທີ 10 ມັງກອນ ​ຜ່ານ​ມາ​ ທີ​່ສະໂມສອນ​ເມືອງ​ດັ່ງ​ກ່າວ.
ທ່ານ ສົມ​ເດດ ຄຳ​ພາ ກຳມະການ​ພັກ​ເມືອງ ຫົວໜ້າ ຫ້ອງການໂຍທາ​ທິ​ການ ແລະ ຂົນສົ່ງ ເມືອງ​ເງິນ ໄດ້​ຂຶ້ນ​ເຜີຍແຜ່​ກົດໝາຍ​ວ່າ​ດ້ວຍ​ການ​ຈະລາຈອນ​ທາງບົກ ສະບັບ​ປັບປຸງ ເລກ​ທີ 188/ນຍ ລົງ​ວັນ​ທີ 3 ກໍລະກົດ 2007  ແລະ ທ່ານ ຍັງ​ໄດ້​ຍົກ​ໃຫ້​ເຫັນ 5 ຫຼັກການ ພື້ນຖານ​ການ​ຂັບ​ຂີ່​ປອດ​ໄພ, ການ​ນຳ​ໃຊ້​ລົດ, ການ​ກວດກາ​ສະພາບ​ເຕັກນິກ​ລົດ​ກ່ອນ​ອອກ​ເດີນທາງ​ທຸກ​ຄັ້ງ, ການ​ນຳ​ໃຊ້​ສັນຍານ, ອັນຕະລາຍ​ຈາກ​ການ​ນຳ​ໃຊ້​ລົດ​ທີ່​ບໍ່​ຖືກຕ້ອງ, ຂໍ້​ຫ້າມ ແລະ ການ​ປັບ​ໃໝ​ຜູ້​ລ່ວງ​ລະເມີດ, ເພື່ອ​ແນໃສ່​ເຮັດ​ໃຫ້​ພະນັກງານ, ລັດຖະກອນ, ໄດ້​ຮັບ​ຮູ້​ເຂົ້າໃຈ​ກົດ​ໝາຍ​ວ່າ​ດ້ວຍ​ການ​ຈະ​ລາ​ຈອນ​ທາງບົກ, ເຮັດ​ໃຫ້​ຜູ້​ຂັບ​ຂີ່​ພາຫະ​ນະ​ຕາມ​ທ້ອງ​ຖະໜົນຫຼວງ​ໄດ້​ມີ​ຄວາມ​ປອດ​ໄພ​ຫຼາຍ​ຂຶ້ນ, ຈາກ​ນັ້ນ ທ່ານ ຮ້ອຍ​ໂທ ຈັນ​ແກ້ວ ເທບ​ປັນຍາ ຫົວໜ້າ​ກອງ​ຕຳຫຼວດ​ຈະລາຈອນ ກອງ​ບັນຊາ​ການ ປກສ ເມືອງ​ເງິນ  ກໍໄດ້​ຂຶ້ນອະ ທິບາຍເຄື່ອງໝາຍ​ປ້າຍຈະ ລາຈອນ ທັງ 7 ປະເພດ​ຄື: ປ້າຍ​ເຕືອນ​ອັນຕະລາຍ, ປ້າຍ​ຫ້າມ, ປ້າຍ​ກຳນົດ, ປ້າຍ​ແນະນຳ​ເສັ້ນທາງ, ປ້າຍ​ບອກ​ສິດ, ປ້າຍ​ເພີ່ມ, ປ້າຍ​ບອກ​ສະຖານ​ທີ່. ພ້ອມ​ທັງ​ແນະ​ນຳການ​ໃຊ້​ລົດ-​ໃຊ້​ຖະໜົນ ການ​​ໃສ່ເຂັມຄັດ​ນິລະ​ໄພ, ໃສ່​ໝວກ​ກັນ​ກະທົບ ແລະ ອື່ນໆ. ເພື່ອ​ໃຫ້​ຖືກ​ຕາມ​ກົດ​ຈະລາຈອນ ແລະ ຄວາມ​ປອດ​ໄພຂອງ​ຜູ້​ຂັບ​ຂີ່ອີກ​ດ້ວຍ.
(ຂ່າວ​-​ພາບ: ອິນ​ແປງ ແຫວນ​ຄຳ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110