ຫົວ​ຂໍ້ : ນະຄອນຫຼວງ ຕັ້ງເປົ້າດຶງດູດການລົງທຶນ 16 ພັນຕື້ກວ່າກີບ

ເຜີຍ​ແຜ່​ໂດຍ​: siththiphone rasphone ເວ​ລາ: 23/01/2020 09:32:25 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1684 ຄັ້ງ

    ໃນ​ປີ 2020 ນະຄອນຫຼວງ​ວຽງ​ຈັນ (ນວ) ຈະ​ສູ້​ຊົນ​ໃຫ້​ເສດຖະກິດ​ຂະຫຍາຍຕົວ​ບໍ່​ຫຼຸດ 9,5%, ລາຍ​ຮັບ​ສະເລ່ຍ 6 ພັນ​ກວ່າ​ໂດ​ລາ​ຕໍ່​ຄົນ​ຕໍ່​ປີ, ໃນ​ຂະນະ​ທີ່​ການ​ລົງທຶນ​ທົ່ວ​ສັງຄົມ​ຄາດ​ວ່າ​ຈະ​ຢູ່​ທີ່​ປະມານ 16.700 ຕື້​ກີບ, ສ່ວນ​ປີ 2019 ເສດຖະກິດ​ຂອງ​ນະຄອນຫຼວງ​ວຽງ​ຈັນ​ຂະຫຍາຍຕົວ​ 9,58% ລວມ​ຍອດ​ຜະລິດ​ຕະ​ພັນ​ພາຍ​ໃນ​ບັນລຸ 84.895 ຕຶ້ກວ່າ​ກີບ, ສະເລ່ຍ​ລາຍ​ຮັບ​ຕໍ່​ຫົວ​ຄົນ 5.699 ໂດ​ລາ.
    ທ່ານ ສິນ​ລະ​ວົງ ຄຸດ​ໄພ ທູນ ເຈົ້າ​ຄອງ​ນະຄອນຫຼວງວຽງ​ ຈັນ ໄດ້​ລາຍ​ງານກ່ຽວກັບ​ຜົນ ​ການຈັດຕັ້ງ​ປະຕິບັດ​ແຜນ​ພັດ ທະນາ​ເສດ​ຖະ​ກິດ​-​ສັງຄົມ, ແຜນ​ງົບປະມານ ປະ​ຈໍາ​ປີ 2019  ແລະ ທິດ​ທາງ​ແຜນການ ປະ​ຈໍາ​ປີ 2020 ຂອງ​ອົງການ​ປົກຄອງ ນວ ຕໍ່​ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ປະຊາຊົນ ນວ ຊຸດ​ທີ I ເມື່ອ​ວັນ​ທີ 20 ມັງກອນ​ຜ່ານ​ມາໃຫ້​ຮູ້​ວ່າ: ປີ2019 ເສດຖະກິດ​ຂອງ ນວ ບັນລຸ​ໄດ້  84.895 ຕື້ກ​ວ່າ​ກີບ, ເພີ່ມ​ຂຶ້ນ 9,5% ລື່ນ​ແຜນການ 0,08% ສະເລ່ຍ​ລາຍ​ຮັບ​ຕໍ່​ຫົວ​ຄົນ 5.699 ໂດ​ລາ. ໃນ​ນັ້ນ ໂຄງ​ປະກອບ​ເສດຖະກິດ ເປັນ​ໄປ​ຕາມ​ແຜນ​ເຊັ່ນ: ຂະແໜງ​ກະ​ສິ​ກໍາ-​ປ່າໄມ້​ເພີ່ມ​ຂຶ້ນ 3,54% ກວມ​ເອົາ 13,87%, ຂະແໜງ​ອຸດ​ສາ​ຫະ​ກໍາ ເພີ່ມ​ຂຶ້ນ 12,79% ກວມ​ເອົາ 50,28%, ຂະແໜງ​ບໍລິການ​ເພີ່ມ​ຂຶ້ນ 9,30% ກວມ​ເອົາ 34,43%.
   ທ່ານກ່າວ​ອີກ​ວ່າ: ປີ 2019 ນວ ຍັງ​ເປັນ​ພື້ນ​ທີ່ໆ​ຍັງ​ມີ​ການ​ລົງທຶນ​ຄຶກຄື້ນ, ໂຕ​ເລກ​ການ​ລົງທຶນ​ບັນລຸ 18.253,15 ຕື້​ກີບ ລື່ນ​ແຜນການ 20,70%, ເງິນ​ຊ່ວຍເຫຼືອ​ທາງ​ການ​ເພື່ອ​ພັດທະນາ ODA ປະຕິບັດ​ໄດ້ 474,70 ກວ່າ​ຕື້ກີບ, ຈາກ​ທະ ນາຄານ​ໄດ້ 3,6 ກວ່າ​ຕື້ກີບ ລື່ນ​ແຜນການ​ປີ​ຫຼາຍ​ກວ່າ 6,6%.
   ທ່ານເຈົ້າ​ຄອງ​ນະຄອນ ຫຼວງ​ວຽງ​ຈັນ ກ່າວ​ອີກ​ວ່າ: ປີ 2020 ນະຄອນຫຼວງ​ວຽງ​ຈັນ​ຈະ​ສູ້​ຊົນ​ເຮັດ​ໃຫ້​ເສດຖະກິດ​ຂະຫຍາຍຕົວ​ບໍ່​ຫຼຸດ 9,5%, ມູນ​ຄ່າ​ລວມ​ຍອດ​ຜະລິດ​ຕະ​ພັນ​ພາຍ​ໃນ ຫຼື GDP ໃຫ້​ບັນລຸ 54 ພັນ​ຕື້​ກວ່າ​ກີບ, ລາຍ​ຮັບ​ສະເລ່ຍ​ປະມານ 6.120 ໂດ​ລາ​ຕໍ່​ຄົນ​ຕໍ່​ປີ, ຂະແໜງ​ກະສິກຳ ແລະ ປ່າໄມ້​ໃຫ້​ເພີ່ມ​ຂຶ້ນ 4,5% ກວມ​ເອົາ 14% ຂອງ ຈີ​ດີ​ພີ; ອຸດສາຫະກຳ​ໃຫ້​ເພີ່ມ​ຂຶ້ນ 12,5% ກວມ​ເອົາ 49% ຂອງ ຈີ​ດີ​ພີ ແລະ ການ​ບໍລິການ​ໃຫ້​ເພີ່ມ​ຂຶ້ນ 10% ກວມ​ເອົາ 37% ຂອງ​ຈີ​ດີ​ພີ.
   ສ່ວນ​ການ​ລົງທຶນ ຈະ​ສູ້​ຊົນ​ລະດົມ​ການ​ລົງທຶນ​ທົ່ວ​ສັງຄົມ​ໃຫ້​ໄດ້​ປະມານ 16.700 ຕື້​ກີບ, ໃນ​ນັ້ນ​ການ​ລົງທຶນ​ຂອງ​ລັດ 75 ຕື້​ກີບ, ການ​ລົງທຶນ​ຂອງ​ພາກ​ເອກະ​ຊົນ ທັງ​ພາຍ​ໃນ ແລະ ຕ່າງປະເທດ​ໃຫ້​ບັນລຸ 12.975 ຕື້​ກວ່າ​ກີບ, ທຶນ​ຊ່ວຍເຫຼືອ​ ແລະ ກູ້​ຢືມ 650 ຕື້​ກີບ ແລະ ການ​ລົງ ທຶນ​ຂອງ​ທະນາຄານ​ປະມານ 3 ພັນ​ຕື້​ກີບ.
(ຂ່າວ: ແສງ​ຈັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110