ຫົວ​ຂໍ້ : ນາຍົກ ສົ່ງສານສະແດງຄວາມເຫັນໃຈ ເຖິງນາຍົກ ສປ ຈີນ

ເຜີຍ​ແຜ່​ໂດຍ​: siththiphone rasphone ເວ​ລາ: 30/01/2020 09:42:44 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1012 ຄັ້ງ

   ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈ ເຖິິງ ສະຫາຍ ຫຼີ ເຄີ້ສຽງ  ນາຍົກລັດຖະມົນຕີ  ແຫ່ງ ສາທາລະນະລັດ  ປະຊາຊົນຈີນ ທີ່ນະຄອນຫຼວງປັກກິ່ງ, ເນື້ອໃນສານລະບຸວ່າ:

    ຂ້າພະເຈົ້າໄດ້ຕິດຕາມຢ່າງໃກ້ຊິດ ສະພາບການລະບາດຂອງພະຍາດ ເຊື້ອໄວຣັສໂຄໂລນາ ສາຍພັນໃໝ່ ຢູ່ນະຄອນອູຮັ້ນ ແຂວງຫູເປີຍ  ນັບແຕ່ທ້າຍປີ 2019 ເປັນຕົ້ນມາ ທີ່ໄດ້ແຜ່ຂະຫຍາຍໄປນະຄອນອື່ນໆຂອງ ສປ ຈີນ ອັນໄດ້ສົ່ງຜົນກະທົບຕໍ່ການດໍາລົງຊີວິດ ກໍຄືສ້າງຄວາມສູນເສຍດ້ານຊີວິດແກ່ປະຊາຊົນຈີນຈໍານວນຫຼວງຫຼາຍ.

   ໃນນາມພັກ, ລັດຖະບານ ແລະ ປະຊາຊົນລາວ ກໍຄືໃນນາມສ່ວນຕົວ, ຂ້າພະເຈົ້າຂໍສະແດງຄວາມເຫັນອົກເຫັນໃຈ ແລະ ເສົ້າສະຫຼົດໃຈຢ່າງສຸດຊຶ້ງ ຜ່ານສະຫາຍ ມາຍັງພັກ, ລັດຖະບານ ແລະ ປະຊາຊົນຈີນອ້າຍນ້ອງ ໂດຍສະເພາະບັນດາຄອບຄົວ ຂອງຜູ້ເສຍຊີວິດໃນຄັ້ງນີ້. ພັກ, ລັດຖະບານ ແລະ ປະຊາຊົນລາວ ຂໍແບ່ງປັນຄວາມທຸກໂສກ ແລະ ຂໍເປັນກໍາລັງໃຈໃຫ້ພັກ, ລັດຖະບານ ແລະ ປະຊາຊົນຈີນອ້າຍນ້ອງ ເພື່ອປ້ອງກັນ ແລະ ຕໍ່ສູ້ກັບການລະບາດຂອງເຊື້ອພະຍາດດັ່ງກ່າວ ຮ່ວມກັບວົງຄະນາຍາດສາກົນໃຫ້ມີຜົນສໍາເລັດສູງສຸດ. 

   ຂ້າພະເຈົ້າຕີລາຄາສູງຕໍ່ການຊີ້ນໍາ-ນໍາພາລະດັບສູງ  ແລະ ທັນການຂອງພັກ ແລະ ລັດຖະບານ ສປ ຈີນ ເພື່ອສຸມທຸກກໍາລັງແຮງເຂົ້າໃນການຄວບຄຸມການລະບາດຂອງເຊື້ອໄວຣັສໂຄໂລນາ ດັ່ງກ່າວ ຈົນສາມາດເຮັດໃຫ້ການລະບາດຖືກຈໍາກັດລົງ. ພ້ອມດຽວກັນກໍເຊື່ອໝັ້ນຢ່າງໜັກແໜ້ນວ່າພາຍໃຕ້ການຊີ້ນໍາ-ນໍາພາ ແລະ ການເອົາໃຈໃສ່ຢ່າງໃກ້ຊິດຂອງບັນດາສະຫາຍການນຳຂັ້ນສູນກາງກໍຄືທ້ອງຖິ່ນ, ສປ ຈີນ ຈະສາມາດຜ່ານຜ່າຄວາມທຸກຍາກໃນຄັ້ງນີ້ ແລະ ຟື້ນຟູສະພາບດັ່ງກ່າວໃຫ້ກັບຄືນສູ່ສະພາບປົກກະຕິໂດຍໄວ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110