ຫົວ​ຂໍ້ : ຮອງປະທານປະເທດ ຕ້ອນຮັບທູດ ອາແຊັກໄບຊານ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 06/02/2020 09:37:04 ຈຳ​ນວນ​ຜູ້​ເຂົ້າ​ຢ້ຽມ​ຊົມ 682 ຄັ້ງ

  ທ່ານ ພັນ​ຄໍາ ວິພາ​ວັນ ຮອງ​ປະທານ​ປະເທດ​ແຫ່ງ ສປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳ​ນັບ​ອໍາ​ລາ​ຂອງ​ທ່ານ ອານາ ອີ​ມາ​ນົບ (Anar lmanov) ເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ​ອາ​ແຊັກ​ໄບ​ຊານ, ໃນ​ວັນ​ທີ 5 ກຸມພາ​ ທີ່​ທໍາ​ນຽບ​ປະທານ​ປະ​ເທດ.
  ໃນ​ໂອກາດ​ດັ່ງກ່າວ ທ່ານ ຮອງ​ປະທານ​ປະເທດ, ໄດ້​ສະ ແດງ​ຄວາມ​ຕ້ອນຮັບ, ຊົມເຊີຍ ແລະ ຕີ​ລາຄາ​ສູງ​ຕໍ່ຜົນງານ​ຂອງ​ທ່ານ​ທູດຕະຫຼອດ​ໄລຍະ​ເວລາ​ທີ່​ປະຕິບັດ​ໜ້າທີ່​ການ​ທູດ​ຢູ່​ ສປປ ລາວ ຊຶ່ງ​ເປັນ​ການ​ປະກອບສ່ວນ​ເສີມສ້າງສາຍ​ພົວພັນ​ມິດຕະພາບ ແລະ ການ​ຮ່ວມ​ມື ລະຫວ່າງ ສປປ ລາວ​-​ອາ​ແຊັກ​ໄບ​ຊານ​ໄດ້​ຮັບ​ການ​ຂະ ຫຍາຍຕົວ​ຢ່າງ​ຕໍ່​ເນື່ອງ; ສ່ວນ​ການ​ຮ່ວມ​ມື​ໃນ​ໄລຍະ​ໃໝ່​ນີ້ ກໍ​ໃຫ້​ສືບຕໍ່​ພົວພັນ​ແລະ ຂະຫຍາຍ​ການ​ຮ່ວມ​ມື​ກັນ ທາງ​ດ້ານ​ການ​ຄ້າ, ການ​ລົງທຶນ​ໃຫ້​ຫຼາຍ​ຂຶ້ນ. ພ້ອມ​ທັງ​ອວຍພອນ​ໃຫ້​ທ່ານ​ທູດ​ຈົ່ງ​ເດີນທາງ​ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ ແລະ ປະສົບ​ຜົນສຳເລັດ​ໃນ​ໜ້າທີ່​ວຽກ​ງານ​ໃໝ່​ຂອງ​ທ່ານ. 
  ທ່ານ ທູດ​ກໍ​ໄດ້​ສະແດງ​ຄວາມ​ຂອບ​ອົກ​ຂອບໃຈ​ຕໍ່ ທ່ານ​ຮອງປະທານ​ປະເທດ​ທີ່ໄດ້ສະຫຼະ​ເວລາ​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ, ພ້ອມ​ທັງ​ສະແດງ​ຄວາມ​ຂອບໃຈ​ຢ່າງ​ສູງ ຕໍ່​ລັດຖະບານ ສປປ ລາວ ທີ່​ໄດ້​ໃຫ້ການ​ຮ່ວມ​ມື, ສະໜັບສະໜູນ​ຊ່ວຍເຫຼືອ ແລະ ອຳນວຍ​ຄວາມ​ສະດວກ​ຕະຫຼອດ​ໄລຍະ​ເວລາ​ທີ່​ຕົນ​ປະຕິບັດ​ໜ້າທີ່​ການ​ທູດ​ຢູ່ ສປປ ລາວ ຈົນ​ປະສົບ​ຜົນສຳເລັດ​ເປັນ​ຢ່າງ​ດີ.
ສປປ​ລາວ​-​ອາ​ແຊັກ​ໄບ​ຊານ ໄດ້​ສ້າງ​ສາຍ​ພົວພັນການ ​ທູດ​ນໍາ​ກັນ ໃນ​ວັນ​ທີ 22 ພຶດ ສະພາ 1995 ຊຶ່ງ​ມີ​ສໍາ​ນັກ​ ງານ​ສະຖານທູດ​ຕັ້ງ​ຢູ່ຮ່າ​ໂນ້ຍ ສສ ຫວຽດນາມ. 
  ໃນ​ວັນ​ດຽວ​ກັນ, ທ່ານ ສະເຫຼີມ​ໄຊ ກົມ​ມະ​ສິດ ລັດຖະ ມົນຕີ​ກະຊວງ​ການ​ຕ່າງປະເທດ ແລະ ທ່ານ ນາງ ສູນ​ທອນ ໄຊ​ຍະ​ຈັກ ຫົວໜ້າ​ຄະນະ​ພົວພັນ​ການ​ຕ່າງປະເທດ​ສູນ​ກາງ​ພັກ ກໍ​ໄດ້​ຕ້ອນຮັບ​ທ່ານ​ທູດ​ອາ​ແຊັກ​ໄບ​ຊານ​ເຂົ້າ​ຢ້ຽມ​ອຳ​ລາ ເຊັ່ນ​ດຽວ​ກັນ. 
( ຂ່າວ: ແສງ​ຈັນ+ພາບ: ພູ​ວຽງ​ຄໍາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110