ຫົວ​ຂໍ້ : ຈັດງານເທດສະການຮູບເງົາຍີ່ປຸ່ນ ຄັ້ງທີ 4

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 10/02/2020 10:04:33 ຈຳ​ນວນ​ຜູ້​ເຂົ້າ​ຢ້ຽມ​ຊົມ 547 ຄັ້ງ

  ສູນ​ອາຊີ​ມູນ​ນິທິ​ຍີ່ປຸ່ນ​ປະຈຳ​ລາວ​ໄດ້​ຈັດ​ງານ​ເທດ ສະການ​ຮູບເງົາ​ຍີ່ປຸ່ນ​ ຄັ້ງ​ທີ 4 ຂຶ້ນ​ໃນ​ວັນ​ທີ 7 ກຸມພາ​ ທີ່​ໂຮງ​ຮູບເງົາ​ເມ​ເຈີ​ສູນ​ການ​ຄ້າ​ວຽງ​ຈັນ​ເຊັນ​ເຕີ​ ນະຄອນຫຼວງ​ວຽງ​ຈັນ, ເປັນ​ກຽດ​ເຂົ້າ​ຮ່ວມ​ຂອງ​ທ່ານ ສະຫວັນ​ຄອນ ຣາ​ຊ​ມຸນ​ຕຣີ ຮອງ​ລັດຖະມົນຕີ​ກະຊວງ​ຖະແຫຼງ​ຂ່າວ, ວັດທະນະທຳ ແລະ ທ່ອງ​ທ່ຽວ (ຖວທ), ທ່ານ  ທາ​ເກ​ວາ​ກະ ເກ​ໂຊ (Takewaka Keizo) ເອກ​ອັກ​ຄະ​ຣາ​ຊະ​ທູດ​ຍີ່ປຸ່ນ ປະຈຳ ສປປ ລາວ, ບັນດາ​ທູຕາ​ນຸ​ທູດ 
ພ້ອມ​ດ້ວຍ​ແຂກ​ຖືກ​ເຊີນ.
  ໃນ​ພິທີ, ທ່ານ ຢູ​ຈິ​ດະ ຮິ​ໂ​ຣ​ຊິ (UCHIDA Hiroshi) ຜູ້ອຳນວຍການ​ສູນ​ອາຊີ​ມູນ​ນິທິ​ຍີ່ປຸ່ນ ກ່າວ​ວ່າ: ການ​ຈັດ​ງານ​ເທດສະການ​ຮູບເງົາ​ຍີ່ປຸ່ນ​ໃນ​ຄັ້ງ​ນີ້ ຖື​ວ່າ​ນອນ​ຢູ່​ໃນ​ໂຄງການ​ໃຫຍ່​ເພື່ອ​ເປັນ​ການ​ແລກປ່ຽນ​ດ້ານ​ວັດ​ທະ​ນະ​ທໍາ ກັບ​ບັນດາ​ປະເທດ​ໃນ​ອາຊີ​ໂດຍ​ຜ່ານ​ການ​ໃຊ້​ຮູບເງົາ​ເປັນ​ສື່​ກາງ​ໃນ​ການ​ສົ່ງເສີມ​ຮູບເງົາ​ໃຫ້​ເປັນ​ທີ່​ຮູ້ຈັກ​ລະຫວ່າງ​ອາ​ຊຽນ​ກັບ​ຍີ່ປຸ່ນ ຊຶ່ງ​ທາງ​ສໍາ​ນັກ​ງານ​ໃຫຍ່​ຂອງ​ປະເທດ​ຍີ່ປຸ່ນ​ເຫັນ​ຄວາມ​ສຳຄັນ​ໄດ້​ຈັດ​ໃຫ້​ມີ​ການ​ສາຍຮູບເງົາ​ຈາກ​ອາຊີ​ຕາເວັນ​ອອກ​ສ່ຽງ​ໃຕ້​ໃນ​ງານ​ເທດສະການ​ຮູບເງົາ​ສາກົນ​ໂຕ​ກຽວ​ຂຶ້ນ​ທຸກໆ​ປີ; ມູນ​ນິທິ​ຍີ່ປຸ່ນ​ໄດ້​ຖືກ​ສ້າງຕັ້ງ​ຂຶ້ນ​ໃນ​ປີ 1972 ໂດຍ​ມີ ຈຸດປະສົງ​ແມ່ນ​ເພື່ອ​ສົ່ງເສີມ​ການ​ແລກປ່ຽນ​ດ້ານ​ວັດ​ທະ​ນະ​ທໍາ​ລະດັບ​ສາກົນ ພ້ອມ​ທັງ​ສ້າງ​ຄວາມ​ເຂົ້າໃຈ​ກັນ​ລະຫວ່າງ​ຍີ່ປຸ່ນ ແລະ ຫຼາຍໆ​ປະເທດ​ໃນ​ໂລກ.
  ທ່ານ​ໄດ້​ກ່າວ​ໃຫ້​ຮູ້​ອີກ​ວ່າ: ຮູບເງົາ​ທີ່​ນຳ​ມາ​ສາຍ​ໃນ​ຄັ້ງ​ນີ້​ມີ​ທັງ​ໝົດ 9 ເລື່ອງ​ຊຶ່ງ​ໄດ້​ມີ​ການ​ນໍາ​ມາ​ສາຍ​ໃນ​ປີຜ່ານມາ, ໃນ​ນີ້​ຮູບເງົາ 8 ເລື່ອງ​ຈະ​ມີ​ສຽງ​ພາກ​ເປັນ​ພາສາ​ຍີ່ປຸ່ນ ພ້ອມ​ທັງ​ມີ​ຄໍາ​ບັນຍາຍ​ເປັນ​ພາສາ​ລາວ ແລະ ອັງກິດ, ຍົກເວັ້ນ​ເລື່ອງ​ໂກ້​ຈັ່ງ (Gochan) ເຈົ້າ​ຊາຍ​ໝີ​ມະຫັດສະຈັນ​ທີ່​ພາກ​ເປັນ​ພາສາ​ໄທ​ແຕ່​ກໍ່​ມີ​ຄໍາ​ບັນຍາຍ​ເປັນ​ພາສາ​ລາວ ແລະ ອັງກິດ​ເຊັ່ນ​ກັນ. ສຳລັບ​ປີ້​ເຂົ້າ​ຊົມ​ຫຼຸດ​ລາຄາ​ພິເສດ​ພຽງ​ແຕ່ 20.000 ກີບ ຕໍ່​ຮູບເງົາ​ໜຶ່ງ​ເລື່ອງ​ເທົ່າ​ນັ້ນ. ສ່ວນ​ມື້​ສາຍຮູບເງົາ​ແມ່ນ​ວັນ​ທີ 8-9 ກຸມພາ ເປີດ​ສາຍ​ເປັນ​ຮອບ​ທີ 1 ແລະ ໃນ​ວັນ​ທີ 14-15-16 ກຸມພາ ສາຍ​ເປັນ​ຮອບ​ທີ 2 , ໃນ​ງານ​ຄັ້ງ​ນີ້​ໄດ້​ມີ​ຫຼາກ​ຫຼາຍ​ຮູບເງົາ​ທີ່​ຖືກ​ຄັດ​ເລືອກ​ອອກ​ມາ​ບໍ່​ວ່າ​ຈະ​ເປັນ​ຮູບເງົາ​ກະຕູນ, ກິລາ, ລຶກລັບ, ຄວາມ​ຮັກ​ໂຣ​ແມນ​ຕິກ, ການ​ຕໍ່ສູ້, ການສະແດງ, ຕະຫຼົກ, ຄອບຄົວ, ເພງ ແລະ ຮູບເງົາ​ຍ້ອນ​ຍຸກ​ອື່ນໆເຊັ່ນ: ຮູບເງົາ​ກະຕູນ​ເລື່ອງ​ໂກ້​ຈັ່ງ​ເຈົ້າ​ຊາຍ​ໝີ​ມະຫັດສະຈັນ,  ພໍ່​ຂອງ​ຂ້ອຍ​ແມ່ນ​ນັກ​ມວຍ​ປ້ຳ, ຄາດຕະກຳ​ທີ່​ໂຮງແຮມ​ມາດ​ຊະ​ກະ​ເລດ, ບົດ​ເພງ​ແຫ່ງ​ຄວາມ​ຮັກ​ນ້ອຍໆ , ລູກ​ຫຼານ​ຂອງ​ທ້ອງ​ທະເລ, ນັກ​ຂ້າ​ສາຍຟ້າ​ແລບ,  ປິນໂຕ​ແທນ​ໃຈ​ແມ່, ສະກົດ​ຈິດ​ຕິດ​ໃຈ​ໄປ​ກັບ​ສຽງ​ເພງ, ພາລະກິດ​ຍ້າຍ​ຖິ່ນ​ດິນແດນ​ສະ​ມູ​ໄລ, ສຳລັບ​ຮູບເງົາ​ແລ້ວ​ຖື​ວ່າ​ເປັນ​ສື່​ທີ່​ດີ​ທີ່​ເຮັດ​ໃຫ້​ພວກ​ເຮົາ​ສາມາດ​ເຂົ້າໃຈ​ເຖິງ​ວັດ​ທະ​ນະ​ທໍາ ແລະ ຊີວິດ​ຂອງ​ຜູ້​ຄົນ​ທີ່ຢູ່​ໃນ​ແຕ່​ລະ​ເຂດ​ຕ່າງ​ກັນ, ສະນັ້ນ​ທາງ​ສຳນັກ​ໃຫຍ່​ທີ່​ໂຕ​ກຽວ​ຈິ່ງ​ໄດ້​ລິ​ເລີ່ມ​ງານ”ເທດສະການ​ຮູບເງົາ​ຍີ່ປຸ່ນ” ໃນ​ປີ 2015 ຊຶ່ງ​ເປັນ​ໂຄງການ​ລະດັບ​ໂລກ ແລະ ມີ​ການ​ພັດທະນາ​ປີ​ຕໍ່​ປີ​ຈົນ​ເຮັດ​ໃຫ້​ສາມາດ​ປະສານ​ງານ​ກັບ 14ປະເທດ​ເພື່ອ​ຈັດ​ງານ​ເທດສະການ​ຮູບເງົາ​ຍີ່ປຸ່ນ ຊຶ່ງ​ລວມ​ມີ 10 ປະເທດ​ອາ​ຊຽນ,  ອົສ​ຕຣາ​ລີ, ຈີນ, ອິນ​ເດຍ ແລະ ຣັດ​ເຊຍ.
(ຂ່າວ​-​ພາບ: ພູ​ວັນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110