ຫົວ​ຂໍ້ : ລັດຖະມົນຕີ ກະຊວງ ຖວທ ຕ້ອນຮັບທູດ ສີລັງກາ ແລະ ເນປານ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 11/02/2020 09:00:29 ຈຳ​ນວນ​ຜູ້​ເຂົ້າ​ຢ້ຽມ​ຊົມ 523 ຄັ້ງ

  ທ່ານ ກິ​ແກ້ວ ໄຂ​ຄຳ​ພິທູນ ລັດຖະມົນຕີ ກະຊວງ ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ (ຖວທ )ໄດ້​ຕ້ອນຮັບ​ການເຂົ້າ​ຢ້ຽມ​ຂ່ຳ​ນັບຂອງ​ ທ່ານ ນາງ ຈາ​ຢາ​ສຸ​ຣິ​ຢາ ອາ​ຣາ​ຊາ​ຈິ ສາມັນ​ທາ ຄູ​ມາ​ຣິ ຈາ​ຢາ​ສຸ​ຣິ​ຢາ (Ms Jayasuriya Arachachige Samantha Kumari Jayasuriya) ເອກ​ອັກ​ຄະ​ລັດ​ຖະ​ທູດ ແຫ່ງ ສີ​ລັງ ກາ ປະຈຳ ສປປ ລາວ ຊຶ່ງ​ມີ​ສຳ ນັກງານ​ໃຫຍ່​ຕັ້ງ​ຢູ່ ບາງກອກ ຣາ​ຊະ​ອານາຈັກ​ໄທ ໃນ​ວັນ​ທີ 7 ກຸມພາຜ່ານ​ມາ ທີ່​ກະຊວງ ຖວທ. ໃນ​ໂອກາດ​ມາ​ຍື່ນ​ສານ​ຕາ​ຕັ້ງ​ຕໍ່ທ່ານປະທານ​ປະເທດ ແຫ່ງ ສປປ ລາວ  ພ້ອມ​ທັງ​ປຶກສາ​ຫາລື​ສານ​ຕໍ່​ກ່ຽວ​ກັບ​ວຽກ​ງານ​ການ​ຮ່ວມ​ມື​ສອງ​ຝ່າຍ ແລະ ຫຼາຍ​ຝ່າຍ ໃນ​ຂົງເຂດ​ວຽກ​ງານ​ວັດທະນະທຳ ແລະ ທ່ອງ​ທ່ຽວ ໃຫ້​ນັບ​ມື້​ນັບ​ຫຼາຍ​ຂຶ້ນ.
  ທ່ານ ກິ​ແກ້ວ ໄຂ​ຄຳພິ ທູນ ໄດ້​ສະແດງ​ຄວາມ​ຍິນດີ​ຕ້ອນຮັບ​ອັນ​ອົບ​ອຸ່ນ​ມາ​ຍັງ ທ່ານ  ນາງ  ຈາ​ຢາ​ສຸ​ຣິ​ຢາ ອາ​ຣາ​ຊາຈິ ສາມັນ​ທາ ຄູ​ມາ​ຣິ ຈາ​ຢາ​ສຸ​ຣິ​ຢາ ທີ່​ໄດ້​ເດີນທາງ​ມາ​ຮັບ​ຕຳ​ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ ສີ​ລັງກາ ຄົນ​ໃ​ໝ່​ປະຈຳ ສປປ ລາວ​ໃນ​ຄັ້ງ​ນີ້ ຊຶ່ງ​ເປັນ​ການ​ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ​ອັນ​ເປັນ​ມູນເຊື້ອ​ທີ່​ດີ​ນັບ​ມື້​ນັບ​ໄດ້​ຮັບ​ການ​ເສີມ​ຂະຫຍາຍ​ຢ່າງ​ຕໍ່​ເນື່ອງ ໂດຍ​ສະເພາະ​ວຽກ​ງານ​ວັດທະນະທຳ ແລະ ທ່ອງ​ທ່ຽວ.
  ໃນ​ໂອກາດ​ດຽວ​ກັນ ທ່ານທູດ ໄດ້​ສະແດງ​ຄວາມ​ຂອບໃຈ​ເປັນ​ຢ່າງ​ສູງຕໍ່​ທ່ານ ລັດຖະມົນຕີ ທີ່​ໄດ້​ໃຫ້​ກຽດ​ຕ້ອນຮັບ​ຢ່າງ​ອົບ​ອຸ່ນ​ໃນ​ຄັ້ງ​ນີ້, ພ້ອມ​ຕີ​ລາຄາ​ສູງ ຕໍ່​ການ​ພົວພັນ​ຮ່ວມ​ມືຂອງ 2 ປະເທດ ແລະ ຈະ​ສືບຕໍ່​ເສີມ​ຂະຫຍາຍສາຍ​ພົວພັນ ມິດຕະພາບ ແລະ ​ການ​ຮ່ວມ​ມື​ໃຫ້​ນັບ​ມື້​ນັບ​ຂະຫຍາຍ ຕົວ​ຍິ່ງໆ​ຂຶ້ນ.
  ໃນ​ເວລາ​ຕໍ່​ມາ​ຂອງ​ວັນ​ດຽວກັນ ທ່ານ ກິ​ແກ້ວ ໄຂ​ຄໍາ​ພິທູນ ລັດຖະມົນຕີ​ກະຊວງ ຖະແຫຼງຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ (ຖວທ ) ກໍ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງ​ທ່ານ ກາ​ເນດ ພຣາ​ສາດ ດາ​ເກລ (Kanesh Prasad Dhakal) ເອກ​ອັກ​ຄະ​ລັດ​ຖະ​ທູດ ແຫ່ງ ເນ​ປານ ປະຈຳ ສປປ ລາວ ຊຶ່ງ​ມີ​ສຳນັກງານ​ຕັ້ງ​ຢູ່ ບາງກອກ ຣາ​ຊະ​ອານາຈັກ​ໄທ, ໃນ​ໂອກາດ​ມາ​ຍື່ນ​ສານ​ຕາ​ຕັ້ງ​ຕໍ່ທ່ານປະທານ​ປະເທດ ແຫ່ງ ສປປ ລາວ, ທັງ​ສອງ​ຝ່າຍ​ໄດ້​ໂອ​້ລົມ ແລະ ປຶກສາ​ຫາລື​ກ່ຽວ​ກັບ​ການ​ເພີ່ມ​ທະວີ​ວຽກ​ງານ​ການ​ຮ່ວມ​ມື​ສອງ​ຝ່າຍ​ໃຫ້​ມີ​ປະສິດ​ທິ​ຜົນ​ຫຼາຍ​ຂຶ້ນ​ກວ່າ​ເກົ່າ ເຊັ່ນ​ດຽວ​ກັບ​ຂົງເຂດ​ວຽກ​ງານ​ການທ່ອງທ່ຽວ ຊຶ່ງ​ນັບ​ແຕ່​ປີ 2017 ເປັນຕົ້ນ​ມາ ໃນ​ແຕ່​ລະ​ປີ​ກໍ​ໄດ້​ຮ່ວມ​ກັບ​ສະຖານທູດ ເນ​ປານ ຈັດ​ຕັ້ງ​ກິດຈະກຳ​ສົ່ງເສີມ​ການທ່ອງທ່ຽວ​ເນ​ປານ​-​ລາວ ພາຍ​ໃຕ້​ຫົວຂໍ້ “ປະເທດ​ເນ​ປານ​ທີ່​ສວຍ​ງາມ  “Napal si beautiful: Visit & Enjoy in Napal”” ຊຶ່ງ​ໄດ້​ເຮັດ​ໃຫ້​ປະຊາຊົນ​ລາວ​ໄດ້​ຮັບ​ຮູ້​ກ່ຽວ​ກັບປະເທດ ເນ​ປານ ຢ່າງ​ກວ້າງ ຂວາງ​ເພີ່ມ​ຂຶ້ນ.
   (ຂ່າວ+ພາບ: ຍຸ​ພິນ​ທອງ  )
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110