ຫົວ​ຂໍ້ : ນວ ຕັ້ງເປົ້າເປັນເຈົ້າຫຼຽນຄຳ ໃນ ຊຽງຂວາງ ເກມ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 11/02/2020 09:16:03 ຈຳ​ນວນ​ຜູ້​ເຂົ້າ​ຢ້ຽມ​ຊົມ 339 ຄັ້ງ

ພິທີ​ໂອ້​ລົມ​ນັກ​ກິລາ ກ່ອນ​ເຂົ້າ​ຮ່ວມ​ງານ​ມະ​ຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI (ຊຽງ​ຂວາງ ເກມ) ຈັດ​ຂຶ້ນ​ວັນ​ທີ 1 ກຸມພາຜ່ານ​ມາ ຢູ່​ສະໂມສອນ​ກິລາ​ບຶງ​ຂະ​ຫຍອງ ໂດຍ​ມີ​ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ (ນວ) ຫົວໜ້າ​ນຳພາ​ນັກ​ກິລາ ນວ ເຂົ້າ​ຮ່ວມ​ຊຽງ​ຂວາງເກມ ພ້ອມ​ດ້ວຍ​ບັນດາ​ການ​ນຳ ນວ ສະຫະພັນຄະນະ​ຮັບຜິດຊອບ​ກິລາ 28 ປະເພດ ຄູ​ຝຶກ ແລະ ນັກກິລາ​ເຂົ້າ​ຮ່ວມ.
ທ່ານ ສົມ​ພອນ ສອນ​ດາລາ ຮອງ​ຫົວໜ້າ​ພະ​ແນ​ກ​ສຶກສາ​ທິ​ການ ແລະ ກິລາ ນວ ຫົວໜ້າ​ອະ​ນຸ​ກຳມະການ​ເຕັກນິກ ກ່າວ​ວ່າ: ພະ​ແນ​ກ​ສຶກສາ​ທິ​ການ ແລະ ກິລາ ນວ ໄດ້​ສົມທົບ​ກັບເມືອງ, ພະ​ແນ​ກ​ທີ່​ຮັບຜິດຊອບ​ປະເພດ​ກິລາ ລົງ​ຊຸກຍູ້​ປະເພດ​ທີ່​ຕົນ​ຮັບຜິດຊອບ ປັດຈຸບັນ​ຄູ​ຝຶກ ນັກ​ກິລາ ໄດ້​ເລັ່ງ​ຝຶກຊ້ອມ​ຢ່າງ​ໜັກ ໂດຍ​ສະເພາະ​ດ້ານ​ເຕັກນິກ ແລະ ຍຸດທະ ວິທີ​ຕ່າງໆ ເພື່ອ​ກຽມພ້ອມ​ໃນ​ງານມະຫະ​ກຳ​ກິລາ​ແຫ່ງ​ຊາດ ຄັ້ງ​ທີ 11 ​ໃນວັນ​ທີ 22 ມີ​ນາ-1 ເມສາ 2020 ເພື່ອ​ນຳ​ເອົາ​ກຽດ ແລະ ສັກ​ສີມາ​ສູ່​ຊາວ ນວ.
ເຖິງ​ວ່າ​ໄລຍະ​ຜ່ານ​ມາ ການ​ຕອບ​ສະໜອງ​ງົບປະມານ​ບໍ່​ພຽງພໍ ຍ້ອນ​ມີ​ວິ​ກິດ​ການ​ຕ່າງໆ​ເກີດ​ຂຶ້ນ​ຢູ່​ລາວ ເວົ້າ​ສະເພາະ​ວິ​ກິດ​ການ​ທາງ​ທຳ​ມະ​ຊາດ ແລະ ເຫດການ​ອື່ນໆ ແຕ່​ຄູ​ຝຶກນັກ​ກິລາ ນວ ກໍ​ໄດ້​ສູ້​ຊົນ​ຝຶກຊ້ອມ ເພື່ອ​ຈະ​ໃຫ້​ເປັນ​ເຈົ້າ​ຫຼຽນ​ຄຳ ຈຶ່ງ​ຮຽກຮ້ອງ​ຊາວ ນວ ຈົ່ງ​ຮ່ວມ​ໃຈ​ກັນ​ສົ່ງ​ນັກ​ກິລາ ນວ ເຂົ້າ​ຮ່ວມ​ມະ​ຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI ໃຫ້​ມີ​ຜົນສຳເລັດ​ສູງ.
ທ່ານ ສີ​ຫຸນ ສິດທິ​ລື​ໄຊ ໄດ້​ສະແດງ​ຄວາມ​ຊົມເຊີຍ​ຕໍ່​ສະຫະພັນ ຄູ​ຝຶກ ແລະ ນັກ​ກິລາ ນວ ທີ່​ໄດ້ເອົາ ໃຈໃສ່​ຝຶກຊ້ອມ​ຢ່າງ​ມີ​ຄວາມ​ຮັບຜິດ ຊອບ​ສູງ ເພື່ອ​ກຽມພ້ອມ​ເຂົ້າສູ່​ການ ​ແຂ່ງຂັນ​ທີ່​ມີ​ຄວາມ​ໝາຍ​ຄວາມ​ສຳ ຄັນ ທີ່​ຊາວ​ລາວ​ທົ່ວ​ປະເທດ ພ້ອມ ພຽງ​ຮຽງ​ໜ້າ​ກັນ​ກຽມ​ເຂົ້າ​ຮ່ວມ​ງານ​ດັ່ງກ່າວ ໂດຍ​ສະເພາະ ນວ ເພື່ອ​ສູ້​ຊົນ​ຍາດ​ເອົາ​ຜົນສຳເລັດ​ມາສູ່​ຊາວ​ນວ ​ຢ່າງ​ແທ້​ຈິງ.   
(ຂ່າວ: ວົງຈອນກິລາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110