ຫົວ​ຂໍ້ : ສະພາແຫ່ງຊາດ ສະຫຼຸບປີ 2019 ພ້ອມຍ້ອງຍໍ ພະນັກງານດີເດັ່ນ

ເຜີຍ​ແຜ່​ໂດຍ​: siththiphone rasphone ເວ​ລາ: 12/02/2020 09:11:44 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1018 ຄັ້ງ

   ສະພາແຫ່ງຊາດຈັດກອງ ປະຊຸມສະຫຼຸບຕີລາຄາການ ເຄື່ອນໄຫວວຽກງານພາຍໃນຂອງສະພາແຫ່ງຊາດ  ແລະ ຂະບວນການແຂ່ງຂັນຮັກຊາດ ແລະ ພັດທະນາປະຈຳປີ 2019 ທິດທາງແຜນການປະຈຳປີ 2020 ຂຶ້ນໃນວັນທີ 11 ກຸມພານີ້  ທີ່ສະພາແຫ່ງຊາດ (ຫຼັກ6) ໂດຍເປັນປະທານຂອງທ່ານ  ນາງ ປານີ ຢາທໍ່ຕູ້ ປະທານສະພາແຫ່ງຊາດ,  ມີທ່ານຮອງປະທານສະພາ, ຄະນະປະຈໍາ ແລະ ພາກສ່ວນກ່ຽວຂ້ອງເຂົ້າຮ່ວມ.

   ທ່ານ ນາງ ສວນສະຫວັນ ວິຍະເກດ ຄະນະປະຈຳສະພາແຫ່ງຊາດ ເລຂາທິການສະພາແຫ່ງຊາດ ໄດ້ຂຶ້ນຜ່ານບົດສະ ຫຼຸບຕີລາຄາການເຄື່ອນໄຫວວຽກງານພາຍໃນຂອງສະພາແຫ່ງຊາດປະຈຳປີ 2019 ແລະ ທິດທາງແຜນການປະຈຳປີ 2020 ວ່າ: ໃນ 1 ປີຜ່ານມາສະ ພາແຫ່ງຊາດສາມາດຍາດໄດ້ ຜົນງານພົ້ນເດັ່ນ ເປັນຕົ້ນກອງປະຊຸມສະໄໝສາມັນເທື່ອທີ 7 ແລະ ເທື່ອທີ 8 ຂອງສະພາແຫ່ງຊາດ ຊຸດທີ VIII ໄດ້ພິຈາລະນາຮັບຮອງເອົາກົດໝາຍຈຳນວນ 18 ສະບັບ ຮັບຮອງເອົາມະຕິກອງປະຊຸມສະພາແຫ່ງຊາດກ່ຽວກັບບັນຫາສຳຄັນພື້ນຖານຂອງປະເທດຊາດ ມີທັງໝົດ 33 ສະບັບ  ທັງໄດ້ດຳເນີນການປະເມີນຜົນດ້ວຍການໃຫ້ຄະແນນຕໍ່ການປະຕິບັດໜ້າທີ່ຂອງບຸກຄະລາກອນທີ່ສະພາແຫ່ງຊາດເລືອກຕັ້ງໄດ້ຮັບຮອງເອົາການສະເໜີແຕ່ງຕັ້ງຈຳນວນ  69 ທ່ານ ຍິງ 14 ທ່ານ ແລະ ຄະນະ ປະຈຳສະພາແຫ່ງຊາດ, ໄດ້ພິ ຈາລະນາບັນຫາສໍາຄັນຕ່າງໆ 114 ເລື່ອງ  ແລະ  ຮັບຮອງເປັນ ມະຕິຂອງຄະນະປະຈຳສະພາແຫ່ງຊາດຈຳນວນ 50 ສະບັບ,  ນອກຈາກນີ້ຍັງໄດ້ ຕິດຕາມກວດກາການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດ ໝາຍທີ່ຕິດພັນກັບການເກັບ ລາຍຮັບ,  ການສ້າງວິຊາຊີບ,  ການພັດທະນາສີມືແຮງງານ ທີ່ມີຄຸນນະພາບ, ການສ້າງວຽກເຮັດງານທໍາຂອງປະຊາ ຊົນ,  ການຕິດຕາມກວດກາ,  ການຕົກລົງຂອງຄະນະປະຈໍາສະພາແຫ່ງຊາດກ່ຽວກັບການຈັດຕັ້ງປະຕິບັດນິຕິກໍາທີ່ພົວພັນກັບການເຊົ່າສຳປະທານທີ່ດິນ, ຜ່ານການຕິດຕາມກວດ ກາເຫັນວ່າລັດຖະບານກໍຄືຂະແໜງການທີ່ກ່ຽວຂ້ອງເອົາ ໃຈໃສ່ສ້າງ, ປັບປຸງ ແລະ ຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍເຂົ້າໃນການປະ ຕິບັດໜ້າທີ່ວຽກງານດັ່ງກ່າວນັບມື້ນັບດີຂຶ້ນ  ປະກອບສ່ວນໃນການປະຕິບັດແຜນພັດທະນາເສດຖະກິດ-ສັງຄົມ,  ແຜນງົບ ປະມານແຫ່ງລັດ ລວມທັງການພັດທະນາສີມືແຮງງານການສ້າງອາຊີບທີ່ສາມາດສ້າງລາຍຮັບໃຫ້ແກ່ປະຊາຊົນຫຼຸດພົ້ນອອກຈາກຄວາມທຸກຍາກ.

   ສຳລັບຂະບວນການແຂ່ງ ຂັນຮັກຊາດ ແລະ ພັດທະນາຄະນະຮັບຜິດຊອບຂະບວນແຂ່ງຂັນຮັກຊາດ ແລະ ພັດທະ ນາໄດ້ເປີດຂະບວນການແຂ່ງ ຂັນຮັກຊາດ ແລະ ພັດທະນາ ຊຶ່ງຜ່ານການຈັດຕັ້ງປະຕິບັດສາມາດສະຫຼຸບສັງລວມໄດ້ຄື: ຜ່ານການປະເມີນຜົນມີພະນັກ ງານລັດຖະກອນປະເພດດີຫຼາຍຈຳນວນ 90 ຄົນ, ປະເພດດີ 252 ຄົນ ແລະ ປະເພດກາງ 13 ຄົນ.

   ນອກຈາກນີ້ ຍັງໄດ້ຍ້ອງຍໍບຸກຄົນ ແລະ ກົມກອງດີເດັ່ນຈຳນວນໜຶ່ງ ຊຶ່ງໄດ້ຮັບໃບຍ້ອງ ຍໍ ແລະ ໃບຊົມເຊີຍຈາກຄະນະປະຈຳ ແລະ ຄະນະເລຂາທິການສະພາແຫ່ງຊາດ  ໂດຍແມ່ນທ່ານ ນາງ   ປານີ  ຢາທໍ່ຕູ້  ໄດ້ໃຫ້ກຽດມອບໃບຍ້ອງຍໍໃຫ້ແກ່ກົມກອງ ແລະ ບຸກຄົນທີ່ມີຜົນງານດີເດັ່ນ ພ້ອມທັງໃຫ້ກຽດໂອ້ລົມໂດຍເນັ້ນໜັກໃຫ້ທຸກພາກສ່ວນການຈັດຕັ້ງພາຍໃນສະພາແຫ່ງຊາດ ຈົ່ງອອກແຮງຕັ້ງໜ້າເປັນເຈົ້າການສ້າງຜົນງານຢ່າງເປັນຂະບວນການຟົດຟື້ນ  ແລະ ມີປະ ສິດທິພາບ ປະສິດທິຜົນ ແລະ ການຍ້ອງຍໍກໍຕ້ອງຮັບປະກັນ ຄວາມຖືກຕ້ອງກັບຜົນງານຕົວຈິງ.

   (ຂ່າວ: ບຸນຕອມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110