ຫົວ​ຂໍ້ : ໄຟຟ້າລາວສາຂາຫຼວງພະບາງ ຄອງແຊັມແຂ່ງຂັນເຕະບານຊີງຂັນ ເຈົ້າແຂວງຫຼວງພະບາງ ຄັ້ງທີ 5

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 12/02/2020 10:35:44 ຈຳ​ນວນ​ຜູ້​ເຂົ້າ​ຢ້ຽມ​ຊົມ 363 ຄັ້ງ

ການ​ແຂ່ງຂັນ​ກິລາ​ເຕະບານ ຊີງ​ຂັນ​ທ່ານ​ເຈົ້າແຂວງ​ຫຼວງ​ພະ​ບາງ ຄັ້ງ​ທີ 5 ປະຈຳ​ປີ 2020 ໃນ​ຮອບຊີງ​ຊະນະ​ເລີດ ໄດ້​ມີ​ຂຶ້ນ​ເມື່ອ​ວັນ​ທີ 8 ກຸມພາ ຜ່ານ​ມາ ທີ່​ເດີ່ນ​ກິລາ​ຂອງ​ແຂວງ​ບ້ານ​ນາ​ຫຼວງ​ ນະຄອນ-ຫຼວງ​ພະ​ບາງ ແຂວງ​ຫຼວງ​ພະ​ບາງ, ສະເພາະ​ຕອນ​ເຊົ້າ ເປັນ​ການ​ຊີງ​ອັນ​ດັບ​ທີີ 3  ລະຫວ່າງ ທີ​ມ​ນອກ​ກອບ (ແຊັມ​ເກົ່າ) ພົບ​ກັບ ທະນາຄານ ແຂວງ​ຫຼວງ​ພະ​ບາງ (ຮອງ​ແຊັມ​ເກົ່າ) ຜ່ານ​ການ​ແຂ່ງຂັນ​ທີ​ມ​ທະນາຄານ​ແຂວງ​ຫຼວງ​ພະ​ບາງ​ສາມາດ​ເອົາ​ຊະນະ​ທີ​ມ​ນອກ​ກອບ 3 ປະຕູ​ຕໍ່ 1, ສໍາ​ລັບ​ຄູ່​ຊີງ​ອັນ​ດັບ​ທີ1(ຊີງ​ຊະນະ​ເລີດ)  ໄດ້​ມີ​ຂຶ້ນ​ໃນ​ຕອນ​ບ່າຍ ຫຼັງ​ຈາກ​ສຳເລັດ​ການ​ແຂ່ງຂັນ​ນັດ​ພິເສດ​ລະຫວ່າງ​ການ​ນຳ​ຂອງ​ແຂວງ ໂດຍ​ແມ່ນ​ທີ​ມ​ເມືອງ​ໂພນ​ໄຊ ພົບ​ກັບ ໄຟຟ້າ​ລາວ​ສາຂາ​ແຂວງ​ຫຼວງ​ພະ​ບາງ ໃນ​ໄລຍະ​ການ​ແຂ່ງຂັນ ຕ່າງ​ຝ່າຍ ຕ່າງ​ມີ​ໂອກາດ​ຜັດປ່ຽນ​ກັນ​ບຸກ ເພື່ອ​ຫວັງ​ໃຫ້​ໄດ້​ປະຕູ​ຂຶ້ນ​ນຳ ແຕ່​ບໍ່​ມີ​ຝ່າຍ​ໃດ​ສາ​ມາດ​ຍິງ​ປະຕູ​ຂຶ້ນ​ນຳ​ກ່ອນ ໃນ​ເຄິ່ງ​ເວລາ​ທຳອິດ, ເລີ່ມ​ເກ​ມ​ເຄິ່ງ​ເວລາ​ທີ 2 ປະມານ 10 ນາທີ ກອງ​ຫຼັງ​ຂອງ​ທີ​ມ​ເມືອງ​ໂພນ​ໄຊ ຟາ​ວ​ໃນ​ນອກ​ເຂດ​ໂທດ ຈາກ​ນັ້ນ ຫົວໜ້າ​ທີ​ມ​ຂອງ​ໄຟຟ້າ​ລາວ​ສາຂາ​ແຂວງ​ຫຼວງ​ພະ​ບາງ ໄດ້​ເຕະ​ລູກ​ໂທດ​ນອກ​ເຂດ​ເຂົ້າ​ປະຕູ​ຢ່າງ​ສວຍ​ງາມ ແລະ ກາຍເປັນ​ປະຕູ​ໄຊ​ເຮັດ​ໃຫ້ ໄຟຟ້າ​ລາວ​ສາຂາ​ແຂວງ​ຫຼວງ​ພະ​ບາງ ຄອງ​ແຊັມ​ເປັນ​ຄັ້ງ​ທຳອິດ​ໃນ​ລາຍການ​ນີ້ ພາຍຫຼັງ​ເຂົ້າ​ຊີງ​ເປັນ​ຄັ້ງ​ທີ 2 ນັບ​ແຕ່ ເລີ່ມ​ການ​ແຂ່ງຂັນ​ລາຍການ​ນີ້. ສະຫຼຸບ​ການ​ແຂ່ງຂັນ​ທີ 1 ແມ່ນ​ທີ​ມ​ໄຟຟ້າ​ລາວ​ສາຂາ​ແຂວງ​ຫຼວງ​ພະ​ບາງ ໄດ້​ຮັບ​ຫຼຽນ​ຄໍາ ພ້ອມ​ຂັນ​ແຊັມ​ປະຈຳ​ປີ​ຂອງ​ສະຫະພັນ​ບານເຕະ​ແຫ່ງ​ຊາດ​ລາວ 1 ໜ່ວຍ​ ຂັນ​ຄອງ​ແຊັມ​ໝູນວຽນ 3 ປີ ຂອງ​ທ່ານ​ເຈົ້າແຂວງ​ຫຼວງ​ພະ​ບາງ 1 ໜ່ວຍ ແລະ ເງິນ​ລາງວັນ 10.000.000 ກີບ, ທີ 2 ເມືອງ​ໂພນ​ໄຊ ໄດ້​ຮັບ​ຫຼຽນ​ລາງວັນ​ພ້ອມ​ດ້ວຍ​ຂັນ 1 ໜ່ວຍ ແລະ ​ເງິນ​ລາງວັນ 7.000.000 ກີບ, ທີ 3 ທະນາຄານ​ແຂວງ​ຫຼວງ​ພະ​ບາງ ໄດ້​ຮັບ​ຫຼຽນ​ລາງວັນ ພ້ອມ​ດ້ວຍ​ຂັນ 1 ໜ່ວຍ ແລະ ​ເງິນ​ລາງວັນ 5.000.000 ກີບ, ທີ 4 ນອກ​ກອບ ໄດ້​ຮັບ​ເງິນ​ສົດ 3.000.000 ກີບ, ພິເສດ​ແມ່ນ​ມີ​ລາງວັນ​ຜູ້​ຍິງ​ປະຕູ​ສູງ​ສຸດຄື: ທ້າວ​ ບຸນ​ທຳ ຈາກ​ທີ​ມ​ນອກ​ກອບ ໄດ້​ຮັບ​ໂລ້​ລາງວັນ ພ້ອມ​ເງິນ​ສົດ 500.000 ກີບ, ຜູ້​ຮັກສາ​ປະຕູ​ດີເດັ່ນ ແມ່ນ​ທ້າວ​ ສຸດທິ​ສັກ ຈາກ​ທີມ​ລັດ​ວິ​ສາ​ຫະ​ກິດ​ໄຟຟ້າ​ລາວ​ສາຂາ​ແຂວງ​ຫຼວງ​ພະ​ບາງ ໄດ້​ຮັບ​ໂລ້ລາງວັນ ພ້ອມ​ເງິນ​ສົດ 500.000 ກີບ ແລະ ​ທີມ​ມາລະຍາດ​ດີເດັ່ນ ແມ່ນ​ທີ​ມ​ພະຍາ​ອິນ​ຊີ ໄດ້​ຮັບ​ໂລ້ລາງວັນ​ພ້ອມ​ເງິນ​ສົດ 1.000.000 ກີບ. ໃຫ້​ກຽດ​ມອບ​ຂັນ​ລາງວັນ​ໃຫ້​ແຕ່​ລະ​ທີ​ມ​ໂດຍ​ແມ່ນ ທ່ານ ຄຳ​ແພງ ວົງ​ຂັນຕີ ຮອງ​ປະທານ​ສະຫະພັນ​ກິລາ​ບານເຕະ​ແຫ່ງ​ຊາດ​ລາວ, ທ່ານ ຊາຍ​ສະຫວັນ ຈັນ​ມານິດ ຮັກສາ​ການ​ຫົວໜ້າ​ພະ​ແນ​ກ​ສຶກສາ​ທິ​ການ ແລະ ກິລາ​ແຂວງ ພ້ອມ​ດ້ວຍ​ຄະນະ​ສະຫະພັນ​ກິລາ​ບານເຕະ​ແຂວງ​ຫຼວງ​ພະ​ບາງ ແລະ ແຂກ​ຮັບ​ເຊີນ​ເຂົ້າ​ຮ່ວມ. 
(ຂ່າວ: ອາ​ພຸດ​ເດດ ບຸບຜາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110