ຫົວ​ຂໍ້ : ໂຮມຊຸມນຸມສະເຫຼີມສະຫຼອງກອງພົນທະຫານຮາບ ທີ 1 ຄົບຮອບ 35 ປີ

ເຜີຍ​ແຜ່​ໂດຍ​: siththiphone rasphone ເວ​ລາ: 13/02/2020 08:59:11 ຈຳ​ນວນ​ຜູ້​ເຂົ້າ​ຢ້ຽມ​ຊົມ 463 ຄັ້ງ

   ກອງ​ພົນທະຫານ​ຮາບ​ທີ 1 ໄດ້​ຈັດ​ງານ​ສະເຫຼີມສະຫຼອງ​ວັນ​ສ້າງຕັ້ງ​ກອງ​ພົນທະຫານ​ຮາບ​ທີ 1  ຄົບຮອບ 35 ປີ (12/2/1985-12/2/2020) ຂຶ້ນ ທີ່​ເມືອງ​ວັງ​ວຽງ​​ແຂວງ​ວຽງ​ຈັນ ໃນ​ວັນ​ທີ 12 ກຸມພານີ້ ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ ສະຫາຍ ບຸນ​ທອງ ຈິດ​ມະນີ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ຄະນະ​ເລຂາທິການ​ສູນ​ກາງ​ພັກ ຮອງ​ນາຍົກລັດຖະມົນຕີ ປະທານ​ຄະນະ​ກວດກາ​ສູນ​ກາງ​ພັກ ປະທານ​ອົງການ​ກວດກາ​ລັດຖະບານ ແລະ ຫົວໜ້າ​ອົງ ການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ, ສະຫາຍ ແສງ​ນວນ ໄຊ​ຍະ​ລາດ ຄະນະ​ເລຂາທິການ​ສູນ​ກາງ​ພັກ ຮອງ​ປະທານ​ສະພາ​ແຫ່ງ​ຊາດ, ສະຫາຍ ພົນ​ໂທ ທອງ​ລອຍ ສີ​ລິ​ວົງ ກໍາ​ມະ​ການ​ສູນ​ກາງ​ພັກ ຮອງ​ລັດຖະມົນຕີ​ກະຊວງ​ປ້ອງ​ກັນ​ປະເທດ, ມີ​ບັນດາ​ສະຫາຍ ລັດຖະມົນຕີ, ຮອງ​ລັດຖະມົນຕີ, ຄະນະ​ພັກ ​- ​ຄະນະ​ບັນຊາ​ກອງ​ພົນ​ທີ 1, ນາຍ ແລະ ພົນ ທະຫານ​ທົ່ວ​ກອງ​ພົນ​ທີ 1, ອົງ ການ​ຈັດ​ຕັ້ງ​ມະຫາຊົນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
   ໃນ​ພິທີ​ທ່ານ ພົນ​ຈັດຕະ ວາ ສາຍໃຈ ກົມ​ມະ​ສິດ ຫົວ ໜ້າ​ການ​ທະຫານ​ກອງ​ພົນ​ທີ 1 ໄດ້​ກ່າວ​ບົດ​ປາ​ໄສ ຕໍ່​ທີ່​ຊຸມນຸມ ໂດຍ​ທ່ານ​ໄດ້​ຍົກ​ໃຫ້​ເຫັນ​ປະຫວັດ​ຄວາມ​ເປັນ​ມາ, ຜົນງານ​ຂອງ​ກອງ​ພົນທະຫານ​ຮາບ​ທີ 1 ນັບ​ຕັ້ງແຕ່​ມື້​ສ້າງຕັ້ງ​ເປັນຕົ້ນ​ມາ ກອງ​ພົນທະຫານ​ຮາບ​ທີ 1 ໄດ້​ຮັບ​ການ​ສ້າງຕັ້ງ​ຂຶ້ນ ໃນ​ວັນ​ທີ 12 ກຸມພາ 1985 ໂດຍ​ແມ່ນ​ປະທານ​ໄກສອນ ພົມວິຫານ ເປັນ​ຜູ້​ອະນຸມັດ​ສ້າງຕັ້ງ ຢູ່​ນະຄອນຫຼວງ​ວຽງ​ຈັນ ມາ​ຮອດ​ປີ 1993 ມີ​ຄໍາ​ສັ່ງ​ຈາກ​ຂັ້ນ​ເທິງ​ໃຫ້​ຍົກຍ້າຍ​ໄປ​ຕັ້ງ​ຢູ່ ເມືອງ​ວັງ​ວຽງ​ແຂວງ​ວຽງ​ຈັນ; ໃນ​ໂອກາດ​ນີ້ ສະຫາຍ​ຮອງ​ນາຍົກລັດຖະມົນຕີ ໄດ້​ໃຫ້​ກຽດ​ໂອ້​ລົມ​ຕໍ່​ພິທີ​ໂຮມ​ຊຸມນຸມ ຄັ້ງ​ນີ້ ໂດຍ​ທ່ານ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ​ຂອງ​ກອງ​ພົນທະຫານ​ຮາບ​ທີ 1 ທີ່​ຍາດ​ມາ​ໄດ້ ໃນ​   ຕະຫຼອດ​ໄລຍະ 35 ປີ ຜ່ານ​ມາ ກໍ​ຄື​ພາລະກິດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ. ພ້ອມ​ກັນ​ນີ້​ສະຫາຍ​ຍັງ​ໄດ້​ເນັ້ນ​ໃຫ້​ເອົາໃຈໃສ່ 5 ບັນຫາ​ຄື: 
ຕ້ອງ​ສືບຕໍ່​ຫັນ​ກຳລັງ​ລົງ​ຮາກ​ຖານກັບ​ປະຊາຊົນ​ບັນດາເຜົ່າ ແລະ ຊັ້ນ​ຄົນ​ຕ່າງໆ, ປຸກລະດົມ​ຂົນຂວາຍສຶກສາ​ອົບຮົມ ຊີ້​ແຈງໃຫ້​ເຫັນ​ກົນ​ອຸ​ບາຍ​ທໍາ​ລາຍ​ມ້າງເພ ຂອງ​ສັດຕູ ແລະ ພວກ​ຄົນ​ບໍ່​ດີ, ສ້າງ ແລະ ຍົກ​ສູງ​ສະຕິ​ຕື່ນ​ຕົວ ເປັນ​ເຈົ້າ​ຂອງ​ພົນລະເມືອງ ທຸກ​ຄົນ​ໃຫ້​ເຂົ້າ​ຮ່ວມ​ວຽກ​ງານ​ປ້ອງ​ກັນ​ຊາດ ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ຮອບດ້ານ, ສ້າງ​ທ່າ​ສະໜາມ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ, ສ້າງ​ບ້ານ​ປ້ອມ​ໝັ້ນ​ສູ້​ຮົບ ແລະ ກຸ່ມ​ບ້ານ​ສູ້​ຮົບ​ຕິດ​ລຽນ ໃຫ້​ໜັກ​ແໜ້ນ​ເຂັ້ມແຂງ, ສຸມ​ໃສ່​ສ້າງ​ຮາກ​ຖານ​ການເມືອງ​ພັດທະນາ​ຊົນນະບົດ ຕາມ 4 ເນື້ອ​ໃນ 4 ຄາດໝາຍ ແລະ ຕາມ​ທິດ​ສາມ​ສ້າງ​ທີ່​ວາງ​ໄວ້.
    ເພີ່ມ​ທະວີ​ການ​ປັບປຸງ ທຸກ​ເລົ່າ​ຮົບ​ໃນ​ກຳລັງ​ກອງ​ພົນ ໃຫ້​ທັນ​ສະໄໝ, ໜັກ​ແໜ້ນ​ເຂັ້ມແຂງ​ຂຶ້ນ​ເລື້ອຍໆ, ກຽມພ້ອມ​ສູ້​ຮົບ ແລະ ສູ້​ຮົບ​ມີ​ໄຊ, ບໍ່​ຍອມ​ຈໍາ​ນົນ, ອົງອາດ​ກ້າຫານ, ມີ​ຄວາມ​ເສຍ​ສະຫຼະ​ສູງ, ມີ​ຄວາມ​ຮູ້​-​ຄວາມ​ສາມາດ​ທາງ​ດ້ານ​ເຕັກ​ນິ​ກ-​ສິລະ​ປະ​ຍຸດ​-​ຍຸດທະວິທີ​ເກັ່ງ​ກ້າ​ສາມາດ ຜາບ​ແພ້​ຝ່າຍ​ກົງກັນຂ້າມ​ໄດ້​ທຸກ​ກໍ​ລະ​ນີ.
ຖື​ສໍາ​ຄັນ ແລະ ເອົາໃຈໃສ່​ປະສານ​ແໜ້ນ​ກັບ​ກຳລັງ​ທ້ອງ ຖິ່ນ ທັງ​ຊ່ວຍ​ປັບ​ປຸງ​ກໍາ​ລັງ​ທ້ອງ ຖິ່ນຄື: ທະຫານ​ແຂວງ, ເມືອງ, ກອງ​ຫຼອນ ແລະ ກໍາ​ລັງ​ສໍາ​ຮອງ​ຢູ່​ຮາກ​ຖານ​ບ້ານ ແລະ ສໍາ​ນັກ​ງານ​ອົງການ, ຫົວໜ່ວຍ​ວິ​ສາ​ຫະ​ກິດ​ຕ່າງໆ ໃຫ້​ມີ​ກຳລັງ​ແຈກ​ຢາຍ​ບົ່ມ​ຊ້ອນ ຢູ່​ທົ່ວ​ທຸກ​ບ່ອນ ເພື່ອ​ເປັນ​ກໍາ​ລັງ​ແຮງ​ສັງ​ລວມ ໃນ​ການ​ປົກ​ປັກ​ຮັກສາ​ເຂດ​ນໍ້າ​ແດນ​ດິນ, ບ້ານ​ຊ່ອງ ກໍ​ຄື​ທ້ອງຖິ່ນ​ຂອງ​ຕົນ​ເອງ, ແບ່ງ​ເບົາ​ຄວາມ​ຮັບ​ຜິດ​ຊບ​ຂອງ​ກໍາ​ລັງ​ຫຼວງ ເພື່ອ​ມີ​ໂອກາດ​ປັບປຸງ​ກຳລັງ​ໃຫ້​ທັນ​ສະໄໝ ກາຍເປັນ​ກຳລັງ​ຫຼັກ​ແຫຼ່ງ​ຂອງ​ພັກ, ຂອງ​ຊາດ ທີ່​ໜັກ​ແໜ້ນ​ເຂັ້ມ​ແຂງ.
   ເພີ່ມ​ທະວີ​ວຽກ​ງານ​ປັບ ປຸງ​ກໍ່ສ້າງ​ພັກ​ໃຫ້​ປອດ​ໃສ, ເຂັ້ມແຂງ ແລະ ໜັກ​ແໜ້ນ, ສະເພາະ​ໜ້າ​ນີ້ ແມ່ນ​ສຸມ​ໃສ່​ການ​ກະກຽມ ແລະ ດຳເນີນ​ກອງ​ປະຊຸມ​ໃຫຍ່​ອົງຄະ​ນະ​ພັກ​ກອງ​ພົນ, ກອງພັນ, ກອງຮ້ອຍ ແລະ ກົມ​ກອງ​ຕ່າງໆ​ທີ່​ຂຶ້ນ​ກັບ​ຄະນະ​ພັກ​ກອງ​ພົນ, ໃນ​ນີ້ ໃຫ້​ເອົາໃຈໃສ່​ດຳເນີນ​ຊີວິດ​ການເມືອງ​ພາຍ​ໃນ​ພັກ ໃຫ້​ເລິກເຊິ່ງ ຕີ​ລາຄາ​ແບ່ງ​ປະເພດ​ສະມາຊິກ​ພັກ, ພະນັກງານ​ຜູ້​ບັງຄັບ​ບັນຊາ​ຢູ່ ແຕ່​ລະ​ກົມ​ກອງ​ໃຫ້​ເລິກເຊິ່ງ, ຖື​ສໍາ​ຄັນ ແລະ ເອົາໃຈໃສ່​ກໍ່ສ້າງ​ພະນັກງານ​ຜູ້​ບັງຄັບ​ບັນຊາ ຢູ່​ແຕ່​ລະ​ບ່ອນ ຕາມ​ທິດ​ຫັນ​ເປັນ​ໜຸ່ມ ມີ​ຜູ້​ສືບ​ທອດ​ປ່ຽນ​ແທນ​ຢ່າງ​ຕໍ່​ເນື່ອງ.
   ຖື​ສໍາ​ຄັນ ແລະ ບໍ່​ລົດ​ລະ​ວຽກ​ງານ​ຕິດ​ຕາມ​-​ກວດກາ​ພາຍ​ໃນ​ພັກ, ກວດກາ​ການ​ປະຕິບັດ​ໜ້າທີ່​ຂອງ​ພະນັກງານ, ສະມາຊິກ​ພັກ ໃຫ້​ເປັນ​ປົກກະຕິ​ກໍລະນີ​ມີ​ການ​ລະເມີດ​ລະ​ບຽ​ບ-​ກົດໝາຍ ແລະ ລະເມີດ​ລະບຽບ​ວິໄນ​ຂອງ​ກອງທັບ ຕ້ອງ​ມີ​ການ​ສຶກສາ​ອົບຮົມ ແລະ ກວດກາ ແກ້​ໄຂ​ຢ່າງ​ທັນ​ການ ແລະ ເຂັ້ມ​ງວດ​ຕາມ​ລະບຽບ​ກົດໝາຍ.
   ໃນ​ພິທີ​ຍັງ​ໄດ້​ຊົມ​ການ ສະແດງ​ສິລະ​ປະ​ວັນນະຄະດີ, ກ້ອນ​ກໍາ​ລັງ​ສວນສະໜາມ​ເປັນຕົ້ນກ້ອນ​ທຸງໄຊ, ກ້ອນ​ນາຍ​ພັນ, ກ້ອນ​ນັກຮຽນ​ນາຍ​ສິບ, ກ້ອນ​ກຳລັງ​ຕີ​ພິເສດ, ກ້ອນ​ກໍາ​ລັງ​ວິຊາ​ສະເພາະ​ສື່ສານ, ກ້ອນ​ກໍາ​ລັງ​ລົບ​ຊ່າງ​ແສງ, ກ້ອນ​ກໍາ​ລັງ​ເຫຼົ່າ​ຮົບ​ປືນ​ໃຫຍ່​ໜ້າດິນ, ກ້ອນ​ກໍາ​ລັງ​ທະຫານ​ຮາບ ກອງພັນ 13, ກ້ອນ​ກໍາ​ລັງ​ວິຊາ​ສະເພາະ​ແພດ​ເສນາ​ຮັກ, ກ້ອນ​ກໍາ​ລັງ​ເຫຼົ່າ​ຮົບ​ອາກາດ, ກ້ອນ​ກໍາ​ລັງ​ທະຫານ​ຮາບ ກອງພັນ 15, ກ້ອນ​ເຫຼົ່າ​ຮົບ​ປະສົມ (ເຫຼົ່າ​ຮົບ​ເຄ​ມີ: ສືບ​ຂ່າວ ແລະ ເຫຼົ່າ​ຮົບ​ຫຸ້ມ​ເກາະ), ກ້ອນ​ກໍາ​ລັງ​ປ້ອງ​ກັນ​ຕົວ ໂຮງງານ​ຊີມັງ​ວັງ​ວຽງ, ກ້ອນ​ນັກຮຽນ, ກ້ອນ​ພໍ່​ແມ່​ປະຊາຊົນ ກຸ່ມ​ບ້ານ​ນາ​ມອນ, ການສະແດງ​ຝຶກແອບ​ຫັດກາຍ, ສິລະ​ປະການ​ຕໍ່ສູ້ຂອງ​ເຫຼົ່າ​ຮົບ​ຕີ​ພິເສດ ແລະ ການ​ໂດດ​ຈ້ອງ​ຂອງ​ເຫຼົ່າ​ຮົບ​ທະຫານ​ອາ​ກາດ. ໂອກາດ​ນີ້​ພາກສ່ວນ​ຕ່າງໆ​ໄດ້​ມອບ​ເຄື່ອງ​ອຸ​ປະ​ຖໍາ​ໃຫ້​ແກ່​ກອງ​ພົນທະຫານ​ຮາບ​ທີ 1  ຕື່ມ​ອີກ.
(ຂ່າວ: ວາລະສານ​ກວດກາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110