ຫົວ​ຂໍ້ : ຊີວິດການປະຕິວັດອັນຍິ່ງໃຫຍ່ຂອງສະຫາຍ ກິມ ເຈິງ ອິນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 13/02/2020 09:00:29 ຈຳ​ນວນ​ຜູ້​ເຂົ້າ​ຢ້ຽມ​ຊົມ 292 ຄັ້ງ

(ເນື່ອງ​ໃນ​ໂອກາດ​ວັນ​ເກີດ​ຂອງ ສະຫາຍ ກິມ ເຈິງ ອິນ ຜູ້​ນໍາ​ທີ່​ຍິ່ງ​ໃຫຍ່​ຂອງ​ປະຊາຊົນ​ເກົາຫຼີ ຄົບຮອບ 78 ປີ, 16/2/1942 - 16/2/2020)

(ບົດ​ຄວາມຈາກ​ສະຖານທູດ ສປປ ເກົາຫຼີ ປະ​ຈໍາ ສປປ ລາວ)

  ວັນ​ທີ 16 ກຸມພາ ປີ​ນີ້, ເປັນ​ວັນ​ເກີດ​ຄົບຮອບ 78 ປີ ຂອງ ສະຫາຍ ກິມ ເຈິງ ອິນ ຜູ້​ນໍາ​ທີ່​ຍິ່ງ​ໃຫຍ່​ຂອງ ປະຊາຊົນ​ເກົາ​ຫຼີ. 
  ການ​ສູ້​ຊົນ​ກໍ່ສ້າງ​ປະເທດ​ສັງຄົມ​ນິຍົມ ຊຶ່ງ​ພວມ​ດໍາ​ເນີນ​ຢູ່​ໃນ​ສາທາລະນະ​ລັດ ປະຊາຊົນ​ປະຊາທິປະໄຕ ເກົາຫຼີ ໄດ້​ຜ່ານ​ຜ່າ​ເອົາ​ຊະນະ​ອຸປະສັກ​ຄວາມ​ຫຍຸ້ງຍາກ​ນາໆປະການ, ບົນ​ຈິດໃຈ​ເຊີດ​ຊູ​ຄັນ​ທຸງ ແຫ່ງ​ນະໂຍບາຍ​ເຊິນ​ກຸນ, ທີ່​ຖືກ​ນໍາ​ມາ​ໃຊ້​ພ້ອມ​ກັບ​ການ​ນໍາ​ພາ​ຂອງ​ສະຫາຍ ກິມ ເຈິງ ອິນ ແຫ່ງ ສປປ ເກົາ​ຫຼີ. 
  ເພິ່ນ​ໄດ້​ສ້າງ​ແສນ​ຍາ​ນຸ​ພາບ​ທາງ​ການ​ທະຫານ​ຂອງ​ປະເທດ ໃນ​ທຸກ​ດ້ານ ໂດຍ​ຜ່ານ ການ​ນໍາ​ພາ​ການປະຕິວັດ​ບົນ​ພື້ນຖານ​ນະໂຍບາຍ​ເຊິ​ນ​ກຸນ ຢ່າງ​ບໍ່​ຮູ້​ອິດ​ຮູ້​ເມື່ອຍ.
  ເພີ່ນ​ໄດ້​ໝູນ​ໃຊ້​ນະໂຍ ບາຍ​ການເມືອງ​ເຊິ​ນ​ກຸນ​ທີ່​ເປັນ​ເອກະລັກ​ມາ​ແຕ່​ຊຸມ​ປີ​ຕົ້ນ​ການເຄື່ອນໄຫວ​ຂອງ​ຕົນ ໄດ້​ເຊີດ​ຊູ​ຄັນ​ທຸງ​ນະໂຍບາຍ​ການເມືອງ​ເຊິ​ນ​ກຸນ ຢ່າງ​ເອົາ​ການ​ເອົາ​ງານ ພາຍ​ໃຕ້​ສະພາບ​ການ​ອັນ​ສັບສົນ ເມື່ອ​ລັດທິ​ສັງຄົມ​ນິຍົມ ໄດ້​ຖືກ​ລົ້ມ​ສະຫຼາຍ​ຢູ່​ໃນ​ຫຼາຍ​ປະເທດ ແລະ ການ​ຕໍ່ຕ້ານ​ສັງຄົມ​ນິຍົມ ຂອງ​ພວກ​ຈັກກະພັດ ໄດ້​ສຸມ​ປາຍ​ຫອກ​ມາ​ໃສ່ ສປປ ເກົາຫຼີ ໃນ​ຊຸມ​ປີ​ທ້າຍ​ສະຕະວັດ​ທີ 20.
ເພິ່ນ​ໄດ້​ສ້າງ​ນະໂຍບາຍ​ການເມືອງ​ເຊິ​ນ​ກຸນ ໃຫ້​ເປັນ​ຮູບ​ແບບ​ທາງ​ການເມືອງ​ຕົ້ນ​ຕໍ່​ຂອງ​ລັດທິ​ສັງຄົມ​ນິຍົມ ແລະ ລົງ​ເຄື່ອນ​ໄຫວ​ຊີ້​ນໍາ​ແຕ່​ລະ​ກອງ ຂອງ​ກອງທັບ​ປະຊາຊົນ​ເກົາຫຼີ ເພື່ອ​ພັດທະນາ​ກອງທັບ​ປະຊາຊົນ ເກົາຫຼີ ທີ່​ເປັນ​ກໍາ​ລັງ​ຫຼັກ​ແຫຼ່ງ, ໃຫ້​ເປັນ​ກໍາ​ລັງ​ທີ່​ເຂັ້ມແຂງ, ມີ​ຄວາມ​ສາມາດ​ປ້ອງ​ກັນ​ຕົນ​ເອງ, ມີ​ແນວ​ຄິດ​ການເມືອງ​ໜັກ​ແໜ້ນ, ມີ​ເຕັກນິກ​ທາງ​ການ​ທະຫານ​ທີ່​ຮັບປະກັນ ແສນ​ຍາ​ນຸ​ພາບ​ອັນ​ແຂງ​ແກ່ນ ບໍ່​ມີ​ສັດຕູ​ໂຕ​ໃດ​ສາມາດ ຕີ​ເອົາ​ຊະນະ​ໄດ້.
  ພາຍ​ໃຕ້​ການ​ນໍາ​ພາ​ຂອງ​ສະຫາຍ ກອງທັບ​ປະຊາຊົນ​ເກົາຫຼີ ໄດ້​ກາຍ​ເປັນ​ກໍາ​ລັງ​ອັນ​ເຂັ້ມແຂງ​ມີ​ຄວາມ​ພ້ອມ​ສູງ ໃນ​ການ​ສູ້​ຮົບ ເພື່ອ​ພິທັກ​ປົກ​ປ້ອງ​ລັດທິ​ສັງຄົມ​ນິຍົມ ແລະ ໄດ້​ຮັບ​ການ​ປະກອບ​ພາຫະນະ​ອາວຸດ​ທັນ​ສະໄໝ, ກຽມພ້ອມ​ທຸກ​ເວລາ​ທີ່​ຈະ​ລົງໂທດ​ສັດຕູ​ທຸກ​ໂຕ​ທີ່​ຫວັງ​ມ້າງ​ເພ​ທໍາ​ລາຍ ໃຫ້​ປະ​ລາ​ໄຊ ຢ່າງ​ຮາບ​ຄາບ.
ດ້ວຍ​ຄວາມ​ພະຍາຍາມ​ເຕົ້າໂຮມ​ຄວາມ​ສາມັກຄີ​ຂອງ​ທົ່ວ​ປວງ​ຊົນ ເຂົ້າ​ໃນ​ພາລະກິດ​ການ​ປ້ອງ​ກັນຊາດ, ການ​ປະ ກອບ​ອາວຸດ​ໃຫ້​ທົ່ວ​ປວງ​ຊົນ ໄດ້​ສ້າງ​ປ້ອມ​ໝັ້ນ​ອັນ​ແຂງ​ແກ່ນ ໃຫ້​ປະເທດ​ຊາດ​ຢ່າງ​ບໍ່​ເຄີຍ​ມີ​ມາ​ກ່ອນ, ສປປ ເກົາຫຼີ ມີ​ຂີດ​ຄວາມ​ສາມາດ​ໃນ​ການ​ຜະລິດ​ອາວຸດ​ຍຸດ​ໂທ​ປະກອນ ໃນ​ປະລິມານ​ທີ່​ພຽງພໍ​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ​ໃນ​ການ​ສ້າງ​ຄວາມ​ເຂັ້ມແຂງ ໃຫ້​ແກ່​ກໍາ​ລັງ​ປ້ອງ​ກັນ​ຊາດ ແລະ ການ​ກຽມພ້ອມ​ສູ້​ຮົບ​ເມື່ອ​ມີ​ກໍລະນີ​ເກີດ​ຂຶ້ນ.
  ເພິ່ນຍັງ​ເປັນ​ຄັນ​ທຸງເຕົ້າ ໂຮມ​ຄວາມ​ສາມັກຄີ​ທາງ​ການ ເມືອງ​ແນວ​ຄິດ ທີ່​ເຂັ້ມແຂງ​ແໜ້ນ​ແກ່ນ​ດັ່ງ​ຫີນ​ສີລາ, ການ​ກໍ່ສ້າງ​ກອງທັບ​ປະຊາຊົນ​ເກົາ ຫຼີ ໃຫ້​ກາຍເປັນ​ເສົາຄໍ້າ​ອັນ​ ແຂງ​ແກ່ນ​ຂອງ​ລັດທິ​ສັງຄົມ​ນິຍົມ ແລະ ເປັນ​ກໍາ​ລັງ​ຫຼັກ ​ແຫຼ່ງ​ແຫ່ງ​ການ​ປະຕິວັດ, ສະ ຫາຍ ໄດ້​ເອົາໃຈໃສ່​ຢ່າງ​ເລິກ ເຊິ່ງ ໃນ​ການ​ກໍ່​ສ້າງ​ກໍາ​ລັງ​ທາງ​ການເມືອງ​ຂອງ​ສັງຄົມ​ເກົາ​ຫຼີ ໂດຍ​ມີ​ກອງທັບ​ປະຊາຊົນ​ເກົາຫຼີ​ເປັນ​ແກນ​ນໍາ.
  ສະຫາຍໄດ້​ສົ່ງເສີມມູນ ເຊື້ອ​ທີ່​ເປັນ​ເອກະ​ພາບ ລະ ຫວ່າງ ກອງທັບ​ກັບ​ປະຊາຊົນ ໃນ​ລະດັບ​ສູງຈົນ​ບັນລຸ​ຄວາມ​ເປັນ​ຈິດ​ໜຶ່ງ​ໃຈ​ດຽວ​ໃນ​ການ​ເຮັດ​ວຽກ​ງານ​ບົນ​ພື້ນ​ຖານ​ນໍ້າ​ໃຈ​ປະຕິວັດ​ອັນ​ກ້າ​ແກ່ນ.
  ສະຫາຍ ໄດ້​ເຕົ້າໂຮມ​ເອົາ​ທຸກ​ພາກສ່ວນ​ໃຫ້​ເປັນ​ກ້ອນ​ກໍາ​ລັງ​ອັນ​ເປັນ​ປຶກ​ແຜ່ນ​ຢູ່​ອ້ອມ​ຂ້າງ​ພັກ​ແຮງ​ງານ​ເກົາຫຼີ ດ້ວຍ​ລັດທິ​ການເມືອງ​ແຫ່ງ​ຄວາມ​ຮັກ ແລະ ຄວາມ​ໄວ້​ວາງ​ໃຈ.
  ດ້ວຍ​ເຫດ​ນັ້ນ, ກໍາ​ລັງ​ປ້ອງ​ກັນ​ຊາດ​ທັງ​ໝົດ ແລະ ປະຊາຊົນ ໄດ້​ກາຍເປັນ​​ປຶກ​ແຜ່ນ​ທີ່​ມີອຸດົມ​ການ ແລະ ຈຸດໝາຍ​ປາຍທາງ​ເປັນ​ເອກະ​ພາບ​ກັບ​ພັກ.
  ຄວາມ​ເປັນ​ຈິດ​ໜຶ່ງ​ໃຈ​ດຽວ​ກັນ​ຂອງ​ທົ່ວ​ສັງຄົມ​ເປັນ​ອາວຸດ​ອັນ​ຄົມ​ແຫຼມ​ທາງ​ການເມືອງ ແລະ ແນວ​ຄິດ ຊຶ່ງ​ມີ​ພະລັງ​ແຮງ​ກວ່າ​ລູກ​ລະເບີດ​ປະລະ​ມາ​ນູ. ສປປ ເກົາຫຼີ ໄດ້​ສະແດງ​ໃຫ້​ເຫັນ​ວ່າ: ກຽດ​ສັກ​ສີ​ເປັນ ພະລັງ​ທາງ​ດ້ານ​ການເມືອງ​ແນວ​ຄິດ ທີ່​ບໍ່​ມີ​ຄວາມ​ຫຍຸ້ງ​ຍາກ​ລໍາ​ບາກ​ໃດໆ​ມາ​ເອົາ​ຊະນະ​ໄດ້.
  ເພິ່ນໄດ້​ເຮັດ​ໃຫ້ການ​ສູ້​ຊົນ​ກໍ່ສ້າງ​ປະເທດ​ສັງຄົມ​ນິຍົມ​ໃນ​ສັງກາດ​ໃໝ່​ປະກົດ​ຜົນ​ເປັນ​ຈິງ. ການ​ກໍ່ສ້າງ​ເສດຖະກິດ ໃຫ້​ກ້າວໜ້າ​ໃນ​ຍຸກ​ແຫ່ງ​ນະໂຍບາຍ​ເຊິ​ນ​ກຸນ ໄດ້​ກາຍເປັນ​ແຮງ​ຂັບ​ເຄື່ອນ ໃນ​ການ​ພັດທະນາ​ອຸດ​ສາ​ຫະ​ກໍາ​ປ້ອງ​ກັນ​ຊາດ​ກ່ອນ. ຄຽງ​ຄູ່​ໄປ​ກັບ​ການ​ພັດທະນາ​ອຸດ​ສາ​ຫະ​ກໍາ​ເບົາ ແລະ ການ ກະ​ສິ​ກໍາ.
  ສະຫາຍ ໄດ້​ໃຫ້​ຄວາມ​ໝັ້ນ​ໃຈ​ວ່າ: ອຸດ​ສາ​ຫະ​ກໍາ​ປ້ອງ​ກັນ​ຊາດ ໄດ້​ມີ​ບົດ​ບາດ​ນໍາ​ໜ້າ, ທັງ​ເປັນ​ກໍາ​ລັງ​ຊຸກ​ດັນ ໃຫ້​ແກ່​ເສດຖະກິດ​ແຫ່ງ​ຊາດ ແລະ ການ​ພັດທະນາ​ເສດຖະກິດ​ໂດຍ​ລວມ. ໃນ​ຂະນະ​ດຽວ​ກັນ, ສະຫາຍ ໄດ້​ໃຫ້​ຄວາມ​ໝັ້ນ​ໃຈ​ວ່າ: ກອງທັບ​ປະຊາຊົນ​ເກົາຫຼີ ໄດ້​ດໍາ​ເນີນ​ການ​ບຸກ​ທະລຸ ໃນ​ບັນດາ​ຂະແໜງການ ແຫ່ງ​ການ​ກໍ່ສ້າງ​ເສດຖະກິດ ທີ່​ມີ​ຄວາມ​ທ້າ​ທາຍ ແລະ ສໍາ​ຄັນ​ທີ່​ສຸດ. ປວງ​ຊົນ​ທັງ​ຊາດ ໄດ້​ຮໍ່າ​ຮຽນ​ຈາກ​ນໍ້າ​ໃຈ​ປະຕິວັດ ທີ່​ບໍ່​ມີ​ສິ່ງ​ໃດ​ເອົາ​ຊະນະ​ໄດ້​ຂອງ​ທະຫານ ແລະ ໄດ້​ສ້າງ​ນະ​ວັດ​ຕະ​ກໍາ​ໃໝ່​ຂຶ້ນ​ໃນ​ທົ່ວ​ປະ​ເທດ.
  ພາຍ​ໃຕ້​ການ​ນໍາ​ພາ​ຂອງ​ເພິ່ນ, ປະຊາຊົນ​ເກົາຫຼີ ໄດ້​ເປີດ​ບາດກ້າວ​ອັນ​ມີ​ພະລັງ ໃຫ້​ແກ່​ການ​ສູ້​ຊົນ ກໍ່ສ້າງ​ປະເທດ ໂດຍ​ການ​ເອົາ​ຊະນະ​ທຸກ​ອຸປະສັກ​ຫຍຸ້ງຍາກ, ເຂົາເຈົ້າ​ໄດ້​ປ່ອຍ​ດາວ​ທຽມ​ທີ່​ສ້າງ​ດ້ວຍ​ຕົນ​ເອງ ຢ່າງ​ມີ​ຜົນ​ສໍາ​ເລັດ ໃນ​ປີ 1998 ແລະ ປີ 2009. ເຂົາເຈົ້າ​ໄດ້​ພັດທະນາ​ເຕັກ​ໂນ​ໂລ​ຊີ CNC ໃນ​ລະດັບ​ໂລກ ເພື່ອ​ການ​ສ້າງ​ເຄື່ອງ​ກົນ​ຈັກ ແລະ ນໍາ​ໃຊ້​ຢູ່​ໃນ​ບັນດາ​ໂຮງ​ງານ. ໃນ​ອຸດ​ສາ​ຫະ​ກໍາ​ຜະລິດ​ເຫຼັກ​ກ້າ ລະບົບ​ການ​ຜະລິດ​ໃໝ່​ທີ່​ບໍ່​ຕ້ອງ​ໃຊ້​ຖ່ານ​ຫີນ ແລະ ເຫຼັກ​ເສດ ໄດ້​ຖືກ​ສ້າງຕັ້ງ​ຂຶ້ນ. ບັນດາ​ລະບົບ​ການ​ຜະລິດ​ຜ້າ​ວີນາ​ລອນ, ຝຸ່ນ​ຈາກ​ວັດຖຸ​ດິບ ແລະ ເຊື້ອ​ໄຟ ທີ່​ຫາ​ໄດ້​ໃນ​ທ້ອງຖິ່ນ​ໄດ້​ຈັດ​ຕັ້ງ​ຂຶ້ນ. ໃນ​ຂະແໜງ​ອຸດ​ສາ​ຫະ​ກໍາ​ເຄ​ມີ, ທີ່​ດິນ​ໃນ​ທົ່ວ​ປະເທດ ຖືກ​ຈັດ​ສັນ​ເປັນ​ທົ່ງ​ກວ້າງ​ໃຫຍ່​ທີ່​ໄດ້​ມາດຕະຖານ, ບໍ່​ເຫຼືອ​ໃຫ້​ເຫັນ​ຮູບ​ລັກສະນະ​ແບບ​ເກົ່າ, ລະບົບ​ຊົນລະປະທານ​ແບບ​ທໍາ​ມະ​ຊາດ ຖືກ​ສ້າງ​ຂຶ້ນ​ຫຼາຍ​ແຫ່ງ, ວິ​ສະ​ວະ​ກໍາ​ພັນທຸ​ສາດ ແລະ ຊີວະ​ວິທະຍາ ໄດ້​ຮັບ​ການ​ພັດທະນາ​ຢ່າງ​ແຂງ​ແຮງ. ທັງ​ໝົດ​ເຫຼົ່າ​ນີ້, ໄດ້​ສ້າງ​ພື້ນຖານ​ອັນ​ເຂັ້ມແຂງ​ໃຫ້​ແກ່​ການ​ເພີ່ມ​ຜົນ​ຜະລິດ​ດ້ານ​ທັນ​ຍາ​ຫານ.
  ການ​ສ້າງຕັ້ງ​ໃໝ່​ໄດ້​ເກີດ​ຂຶ້ນ​ໃນ​ທົ່ວ​ປະເທດ, ບັນດາ​ຖະໜົນ, ຄຸ້ມ​ບ້ານ ແລະ ອາຄານ​ບ້ານ​ເຮືອນ​ໄດ້​ຫັນ​ເປັນ​ແບບ​ສັງຄົມ​ນິຍົມ, ການ​ກໍ່ສ້າງ​ເສດຖະກິດ ແລະ ວັດ​ທະ​ນະ​ທໍາ ໂດຍ​ລວມ​ໃນ ສປປ ເກົາຫຼີ ໄດ້​ນັບ​ມື້​ມີ​ຄວາມ​ຈະເລີນ​ຮຸ່ງເຮືອງ​ຂຶ້ນ.
  ເພິ່ນ ໄດ້​ສືບຕໍ່​ເດີນທາງ​ໄປ​ຊີ້​ນໍາ-ນໍາ​ພາ ການ​ກໍ່ສ້າງ​ປະເທດ​ສັງຄົມ​ນິຍົມ ຈົນ​ເຖິງ​ວິນາທີ​ສຸດ​ທ້າຍ​ແຫ່ງ ຊີວິດ, ໄດ້​ເຖິງ​ແກ່​ມໍລະນະ​ກໍາ​ຢູ່​ເທິງ​ລົດໄຟ​ທີ່​ພວມ​ແລ່ນ​ໄປ​ຍັງ​ຈຸດໝາຍ​ບ່ອນ​ກວດ​ວຽກ.
  ເຖິງແມ່ນ​ວ່າ​ເພິ່ນ ໄດ້​ເຖິງ​ແກ່​ມໍລະນະ​ກໍາ​ໄປ​ແລ້ວ​ກໍ່​ຕາມ, ແຕ່​ວ່າ​ພາລະກິດ​ເຊິ​ນ​ກຸນ ແລະ​ພາລະກິດ​ກໍ່ສ້າງ​ປະເທດ​ສັງຄົມ​ນິຍົມ ໃຫ້​ນັບ​ມື້​ນັບ​ເຂັ້ມແຂງ ແລະ ຈະເລີນ​ຮຸ່ງເຮືອງ ສືບຕໍ່​ຮັບ​ການ​ສືບ​ທອດ​ຢ່າງ​ບໍ່​ມີ​ການ​ປ່ຽນແປງ ໂດຍ ສະຫາຍ ກິມ ເຈິງ ອຸນ ຜູ້​ນໍາ​ສູງ​ສຸດ​ແຫ່ງ ສປປ ເກົາຫຼີ ແລະ ໃນ​ຂະນະ​ທີ່​ສະຫາຍ ພວມ​ຢ້ຽມຢາມ​ບັນດາ​ກອງ​ທະຫານ ແລະ ໜ່ວຍ​ງານ ຂອງ​ພົນ​ລະ​ເຮືອນ, ສະຫາຍ ໄດ້​ສະແດງ​ໃຫ້​ເຫັນ​  ເຖິງ​ຄວາມ​ຮັກແພງ​ອັນ​ອົບ​ອຸ່ນ​ຕໍ່​ທະຫານ ແລະ ປະຊາຊົນ, ຍາມ​ໃດ​ກໍ່​ເອົາໃຈໃສ່​ສ້າງ​ຄວາມ​ເປັນ​ຈິດ​ໜຶ່ງ​ໃຈ​ດຽວ ທີ່​ເຂັ້ມແຂງ​ແຮງ​ກ້າ​ຂອງ​ສັງຄົມ​ເກົາຫຼີ ຢ່າງ​ແທ້​ຈິງ.
  ມັນ​ເປັນ​ເຈດ​ຈໍາ​ນົງ ແລະ ຄວາມ​ເຊື່ອ​ໝັ້ນ​ທີ່​ບໍ່​ປ່ຽນແປງ​ຂອງ​ປະຊາຊົນ ເກົາຫຼີ ທີ່​ຈະ​ດໍາ​ເນີນ​ການ ຕາມ​ແຜນທີ່​ສະຫາຍ ກິມ ເຈິງ ອິນ ວາງ​ໄວ້​ໃນ​ເວລາ​ມີ​ຊີວິດ​ຢູ່ ແລະ ປະຕິບັດ​ຕາມ​ຄໍາ​ສັ່ງສອນ ຂອງ ສະຫາຍ ຢ່າງ​ເຄັ່ງ​ຄັດ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110