ຫົວ​ຂໍ້ : ໄຊຍະບູລີ ຈະສົ່ງ 14 ປະເພດກິລາຮ່ວມ ຊຽງຂວາງເກມ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 13/02/2020 09:09:33 ຈຳ​ນວນ​ຜູ້​ເຂົ້າ​ຢ້ຽມ​ຊົມ 328 ຄັ້ງ

  ແຂວງ​ໄຊ​ຍະ​ບູ​ລີ ຈັດ​ກອງ​ປະຊຸມ​ປຶກສາ​ຫາລື​ກະກຽມ​ຄວາມ​ພ້ອມ​ສົ່ງ​ນັກ​ກິລາ ເຂົ້າ​ຮ່ວມ​ງານມະ​ຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI (ຊຽງ​ຂວາງ ເກມ) ເມື່ອ​ບໍ່​ດົນ​ຜ່ານ​ມາ ຢູ່​ພະ​ແນ​ກ​ສຶກສາ​ທິ​ການ ແລະ ກິລາ (ສສກ) ແຂວງ​ດັ່ງກ່າວ ໂດຍ​ມີ​ທ່ານ ນາງ ບຸນ​ພັກ ອິນ​ທະ​ປັນຍາ ຮອງ​ເຈົ້າແຂວງ​ໄຊ​ຍະ​ບູ​ລີ ຜູ້​ຊີ້​ນຳ​ວຽກ​ງານ​ວັດທະນະ​ທຳ-ສັງຄົມ, ມີ​ຫົວ​ໜ້າ​-​ຮອງ​ຫົວໜ້າ​ພະແນກການ, ຜູ້ຕາງໜ້າ​ສະຫະພັນ​ກິລາ 14 ປະເພດ, ຄູ​ຝຶກເຂົ້າ​ຮ່ວມ.
  ທ່ານ ພັນ ດວງ​ຕາ ຮອງ​ຫົວໜ້າ​ພະ​ແນກ ສສກ ແຂວງ​ໄຊ​ຍະ​ບູ​ລີ ກ່າວ​ວ່າ: ປັດຈຸບັນ​ວຽກ​ງານ​ຂອງ​ກຳມະການ​ເຕັກນິກ​ຈັດ​ມະ​ຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI (ແຕ່​ວັນ​ທີ 22 ມີ​ນາ-1 ເມສາ 2020) ມີ​ຄວາມ​ກຽມພ້ອມ​ໂດຍ​ພື້ນຖານ​ແລ້ວ​ໃນ​ທຸກ​ສະໜາມ​ແຂ່ງຂັນ ເພື່ອ​ຮອງ​ຮັບ​ພິທີ​ເປີດ​-​ປິດ​ງານ​ດັ່ງກ່າວ ຊຶ່ງ​ເຈົ້າພາບ​ໄດ້​ກຳນົດ 28 ປະເພດ​ກິລາ ສະເພາະ​ແຂວງ​ໄຊ​ຍະ​ບູ​ລີ ຈະ​ສົ່ງ 14 ປະເພດກິ​ລາເຂົ້າ​ຮ່ວມຄື: ບານເຕະ, ບານສົ່ງ​ໃນ​ຮົ່ມ​-​ບານສົ່ງ​ຫາດ​ຊາຍ, ກະຕໍ້, ແລ່ນ​-​ລານ, ເປ​ຕັງ, ຊ່ວງ​ເຮືອ, ໝາກ​ແລ້, ໜ້າ​ເກັກ, ໝາກ​ຂ່າງ, ລົດຖີບ, ສະໜຸກ​ເກີ, ມວຍ, ກ໊ອຟ ແລະ ດອກ​ປີກ​ໄກ່.
  ໂອກາດ​ນີ້ ຍັງ​ໄດ້​ຮັບ​ຟັງ​ການ​ລາຍ​ງານ​ຄວາມ​ພ້ອມ​ຂອງ​ການ​ອອກ​ສະຫຼາກ​ຊີງ​ໂຊກ ເພື່ອ​ລະດົມ​ທຶນ​ຊ່ວຍ​ນັກກິລາເຂົ້າ​ຮ່ວມ​ງານ​ດັ່ງກ່າວ ຊຶ່ງ​ຈະ​ໄດ້​ອອກ​ສະຫຼາກ​ຊີງ​ໂຊກ ວັນ​ທີ 19 ກຸມພາ 2020. ນອກ​ນີ້ ແຕ່​ລະສະ​ຫະ​ພັນ​ກິລາ​ຍັງ​ໄດ້​ປະກອບ​ຄຳ​ຄິດ​ເຫັນ ເພື່ອ​ໃຫ້ການ​ກະກຽມ​ຄວາມ​ພ້ອມ​ເຂົ້າ​ສູນ​ຝຶກຊ້ອມ​ນັກກິລາ​ແຕ່​ລະ​ປະເພດ ຕື່ມ​ອີກ.
(ຂ່າວ: ວົງ​ຈອນ​ກິລາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110