ຢູນຽນເພ ສາກົນ ຊ່ວຍເຫຼືອຜູ້ປະສົບໄພນ້ຳຖ້ວມເມືອງສະໜາມໄຊ


...

01.11.2018 17:27     

   ຢູນຽນເພສາກົນ ໄດ້ມອບເງິນຈໍານວນ 87 ລ້ານກີບ ໃຫ້ທະນາຄານການຄ້າຕ່າງປະ ເທດລາວ ມະຫາຊົນ (ທຄຕລ) ເພື່ອນໍາໄປຊ່ວຍເຫຼືອຜູ້ປະສົບໄພພິບັດນໍ້າຖ້ວມ ທີ່ເມືອງສະໜາມໄຊ ແຂວງອັດຕະປື. ພິທີມອບ-ຮັບເງິນຈຳ ນວນດັ່ງກ່າວ ໄດ້ຈັດຂຶ້ນເມື່ອວັນທີ 30 ຕຸລານີ້ ທີ່ທະນາຄານການຄ້າຕ່າງປະເທດລາວມະຫາ ຊົນ ມອບໂດຍຜູ້ຕາງໜ້າຢູນຽນເພສາກົນ ແລະ ກ່າວຮັບ ແມ່ນ ທ່ານ ນັນທະລາດ ແກ້ວປະເສີດ ຮອງຜູ້ອຳນວຍການໃຫຍ່ ທະນາຄານການຄ້າຕ່າງ ປະເທດລາວ ມະຫາຊົນ ມີພາກ ສ່ວນ ທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ. ທ່ານ ນັນທະລາດ ແກ້ວປະເສີດ ກ່າວວ່າ: ທຄຕລ ແລະ ສູນບັດສາກົນ ແມ່ນໄດ້ມີການຮ່ວມມື ກັນອອກບັດຕັ້ງແຕ່ປີ 2012 ເປັນຕົ້ນມາ ຊຶ່ງການຮ່ວມມືກັນທັງສອງຝ່າຍ ແມ່ນໄດ້ເຮັດໃຫ້ ທຄຕລ ມີຜະລິດຕະພັນ ແລະ ການບໍລິການຄື: ການປ່ຽນບັດເອທີເອັມ ຂອງ ທຄຕລ ທີ່ສາມາດໃຊ້ໄດ້ແຕ່ພາຍໃນ ໃນເມື່ອກ່ອນ ມາເປັນບັດເອທີເອັມ ທຄຕລ ຢູນຽນເພ ທີ່ສາມາດໃຊ້ໄດ້ທັງພາຍໃນ ແລະ ຕ່າງປະເທດ. ນອກຈາກບັດເອທີເອັມ ແລະ ບັດຢູນຽນເພແລ້ວ ຍັງມີການຮ່ວມມືອອກບັດນັກສຶກສາຂອງມະຫາວິທະຍາ ໄລແຫ່ງຊາດ ແລະ ວິທະຍາໄລຕ່າງໆ ໃນຂອບເຂດທົ່ວປະທດ,ສຳລັບສັງຄົມແມ່ນສາມາດນຳໃຊ້ບັດ ແທນເງິນສົດ ແລະ ເວລາເດີນທາງໄປຕ່າງປະເທດຍັງສາມາດໃຊ້ບັດ ເອທີເອັມ ທຄຕລ ຢູນຽນເພໃນ ການຊຳລະສິນຄ້າຕ່າງໆ ໄດ້ຢ່າງສະດວກສະບາຍ ແລະ ປອດໄພ, ທ່ານກ່າວຕື່ມວ່າ: ໜຶ່ງໃນຄຸນຄ່າຫຼັກ ຂອງ ສູນບັດສາກົນຢູນຽນເພ ແມ່ນ ການແບ່ງປັນການເຕີບໂຕ,ແຮງບັນດານໃຈຂອງ ບໍລິສັດແມ່ນ ເພື່ອສ້າງຜົນປະໂຫຍດຮ່ວມກັນໃຫ້ແກ່ທຸກຝ່າຍ ແລະ ໄດ້ຮັບໝາກຜົນເທົ່າກັນ ສຳລັບຄູ່ຮ່ວມກັບຄູ່ຮ່ວມທຸລະກິດ (win-win) ໂດຍສະເພາະແມ່ນຄູ່ຮ່ວມທຸລະກິດທີ່ຢູ່ໃນປະເທດນັ້ນໆ, ທີ່ໂດດເດັ່ນແມ່ນການໃຫ້ການຊ່ວຍເຫຼືອສັງຄົມ ຊຶ່ງຜ່ານມາ ຢູນຽນເພ ໄດ້ໃຫ້ການບໍລິຈາກ, ຮ່ວມເຄື່ອນໄຫວວຽກງານປົກປັກຮັກສາສິ່ງແວດລ້ອມ, ການກໍ່ສ້າງສິ່ງອຳນວຍຄວາມສະດວກ ເພື່ອສັງຄົມ ແລະ ເຮັດວຽກງານອາສາສະໝັກ ເພື່ອຊ່ວຍເຫຼືອສັງຄົມ ໃນຫຼາຍໆຕະຫຼາດໃນບັນດາປະເທດໃນເອເຊຍ, ໂອກາດດັ່ງກ່າວ ທ່ານ ນັນທະລາດ ແກ້ວ ປະເສີດ ໄດ້ສະແດງຄວາມຂອບໃຈ ຕໍ່ສູນບັດສາກົນ ຢູນຽນເພ ທີ່ໄດ້ມອບເງິນຊ່ວຍເຫຼືອຜູ້ປະສົບໄພນໍ້າຖ້ວມທີ່ເມືອງສະໜາມໄຊ ແຂວງອັດຕະປືໂດຍຜ່ານ ທຄຕລ. (ຂ່າວ: ສຳນານ)