6 ແຂວງ ປຶກສາຫາລືວຽກງານການແກ້ໄຂຄວາມທຸກຍາກ


...

01.11.2018 17:28     

   ກອງປະຊຸມປຶກສາຫາລື ປະເມີນຄືນການແກ້ໄຂຄວາມ ທຸກຍາກ ແລະ ການພັດທະ ນາແບບຍືນຍົງຕິດພັນກັບການລຶບລ້າງຄວາມທຸກຍາກ ໄດ້ຈັດຂຶ້ນເມື່ອບໍ່ດົນຜ່ານມາ ທີ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊໂດຍການເຂົ້າຮ່ວມເປັນປະທານຂອງ ທ່ານ ລີເບີ ລີບົວປາວ ຮອງຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ, ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ, ມີຫົວໜ້າພະແນກການທີ່ກ່ຽວຂ້ອງຈາກ 6 ແຂວງພາກກາງຄື: ແຂວງວຽງຈັນ, ໄຊສົມ ບູນ, ນະຄອນຫຼວງວຽງຈັນ, ຊຽງຂວາງ, ບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດ ພ້ອມພະນັກງານທີ່ກ່ຽວຂ້ອງ ຈາກສະຖາບັນຄົ້ນຄວ້າເສດຖະ ກິດແຫ່ງຊາດເຂົ້າຮ່ວມ. ທ່ານ ລີເບີ ລີບົວປາວ ໄດ້ກ່າວເປີດກອງປະຊຸມ ແລະ ສະເໜີຈຸດປະສົງໃນການຈັດກອງປະຊຸມຄັ້ງນີ້,ໃນໂອກາດດຽວກັນ ທ່ານ ບຸນເສັງ ປະທຳ ມະວົງ ຮອງເຈົ້າແຂວງບໍລິຄຳ ໄຊ ໄດ້ມີຄຳເຫັນຕໍ່ກອງປະຊຸມ ແລະ ລາຍງານຫຍໍ້ກ່ຽວກັບວຽກງານກໍ່ສ້າງຮາກຖານການເມືອງໃນການແກ້ໄຂຄວາມທຸກຍາກ ແລະ ການພັດທະນາຂອງແຂວງບໍລິຄຳໄຊຕໍ່ກອງປະຊຸມໄດ້ຮັບຊາບ. ຜ່ານການຈັດຕັ້ງປະຕິບັດການແກ້ໄຂຄວາມທຸກຍາກຂອງແຂວງບໍລິຄຳໄຊ ໃນໄລຍະຜ່ານມາເຫັນວ່າ ໃນທົ່ວ ແຂວງ ມີ 291 ບ້ານ, ມີປະ ຊາກອນທັງໝົດ 299.642 ຄົນ, ຍິງ 148.391 ຄົນ, ມີ 52.142 ຄອບຄົວ, ມີຄອບຄົວພົ້ນທຸກ 51.203 ຄອບຄົວ ກວມເອົາ 97,23%, ຄອບຄົວທຸກຍາກຍັງເຫຼືອ 939 ຄອບຄົວເທົ່າກັບ 2%, ມີບ້ານພົ້ນທຸກ 259 ບ້ານ, ກວມ 89%, ບ້ານທຸກຍາກຍັງເຫຼືອ 32 ບ້ານ, ເທົ່າກັບ 11%, ມີຄອບຄົວພັດທະນາ 46.422 ຄອບຄົວ, ກວມເອົາ 89%, ມີບ້ານພັດທະນາ 205 ບ້ານ. ຈາກນັ້ນທ່ານ ສະຖາບັນດິດ ອິນສີຊຽງໃໝ່ ຫົວໜ້າສູນຄົ້ນຄວ້ານະໂຍບາຍເສດຖະກິດມະຫາພາກ ແລະ ບັນດາໂຄງສ້າງເສດຖະກິດ ໄດ້ສະເໜີບົດປະເມີນຄືນກ່ຽວກັບການແກ້ໄຂຄວາມທຸກຍາກ ແລະ ການພັດທະນາແບບຍືນຍົງຕິດພັນກັບການລຶບລ້າງຄວາມທຸກຍາກໃນໄລຍະຜ່ານມາ. ຊຶ່ງໃນ ປີ 2000 ໄດ້ເຊັນສັນຍາສາກົນ ວ່າດ້ວຍການບັນລຸເປົ້າໝາຍສະຫັດສະຫວັດດ້ານການພັດ ທະນາ (MDGs) ຕາມ 8 ເປົ້າໝາຍ ແລະ 18 ຕົວຊີ້ບອກ ໃນນັ້ນເປົ້າໝາຍທີ່ 1 ແມ່ນລຶບລ້າງຄວາມທຸກຍາກ ແລະ ຄວາມອຶດຫິວ. ມາຮອດປີ 2003 ໄດ້ສ້າງແຜນຍຸດທະສາດການເຕີບໂຕແຫ່ງຊາດ ແລະ ລຶບລ້າງຄວາມທຸກຍາກເພື່ອເປັນແນວ ທາງດ້ານນະໂຍບາຍ ແລະ ຜັນ ຂະຫຍາຍເປັນແຜນການ ແລະ ໂຄງການລະອຽດເພື່ອຈັດຕັ້ງ ປະຕິບັດໃນການແກ້ໄຂຄວາມ ທຸກຍາກ. ມາຮອດປັດຈຸບັນ ເຫັນວ່າທຸກພາກສ່ວນທີ່ກ່ຽວ ຂ້ອງໄດ້ຈັດຕັ້ງປະຕິບັດຕາມ ທິດທາງຊີ້ນຳໄດ້ເປັນຢ່າງດີ ເຮັດໃຫ້ມີຄອບຄົວ, ບ້ານ, ເມືອງ ຂອງແຕ່ລະແຂວງໃນທົ່ວປະ ເທດໄດ້ລຸດພົ້ນອອກຈາກຄວາມ ທຸກຍາກໄດ້ເປັນຢ່າງດີ. ພ້ອມນີ້ໃນກອງປະຊຸມຍັງໄດ້ປຶກສາຫາລືຕາມບັນຫາ ແລະ ຄຳຖາມເຈາະຈີ້ມຂອງປະທານກອງ ປະຊຸມເປັນຕົ້ນຄວາມເປັນມາ ແລະ ນະໂຍບາຍແກ້ໄຂຄວາມ ທຸກຍາກ ແລະ ພັດທະນາຊົນ ນະບົດ, ຜົນສຳເລັດກ່ຽວກັບວຽກງານແກ້ໄຂຄວາມທຸກຍາກ ເປັນຕົ້ນ ດ້ານມະຫາພາກ, ດ້ານການສະໜອງທຶນ, ດ້ານຈັດສັນ ພູມລຳເນົາ ແລະ ບ່ອນທຳມາ ຫາກິນ, ດ້ານການຜະລິດເປັນ ສິນຄ້າ, ດ້ານການຈັດຕັ້ງປະຕິ ບັດນະໂຍບາຍ-ມະຕິ 3 ສ້າງ, ດ້ານການກຳນົດຄວາມທຸກ ຍາກ ແລະ ການພັດທະນາ. (ຂ່າວ: ຄຳຟອງ)