ຫາລືກະກຽມຄວາມພ້ອມຈັດການແຂ່ງຂັນກິລາ ຄົນພິການທົ່ວປະເທດ ຄັ້ງທີ III


...

     ກົມກິລາມວນຊົນ ກະຊວງສຶກສາທິການ ແລະ ກິລາ ຮ່ວມກັບພະແນກສຶກສາທິການ ແລະ ກິລາ ແຂວງຊຽງຂວາງ ຈັດກອງປະຊຸມປຶກສາຫາລືກະກຽມ ຄວາມພ້ອມຈັດການແຂ່ງຂັນກິລາຄົນພິການທົ່ວປະເທດຄັ້ງທີ III ປີ 2019, ເມື່ອບໍ່ດົນມານີ້ ທີ່ຫ້ອງປະຊຸມພະແນກ ສຶກສາທິການ ແລະ ກິລາ ແຂວງຊຽງຂວາງ ໂດຍໃຫ້ກຽດເປັນປະທານຮ່ວມຂອງທ່ານ ສີທາດ ຈັນທະບູລີ ຫົວໜ້າກົມກິລາ ມວນຊົນ ກະຊວງສຶກສາທິການ ແລະ ກິລາ, ທ່ານ ບົວລີ ພັນນາວົງ ຫົວໜ້າພະແນກສຶກສາທິ ການ ແລະ ກິລາ ແຂວງຊຽງຂວາງ ຊຶ່ງມີພະແນກ,ຂະແໜງການທີ່ກ່ຽວຂ້ອງເຂົ້າຮ່ວມ. ຈຸດປະສົງຂອງກອງປະ ຊຸມຄັ້ງນີ້ ຜູ້ແທນໄດ້ພ້ອມກັນ ຄົ້ນຄ້ວາປຶກສາຫາລືປະກອບຄໍາຄິດຄໍາເຫັນໃສ່ຮ່າງຂໍ້ຕົກລົງວ່າດ້ວຍການກະກຽມຄວາມ ພ້ອມດ້ານຕ່າງໆໃນການຈັດ ງານແຂ່ງຂັນກິລາຄົນພິການ ທົ່ວປະເທດຄັ້ງທີ III ປີ 2019 ທີ່ແຂວງຊຽງຂວາງເປັນເຈົ້າ ພາບ, ເປັນຕົ້ນແມ່ນຮ່າງ ຂໍ້ຕົກລົງແຕ່ງຕັ້ງຄະນະຮັບ ຜິດຊອບລະດັບຊາດ, ໂຄງຮ່າງກໍາມະການຝ່າຍຕ່າງໆ, ຮ່າງຂໍ້ຕົກລົງວ່າດ້ວຍການແບ່ງຄວາມຮັບຜິດຊອບລະຫວ່າງກະຊວງສຶກສາທິການ ແລະ ກິລາ ກັບ ແຂວງຊຽງຂວາງເຈົ້າ ພາບ, ການນໍາສະເໜີໂລໂກ໊ ແລະ ສັດນໍາໂຊກຂອງງານ, ຂໍ້ກໍານົດວ່າດ້ວຍການຈັດງານແຂ່ງຂັນກິລາຄົນພິການທົ່ວປະເທດ, ການກໍານົດປະເພດກິລາ, ແຜນດໍາເນີນງານ, ຕາ ຕະລາງມື້ແຂ່ງຂັນ ແລະ ມື້ເປີດ-ປິດ, ການກໍານົດຈໍານວນຫຼຽນ-ລາງວັນ, ສັງລວມຂໍ້ມູນຈໍານວນນັກກິລາຂອງບັນດາແຂວງ, ນະຄອນຫຼວງ ແລະ ຮ່າງເອກະສານທີ່ສໍາຄັນຕື່ມອີກຈໍານວນໜຶ່ງ ເພື່ອໃຫ້ມີຄວາມສົມບູນ ແລະ ເອກະພາບ ກັນ ໃນເວລານໍາໄປຈັດຕັ້ງປະຕິ ບັດ, ໃນຕອນທ້າຍກອງປະຊຸມ ຜູ້ແທນເຂົ້າຮ່ວມຈະໄດ້ຮັບຟັງ ການໂອ້ລົມ ປະກອບຄໍາຄິດຄໍາ ເຫັນຂອງທ່ານປະທານ ເພື່ອເປັນທິດເຍືອງທາງໃຫ້ແກ່ການ ຈັດຕັ້ງປະຕິບັດໃຫ້ໄດ້ຮັບຜົນດີ. ສໍາລັບການຈັດງານແຂ່ງຂັນແມ່ນ ໄດ້ກໍານົດໃຫ້ແຂວງຊຽງຂວາງເປັນເຈົ້າພາບ, ໃນເບື້ອງຕົ້ນໄດ້ກໍານົດເອົາການແຂ່ງຂັນເປັນທາງການລະຫວ່າງ ວັນທີ 13-19 ມັງກອນ 2019 ແລະ ກໍານົດເອົາ 9 ປະ ເພດກິລາເຂົ້າແຂ່ງຂັນຄື: ກິລາ ແລ່ນ-ລານ, ລອຍນໍ້າ, ຍົກນໍ້າໜັກ, ໂກນບານ, ເຕະບານ 5 ຄົນ, ບານບ້ວງລໍ້ເລື່ອນ, ໂລນບານ, ຈານບິນ ແລະ ກິລາຕີປິ່ງປ໋ອງ, ໄດ້ກໍານົດເອົາຫຼຽນທີ່ລະນຶກ (ຫຼຽນຄໍາ, ຫຼຽນເງິນ, ຫຼຽນທອງ) ຢ່າງລະ 366 ຫຼຽນ, ລວມທັງໝົດ 1.098 ຫຼຽນ, ກໍານົດເອົາ ໄຫຫີນ ເປັນໂລໂກ໊ຂອງງານ ແລະ ນົກແອ່ນເປັນສັດນໍາໂຊກ, ຖ້າມີຫຍັງຄືບໜ້າ ແລະ ປ່ຽນແປງ ຈະລາຍງານໃຫ້ທ່ານຊາບຄັ້ງຕໍ່ໄປ. (ຂ່າວ: ຄານສີສະຫວັນ ພົງພັກດີ)