ສວນຊາ 400 ກວ່າປີ ສະຖານທີ່ທ່ອງທ່ຽວທີ່ມີຊ່ືສຽງຂອງຜົ້ງສາລີ


...

08.11.2018 14:55     

   ໂດຍ: ສົມຄິດ ແກ້ວນວນລາ

ສວນຊາ 400 ກວ່າປີ ນອນຢູ່ໃນເຂດການປົກຄອງຂອງບ້ານກໍແມນ ເມືອງຜົ້ງສາລີ ຊຶ່ງຢູ່ຫ່າງຈາກເທດສະບານເມືອງຜົ້ງສາລີ ຕາມທິດຕາເວັນຕົກ 15 ກິໂລແມັດ, ຕາມການບອກເລົ່າຂອງຊາວບ້ານບອກວ່າ: ບ້ານກໍແມນຍັງມີຊື່ເອີ້ນອີກແບບໜຶ່ງ ຕາມຊື່ເອີ້ນຂອງບຸກຄົນທີ່ນຳເອົາຊາມາປູກໃນສະຖານທີ່ແຫ່ງ ນີ້, ລຸງຄົນນັ້ນມີຊື່ວ່າ: "ລຸງຈິງ" ຊຶ່ງ ລຸງ ຈິງ ເປັນຄົນຊົນເຜົ່າພູ ນ້ອຍ ສັນຊາດຈີນ ທີ່ເດີນທາງມາຈາກປະເທດ ສປ ຈີນ ແລະ ເປັນຄົນທຳອິດທີ່ນຳເອົາຕົ້ນຊາມາປູກໃນສະຖານທີ່ນີ້, ດັ່ງນັ້ນຊາວບ້ານທີ່ອາໄສຢູ່ໃນສະຖານທີ່ແຫ່ງນີ້ ຈຶ່ງນິຍົມກັນເອີ້ນວ່າ: "ບ້ານ ລຸງ ຈິງ" ຕາມນາມຊື່ຂອງ ລຸງ ຈິງ. ຊຶ່ງຊາ 400 ກວ່າປີ ເປັນ ຊາທີ່ມີຊື່ສຽງ ເພາະນຳ້ຊາ 400 ກວ່າປີເປັນຊາທີ່ເຂັ້ມຂຸ້ນ, ນຳ້ຊາສົດມີລົດຊາດແຊບ ແລະ ຊັບພະຄຸນ ເພື່ອສຸຂະພາບທີ່ດີກວ່າຊາປະເພດອື່ນ ແລະ ຍັງເປັນຊາທີ່ຄົນເຮົາປູກທີ່ມີອາຍຸເກົ່າແກ່ທີ່ສຸດໃນລາວເຮົາ ຫຼື ໃນໂລກກໍເປັນໄດ້ ເພາະນັກວິໄຈເພິ່ນໄດ້ວິໄຈຢັ້ງຢືນແລ້ວວ່າຊານີ້ມີອາຍຸ 400 ກວ່າປີມາແລ້ວ. ດັ່ງນັ້ນເພິ່ນ ຈຶ່ງຕັ້ງຊື່ວ່າ: "ຊາ 400 ປີ" ຍ້ອນເຫດຜົນນີ້ເອງ ສວນຊາ 400 ປີ ບ້ານກໍແມນ ເມືອງຜົ້ງສາລີ ຈຶ່ງເປັນອີກສະຖານທີ່ທ່ອງທ່ຽວທີ່ແຂກທັງພາຍໃນ ແລະ ຕ່າງປະເທດຢາກມາທ່ຽວຊົມ ແລະ ກາຍເປັນແຫຼ່ງທ່ອງທ່ຽວອັນດັບຕົ້ນໆຂອງແຂວງ ແລະ ແຫຼ່ງທ່ອງທ່ຽວທີ່ມີຊື່ສຽງຂອງລາວເຮົາ. ໃນປັດຈຸບັນນີ້ ການປູກຊາ, ຂາຍຊາແມ່ນເປັນອາຊີບຫຼັກຂອງຊາວເມືອງຜົ້ງສາລີເວົ້າລວມ, ເວົ້າສະເພາະແມ່ນຊາວບ້ານກໍແມນ ປັດຈຸບັນຊາ 400 ກວ່າປີ ມີເນື້ອທີ່ປູກ 32,25 ເຮັກຕາ ຊຶ່ງຢູ່ສວນຊາດັ່ງກ່າວແມ່ນມີຕົ້ນຊາຈຳນວນໜຶ່ງທີ່ໃຫຍ່ຊາໍ່ກັບໂຕຄົນເຮົາ ແລະ ສູງຍາວ, ບັນດາທ່ານຄົງຈະແປກໃຈວ່າເປັນຫຍັງຕົ້ນຊາທີ່ມີອາຍຸເຖິງ 400 ກວ່າປີ ແຕ່ຕົ້ນຊາຫາກໍໃຫຍ່ຊາໍ່ນີ້ ເຫດຜົນກໍ ຍ້ອນວ່າຕົ້ນຊາຈະບໍ່ໄດ້ເຕີບໃຫຍ່ຂະຫຍາຍຕົວຕາມທຳມະຊາດຂອງມັນຄືຕົ້ນໄມ້ອື່ນໆ ເພາະໃນແຕ່ລະປີ ປະຊາຊົນ ເຈົ້າຂອງຕົ້ນຊາໄດ້ມີການຕັດຕອນກິ່ງ, ງ່າ ແລະ ໃບແກ່ຂອງ ຕົ້ນຊາທຸກໆປີ ເພື່ອເຮັດໃຫ້ຕົ້ນ ຊາປົ່ງຍອດອ່ອນອອກງອກງາມ ແລະ ໃຫ້ຜົນຜະລິດຫຼາຍກວ່າ ແຕ່ຖ້າຫາກວ່າບໍ່ຕັດຕອນແລ້ວ ຈະເຮັດໃຫ້ບໍ່ໄດ້ຮັບຜົນຜະລິດຍອດຊາຫຼາຍເທົ່າທີ່ຄວນ ສະ ນັ້ນ ຕົ້ນຊາ ຈຶ່ງຂະຫຍາຍຕົວຊ້າ ສະນັ້ນ ລະດູການທີ່ຍອດຊາປົ່ງຫຼາຍ ແລະ ນຳ້ຊາເຂັ້ມຂຸ້ນແຊບທີ່ສຸດແມ່ນໃນໄລຍະເດືອນ 2 ຫາ ເດືອນ 4. ພວກເຮົາສາມາດເຂົ້າໄປທ່ຽວຊົມສວນຊາ 400 ກວ່າປີ ທີ່ບ້ານກໍແມນໄດ້ ໂດຍມີເສັ້ນທາງແຕ່ຕົວເມືອງຜົ້ງສາລີ ໄປຕາມທາງທິດຕາເວັນຕົກພຽງແຕ່ 15 ກິໂລແມັດ ເທົ່ານັ້ນ ແລະ ຖ້າຍ່າງໄປກໍໃຊ້ເວລາພຽງ 3 ຊົ່ວໂມງກໍໄປເຖິງບ້ານດັ່ງກ່າວ ຊຶ່ງຕະຫຼອດທາງທີ່ໄປແມ່ນເສັ້ນ ທາງຈະໄຕ່ໄປຕາມສັນພູທີ່ງົດງາມຂອງທຳມະຊາດພູຜາ ແລະ ສາມາດຫຼຽວກັບຄືນມາແນມເຫັນພູຟ້າຕັ້ງສະງ່າ ພ້ອມຕົວເມືອງຜົ້ງສາລີໄດ້ ຊຶ່ງເສັ້ນທາງໄປທ່ານຈະໄດ້ຜ່ານ ແລະ ສຳຜັດກັບວິຖີການດຳລົງຊີວິດຂອງຊາວສວນຊາ ແລະ ສວນຊາຂອງປະຊາຊົນເຜົ່າພູນ້ອຍບ້ານມົງເຈົ່າ, ບ້ານພູຊຸມ ແລະ ບ້ານຈ່າພູ ຈຶ່ງກ້າວເຂົ້າສູ່ບ້ານກໍແມນ ແລະ ສວນຊາທີ່ຢັ່ງຢາຍສັບປົນກັບເຮືອນຊານບ້ານຊ່ອງຂອງປະຊາຊົນຢ່າງງົດງາມ ມາຮອດນີ້. ນອກຈາກທ່ານຈະໄດ້ເລາະຊົມສວນຊາ 400 ກວ່າປີແລ້ວ ທ່ານຍັງຈະໄດ້ຊີມນ້ຳຊາ 400 ປີ ທີ່ປະຊາຊົນຊົງເອງກັບມື ແລະ ຜະລິດຕະພັນຊາແຫ້ງ, ຊາບັ້ງທີ່ເປັນຜະລິດຕະພັນພູມປັນຍາຂອງພໍ່ແມ່ພີ່ ນ້ອງຊາວບ້ານກໍແມນ ຫຼື ທ່ານສາມາດຂຶ້ນຊົມວິວສວນຊາຖ່າຍ ພາບໄວ້ເປັນທີ່ລະນຶກ ແລະ ດື່ມນຳ້ຊາທີ່ສາລາດື່ມນ້ຳຊາ 400 ປີກໍໄດ້. ປີທ່ອງທ່ຽວລາວ 2018 ຊຶ່ງພໍ່ແມ່ພີ່ນ້ອງຊາວບ້ານກໍແມນ ໄດ້ກະກຽມການບໍລິການ ແລະ ຜະລິດຕະພັນຊາ, ນຳ້ຊາແຊບຈາກສວນຊາ 400 ກ່ວາປີ ເພື່ອຕ້ອນຮັບແຂກຄົນທັງພາຍໃນ ແລະ ຕ່າງປະເທດທີ່ມາຢ້ຽມຊົມ, ສຳຜັດ ແລະ ຊີມ ໄດ້ ພ້ອມເຊີນຊວນບັນດາທ່ານຍາດເວ ລາມາທ່ຽວຊົມ ຊຶ່ງເປັນອີກສະ ຖານທີ່ທ່ອງທ່ຽວທີ່ສຳຄັນ ແລະ ມີຫຼາຍສິ່ງຫຼາຍຢ່າງທີ່ໜ້າຄົ້ນຫາຮັບຮອງວ່າເມື່ອທ່ານໄດ້ທ່ຽວ ຊົມແລ້ວຈະຕິດໃຈ ແລະ ຈົດຈຳ ສະຖານທີ່ສວນຊາປະຫວັດສາດ ສວນບັນພະບຸລຸດຊາ 400 ກວ່າປີແຫ່ງນີ້ໄປຊົ່ວກາລະນານ.