ຜົ້ງສາລີ ເປີດປີທ່ອງທ່ຽວລາວ ແລະ ເທດສະການດ່ືມນາໍ້ຊາດ້ວຍບັນຍາກາດຄຶກຄື້ນມ່ວນຊ່ືນ


...

12.11.2018 10:26     

   ພິທີເປີດປີທ່ອງທ່ຽວລາວ 2018 ແລະ ເທດສະການດື່ມ ນຳ້ຊາຂອງແຂວງຜົ້ງສາລີໄດ້ ຈັດຂຶ້ນ ໃນຕອນເຊົ້າຂອງວັນທີ 9 ພະຈິກ 2018 ທີ່ເດີ່ນສະ ໜາມ ຫຼວງຂອງແຂວງ, ໃຫ້ກຽດເຂົ້າຮ່ວມ ໃນພິທີມີທ່ານ ສອນໄຊ ສີພັນດອນ ຮອງນາຍົກລັດຖະ ມົນຕີ, ທ່ານ ຄຳເຈນ ວົງໂພສີ ເຈົ້າແຂວງໆຜົ້ງສາລີ, ມີແຂກຖືກເຊີນຕະຫຼອດຮອດຊາວແຂວງຜົ້ງສາລີເຂົ້າຮວ່ມຢ່າງຫຼວງຫຼາຍ.
ການຈັດກິດຈະກຳໃນຄັ້ງ ນີ້ ເປັນຂະບວນການທີ່ສຳຄັນ ເພື່ອນຳໃຊ້ທ່າແຮງຂອງແຂວງ ໃຫ້ເກີດປະໂຫຍດສູງສຸດ ໂດຍສະເພາະແມ່ນການຊຸກຍູ້ສົ່ງ ເສີມວຽກງານການທ່ອງທ່ຽວ, ການປົກປັກຮັກສາທຳມະຊາດ, ການອະນຸລັກວັດທະນະທຳ ແລະ ຮີດຄອງປະເພນີອັນດີງາມ ຂອງປະຊາຊົນບັນດາເຜົ່າຢູ່ພາຍໃນແຂວງຜົ້ງສາລີ ໃຫ້ກວ້າງຂວາງ, ໝັ້ນຄົງຍາວນານ ແລະ ນຳເອົາ ຊື່ສຽງມາໃຫ້ທ້ອງຖິ່ນກໍຄືປະ ເທດຊາດ, ທັງເປັນການສ້າງບັນຍາກາດທີ່ເອື້ອອຳນວຍໃຫ້ ແກ່ການໄປມາຫາສູ່ກັນ, ແລກ ປ່ຽນ ແລະ ຈຳໜ່າຍສິນຄ້າທີ່ ເປັນຜະລິດຕະພັນຂອງທ້ອງ ຖິ່ນໃຫ້ມີການຂະຫຍາຍຕົວ ປະກອບສ່ວນເຂົ້າໃນການພັດ ທະນາເສດຖະກິດ-ສັງຄົມຂອງ ແຂວງກໍຄືເສດຖະກິດ-ສັງຄົມ ແຫ່ງຊາດໃຫ້ມີຄວາມໜັກ ແໜ້ນ, ເຂັ້ມແຂງ ແລະ ຂະຫຍາຍຕົວ ຢ່າງບໍ່ຢຸດຢັ້ງ.
ພິທີເລີ່ມຕົ້ນດ້ວຍການຍ່າງສວນສະໜາມຂອງແຕ່ລະກ້ອນກຳລັງ ເປັນຕົ້ນກ້ອນກຳລັງເຍົາວະຊົນທັນວາ, ກ້ອນຊາວໜຸ່ມ, ກ້ອນນັກຮຽນນັກສຶກສາ ແລະ ຄູ-ອາຈານ, ກ້ອນກໍາລັງແຫ່ຕົ້ນຊາ, ກ້ອນກຳລັງສຽງແຄນລາວ ແລະ ກ້ອນກຳລັງ 15 ຊົນເຜົ່າ.
ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ ປະ ທານຄະນະຮັບຜິດຊອບຈັດງານປີທ່ອງທ່ຽວລາວ 2018 ແລະ ເທດສະການດື່ມນາໍ້ຊາທີ່ແຂວງຜົ້ງສາລີ ໄດ້ຂຶ້ນລາຍງານ ກ່ຽວກັບການກະກຽມຈັດງານ ໃນຄັ້ງນີ້ວ່າ: ແຂວງຜົ້ງສາລີ ໄດ້ເລີ່ມກະກຽມມາແຕ່ທ້າຍເດືອນຕຸລາ 2017 ໂດຍປະກອບມີກິດຈະກຳຕ່າງໆທີ່ຕິດພັນກັບຂະບວນການຂອງແຕ່ລະເມືອງ ເປັນຕົ້ນ ເມືອງບຸນເໜືອ; ຈັດງານປີທ່ອງທ່ຽວ 2018 ແລະ ເທດສະການຈູດບັ້ງໄຟ; ເມືອງຍອດອູ ເທດສະການພະທາດກິ່ວແອກ; ເມືອງສຳ ພັນ: ຈັດງານປີທ່ອງທ່ຽວຕິດພັນກັບການສ້າງຄອບຄົວ ແລະ ບ້ານວັດທະນະທຳ ບ້ານອາເຊີ; ເມືອງບຸນໃຕ້ຈັດງານປີທ່ອງ ທ່ຽວ 2018 ແລະ ງານສະແດງ ສິລະປະວັນນະຄະດີບັນດາ ເຜົ່າ, ຕິດພັນກັບການຕາໍ່ຫູກທໍໄໝ ຍ້ອມສີທຳມະຊາດຂອງເຜົ່າຢັ້ງ ບ້ານລ້ອງນາຍເກົ່າ ແລະ ບ້ານນານຳ້; ເມືອງໃໝ່ ເທດສະການທ່ຽວຊົມຕາດຫ້ວຍຈິກ. ເມືອງຂວາ ຈັດງານປີທ່ອງທ່ຽວຕິດພັນກັບບູນປະເພນີຊ່ວງເຮືອ. ສຳລັບການຈັດງານໃນຄັ້ງນີ້, ແຂວງຍັງໄດ້ຈັດງານຕະຫຼາດນັດ ຂາຍສິນຄ້າພາຍໃນ ແລະ ຕ່າງປະເທດ, ປະກວດນາງສາວງາມ ແລະ ນັກຮອງສຽງດີ ບັນດາເຜົ່າທົ່ວແຂວງ ໃນນັ້ນ ດ້ານສິນຄ້າ ປະກອບມີສິນຄ້າກະສິກຳ, ອຸດສະຫະກຳ ແລະ ເຄື່ອງຫັດຖະກຳ ທີ່ເປັນເອກະລັກຂອງປະຊາຊົນບັນດາເຜົ່າ ທີ່ນຳມາຈາກບັນດາເມືອງໃນທົ່ວແຂວງ, ສິນຄ້າຈາກລາຊະອານາຈັກໄທ, ສສ ຫວຽດນາມ ແລະ ສປ ຈີນ ຈຳ ນວນ 60 ກວ່າຮ້ານ ຊຶ່ງມີມູນຄ່າຂອງສິນຄ້າທັງໝົດໃນງານ ປະມານ 1 ຕື້ກ່ວາກີບ, ຄາດຄະເນຜູ້ເຂົ້າຮ່ວມ ແລະ ຊົມງານໃນຄັ້ງນີ້ມີປະມານ 2.000 ກວ່າຄົນ. ສຳລັບກິດຈະກຳສະແດງສິລະປະວັນນະຄະດີຂອງຊົນເຜົ່າແມ່ນມາຈາກບັນດາເມືອງ ຈຳນວນ 30 ລາຍການ, ສິລະປະກອນຂອງແຂວງ 4 ລາຍການ, ລວມທັງໝົດ 34 ລາຍການ ຊຶ່ງສ່ອງແສງໃຫ້ເຫັນເຖິງຄວາມແຕກຕ່າງກັນ ທາງດ້ານວິທີການດຳລົງຊີວິດ ແລະ ຄວາມເປັນເອກະລັກ ທາງດ້ານຮີດຄອງປະເພນີອັນດີງາມຂອງແຕ່ລະເຜົ່າ.
ທ່ານ ຄຳເຈນ ວົງໂພສີ ກ່າວວ່າ: ການຈັດງານປີທ່ອງທ່ຽວລາວ 2018 ແລະ ເທດສະການດຶ່ມນຳ້ຊາ ທີ່ແຂວງຜົ້ງສາລີ ໃນຄັ້ງນີ້. ນອກຈາກເປັນການປຸກລະດົມກຳລັງແຮງຂອງທົ່ວສັງຄົມເຂົ້າໃນການສົ່ງເສີມ ແລະ ພັດທະນາການທ່ອງທ່ຽວ ໃຫ້ກາຍເປັນຂະແໜງການບຸລິມະສິດ ໃນການພັດທະນາເສດຖະກິດ-ສັງຄົມຂອງແຂວງແລ້ວ ຍັງສະແດງເຖິງ ຄວາມສາມັກຄີເປັນປຶກແຜ່ນ, ເປັນການເສີມຂະຫຍາຍທ່າແຮງການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດ ເພື່ອສືບຕໍ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ອງທ່ຽວຢູ່ແຂວງຜົ້ງສາລີ ນັບມື້ນັບຫຼາຍຂຶ້ນ.
ທ່ານ ສອນໄຊ ສີພັນດອນ ໄດ້ໃຫ້ກຽດຂຶ້ນລັ່ນຄ້ອງ 9 ບາດ, ຕັດແຖບຜ້າ ແລະ ປ່ອຍປ້າຍ ພິທີຈັດງານປີທ່ອງທ່ຽວລາວ 2018 ແລະ ເທດສະການດື່ມນາໍ້ຊາຢ່າງເປັນທາງການ ພ້ອມກັນນັ້ນກໍຍັງໄດ້ມອບເງິນໃຫ້ແກ່ແຂວງ ຈຳນວນ 50 ລ້ານກີບ ແລະ ທຽ່ວຊົມງານຕະຫຼາດນັດ ຕື່ມອີກ. (ຂ່າວ: ກົມປະຊາສຳພັນ, ຫສນຍ)