ທ່ານ ຫງວຽນຝູຈ້ອງ ສາບານຕົວດຳລົງຕຳແໜ່ງປະທານປະເທດຫວຽດນາມ


   ວິທະຍຸກະຈາຍສຽງຫວຽດນາມລາຍງານວ່າ: ວັນທີ 23 ຕຸລາຜ່ານມາ, ກອງປະ ຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 14, ໄດ້ເຫັນດີເປັນເອກະພາບເລືອກຕັ້ງທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໃຫ້ດຳລົງຕຳແໜ່ງເປັນປະທານປະເທດ ໃນອາຍຸການ 2016 - 2021. ຂ່າວລະບຸວ່າ: ໃນພິທີສາບານຕົວເຂົ້າຮັບດຳລົງຕຳແໜ່ງ, ທ່ານ ຫງວຽນຝູຈ້ອງ ເລຂາທິການໃຫຍ່ ປະທານປະເທດຫວຽດນາມ ໄດ້ຢັ້ງຢືນວ່າ: ພາຍໃຕ້ຄັນທຸງຊາດທີ່ສັກກະລະບູຊານີ້, ຂ້າພະເຈົ້າ ໃນນາມປະທານປະເທດ ແຫ່ງ ສສ ຫວຽດນາມ ຂໍສາບານຕົວຕໍ່ສະພາແຫ່ງຊາດ, ຕໍ່ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດ ຈົງຮັກພັກດີຕໍ່ປະເທດຊາດ, ຕໍ່ປະຊາຊົນ, ຕໍ່ກັບລັດຖະທຳມະນູນ ສສ ຫວຽດນາມ. ພະຍາຍາມ ເຮັດສຳເລັດໜ້າທີ່ຊຶ່ງພັກກອມມູນິດຫວຽດນາມ, ລັດ ແລະ ປະຊາຊົນມອບໝາຍໃຫ້. ທ່ານ ຫງວຽນຝູຈ້ອງ ກ່າວເນັ້ນວ່າ: ຂ້າພະເຈົ້າຮູ້ສຶກເປັນກຽດອັນຍິ່ງໃຫຍ່ ແລະ ກໍແມ່ນໜ້າທີ່ອັນໜັກໜ່ວງ ຊຶ່ງ ທ່ານ ໃຫ້ຄໍາໝັ້ນສັນຍາວ່າຈະພະຍາຍາມເຮັດຫຼ້ອນໜ້າທີ່ຂອງຕົນຕາມການມອບໝາຍຂອງສະພາແຫ່ງຊາດ, ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດ.