ທ່ານ ສີຈິ້ນຜິງ ຮຽກຮ້ອງບັນດາປະເທດຢຶດໝັ້ນການເປີດປະຕູ ສູ່ພາຍນອກ ແລະ ເຊື່ອມໂຍງ


   ວິທະຍຸສາກົນແຫ່ງປະ ເທດຈີນລາຍງານວ່າ: ວັນທີ 5 ພະຈິກນີ້, ງານວາງສະແດງສິນຄ້ານຳເຂົ້າສາກົນຈີນຄັ້ງທຳ ອິດ ໄດ້ເປີດຂຶ້ນຢູ່ນະຄອນຊຽງໄຮ້ຂອງຈີນ. ທ່ານ ສີຈິ້ນຜິງ ປະ ທານປະເທດຈີນ ໄດ້ເຂົ້າຮ່ວມພິທີເປີດງານ ແລະ ກ່າວຄຳປາໄສໂດຍຊີ້ອອກວ່າ: ແມ່ນງານວາງສະແດງລະດັບຊາດຂະ ໜາດໃຫຍ່ທີ່ເນັ້ນຫົວຂໍ້ການນຳເຂົ້າ ໂດຍມີເປົ້າໝາຍເພື່ອໃຫ້ບັນດາປະເທດກຳກາລະໂອ ກາດການພັດທະນາຂອງຈີນ, ລົງເລິກການຮ່ວມມືເສດຖະກິດການຄ້າສາກົນ, ບັນລຸຄວາມຈະເລີນຮຸ່ງເຮືອງຮ່ວມກັນ ແລະ ເປັນການກະທຳຕົວຈິງທີ່ຈີນຊຸກຍູ້ການສ້າງເສດຖະກິດໂລກ ທີ່ເປີດປະຕູ ແລະ ສະໜັບສະ ໜູນເສດຖະກິດໂລກາພິວັດ. ຂ່າວລະບຸວ່າ: ງານວາງ ສະແດງສິນຄ້າຄັ້ງນີ້ ມີ 172 ປະ ເທດ, ເຂດແຄ້ວນ ແລະ ອົງການຈັດຕັ້ງສາກົນເຂົ້າຮ່ວມ, ມີວິສາຫະກິດຫຼາຍກວ່າ 3.600 ແຫ່ງເຂົ້າຮ່ວມການວາງສະແດງ ແລະ ຄາດວ່າມີນັກທຸລະກິດພາຍໃນ ແລະ ຕ່າງປະເທດ 4 ແສນກວ່າຄົນຈະມາຮ່ວມກອງປະຊຸມ ເພື່ອປຶກສາຫາລືການຈັດຊື້ສິນຄ້າ. ນອກຈາກນັ້ນ, ໃນງານວາງສະແດງຄັ້ງນີ້, ຍັງຈັດກອງປະຊຸມເວທີປຶກສາຫາລືເສດຖະກິດການຄ້າສາກົນຫົງສຽວທີ່ມີຫົວຂໍ້ວ່າ; "ກະຕຸ້ນຄວາມ ມີຊີວິດຊີວາໃໝ່ຂອງການຄ້າ ທົ່ວໂລກ, ຮ່ວມກັນສ້າງສະພາບ ການໃໝ່ທີ່ຕ່າງຝ່າຍຕ່າງມີຜົນປະໂຫຍດ", ຈີນຫວັງວ່າຈະສ້າງ ກອງປະຊຸມດັ່ງກ່າວ ໃຫ້ເປັນເວທີສຳຄັນຄັ້ງໜຶ່ງທີ່ປຶກສາຫາລືບັນຫາສຳຄັນຂອງໂລກ. ທ່ານ ສີຈິ້ນຜິງ ໄດ້ຮຽກ ຮ້ອງໃຫ້ບັນດາປະເທດຢຶດໝັ້ນການເປີດປະຕູສູ່ພາຍນອກ ແລະ ເຊື່ອມໂຍງເຂົ້າກັນ, ເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ; ຢຶດໝັ້ນການພັດທະນາທີ່ນຳພາໂດຍການປະດິດສ້າງໃໝ່, ເລັ່ງລັດສ້າງພະລັງແຮງຊຸກດັນໃໝ່ປ່ຽນແທນພະລັງແຮງເກົ່າທີ່ຫຼ້າຫຼັງ; ຢຶດໝັ້ນການໂອບເອື້ອອາລີ ແລະ ຕ່າງຝ່າຍຕ່າງມີຜົນປະ ໂຫຍດ, ຊຸກຍູ້ການພັດທະນາຮ່ວມກັນ. ບັນດາປະເທດຄວນຄັດຄ້ານລັດທິປົກປ້ອງ ແລະ ລັດທິຝ່າຍດຽວຢ່າງເດັດດ່ຽວໜຽວແໜ້ນ, ຍົກສູງລະດັບການເປີດປະຕູຂອງລັດທິຫຼາຍຝ່າຍ ແລະ ສອງຝ່າຍ, ຊຸກຍູ້ເສດຖະ ກິດບັນດາປະເທດເຊື່ອມໂຍງເຊື່ອມຈອດເຂົ້າກັນ, ຮ່ວມກັນສ້າງເສດຖະກິດໂລກແບບເປີດປະຕູ; ເພີ່ມທະວີການປະສານງານດ້ານນະໂຍບາຍເສດຖະ ກິດມະຫາພາກ, ຫຼຸດຜ່ອນຜົນສະທ້ອນທາງລົບຕໍ່ພາຍນອກໃຫ້ໜ້ອຍລົງ; ຊຸກຍູ້ການສ້າງລະບົບເສດຖະກິດການຄ້າສາກົນທີ່ເປັນທຳ, ສົມເຫດສົມຜົນ ແລະ ໂປ່ງໃສ, ຊຸກຍູ້ການຄ້າ ແລະ ການລົງທຶນຢ່າງເສລີສະດວກ, ສົ່ງເສີມເສດຖະ ກິດໂລກໃຫ້ເປີດປະຕູສູ່ພາຍນອກ, ແລກປ່ຽນ ແລະ ເຊື່ອມໂຍງເຂົ້າກັນຕື່ມອີກ.