ທ່ານ ຫຼີເຄີ້ສຽງ ກ່າວປາຖະກະຖາໃນງານສຳມະນາສິງກະໂປ


...

     ວິທະຍຸສາກົນແຫ່ງປະເທດຈີນລາຍງານວ່າ: ວັນທີ 13 ພະຈິກຜ່ານມາ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ໄດ້ກ່າວປາຖະກະຖາ ວ່າດ້ວຍຫົວຂໍ້: "ຮ່ວມກັນສ້າງ ແລະ ຊົມໃຊ້ຄວາມຈະເລີນຮຸ່ງເຮືອງໃນທ່າມກາງການເປີດປະຕູ ແລະ ເຊື່ອມສານກັນ" ຢູ່ໃນ "ງານສຳມະນາສິງກະໂປ". ໂດຍມີທ່ານ ລີຊຽນລົງ ນາຍົກລັດຖະມົນຕີສິງກະໂປ ເຂົ້າຮ່ວມປະຊຸມ ລວມທັງບຸກຄົນວົງການຕ່າງໆຂອງສິງກະໂປ ແລະ ນັກການທູດຕ່າງປະເທດປະຈຳສິງກະໂປ 500 ກວ່າຄົນ ໄດ້ເຂົ້າງານປາຖະກະຖາດັ່ງກ່າວ.
   ທ່ານ ຫຼີເຄີ້ສຽງ ກ່າວວ່າ: ການພົວພັນຈີນ-ສິງກະໂປ ໃນປັດຈຸບັນພວມກ້າວໄປໜ້າຢ່າງໜັກ ແໜ້ນ, ການຮ່ວມມືທີ່ຕິດແທດຕົວຈິງສືບຕໍ່ໄດ້ຮັບການຊຸກຍູ້ໄປເລື້ອຍໆ. ປີ 2015 ທ່ານ ສີຈິ້ນຜິງ ປະທານປະເທດຈີນ ໄດ້ໄປຢ້ຽມຢາມສິງກະໂປທາງລັດຖະກິດ ຊຶ່ງສອງປະເທດໄດ້ຕົກລົງສ້າງການພົວພັນຄູ່ຮ່ວມມືຮອບດ້ານກ້າວທັນຍຸກສະໄໝ. ຕະຫຼອດໄລຍະເວລາ 40 ປີທີ່ຈີນດຳເນີນການປະຕິຮູບ ແລະເປີດປະຕູສູ່ພາຍນອກເປັນຕົ້ນມາ, ວົງການຕ່າງໆຂອງສິງກະໂປ ໄດ້ມີສ່ວນຮ່ວມຢ່າງກວ້າງຂວາງ ແລະ ຮ່ວມກັບຈີນ ບັນລຸຜົນປະໂຫຍດຮ່ວມກັນ. ການຢ້ຽມຢາມຂອງທ່ານ ຫຼີເຄີ້ສຽງ ໃນຄັ້ງນີ້ ກໍ່ແມ່ນເພື່ອຮ່ວມກັບສິງກະໂປ ຖອດຖອນບົດຮຽນນຳກັນ, ທ້ອນໂຮມຄວາມຮັບຮູ້ທີ່ເປັນເອກະພາບກັນ, ລົງເລິກການຮ່ວມມື, ຊຸກຍູ້ການພົວພັນຈີນ-ສິງກະໂປ ຂຶ້ນສູ່ລະດັບໃໝ່.
   ທ່ານ ຫຼີເຄີ້ສຽງ ຊີ້ອອກວ່າ: ສະຖານະການການເມືອງ ແລະ ເສດຖະກິດສາກົນສະຫຼັບສັບຊ້ອນ, ປັດໄຈທີ່ບໍ່ແນ່ນອນເພີ່ມຫຼາຍຂຶ້ນ. ຫວນຄືນ 70 ກວ່າປີ ຫຼັງສົງຄາມໂລກຄັ້ງທີສອງສິ້ນສຸດລົງເປັນຕົ້ນມາ, ສັນຕິພາບໂລກ ໄດ້ຮັບການປົກປັກຮັກສາໂດຍກວມລວມ, ປະຊາຊົນຜູ້ທຸກຍາກສືບຕໍ່ຫຼຸດລົງ, ທັງໝົດນີ້ແມ່ນຍ້ອນມີລັດທິຫຼາຍຝ່າຍ, ມີລະບຽບສາກົນ ແລະ ການຄ້າເສລີທີ່ຖືກົດລະບຽບເປັນພື້ນຖານ. ພາຍໃຕ້ສະຖານະການປັດຈຸບັນ, ຕ້ອງປະຕິບັດຕາມຫຼັກການລັດທິຫຼາຍຝ່າຍ, ຢຶດໝັ້ນການເຄົາລົບ ຊຶ່ງກັນ ແລະກັນ, ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ, ມີຄວາມສະເໝີພາບກັນ ລະຫວ່າງ ປະເທດນ້ອຍແລະ ປະເທດໃຫຍ່, ຢຶດໝັ້ນແກ້ໄຂບັນຫາຂອງທົ່ວໂລກໂດຍຜ່ານການປຶກສາຫາລືກັນ, ແກ້ໄຂຄວາມຂັດແຍ້ງກັນດ້ວຍການເຈລະຈາໂດຍສັນຕິ. ຈີນ ສະໜັບສະໜູນການຄ້າເສລີ ແລະ ສະໜັບສະໜູນຄວາມຍຸຕິທຳຂອງການຄ້າ, ເສລີພາບແມ່ນເງື່ອນໄຂເບື້ອງຕົ້ນຂອງການຄ້າຢ່າງຍຸຕິທຳ, ຖ້າການຄ້າຂາດຄວາມຍຸຕິທຳ ແລະ ສະເໝີພາບກັນ ກໍ່ບໍ່ສາມາດດຳເນີນໄປຢ່າງຕໍ່ເນື່ອງໄດ້. ສຳລັບບັນຫາທີ່ເກີດຂຶ້ນຈາກ ຂະບວນໂລກາພິວັດ ແລະ ການຄ້າເສລີ, ຄວນພິຈາລະນາດ້ວຍສາຍຕາພັດທະນາ, ແກ້ໄຂ ດ້ວຍການຊຸກຍູ້ການປະຕິຮູບ, ຫາກບໍ່ແມ່ນລະເມີດກົດຂໍ້ກຳນົດພື້ນຖານຂອງລັດທິຫຼາຍຝ່າຍ ແລະ ການຄ້າເສລີ. ທິດພັດທະນາຄວາມສີວິໄລຂອງມວນມະນຸດ ແມ່ນຈະແຈ້ງ, ເຖິງຈະຜ່ານການທົດສອບນາໆປະການ, ແຕ່ຖ້າຫາກທຸກຝ່າຍຮ່ວມກັນທຳຄວາມພະຍາຍາມ, ກໍຈະສາມາດຜ່ານຜ່າຄວາມຫຍຸ້ງຍາກໄດ້ຢ່າງແນ່ນອນ.

...

   ທ່ານ ຫຼີເຄີ້ສຽງ ເນັ້ນວ່າ: ການມາຢ້ຽມຢາມສິງກະໂປໃນຄັ້ງນີ້, ທ່ານ ຫຼີເຄີ້ສຽງ ຈະເຂົ້າຮ່ວມກອງປະຊຸມຕ່າງໆຂອງຜູ້ນຳການຮ່ວມມືອາຊີຕາເວັນອອກ ເພື່ອຊຸກຍູ້ການພົວພັນຈີນ-ອາຊຽນ ຂະຫຍາຍຕົວຕື່ມອີກ. ປີນີ້, ການເຈລະຈາກ່ຽວກັບສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ (RECP) ໄດ້ຮັບຄວາມຄືບໜ້າຕົວຈິງ. ຈີນ ຈະສືບຕໍ່ຊຸກຍູ້ການເຈລະຈາ ທີ່ຕ່າງຝ່າຍຕ່າງມີຜົນປະໂຫຍດ ແລະ ຄ່ອງແຄ່ວ ຫວັງວ່າທຸກຝ່າຍຮ່ວມກັນພະຍາຍາມ ເພື່ອໃຫ້ສຳເລັດການເຈລະຈາໃນປີ 2019, ບັນລຸສັນຍາທີ່ຮອບດ້ານທັນສະໄໝ, ມີລະດັບສູງ ແລະ ຕ່າງຝ່າຍຕ່າງມີຜົນປະໂຫຍດ. ການຮ່ວມມືຂອງອາຊີຕາເວັນອອກ ແມ່ນບໍ່ສາມາດແຍກອອກຈາກສະພາບແວດລ້ອມທີ່ສັນຕິພາບ ແລະ ສະຖຽນລະພາບ. ປັດຈຸບັນ ສະຖານະການທະເລຈີນໃຕ້ ເລີ່ມຜ່ອນຍານ ແລະ ມີຄວາມໝັ້ນຄົງ, ຈີນ ຍິນດີຮ່ວມກັບບັນດາປະເທດອາຊຽນພະຍາຍາມນຳກັນ, ຈັດຕັ້ງປະຕິບັດຖະແຫຼງການເຄື່ອນໄຫວຂອງທຸກຝ່າຍຢູ່ທະເລຈີນໃຕ້, ບົນພື້ນຖານການເຈລະຈາ ເປັນເອກະພາບກັນ, ຍາດແຍ່ງໃຫ້ສຳເລັດການປຶກສາຫາລືກ່ຽວກັບຫຼັກມາດຖານການເຄື່ອນໄຫວຢູ່ທະເລຈີນໃຕ້ (COC) ພາຍໃນເວລາ 3 ປີ, ເພື່ອສັນຕິພາບ ແລະ ການພັດທະນາ ຂອງພາກພື້ນ.
   ທ່ານ ຫຼີເຄີ້ສຽງ ຊີ້ອອກວ່າ: ຈີນຈະເດັດດ່ຽວເດີນຕາມເສັ້ນທາງພັດທະນາໂດຍສັນຕິຢ່າງໝັ້ນໜຽວ ບໍ່ປ່ຽນແປງ, ຢຶດໝັ້ນການຢູ່ຮ່ວມກັບປະເທດເພື່ອບ້ານເປັນຢ່າງດີ, ເປັນໝູ່ກັບເພື່ອນບ້ານ, ຢຶດໝັ້ນທັດສະນະທີ່ສະໜິດສະໜົມ ມີຄວາມຈິງໃຈຕໍ່ກັນ, ສ້າງຜົນປະໂຫຍດໃຫ້ກັນ ແລະ ກັນ ແລະ ຖືກຕ້ອງປອງດອງກັນ, ຊຸກຍູ້ການພົວພັນກັບບັນດາປະເທດອາຊຽນກ້າວໄປໜ້າ. ຜົນງານທີ່ຈີນ ໄດ້ຮັບໃນການດຳເນີນການປະຕິຮູບ ແລະ ເປີດປະຕູສູ່ພາຍນອກຕະຫຼອດໄລຍະເວລາ 40 ປີມານີ້ ແມ່ນປະຊາຊົນຈີນຍາດມາໄດ້ຢ່າງລຳບາກກາກກຳ. ໃນຕໍ່ໜ້າ, ຈີນຈະເພີ່ມທະວີການປະຕິຮູບຕື່ມອີກ, ເປີດປະຕູສູ່ພາຍນອກຕໍ່ໄປ, ຍິນດີຕ້ອນຮັບວິສາຫະກິດສິງກະໂປ ກໍ່ຄືບັນດາປະເທດອາຊຽນ ກຳໂອກາດນີ້ໃຫ້ດີ, ເພີ່ມການລົງທຶນຢູ່ຈີນ. ໂດຍອວ່າຍໜ້າໄປສູ່ອະນາຄົດ, ຈີນຍິນດີຮ່ວມມືກັບສິງກະໂປ ຊຸກຍູ້ການສ້າງສາ "ໜຶ່ງແລວ ໜຶ່ງເສັ້ນທາງ", ສ້າງເວທີທີ່ເຊື່ອມຈອດກັນ, ຄ້ຳຊູດ້ວຍການທະນາຄານ ແລະ ການຮ່ວມມືສາມຝ່າຍ, ຊຸກຍູ້ການພົວພັນຈີນ-ສິງກະໂປ ແລະ ການພົວພັນຈີນ-ອາຊຽນ ສືບຕໍ່ກ້າວໄປໜ້າ, ປະກອບສ່ວນອັນໃໝ່ເຂົ້າໃນການຊຸກຍູ້ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງອາຊີກໍ່ຄືຂອງໂລກ.
   ນອກຈາກນັ້ນ, ທ່ານ ຫຼີເຄີ້ສຽງ ຍັງໄດ້ຕອບຄຳຖາມຂອງຜູ້ຟັງກ່ຽວກັບການພົວພັນຈີນ-ສິງກະໂປ, ການຮ່ວມມືຢ່າງມີຫົວຄິດປະດິດສ້າງ, ການພົວພັນຈີນ-ອາເມຣິກາ ແລະ ການຮ່ວມມືຈີນ-ອາຊຽນ ເປັນຕົ້ນ.