ບົດສຳພາດທ່ານຈ່ຽງຈ້າຍຕົ່ງ ເອກອັກຄະລັດຖະທູດ ສປ ຈີນປະຈຳ ສປປ ລາວ


...

18.03.2019 11:15     

    ວັນທີ 14 ມີນານີ້ ທ່ານ ຈ່ຽງຈ້າຍຕົ່ງ ເອກອັກຄະລັດຖະທູດ ສປ ຈີນໄດ້ໃຫ້ສຳພາດຕໍ່ນັກຂ່າວສະຖານີວິທະຍຸໂທລະພາບສູນກາງຈີນພາກພາສາລາວ (CMG ຊື່ເກົ່າຄື: ສະຖານີວິທະຍຸສາກົນແຫ່ງປະເທດຈີນ CRI) ທ່ານກ່າວວ່າ: ປະຊາຊົນສອງປະເທດຈີນ-ລາວລາວ-ຈີນ ຄວນຄຽງບ່າຄຽງໄຫຼ່ຮ່ວມມືກັນ ສະແຫວງຫາການພັດທະນາຮ່ວມກັນ, ຍ່ອມຈະບັນລຸເປົ້າໝາຍຫຼຸດພົ້ນອອກຈາກຄວາມທຸກຍາກ ແລະ ມີຊີວິດທີ່ສົມບຸນພູມສຸກກວ່າເກົ່າ.
ທ່ານ ຈ່ຽງຈ້າຍຕົ່ງ ໄດ້ຕີລາຄາສູງຕໍ່ວຽກງານຫຼຸດພົ້ນອອກກຈາກຄວາມທຸກຍາກຂອງລາວ ນັບແຕ່ປະເທດລາວດຳເນີນການປ່ຽນແປງໃໝ່ ແລະ ເປີດປະຕູສູ່ພາຍນອກເປັນເວລາ 30 ກວ່າປີຜ່ານມາ, ການພັດທະນາເສດຖະກິດສັງຄົມໄດ້ຮັບຄວາມຄືບໜ້າຢ່າງຫຼວງຫຼາຍ, GDP ສະເລ່ຍຕໍ່ຫົວຄົນຈາກ 432 ໂດລາ, ເພີ່ມຂຶ້ນເປັນ 2.600 ໂດລາ ໃນປີ 2018. ຄຽງຄູ່ກັບການພັດທະນາເສດຖະກິດ ແລະ ຄວາມກ້າວໜ້າທາງສັງຄົມ, ຊີວິດການເປັນຢູ່ຂອງປະຊາຊົນລາວ ໂດຍສະເພາະແມ່ນຊີວິດການເປັນຢູ່ຂອງປະຊາຊົນຜູ້ທຸກຍາກໄດ້ຮັບການປັບປຸງໃຫ້ດີຂຶ້ນເທື່ອລະກ້າວ, ສະເລ່ຍແຕ່ລະປີມີ 5.000 ກວ່າຄອບຄົວໄດ້ຫຼຸດພົ້ນອອກຈາກຄວາມທຸກຍາກ. ນີ້ຖືວ່າເປັນຜົນສຳເລັດທີ່ສຳຄັນຂອງປະເທດລາວໃນປັດຈຸບັນ ຊຶ່ງເປັນຜົນງານອັນໃຫຍ່ຫຼວງ ພາຍໃຕ້ການນຳພາອັນເຂັ້ມແຂງຂອງພັກ ແລະ ລັດຖະບານລາວ, ທັງເປັນຜົນງານຂອງຄວາມພະຍາຍາມຢ່າງບໍ່ລົດລະຂອງປະຊາຊົນລາວ. ໃນຖານະເປັນປະເທດບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມທີ່ດີ, ພວກຂ້າພະເຈົ້າຮູ້ສຶກດີໃຈເປັນຢ່າງຍິ່ງ ແລະ ຕີລາຄາສູງຕໍ່ຜົນສຳເລັດດັ່ງກ່າວ.
ທ່ານ ຈ່ຽງຈ້າຍຕົ່ງ ກ່າວອີກວ່າ: ພັກກອມມູນິດຈີນ ແລະ ພັກປະຊາຊົນປະຕິວັດລາວ ແມ່ນພັກກຳອຳນາດຂອງສອງປະເທດ, ລ້ວນແຕ່ຢຶດໝັ້ນທັດສະນະການພັດທະນາທີ່ຖືປະຊາຊົນເປັນໃຈກາງ ແລະ ຖືຄວາມມຸ້ງມາດປາຖະໜາຂອງປະຊາຊົນທີ່ຈະສະແຫວງຫາຊີວິດການເປັນຢູ່ອັນດີງາມເປັນເປົ້າໝາຍສູ້ຊົນຂອງຕົນ, ສອງຝ່າຍສາມາດຖອດຖອນບົດຮຽນ ແລະ ຊ່ວຍເຫຼືອ ຊຶ່ງກັນ ແລະ ກັນ ໃນວຽກງານຫຼຸດຜ່ອນຄວາມທຸກຍາກ. ອີກດ້ານໜຶ່ງ, ສອງຝ່າຍຄວນນຳໃຊ້ທ່າແຮງທີ່ມີອຸດົມການເສັ້ນທາງການພັດທະນາ ແລະລະບອບການເມືອງທີ່ຄ້າຍຄືກັນ, ເພື່ອເພີ່ມທະວີການແລກປ່ຽນບົດຮຽນດ້ານການຫຼຸດຜ່ອນຄວາມທຸກຍາກຕື່ມອີກ. ອີກດ້ານໜຶ່ງ, ສອງຝ່າຍຄວນສົ່ງເສີມຈິດໃຈຮ່ວມແຮງຮ່ວມໃຈຂອງສາຍພົວພັນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ ລະຫວ່າງ ຈີນ -ລາວ ເພີ່ມທະວີການຮ່ວມມືດ້ານການຫຼຸດຜ່ອນຄວາມທຸກຍາກຕື່ມອີກ. ໃນຊຸມປີມໍ່ໆມານີ້, ການຮ່ວມມືຈີນ - ລາວ ໄດ້ເນັ້ນໃສ່ຂົງເຂດຊີວິດການເປັນຢູ່ຂອງປະຊາຊົນ ແລະ ພັດທະນາເຂດທຸກຍາກໃຫ້ຫຼາຍຂຶ້ນ ຊຶ່ງໄດ້ກວມເອົາຫຼາຍໆດ້ານເຊັ່ນ: ພື້ນຖານໂຄງລ່າງ, ການບໍລິການສາທາລະນະ, ຊີວິດການເປັນຢູ່ຂອງຊາວກະສິກອນ, ເສີມສ້າງຄວາມສາມາດດ້ານການຫຼຸດຜ່ອນຄວາມທຸກຍາກ ແລະ ດ້ານອື່ນໆ.
ອີງຕາມໂຕເລກສະຖິຕິ, ຂະແໜງການທ່ອງທ່ຽວ ແລະ ຂະແໜງການທີ່ກ່ຽວຂ້ອງໄດ້ສ້າງຕຳ ແໜ່ງວຽກເຮັດງານທຳ 385.000 ຕຳແໜ່ງຢູ່ລາວ, ກາຍເປັນຂະແໜງການເສົາຄ້ຳຂອງລາວ. ສະນັ້ນ, ລັດຖະບານສອງປະເທດຈີນ - ລາວ ໄດ້ຕົກລົງກຳນົດໃຫ້ປີ 2019 ເປັນປີທ່ອງທ່ຽວ ຈີນ-ລາວ, ລາວ-ຈີນ ຊຶ່ງເປັນການຕົກລົງເພື່ອໃຫ້ສອງປະເທດຮ່ວມມືກັນ, ຊຸກຍູ້ການພັດທະນາ ແລະ ສ້າງຊີວິດທີ່ດີງາມໃຫ້ແກ່ປະຊາຊົນ.
ວັນທີ 25 ມັງກອນຜ່ານມາ, ທ່ານ ສີຈິ້ນຜິງ ປະທານປະເທດຈີນ ແລະ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ໄດ້ສົ່ງສານອວຍພອນປີທ່ອງທ່ຽວ ຈີນ-ລາວ, ລາວ-ຈີນ ຊຶ່ງກັນ ແລະ ກັນ. ທ່ານ ຈ່ຽງຈ້າຍຕົ່ງ ກ່າວວ່າ: ການຈັດກິດຈະກຳ ປີທ່ອງທ່ຽວ ຈີນ-ລາວ, ລາວ-ຈີນ ເປັນມາດຕະການສຳຄັນຂອງຜູ້ນຳສູງສຸດຂອງສອງປະເທດ ເພື່ອຕອບສະໜອງຄວາມມຸ້ງມາດປາຖະໜາອັນແຮງກ້າ ແລະ ຄວາມຕ້ອງການອັນຮີບດ່ວນຂອງປະຊາຊົນສອງຊາດ ໃນການເພີ່ມທະວີຄວາມເຂົ້າໃຈກັນ ແລະ ເພີ່ມພູມຄູນສ້າງມິດຕະພາບຊຶ່ງກັນ ແລະ ກັນ. ປີ 2019, ຄົນຈີນທີ່ໄປທ່ຽວລາວ ປະມານ 8 ແສນຄົນ, ເພີ່ມຂຶ້ນ 26%, ເມື່ອທຽບໃສ່ປີ 2017, ໃນໄລຍະບຸນກຸດຈີນ 2019, ໄດ້ເພີ່ມຂຶ້ນ 39%, ຄາດວ່າໝົດປີນີ້ ຈຳນວນຄົນຈີນທີ່ໄປທ່ອງທ່ຽວຢູ່ລາວຈະຫຼາຍກວ່າ 1 ລ້ານຄົນ. ສອງຝ່າຍໄດ້ຈັດກິດຈະກຳ ປີທ່ອງທ່ຽວຈີນ-ລາວ,ລາວ-ຈີນ, ບໍ່ພຽງແຕ່ ເພື່ອເຮັດໃຫ້ຈຳນວນນັກທ່ອງທ່ຽວເພີ່ມຂຶ້ນເທົ່ານັ້ນ, ແຕ່ຫາກຍັງຈະຖືໂອກາດນີ້, ລົງເລິກການຮ່ວມມືດ້ານການທ່ອງທ່ຽວ, ປັບປຸງສະພາບແວດລ້ອມການທ່ອງທ່ຽວໃຫ້ດີຂຶ້ນ, ທັງເປັນການຊຸກຍູ້ການພັດທະນາເສດຖະກິດ.
ທ່ານ ຈ່ຽງຈ້າຍຕົ່ງ ຍັງກ່າວອີກວ່າ: ໂດຍເປັນໂຄງການສຳຄັນຂອງການໃຫ້ຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ເຊື່ອມຈອດກັບຍຸດທະສາດການພັດທະນາຂອງລາວທີ່ຫັນຈາກປະເທດບໍ່ຕິດຈອດກັບທະເລເປັນປະເທດເຊື່ອມຕໍ່ໃນອະນຸພາກພື້ນ, ສອງຝ່າຍກຳລັງຊຸກຍູ້ການສ້າງສາລະບຽງເສດຖະກິດຈີນ-ລາວ,ລາວ-ຈີນ ຢ່າງແຂງແຮງ. ລະບຽງເສດຖະກິດພາກເໜືອ ເລີ່ມຈາກແຂວງຢຸນໜານຂອງຈີນເຊື່ອມຕໍ່ເຂດພາກຕາເວັນຕົກສ່ຽງໃຕ້ ແລະ ເຂດຍ່ານເໜືອຂອງແມ່ນ້ຳຢາງຊີກຽງຂອງຈີນ ແລະ ຜ່ານ ສປປລາວ ຕິດຕໍ່ກັບບັນດາປະເທດແຫຼມອິນດູຈີນ, ຊຶ່ງເປັນຂົວເຊື່ອມຕໍ່ ລະຫວ່າງ ຈີນກັບບັນດາປະເທດຢູ່ອະນຸພາກພື້ນແມ່ນໍ້າລ້ານຊ້າງ - ແມ່ນໍ້າຂອງ ລວມທັງສປປລາວ.

...

ປັດຈຸບັນ, ໃນການສ້າງລະບຽງເສດຖະກິດຈີນ-ລາວ, ລາວ-ຈີນ ໄດ້ມີຄວາມຄືບໜ້າຢ່າງສະດວກໃນບາງຂົງເຂດສຳຄັນເຊັ່ນ: ໂຄງການທາງລົດໄຟຈີນ-ລາວ, ລາວ-ຈີນ ທີ່ມີຄວາມຍາວ 414 ກິໂລແມັດ ໄດ້ສຳເລັດການສ້າງພື້ນທາງໂດຍພື້ນຖານ. ສ່ວນການກໍ່ສ້າງດ້ານອື່ນກໍ່ກກາຍເຄິ່ງໜຶ່ງ, ການພັດທະນາໂດຍລວມທີ່ຢູ່ລຽບຕາມທາງລົດໄຟສາຍນີ້ ກໍ່ເລີ່ມມີການພິຈາລະນາແລ້ວ. ເຂດຮ່ວມມືເສດຖະກິດບໍ່ຫານ-ບໍ່ເຕັນແລະ ເຂດພັດທະນາກວມລວມໄຊເສດຖາໄດ້ຮັບການກໍ່ສ້າງ ແລະ ມີຄວາມຄືບໜ້າ. ໃນນັ້ນ, ເຂດພັດທະນາກວມລວມໄຊເສດຖາ ໄດ້ມີບໍລິສັດ 57 ແຫ່ງເຂົ້າໄປລົງທຶນ, ລວມຍອດມູນຄ່າການລົງທຶນຫຼາຍກວ່າ 1 ຕື້ໂດລາ.
ຄາດວ່າ: ຈະບັນລຸມູນຄ່າການຜະລິດຫຼາຍກວ່າ 1.500 ຕື້ໂດລາໃນທ້າຍປີໜ້າ ແລະ ຈະສ້າງຕຳແໜ່ງວຽກເຮັດງານທຳ 1 ໝື່ນຕຳແໜ່ງ. ການສ້າງລະບຽງເສດຖະກິດຈີນ-ລາວ, ລາວ-ຈີນ ຢ່າງຮອບດ້ານຍ່ອມຈະສ້າງໂອກາດຫຼາຍກວ່າເກົ່າໃຫ້ແກ່ສອງປະເທດ.
ໃນຕອນທ້າຍ, ທ່ານ ຈ່ຽງຈ້າຍຕົ່ງ ກ່າວຢໍ້າວ່າ: ປີ 2019 ເປັນປີຄົບຮອບ 70 ປີ ແຫ່ງການສະຖາປະນາ ສປ. ຈີນ, ທັງແມ່ນປີໜຶ່ງທີ່ສຳຄັນສຳລັບລາວ ເພື່ອບັນລຸເປົ້າໝາຍຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ກໍ່ແມ່ນປີແຫ່ງການຄົບຮອບ 10 ປີຂອງການສ້າງການພົວພັນຄູ່ຮ່ວມຍຸດທະສາດຮອບດ້ານ ລະຫວ່າງຈີນ-ລາວ, ລາວ-ຈີນ ແລະ ຖືເປັນປີແຫ່ງໂອກາດາສຳຄັນອັນໃໝ່ໃນການຂະຫຍາຍການພົວພັນ ລະຫວ່າງ ສອງປະເທດ. ເດືອນເມສາປີນີ້, ທ່ານ ບຸນຍັງ ວໍລະຈິດ ຈະເຂົ້າຮ່ວມກອງປະຊຸມສຸດຍອດການຮ່ວມມືສາກົນ "ໜຶ່ງແລວໜຶ່ງເສັ້ນທາງ" ຄັ້ງທີ 2 ຢູ່ຈີນ ຊຶ່ງການນຳສູງສຸດຂອງສອງພັກ ແລະສອງປະເທດຈະໄດ້ພົບປະກັນອີກຄັ້ງໜຶ່ງ, ເພື່ອເປີດກວ້າງການຮ່ວມມືດ້ານຍຸດທະສາດຮອບດ້ານລະຫວ່າງສອງປະເທດ ແລະ ສ້າງປະຫວັດສາດໜ້າໃໝ່ແຫ່ງການສ້າງປະຊາຄົມຮ່ວມຊາຕາກຳ ລະຫວ່າງສອງປະເທດ.