ອາ​ຣາ​ບີ​ຊາ​ອຸ​ດິດ​ຫຼຸດ​ການ​ຜະລິດ​ນ້ຳມັນ

12.09.2019 10:51     

   ຂ່າວຕ່າງປະເທດ​ລາຍ​ງານ​ວ່າ: ສັນຍາ​ນ້ຳມັນ​ດິບລ່ວງ​ ໜ້າ​ໄດ້​ເພີ່ມ​ຂຶ້ນຫຼາຍກ່​ວາ2% ໃນ​ວັນ​ທີ 9 ກັນຍາ​ຜ່ານ​ມາ ຫຼັງ​ຈາກທີ່​ ລັດຖະມົນຕີ​ພະລັງງານ​ຄົນໃໝ່ ຂອງຊາ​ອຸ​ດິດ ອາຣາ​ບີ ຢືນຢັນ ຈະ​ດຳເນີນ​ການຈຳກັດ​ການ ຜະ ລິດ​ນ້ຳ​ມັນ.
ສັນຍາ​ນ້ຳມັນ​ດິບ​ເວ​ສ ເທັກ​ຊັສ (TWI) ສົ່ງ​ມອບ​ເດືອນ​ຕຸລາ ຊຶ່ງ​ມີ​ການ​ຊື້​-​ຂາຍ​ໃນ​ຕະ ຫຼາດ​ນິວ​ຢອກ​ເພີ່ມ​ຂຶ້ນ 1,33 ໂດ​ລາ ຫຼື 2,4% ເປັນ 57,85 ໂດລາ​ ຕໍ່​ບາ​ເຣນ. ຂະນະ​ທີ່​ນ້ຳມັນ​ດິບ​ເບ​ຣນ (Brent) ໄດ້​ເພີ່ມ​ຂຶ້ນ 1,31 ໂດ​ລາ ຫຼື 2,3% ມາເປັນ  62,58 ໂດ​ລາ​ຕໍ່​ບາ​ເຣນ.
ກ່ອນ​ໜ້າ​ນີ້, ລັດຖະມົນຕີ​ພະລັງງານ​ຄົນ​ໃໝ່​ຂອງ ຊາ​ອຸ​ດິດ ອາ​ຣາ​ບີ ເຈົ້າ​ຊາຍ​ອັບ​ດູລາ​ຊິສ ບິນ ຊາ​ມານ ກ່າວ​ວ່າ: ຂໍ້​ຕົກລົງ​ໃນ​ການ​ຈຳກັດ​ການ​ຜະ ລິດ​ນ້ຳມັນ​ຂອງ​ກຸ່ມ​ປະເທດ​ຜູ້​ສົ່ງ​ອອກ​ນ້ຳມັນ (OPEC) ທີ່​ເຮັດ​ຮ່ວມ​ກັບ​ບັນດາ​ປະເທດ​ທີ່ຢູ່​ນອກ OPEC ຊຶ່ງ​ລວມ​ເຖິງ ຣັດ​ເຊຍ ຈະ​ຍັງ​ມີ​ຜົນ​ບັງຄັບ​ໃຊ້ ເຖິງ​ວ່າ​ເວລາ​ຈະ​ຜ່ານ​ໄປ. ເຈົ້າ​ຊາຍ ອັບ​ດູ ລາ​ຊິສ ກ່າວວ່າ: ປັດຈຸບັນ, ພວກ​ເຮົາ​ມີ​ຄອບຄົວ​ທີ່​ໃຫຍ່​ຂຶ້ນ​ຄື: OPEC Plus ແລະ ໃນ​ອີກ​ບໍ່​ດົນ​ພວກ​ເຮົາ​ຈະ​ສະເຫຼີມສະຫຼອງ​ການ​ເຮັດ​ຂໍ້​ຕົກລົງ​ທີ່​ເຮັດ​ໃຫ້​ພວກ​ເຮົາ​ມາ​ຢູ່​ຮ່ວມ​ກັນ​ຕະຫຼອດ​ໄປ. ດ້ານ​ລັດຖະບານ​ຣັດ​ເຊຍ ຖະ​ແຫຼ່ງ​ວ່າ: ເຖິງ​ວ່າ ຊາ​ອຸ​ດິດ ອາ​ຣາ​ບີ ໄດ້​ປັບ​ປ່ຽນ​ລັດຖະມົນຕີ​ພະລັງງານ ແຕ່​ຈະ​ບໍ່​ມີ​ຜົນ​ກະ ທົບ​ຕໍ່​ສັນຍາ OPEC Plus.
 ໂອ​ເປັກ ສາມາດ​ບັນລຸ​ຂໍ້​ຕົກລົງ​ກັບ ຣັດ​ເຊຍ ແລະ ຜູ້​ຜະ ລິດ​ນ້ຳມັນ​ນອກ​ກຸ່ມ OPEC ອີກ 9 ປະເທດ ໃນ​ກອງ​ ປະຊຸມ​ເມື່ອ​ເດືອນ​ກໍລະກົດ ທີ່​ນະຄອນຫຼວງ​ວຽນ​ນາ ປະເທດ​ໂອ​ຕຣິສ ເພື່ອ​ຂະຫຍາຍ​ເວລາ​ໃນ​ການ​ຫຼຸດ​ກຳລັງ​ການ​ຜະລິດ​ນ້ຳມັນ​ອອກ​ໄປ​ອີກ 9 ເດືອນ​ຈົນ​ເຖິງ​ທ້າຍ​ເດືອນ​ມີນາ ປີ 2020, ຈາກ​ເມື່ອ​ກ່ອນ​ທີ່​ມີ​ກຳນົດ​ສິ້ນ​ສຸດ​ໃນ​ເດືອນ​ມິຖຸນາ​ປີ​ນີ້. OPEC ຈະ​ປັບ​ຫຼຸດ​ກຳລັງ​ການ​ຜະ​ລິດ​ນໍ້າ​ມັນ​ລົງ ໃນ​ອັດຕາ 1,2 ລ້ານ​ບາ​ເຣນ​ຕໍ່​ວັນ. ນອກຈາກ​ນີ້, ລາຄາ​ນ້ຳມັນ ຍັງ​ໄດ້​ແຮງ​ໜູນ​ຈາກ​ຈີນ ທີ່​ເພີ່ມ​ການ​ນຳ​ເຂົ້າ​ນ້ຳມັນ​ດິບ​ໃນ​ເດືອນ​ສິງຫາ ໂດຍ​ເພີ່ມ​ຂຶ້ນ 3% ຈາກ​ເດືອນ​ກໍລະກົດ ແລະ ເພີ່ມ​ຂຶ້ນ​ເກືອບ 10% ໃນ​ໄລຍະ 8 ເດືອນ​ຕົ້ນ​ປີ​ນີ້, ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ​ຜ່ານ​ມາ.