3 ປະເທດ​ເພີ່ມ​ທະວີ​ການ​ຮ່ວມ​ມື​ປ້ອງ​ກັນ ຕ້ານ​ຢາ​ເສບ​ຕິດ

13.09.2019 8:56     

   ວິທະຍຸ​ກະ​ຈາ​ຍສຽງຫວຽດ ນາມ​ລາຍ​ງານ​ວ່າ: ວັນ​ທີ 11 ກັນຍາ​ຜ່ານ​ມາ, ຢູ່​ນະຄອນຫຼວງ​ຮ່າ​ໂນ້ຍ ໄດ້​ດຳເນີນ​ກອງ​ປະຊຸມ 3 ຝ່າຍ ແລະ ສອງ​ຝ່າຍ​ຂັ້ນ​ລັດ ຖະມົນຕີ 3 ປະເທດ ຫວຽດນາມ- ລາວ-ກໍາ​ປູ​ເຈຍ ກ່ຽວ​ກັບ​ການ​ຮ່ວມ​ມື​ປາບ​ປາມ, ຕ້ານ​ຢາ​ເສບ​ຕິດ​ຄັ້ງ​ທີ 18.
ກ່າວຄຳເຫັນໃນພິທີເປີດ​ ກອງ​ປະຊຸມ, ທ່ານ ພົນ​ເອກ ໂຕ​ເລິມ ລັດຖະມົນຕີ​ກະຊວງ ​ຕຳຫຼວດ​ຫວຽດນາມ ຊີ້​ແຈ້ງ ວ່າ: ນັບ​ແຕ່​ປີ 1998, ກົນ​ໄກ​ຮ່ວມ​ມື 3 ຝ່າຍ ແລະ ສອງຝ່າຍ ກ່ຽວ​ກັບ​ການ​ປາບ​ປາມ, ຕ້ານ​ ຢາ​ເສບ​ຕິດ ລະຫວ່າງ 3 ປະ ເທດ ຫວຽດນາມ, ລາວ ແລະ ກຳປູເຈຍ ໄດ້​ສ້າງຕັ້ງ​ຂຶ້ນ ແລະ ພັດທະນາ​ຢ່າງ​ບໍ່​ຢຸດ​ຢັ້ງ. ພາຍ ຫຼັງ​ດຳເນີນ​ມາ​ເປັນ​ເວລາ 25 ປີ, ກົນ​ໄກ​ດັ່ງກ່າວ ນັບ​ມື້​ໄດ້​ຮັບ​ການ​ເສີມ​ຂະຫຍາຍ​ບົດບາດ​ຢ່າງ​ຕັ້ງໜ້າ, ໄດ້​ປະກອບສ່ວນ​ຫຼາຍ​ພໍ​ສົມຄວນ​ເຂົ້າ​ການ​ປົກ​ປັກ​ຮັກສາ, ປັບປຸງ ແລະ ຍູ້​ແຮງ​ການ​ພົວພັນ​ຮ່ວມ​ມື​ມິດຕະພາບ ລະຫວ່າງ 3 ປະເທດ ໃນ​ວຽກ​ງານ​ປາບ​ປາມ, ຕ້ານ​ຢາ​ເສບ​ຕິດ.
ທ່ານ ພົນ​ເອກ ໂຕ​ເລິມ ກ່າວ​ຢໍ້າ​ວ່າ: ຍິ່ງ​ກວ່າ​ເວລາ​ໃດ​ໝົດ, 3 ປະເທດ​ພວກ​ເຮົາຄວນ​ສືບຕໍ່​ຮ່ວມ​ແຮງ​ຮ່ວມ​ໃຈ, ຮ່ວມ​ມື​ຢ່າງ​ແໜ້ນ​ແຟ້ນ, ລະດົມ​ແຫຼ່ງ​ກຳລັງ​ພາຍ​ໃນ​ຢູ່​ໃນ​ລະດັບ​ສູງ, ຍາດ​ແຍ່ງ​ແຫຼ່ງ​ກຳລັງ​ພາຍ​ນອກ​ໃຫ້​ດີ​ທີ່​ສຸດ ເພື່ອ​ໜູນ​ຊ່ວຍ​ໃຫ້​ແກ່​ວຽກ​ງານ​ຕໍ່ສູ້, ປາບ​ປາມ, ຕ້ານ​ຢາ​ເສບ​ຕິດ. ກ່ອນ​ອື່ນ​ໝົດ ແມ່ນ​ສຸມ​ໃສ່​ສົມທົບ​ກັນ​ຕໍ່ສູ້​ກັບ​ບັນດາ​ການເຄື່ອນໄຫວ​ຊື້​ຂາຍ, ຂົນສົ່ງ​ຢາ​ເສບ​ຕິດ​ຂ້າມ​ຊາດ​ຜິດ​ກົດໝາຍ ໃຫ້​ມີ​ປະສິດທິ​ຜົນ,  ຍົກ​ສູງ​ການ​ຮ່ວມ​ມື​ໃນ​ວຽກ​ງານ​ໂຄສະນາ, ບຳບັດ​ຜູ້​ຕິດ​ຢາ​ເສບ​ຕິດ, ເພີ່ມ​ທະວີ​ກຳລັງ​ຄວາມ​ສາມາດ​ຂອງ​ຖັນ​ແຖວ​ພະນັກງານ​ທີ່​ປະຕິບັດ​ວຽກ​ງານ​ປາບ​ປາມ, ຕ້ານ​ຢາ​ເສບ​ຕິດ. ຄວາມ​ຜູກ​ມັດ ລະຫວ່າງ 3 ປະເທດ ຈະ​ແມ່ນ​ປັດ​ໄຈ​ສຳຄັນ, ຮັບປະກັນ​ຄວາມ​ສຳເລັດ​ໃນ​ວຽກ​ງານ​ປາບ​ປາມ, ຕ້ານ​ຢາ​ເສບ​ຕິດ​ຂອງ​ແຕ່​ລະ​ປະ​ເທດ.
ຂ່າວ​ລະບຸ​ວ່າ: ກອງ​ປະ ຊຸມ, 3 ປະເທດ ໄດ້​ເຫັນ​ດີ​ເປັນ​ເອກະ​ພາບ​ປະຕິບັດ​ເປົ້າ​ໝາຍ​ປ້ອງ​ກັນ ຂອງ​ອາ​ຊຽນ​ໃນ​ການ​ປາບ​ປາມ, ຕ້ານ​ຢາ​ເສບ​ຕິດ​ທີ່​ຜິດ​ກົດໝາຍ​ໃນ​ໄລຍະ​ປີ 2016 - 2025 ໂດຍ​ບໍ່​ມີ​ຄວາມ​ຜ່ອນ​ສັ້ນ​ຜ່ອນ​ຍາວ​ກ່ຽວ​ກັບ​ຢາ​ເສບ​ຕິດ, ຢຶດ​ໝັ້ນ ການ​ປະຕິບັດ​ວິໄສ​ທັດ​ອາ​ຊຽນ ພາຍຫຼັງ​ປີ 2015 ແລະ ຖື​ນີ້​ແມ່ນ​ເປົ້າ​ໝາຍ​ຂອງ 3 ປະເທດ ຫວຽດນາມ, ລາວ ແລະ ກຳ​ປູ​ເຈຍ.