ຈີນດຶງດູດການລົງທຶນຕ່າງປະເທດໄດ້ຢ່າງແຂງແຮງ

13.09.2019 9:04     

   ຂ່າວສານ​ຊີ​ອາ​ໄອ​ລາຍ​ງານ​ວ່າ: ກອງ​ປະຊຸມ​ປຶກສາ​ຫາລື​ການ​ລົງທຶນ ແລະ ການ​ຄ້າ​ສາກົນ ປີ 2019 ທີ່​ພວມ​ດຳເນີນ​ຢູ່​ນະຄອນ​ເຊ້ຍ​ເໝີນ​ຂອງ​ຈີນ, ໃນ​ງານ​ຕະຫຼາດນັດ​ວັດ​ສະ​ດຸ ແລະ ຜະລິດ​ຕະ​ພັນ​ກະສິກຳ "ໜຶ່ງ​ແລວ​ໜຶ່ງ​ເສັ້ນທາງ" ຊຶ່ງ​ມີ​ນັກ​ລົງທຶນ​ຕ່າງປະເທດ ໄດ້​ເຊັນ​ສັນຍາ​ລວມ​ມູນ​ຄ່າ​ທັງ​ໝົດ 29,5 ຕື້​ໂດ​ລາ ສະແດງ​ໃຫ້​ເຫັນ​ວ່າ: ຈີນ​ສາມາດ​ດຶງ​ດູດ​ການ​ລົງທຶນ​ຂອງ​ຕ່າງປະເທດ​ໄດ້​ຢ່າງ​ແຂງ​ແຮງ.
ຂ່າວ​ລະບຸ​ວ່າ: ເວົ້າ​ສຳ ລັບທຶນ​ຕ່າງປະເທດ, ຈີນ ມີ​ຄວາມ​ສາມາດ​ດຶງ​ດູດ​ທຶນ​ໄດ້​ຢ່າງ​ໃຫຍ່​ຫຼວງ ເນື່ອງ​ຈາກປະ ເທດ​ຈີນ ເປັນ​ຕະຫຼາດ​ທີ່​ກວ້າງ​ ໃຫຍ່​ໄພສານ, ມີ​ຕ່ອງ​ໂສ້​ອຸດ ສາຫະກຳ​ທີ່​ຄົບ​ຖ້ວນ​ສົມບູນ, ມີ​ຊັບ​ພະຍາ ກອນ​ມະນຸດ​ທີ່​ອຸດົມສົມບູນ, ພື້ນຖານ​ໂຄງ​ລ່າງ​ມີ​ການ​ພັດທະນາ​ເປັນ​ຢ່າງ​ດີ, ເຄືອ​ຂ່າຍ​ການ​ຈໍ​ລະ​ຈອນ​ສິນຄ້າ ກໍ​ພັດທະນາ​ກ້າວໜ້າ​ເຊັ່ນ​ດຽວ​ກັນ.
ນອກ​ນີ້, ພາຍ​ໃຕ້​ສະຖານະ​ການ​ທີ່​ສະພາບ​ແວດ​ລ້ອມ​ພາຍ​ນອກ​ມີ​ຄວາມ​ບໍ່​ແນ່ນອນ, ຈີນ ໄດ້​ຢຶດ​ໝັ້ນ​ຄວາມ​ຕັດສິນ​ໃຈ​ຂອງ​ຕົນ​ຢ່າງ​ສະເໝີ​ຕົ້ນ​ສະເໝີ​ປາຍ ໃນ​ການ​ເປີດ​ປະຕູ​ສູ່​ພາຍ​ນອກ ແລະ ສ້າງ​ສະພາບ​ແວດ​ລ້ອມ​ການ​ດຳເນີນ​ທຸລະ​ກິດ​ທີ່​ດີ​ໃຫ້​ແກ່​ນັກ​ລົງທຶນ​ຕ່າງ​ປະ​ເທດ.
ຂ່າວ​ລາຍ​ງານ​ຕື່ມ​ວ່າ: ເຖິງ​ວ່າຄວາມ​ຂັດ​ແຍ່ງກັນດ້ານ​ ການ​ຄ້າ​ຈີນ - ອາ​ເມ​ຣິ​ກາ ໄດ້​ສ້າງ​ຄວາມ​ບໍ່​ແນ່ນອນ​ໃຫ້​ແກ່​ເສດຖະກິດ​ໂລກ ແລະ ເຮັດ​ໃຫ້ການ​ໄຫຼ​ວຽນ​ຂອງ​ທຶນ​ຂ້າມ​ຊາດ​ໃນ​ໂລກ​ຫຼຸດ​ໜ້ອຍ​ຖອຍ​ລົງ​ຢ່າງ​ຫຼວງຫຼາຍ​ກໍ​ຕາມ, ແຕ່​ສະພາບ​ແວດ​ລ້ອມ​ການ​ດຳເນີນ​ທຸລະ​ກິດ​ໃນ​ຈີນ ຍັງ​ມີ​ທ່າແຮງ​ຫຼາຍ​ດ້ານ, ຈຶ່ງ​ເຮັດ​ໃຫ້​ວິ​ສາ​ຫະ​ກິດ​ຕ່າງປະເທດ​ບໍ່​ສາມາດ​ຕັດ​ແຍກ​ອອກ​ຈາກ​ຕະຫຼາດ​ຈີນ​ໄດ້ ແລະ ຈີນ ຍັງ​ສືບຕໍ່​ເປັນ​ປະເທດ​ທີ່​ມີ​ຄວາມ​ສາມາດ​ດຶງ​ດູດ​ທຶນ​ຕ່າງປະເທດ​ໄດ້​ຢ່າງ​ແຂງ​ແຮງ.