ຜົນ​ຜະ­ລິດ​ກະ­ສິ­ກຳ​ແມ່ນ​ສິນ­ຄ້າ​ສົ່ງ​ອອກ​ຂອງ​ນີ​ກາ​ຣາກ​ວາ

16.09.2019 8:42     

(ເນື່ອງ​ໃນ​ໂອກາດ​ວັນຊາດ ນີ​ກາ​ຣາ​ກວາ 15 ກັນ​ຍາ)

ຮຽບຮຽງ​ໂດຍ​​ : ລຸ້ງ​ດາວ

   ນີ​ກາ​ຣາກ​ວາ ມີ​ຊື່​ທາງ ການແມ່ນ​ສາທາລະນະ​ລັດ ນີກາ​ຣາກ​ວາ ຕັ້ງ​ຢູ່​ໃນ​ອາ​ເມ​ຣິ​ກາ​ກາງ, ທິດເໜືອ​​ຕິດ​ກັບ​ຮົງ​ດູ​ຣັດ, ທິດໃຕ້​ຕິດ​ກັບ ໂກສ ຕາ​ຣິ​ກາ, ທິດຕາເວັນອອກ​ຕິດ​ກັບ​ທະເລ​ຄາ​ຣິ​ບຽນ ແລະ ທິດຕາເວັນຕົກ​ຕິດ​ກັບ​ມະຫາ​ສະ​ໝຸດ​ປາ​ຊີ​ຟິກ ມີ​ເນື້ອທີ່​ທັງ​ໝົດ 130.370 ກິໂລ​ຕາ​ແມັດ, ມີ​ພົນລະເມືອງ​ທັງ​ໝົດ 6.218 ລ້ານ​ຄົນ (ຂໍ້​ມູນ​ປີ 2017), ອັດ ຕາ​ການ​ເຕີບ​ໂຕ​ຂອງ​ພົນລະ ເມືອງ 1,1%, ນະຄອນຫຼວງຂອງ​ ປະເທດ​ແມ່ນ ມາ​ນາກ​ວາ.
ຊັບພະຍາກອນ​ທຳມະ​ ຊາດ ທີ່​ເປັນ​ທ່າແຮງ​ໃຫ້​ກັບ​ປະ ເທດ​ແມ່ນ ຄຳ, ເງິນ, ທອງແດງ, ຕັງ​ສະ​ແຕນ, ກົ່ວ, ສັງກະສີ, ໄມ້ ແລະ ປາ. ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) 13,81 ຕື້​ໂດ​ລາ (ຂໍ້​ມູນ​ປີ 2017), ອັດຕາ​ເຕີບ​ໂຕ​ຂອງ GDP ກວມ 4,9%, ລາຍ​ໄດ້​ສະເລ່ຍ​ຕໍ່​ຫົວ​ຄົນ​ບັນລຸ 2.220 ກ່​ວາ​ໂດ​ລາ​ຕໍ່​ຄົນ​ຕໍ່​ປີ. GDP ແຍກ​ຕາມ​ພາກ​ການ​ຜະລິດ​ມີ​ດັ່ງນີ້: ພາກ​ກະສິກຳ 16,9%, ພາກ​ອຸດສາຫະກຳ 24,3% ແລະ ພາກ​ການ​ບໍລິການ 58,8%. ຜົນ​ຜະລິດ​ທາງ​ດ້ານ​ກະສິກຳ​ແມ່ນກາເຟ, ກ້ວາຍ, ອ້ອຍ, ເຂົ້າ, ສາລີ, ຢາສູບ, ງາ, ຖົ່ວ ເຫຼືອງ, ຊີ້ນ​ສັດ, ຜະລິດ​ຕະ​ພັນ​ນົມ, ກຸ້ງຝອຍ, ກຸ້ງ​ທະເລ (Lobster), ດ້ານ​ອຸດສາຫະກຳ​ແມ່ນອາຫານ​ສຳເລັດ​ຮູບ, ເຄ​ມີ, ເຄື່ອງ​ຈັກ ແລະ ໂລຫະ, ແຜ່ນແພ, ເຄື່ອງນຸ່ງ, ກັ່ນ ແລະ ແຍກ​ນ້ຳມັນ, ເຄື່ອງ​ດື່ມ, ຖົງຕີນ, ເກີບ ແລະ ໄມ້. ອັດຕາ​ການ​ເຕີບ​ໂຕ​ຂອງ​ພາກ​ອຸດສາຫະກຳ​ກວມ 3,5% (ຂໍ້​ມູນ​ປີ 2016), ມູນ​ຄ່າ​ການ​ສົ່ງ​ອອກ 3,108 ຕື້​ໂດ​ລາ. ສິນຄ້າ​ສົ່ງ​ອອກ​ແມ່ນ ກາເຟ, ຊີ້ນ​ງົວ, ຄຳ, ນ້ຳຕານ, ຖົ່ວດິນ, ກຸ້ງ ແລະ ກຸ້ງ​ມັງກອນ, ຢາສູບ, ຊີ​ກາ, ຊຸດ​ສາຍ​ໄຟ​ສຳລັບ​ລົດ, ແຜ່ນແພ, ເຄື່ອງນຸ່ງ ແລະ ຝ້າຍ. ປະເທດ​ຄູ່​ຄ້າ​ສົ່ງ​ອອກ​ທີ່​ສຳຄັນ ແມ່ນ​ສົ່ງ​ໄປ​ອາ​ເມ​ຣິ​ກາ 56,5%, ​ແມັກ​ຊິ​ໂກ 10,7%, ເວ​ເນ​ຊູ​ເອ​ລາ 5,4%, ແອນ​ຊານ​ວາ​ດໍ 4,3% (ຂໍ້​ມູນ​ປີ 2015). ມູນ​ຄ່າ​ການ​ນຳ​ເຂົ້າ​ບັນລຸ 6,039 ຕື້​ໂດ​ລາ (2016). ສິນຄ້າ​ນຳ​ເຂົ້າ​ແມ່ນ ສິນຄ້າ​ອຸປະ​ໂພ​ກ-​ບໍລິໂພກ, ເຄື່ອງ​ຈັກ ແລະ ສ່ວນ​ປະກອບ, ວັດຖຸ​ດິບ, ຜະລິດ​ຕະ​ພັນ​ຈາກ​ນ້ຳ​ມັນ. ປະເທດ​ຄູ່​ຄ້າ​ນຳ​ເຂົ້າ​ທີ່​ສຳຄັນ ແມ່ນ​ນຳ​ເຂົ້າ​ຈາກ​ອາ​ເມ​ຣິ​ກາ 19,9%, ​ແມັກ​ຊິ​ໂກ 14,9%, ຈີນ 10,6%, ເວ​ເນ​ຊູ​ເອ​ລາ 7%, ໂກ​ສ​ຕາ​ຣິ​ກາ 7%, ແອນ​ຊານ​ວາ​ດໍ 5,7%, ກວາ​ເຕ​ມາລາ 5,6% (ຂໍ້​ມູນ​ປີ 2015).
ນີ​ກາ​ຣາກ​ວາ ເປັນ​ປະເທດ​ກະສິກຳ ແລະ ຜົນ​ຜະລິດ​ທາງ​ດ້ານ​ກະສິກຳ​ແມ່ນ ສິນຄ້າສົ່ງ​ ອອກ​ຊຶ່ງ​ກວມ​ເຖິງ 60% ຂອງ ​ການ​ສົ່ງ​ອອກ​ທີ່​ມີ​ມູນ​ຄ່າ​ປະ ມານ 2 ຕື້​ໂດ​ລາ. ທ່ານ ມັກ​ ຟໍ ລັດຖະມົນຕີ​ກະຊວງ​ກະສິກຳ ແລະ ປ່າໄມ້ນີ​ກາ​ຣາກ​ວາກ່າວ ​ວ່າ: ລັດຖະບານ ໄດ້​ສົ່ງເສີມ ການ​ປູກ​ຝ້າຍ​ປອດ​ສານ​ພິດ ເພື່ອ​ສົ່ງເສີມ​ການ​ເຕີບ​ໂຕຂອງ ​ຂະແໜງ​ແຜ່ນ​ແ​ພ ແລະ ເຄື່ອງ ນຸ່ງ​ຫົ່ມ. ການ​ປູກ​ຝ້າຍ​ປອດ​ສານ​​ພິດ ແມ່ນ​ຜະລິດ​ຢູ່​ທາງ​ພາກ​ເໜືອ​ຂອງ​ປະເທດ​ຈຳນວນ 1.600 ຕອນ ຊຶ່ງ​ແຕ່​ລະ​ຕອນ​ຈະ​ໃຫ້​ຜົນ​ຜະລິດ 4.000 ຫາ 4.500 ກິໂລ, ຄາດ​ວ່າ​ຈະ​ໃຫ້ຜົນ​ ຜະລິດ​ປະມານ 6,4 ລ້ານ​ກິໂລ ຊຶ່ງ​ຈະ​ສາມາດ​ສະໜອງ​ໄດ້ ຢ່າງ​ພຽງພໍ​ໃຫ້​ກັບ​ປະ​ເທດ. ມີ​ບໍລິສັດ​ຈາກ​ປະເທດ​ຮົງ​ດູ​ຣັດ ແລະ ແອນ​ຊານ​ວາ​ດໍ ສົນໃຈ​ສັ່ງ​ຊື້​ຝ້າຍ​ປອດ​ສານ​ພິດ​ຈາກ​ນີ​ກາ​ຣາກ​ວາ. ນອກຈາກ​ນີ້, ຜູ້​ສະໜອງ​ວັດຖຸ​ດິບ​ພາຍ​ໃນ​ປະເທດ ຍັງ​ຈະ​ດຶງ​ດູດ​ການ​ລົງ ທຶນ​ຈາກ​ຕ່າງປະເທດ​ເຂົ້າຂະ ແໜງ​ຕ່ຳ​ແຜ່ນ. ໂຄງການ​ປູກ​ ຝ້າຍ​ປອດ​ສານ​​ພິດຍັງ​ຈະ​ຂະ ຫຍາຍ​​ການ​ຜະລິດ​ຈາກ 5 ປີ ອອກ​ເປັນ 7 ປີ. ເນື້ອທີ່​ດິນ​ ທາງ​ດ້ານ​ມະຫາ​ສະ​ໝຸດ​ປາຊີຟິກ ​ຂອງ​ນີ​ກາ​ຣາກ​ວາ ແມ່ນ​ພັດ ທະ ນາ​ໃຫ້​ເປັນ​ເຂດ​ກະສິກຳ ເພື່ອ​ການ​ຄ້າ ຫຼື ຜະລິດ​ເປັນ​ສິນຄ້າ​ເຊັ່ນ: ການ​ປູກ​ກາເຟ ທີ່​ປູກ​ໃນ​ລະດັບ​ຄວາມ​ສູງ 300 ແມັດ​ເໜືອ​ລະດັບ​ນ້ຳ​ທະ​ເລ. ສ່ວນ​ການ​ລ້ຽງສັດ ແມ່ນ​ລ້ຽງ​ຢູ່​ທາງ​ທິດຕາເວັນອອກ​ສ່ຽງ​ໃຕ້​ຂອງ​ເຂດ​ພູ​ພຽງ.
ສປປ ລາວ ແລະ ນີ​ກາ​ຣາກ​ວາ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ​ໃນ​ວັນ​ທີ 30 ພຶດສະພາ ປີ 1980.