ນາ­ຍົກ­ລັດ­ຖະ­ມົນ­ຕີ​ຍີ່­ປຸ່ນ​ປະ­ຕິ​ຮູບຄະ­ນະ​ລັດ­ຖະ­ບານ

16.09.2019 9:08     

ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ທ່ານ ຊິນ​ໂຊ ອາ​ເບະ ນາຍົກລັດຖະມົນຕີ​ ຍີ່ ປຸ່ນ ໄດ້​ແຕ່ງຕັ້ງ​ທ່ານ ນາງ ເຊ​ອິ​ໂກະ ຮາ​ຊິ​ໂມ​ໂຕະ ສະມາຊິກ​ສະພາ​ສູງ ໃຫ້​ດໍາ​ລົງ​ຕໍາ​ແໜ່​ງ​ລັດຖະມົນຕີ​ຮັບຜິດຊອບ​ງານ​ມະ​ຫະກໍາ​ກິລາ​ໂອ​ແລັ​ມ​ປິກ ແລະ ພາ​ຣາ​ແລັມ​ປິກ ໂຕ​ກຽວ ປີ 2020.
ຂ່າວ​ລະບຸ​ວ່າ: ວັນ​ທີ 11 ກັນຍາ​ຜ່ານ​ມາ, ທ່ານ ອາເບະ ໄດ້​ດໍາ​ເນີນ​ການ​ປະຕິ​ຮູບ​ການ ຈັດຕັ້ງ​ຄະນະ​ລັດຖະບານຍີ່ ປຸ່ນ ຊຸດ​ໃໝ່​ຈໍາ​ນວນ 17 ຕໍາແໜ່ງ. ໃນ​ນັ້ນ, ທ່ານ ໂຢ​ຊິ​ຮິເດະ ຊູ​ກະ ເປັນ​ຫົວໜ້າ​ຫ້ອງວ່າການ​ລັດຖະບານ ແລະ ທ່ານ ທາ​ໂຣ ອາ​ໂຊະ ເປັນ​ຮອງ​ນາຍົກລັດຖະມົນຕີ ທັງ​ເປັນ​ລັດຖະມົນຕີ​ກະຊວງ​ການ​ເງິນ. ທ່ານ ທາ​ໂຣ ໂກ​ໂນ ລັດຖະມົນຕີ​ກະຊວງ​ການ​ເງິນ ຖືກ​ຍົກ​ຍ້າຍ​ໄປ​ຮັບ​ຕໍາແໜ່ງ​ລັດ ຖະມົນຕີ​ກະຊວງ​ປ້ອງ​ກັນ​ປະເທດ, ທ່ານ ໂຕ​ຊິ​ມິດ​ຊຸ ໂມ​ເຕ​ຈິ ລົງ​ຕໍາ​ແໜ່​ງ​ເປັນ​ລັດຖະມົນຕີ​ການ​ຕ່າງປະເທດ ແລະ ທ່ານ ຊິນ​ຈິ​ໂຣ ໂກ​ອິຊຸມິ ລັດຖະມົນຕີ​ກະຊວງ​ສິ່ງແວດລ້ອມ​ຄົນ​ໃໝ່.
ໃນ​ຄວາມ​ພະຍາຍາມ​ຊຸກຍູ້​ນະໂຍບາຍ​ມອບ​ສິດ​ໃຫ້​ແກ່​ແມ່ຍິງ, ທ່ານ ຊິນ​ໂຊ ອາ​ເບະ ໄດ້​ແຕ່ງຕັ້ງ​ທ່ານ ນາງ ເຊ​ອິ​ໂກະ ຮາ​ຊິ​ໂມ​ໂຕະ ສະມາຊິກສະພາ​ສູງ ຮັບ​​ຕໍາ​ແໜ່​ງ​ເປັນ​ລັດຖະມົນຕີ​ຮັບຜິດຊອບງານ​ມະຫະ​ກໍາ​ກິລາ ໂອ​ແລັ​ມ​ປິກ ແລະ ພາ​ຣາ​ແລັມ​ປິກ ໂຕ​ກຽວ 2020. ການ​ປະຕິ​ຮູບ​ຄະນະ​ລັດຖະບານ​ຊຸດ​ໃໝ່​ຂອງ​ຍີ່ປຸ່ນ​ຄັ້ງ​ນີ້, ໃນ​ຈໍາ​ນວນ 17 ຕໍາ​ແໜ່​ງ​ນັ້ນ, ມີ 13 ຄົນ ແມ່ນ​ໄດ້​ຮັບ​ການ​ແຕ່ງ​ຕັ້​ງດໍາ​ລົງ​ຕໍາແໜ່​ງ​ເປັນ​ລັດຖະມົນຕີ​ໃໝ່​ໃນ​ອົງການ​ຈັດ​ຕັ້ງ​ລັດຖະບານ​ເປັນ​ຄັ້ງ​ທໍາ​ອິດ.