ປີ 2020 ແມັກ​ຊີ​ໂກ ຈະ​ຜະ­ລິດ​ລົດ​ໄດ້ 5 ລ້ານ​ຄັນ

17.09.2019 9:57     

(ເນື່ອງ​ໃນ​ໂອກາດ​ວັນຊາດ ແມັກ​ຊີ​ໂກ 16 ກັນ​ຍາ)

ຮຽບຮຽງ​ໂດຍ​​ : ລຸ້ງ​ດາວ

   ສາທາລະນະ​ລັດ ແມັກ​ຊີ​ໂກ ຕັ້ງ​ຢູ່​ທະວີບ​ອາ​ເມ​ຣິ​ກາ ມີ​ຊາຍ​ແດນ​ທິດເໜືອ​ຕິດ​ກັບ ອາ​ເມ​ຣິ​ກາ, ທິດໃຕ້​ຕິດ​ກັບ​ກວາ​ເຕ​ມາລາ ແລະ ບີ​ລີ​ຊີ, ທິດຕາເວັນອອກ​ຕິດ​ກັບ​ອາວ​ແມັກ​ຊີ​ໂກ ແລະ ທະເລ​ກາລີ​ບຽນ, ທິດຕາເວັນຕົກ​ຕິດ​ກັບ​ມະຫາ​ສະ​​ໝຸດ​ປາ​ຊີ​ຟິກ ແລະ ອ່າວ​ແຄ​ລິ​ຟໍ​ເນ​ຍ. ມີ​ເນື້ອທີ່​ທັງ​ໝົດ 1.964.375 ກິໂລ​ຕາ​ແມັດ, ເປັນ​ປະເທດ​ໃຫຍ່​ທີ່​ສຸດ​ໃນ​ອາ​ເມ​ຣິ​ກາ​ກາງ, ໃຫຍ່​ເປັນ​ອັນ​ດັບ 3 ໃນ​ອາ​ເມ​ຣິ​ກາ​ລາ​ຕິນ ແລະ ໃຫຍ່​ເປັນ​ອັນດັບ​ທີ 14 ຂອງ​ໂລກ. ມີ​ພົນລະເມືອງ​ທັງ​ໝົດ 124.574.790 ກ່​ວາ​ຄົນ (ຂໍ້​ມູນ​ປີ 2017), ອັດຕາ​ການ​ເຕີບ​ໂຕ​ຂອງ​ພົນລະເມືອງ 1,1%, ນະຄອນຫຼວງ​ແມ່ນ ແມັກຊິີ​ໂກ ຊີ​ຕີ.
ປະເທດ​ແມັກ​ຊີ​ໂກ ແມ່ນ ​ໜຶ່ງ​ໃນ​ບັນດາ​ປະເທດ​ເສດຖະ ກິດ​ເສລີ ທີ່​ມີ​ລາຍ​ໄດ້​ແຫ່ງ​ຊາດ​ຂຶ້ນ​ຫຼັກ​ແສນ​ລ້ານ. ເສດຖະກິດ​ຂອງ​ປະເທດ​ມີ​ລັກສະນະ​ປະ ສົມ​ປະສານ​ກັນ ລະຫວ່າງ ອຸດ ສາຫະກຳ​ທີ່​ທັນ​ສະໄໝ ແລະ ເສດຖະກິດ​ແບບ​ດັ້ງເດີມ. ພາກ​ເອກະ​ຊົນ​ເລີ່ມ​ມີ​ບົດບາດ​ຫຼາຍ​ຂຶ້ນ​ໃນ​ລະບົບ​ເສດ​ຖະ​ກິດ. ປັດ ຈຸບັນ, ແມັກ​ຊີ​ໂກ ໄດ້​ລົງ​ນາມ​ໃນ​ຂໍ້​ຕົກລົງ​ການ​ຄ້າ​ເສລີ​ກັບ 40 ກວ່າ​ປະເທດ​ເຊັ່ນ: ກວາ​ເຕ​ມາລາ, ຮອນ​ດູ​ຣັສ, ແອນ​ຊານ​ວາ​ດໍ, ເຂດ​ການ​ຄ້າ​ເສລີ​ເອີ​ຣົບ (EFTA) ແລະ ຍີ່ປຸ່ນ ເຮັດ​ໃຫ້​ຫຼາຍ​ກວ່າ 90% ຂອງ​ມູນ​ຄ່າ​ການ​ຄ້າ​ມາ​ຈາກ​ຂໍ້​ຕົກລົງ​ເຂດ​ການ​ຄ້າ​ເສ​ລີ. ລວມ​ຍອດ​ຜະລິດ​ຕະ​ພັນ​ພາຍ​ໃນ​ຂອງ​ປະເທດ​ແມັກ​ຊີ​ໂກ ສາມາດ​ແບ່ງ​ອອກ​ເປັນ​ພາກ​ກະສິກຳ, ອຸດ​ສາຫະ​ກຳ ແລະ ການ​ບໍລິການ ໂດຍ​ມີ​ຜົນ​ຜະລິດ​ຈາກ​ພາກ​ບໍລິການ​ປະມານ2/3 ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ​ຂອງ​ປະ​ເທດ. ການ​ບໍລິການ​ສາຂາ​ທີ່​ມີ​ການ​ເຕີບ​ໂຕ​ຫຼາຍ​ຢ່າງ ລວມ​ມີ​ຂະແໜງການ​ສື່ສານ ແລະ ການ​ຂົນສົ່ງ, ຂະແໜງ​ກໍ່ສ້າງ ແລະ ການ​ຄ້າ, ທຸລະ​ກິດ​ໂຮງແຮມ ແລະ ຮ້ານ​ອາຫານ ໂດຍ​ລວມ​ຍອດຜະລິດ​ຕະ​ພັນ​ພາຍ​ໃນ (GDP) ປະມານ 1,761 ພັນ​ຕື້​ໂດ​ລາ, ລາຍ​ໄດ້​ສະເລ່ຍ​ຕໍ່ຫົວ ​ຄົນ​ປະມານ 15.300 ໂດ​ລາ. ອັດຕາ​ການ​ເຕີບ​ໂຕ GDP ແມ່ນ 4%, ມູນ​ຄ່າ​ການ​ສົ່ງອອກ 370,9 ຕື້​ໂດ​ລາ. ສິນຄ້າ​ສົ່ງ​ ອອກ​ທີ່​ສຳຄັນ​ຄື: ສິນຄ້າ​ອຸດ ສາຫະກຳ, ນ້ຳມັນ​ປີ​ໂຕ​ຣ​ລຽມ, ເງິນ, ໝາກ​ໄມ້, ຜັກ, ກາເຟ ແລະ ຝ້າຍ. ປະເທດ​ຄູ່​ຄ້າ​ສົ່ງ​ອອກ​ທີ່​ສຳຄັນ​ແມ່ນສົ່ງ​ໄປ​ອາ​ເມ​ຣິກາ 78%. ສ່ວນ​ມູນ​ຄ່າ​ການນຳ​ ເຂົ້າ​ບັນລຸ​ມູນ​ຄ່າ​ປະມານ 379,4 ຕື້​ໂດ​ລາ. ສິນຄ້າ​ນຳ​ເຂົ້າ​ແມ່ນວັດຖຸ​ດິບ, ເຄື່ອງ​ຈັກ​ອຸດສາຫະກຳ​ໜັກ, ເຄື່ອງມື​ການ ​ກະເສດ, ອຸປະກອນ​ການ​ຂົນສົ່ງ ແລະ ຊິ້ນ​ສ່ວນ​ລົດ​ໃຫຍ່, ເຮືອ ບິນ ແລະ ອື່ນໆ​ເປັນ​ຕົ້ນ. ແຫຼ່ງ​ນຳ​ເຂົ້າ​ຕົ້ນຕໍ​ແມ່ນ ອາ​ເມ​ຣິ​ກາ 49,7%, ຈີນ 14,9% ແລະ ຍີ່ ປຸ່ນ 4,7%.
ປີ 2017 ເສດຖະກິດ​ຂະ ຫຍາຍຕົວ​ໃນ​ອັດຕາ 2,1%, GDP ລວມ​ມູນ​ຄ່າ​ເຖິງ 1,153,2 ຕື້​ໂດ​ລາ, ສະເລ່ຍ​ລາຍ​ໄດ້​ຕໍ່​ຫົວ​ຄົນ​ແມ່ນ 8.928 ໂດ​ລາ ແລະ ໄດ້​ຮັບ​ເງິນ​ລົງທຶນ​ໂດຍ​ກົງ​ຈາກ​ຕ່າງປະເທດ (FDI) ຫຼາຍ​ກ່​ວາ 29 ຕື້​ໂດ​ລາ. ແມັກ​ຊີ​ໂກ ເປັນ​ປະ ເທດ​ຕະຫຼາດ​ຂະໜາດ​ໃຫຍ່. ມີ​ພົນລະເມືອງ​ຫຼາຍ​ກ່​ວາ 127 ລ້ານ​ຄົນ, ມີ​ເສດຖະກິດ​ໃຫຍ່ ເປັນ​ອັນ​ດັບ 2 ໃນ​ພາກ​ພື້ນອາ ​ເມ​ຣິ​ກາ​ລາ​ຕິນ, ຮອງ​ຈາກ​ປະ ເທດ​ເບຣ​ຊິນ, ມີ​ຂໍ້​ຕົກລົງ​ດ້ານ​ສິດທິ​ປະໂຫຍດ​ທາງ​ການ​ຄ້າ​ກັບ​ຫຼາຍ​ກວ່າ 50 ປະເທດ​ທົ່ວ​ໂລກ​ເຊັ່ນ: ສັນຍາ​ການ​ຄ້າ​ເສລີ​ກັບ​ອາ​ເມ​ຣິ​ກາ ແລະ ກາ​ນາ​ດາ (NAFTA), ສະຫະພາບ​ເອີ​ຣົບ, ຍີ່ປຸ່ນ, ກຸ່ມ​ພັນທະ​ມິດ​ປາ​ຊີ​ຟິກ (ເປ​ຣູ, ຊີ​ລີ ແລະ ໂກ​ລົມ​ເບຍ), ສັນຍາ​ຮອບດ້ານ ແລະ ກ້າວໜ້າ​ສຳລັບ​ການ​ຮ່ວມມື​ຂ້າມ​ປາ​ຊີ​ຟິກ (CPTPP) ຊຶ່ງ​ແມັກ​ຊີ​ໂກ ໄດ້​ເຂົ້າ​ຮ່ວມ​ລົງນາມ​ໃນ​ວັນ​ທີ 8 ມີນາ 2018, ເຮັດ​ໃຫ້​ຕ່າງປະເທດ​ເຂົ້າ​ລົງທຶນ ແລະ ນຳ​ໃຊ້​ເມັກ​ຊີ​ໂກເປັນ​ສູນ​ກາງ​ການ​ຜະລິດ ແລະ ປະຕູ​ອອກ​ສູ່​ເຂດ​ອື່ນໆ ໂດຍ​ສະເພາະພາກ​ພື້ນ​ອາ​ເມ​ຣິ​ກາ​ເໜືອ (NAFTA) ແລະ ອາ​ເມ​ຣິ​ກາ​ໃຕ້ເປັນຈຳ ນວນຫຼາຍ. ແມັກ​ຊີ​ໂກ ເປັນຖານ ​ການ​ຜະລິດ​ລົດ​ສຳລັບ ພາກ ພື້ນ​ອາ​ເມ​ຣິ​ກາ​ເໜືອ. ໃນ​ປີ 2017 ແມັກ​ຊີ​ໂກ ຜະລິດ​ລົດ​ໄດ້​ເປັນ​ອັນ​ດັບ 7 ຂອງ​ໂລກ, ຮອງ​ຈາກ​ຈີນ, ອາ​ເມ​ຣິ​ກາ, ຍີ່ປຸ່ນ, ເຢຍ​ລະ​ມັນ, ອິນ​ເດຍ ແລະ ສ.ເກົາຫຼີ ຕາມ​ລຳດັບ, ເພີ່ມ​ຂຶ້ນ​ເປັນ​ຈຳນວນ 3,77 ລ້ານ​ຄັນ ກວມ 8,9% ທຽບໃສ່​ປີຜ່ານມາ ແລະ ການ​ສົ່ງ​ອອກ​ລົດ​ສູງ​ເປັນ​ອັນ​ດັບ 4 ຂອງ​ໂລກ ເປັນ​ຈຳນວນ​ຫຼາຍ​ກວ່າ 3,1 ລ້ານ​ຄັນ, ເພີ່ມ​ຂຶ້ນ 12,1% ຈາກ​ປີ​ກ່ອນ. ໃນ​ປີ 2020 ຄາດ​ວ່າ: ຈະ​ຜະລິດ​ລົດ​ໄດ້ 5 ລ້ານ​ຄັນ.
ປີ 2010-2017, ມີ​ບໍລິສັດ​ ຜະລິດ​ລົດ (OEM) ຕ່າງປະເທດ​ ຈຳນວນ 7 ບໍລິສັດ ລົງທຶນ​ໃນ​ ອຸດສາຫະກຳ​ລົດ​ຂອງ​ແມັກ​ຊີ​ໂກ ເປັນ​ມູນ​ຄ່າ​ຫຼາຍ​ກ​ວ່າ 25 ຕື້​ໂດ​ລາ ເນື່ອງ​ຈາກ​ຂໍ້​ໄດ້​ປຽບ​ດ້ານ​ການ​ແຂ່ງຂັນ​ຄື: (1) ທີ່​ຕັ້ງ​ຂອງ​ແມັກ​ຊີ​ໂກ ຊຶ່ງ​ສາມາດ​ເປັນ​ປະຕູ​ອອກ​ສູ່​ຂົງເຂດ​ອາ​ເມ​ຣິ​ກາ​ເໜືອ ແລະ ອາ​ເມ​ຣິກາ​ລາ​ຕິນ, (2) ຂໍ້​ຕົກລົງ​ດ້ານ​ຜົນ ​ປະໂຫຍດ​ດ້ານ​ການ​ຄ້າ​ທີ່ ແມັກ​ ຊີ​ໂກ ກັບ​ຫຼາຍ​ປະເທດ​ທົ່ວ​ໂລກ. (3) ຄ່າ​ແຮງ​ງານ​ຕາໍ່. (4) ສະພາບ​ທາງ​ການເມືອງ ແລະ ເສດຖະກິດ ທີ່​ມີ​ຄວາມ​ໝັ້ນຄົງ ແລະ (5) ນະໂຍບາຍ​ເປີດ​ເສລີ​ດ້ານ​ການ​ຄ້າ ໂດຍ​ການ​ເຂົ້າ​ມາ​ລົງທຶນ ຂອງ ​ບໍລິສັດ​ຕ່າງປະເທດ​ທີ່​ກ່າວ​ມາ​ຂ້າງ​ເທິງ​ນັ້ນ ສົ່ງ​ຜົນ​ໃຫ້​ແມັກ​ຊີ​ໂກ ໄດ້​ພັດທະນາ​ພື້ນຖານ​ໂຄງ​ລ່າງ​ຕ່າງໆ ແລະ ຊັບພະຍາ ກອນ​ມະນຸດ​ໃຫ້​ມີ​ຄຸນ​ນະ​ພາບ​ ຄວບ​ຄູ່​ໄປ​ນຳ.
ຖານ​ການ​ຜະລິດ​ລົດ​ໃນ ປະເທດ​ແມັກ​ຊີ​ໂກ ຕັ້ງ​ຢູ່ 14 ລັດ, ໃນ 3 ພາກ​ຂອງ​ປະເທດ​ຄື: ເຂດ​ພາກ​ໃຕ້​ເຊັ່ນ: ລັດ​ປວ​ຍບ​ລາ, ໃນ​ນັ້ນ​ບໍລິສັດ Volkswagen ໄດ້​ເຂົ້າ​ມາ​ຕັ້ງ​ໂຮງງານ​ແຕ່​ປີ 1940 - 1960. ເຂດ​ພາກ​ເໜືອ​ເຊັ່ນ: ລັດ​ນວຍ​ໂວ​ເລ​ອອງ ຊຶ່ງ​ມີ​ບໍລິສັດ​ຊິ້ນ​ສ່ວນ​ຍານພາຫະນະ ແລະ ບໍລິສັດ OEM ຜະລິດ​ລົດ​ຂະໜາດ​ໃຫຍ່​ເຊັ່ນ: Navistar (ຜະລິດ​ລົດ​ບັນທຸກ)ຂອງ​ອາ​ເມ​ຣິ​ກາ, Daimler (ຜະລິດ​ລົດເມ) ຂອງ​ເຢຍ​ລະ​ມັນ ແລະ ອື່ນໆ, ໄດ້​ເຂົ້າ​ມາ​ສ້າງ​ໂຮງງານ​ຜະລິດ​ລົດ ນັບ​ຕັ້ງແຕ່​ປີ 1980 - 1990 (ຫຼັງ​ຈາກ​ລົງ​ນາມ NAFTA). ປັດຈຸບັນ OEM ຜະລິດ​ລົດ​ຂະໜາດ​ນ້ອຍ​ລວມ​ທັງ Kia ແລະ suppliers ກໍໄດ້​ເຂົ້າ​ມາ ເຊັ່ນ​ກັນ. ເຂດ​ພາກ​ກາງ​ຕອນ​ເທິງ​ເຊັ່ນ: ລັດ​ກວາ​ນາວາ​ໂຕ, ລັດ​ເກ​ເຣ​ຕາ​ໂຣ, ລັດ​ຊັນ​ຫຼຸຍ​ໂປ​ໂຕ​ຊີ ແລະ ລັດ​ອາ​ກວັສ​ກາ​ລຽນ​ເຕ​ສ​ຊຶ່ງ​ມີ Nissan, Honda, Mazda, Toyota, BMW, GM, Hino, Volkwagen ແລະ Daimler ເຂົ້າ​ມາ​ຕັ້ງ​ໂຮງ​ງານ. ນອກຈາກ​ນີ້, ອຸດສາຫະກຳ​ລົດ​ປັກ​ກິ່ງ (Beijing Automotive Industry=BAIC), ຊຶ່ງ​ເປັນ OEM ຈາກ​ປະເທດ​ຈີນ ແລະ ໄດ້​ເຂົ້າ​ມາ​ສ້າງຕັ້ງ assembly line ສຳລັບ​ເລີ່ມ​ຕົ້ນ​ຜະລິດ​ລົດ​ລຸ້ນ D20 ແລະ X25 ໃນ​ລັດ​ເວ​ຣາກ​ຣູ​ຊ. ປີ 2016 ໄດ້​ມີ​ການ​ສຶກສາ​ຄົ້ນ​ຄ້​ວາ​ກ່ຽວ​ກັບ​ທ່າແຮງ​ຂອງ​ລັດ​ຕ່າງໆ​ໃນ​ແມັ​ກຊິີ​ໂກ ເພື່ອ​ວາງ​ແຜນ​ເປີດ​ໂຮງງານ OEM ເຕັມ​ຮູບ​ແບບ​ສຳລັບ​ປີ 2022. BMI ລະບຸ​ວ່າ: ບໍລິສັດ​ຈີນ ຫຼາຍ​ບໍລິສັດ​ມາ​ລົງທຶນ​ໃນ​ແມັກ​ຊີ​ໂກ ເພື່ອ​ສົ່ງ​ອອກ​ໄປ​ຍັງ​ປະເທດ​ຕ່າງໆ​ໃນ​ພາກ​ພື້ນ​ອາ​ເມ​ຣິ​ກາ​ລາ​ຕິ​ນ.
ສາທາລະນະ​ລັດ ປະຊາທິ ປະໄຕ ປະຊາຊົນ​ລາວ ແລະ ສາທາລະນະ​ລັດ ແມັກ​ຊີ​ໂກ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນໍາ​ກັນ ໃນ​ວັນ​ທີ 29 ພະຈິກ ປີ 1976.