ອິນ​ເດຍ ມອບ​ທຶນ​ການ​ສຶກ­ສາ​ປະ­ລິນ­ຍາ​ເອກ​ໃຫ້​ແກ່​ນັກ​ສຶກ­ສາ​ອາ​ຊຽນ 1.000 ທຶນ

19.09.2019 9:13     

   ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວັນ​ທີ 16 ກັນຍາ​ທີ່​ຜ່ານ​ມາ ອິນ​ເດຍ ໄດ້​ປະກາດ​ຂໍ້​ລິ​ເລີ່ມ ມອບ​ທຶນ​ການ​ສຶກສາ​ປະລິນຍາ​ເອກ​ຈໍາ​ນວນ 1.000 ທຶນ​ໃຫ້​ແກ່​ນັກ​ສຶກສາ​ອາ​ຊຽນ​ຢູ່​ສະຖາບັນ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ (IIT) 23 ແຫ່ງ​ຂອງ​ອິນ​ເດ​ຍ.

   ກ່າວ​ຄໍາ​ເຫັນ​ທີ່​ພິທີ​ປະ ກາດລັດຖະມົນຕີ​ກະຊວງ ຊັບພະຍາກອນ​ມະນຸດ​ທ່ານ​ຣາ​ເ​ມັສ ໂພ​ກຣີ​ໂຍ ນິ​ແຊັງ (Ramesh Pokhriyal Ni shank)ໃຫ້​ຮູ້​ວ່າ ທຶນ​ການ​ສຶກສາ 1.000 ທຶນ​ນີ້ ມີ​ບົດ​ບາດ​ສໍາ​ຄັນ​ໃນ​ການ​ປັບປຸງ​ການ​ພົວພັນ​ລະຫວ່າງ ອິນ​ເດຍ ກັບ​ບັນດາ​ປະເທດອາຊຽນ. ບ້ວງ​ທຶນ​ການ​ສຶກສາ​ດັ່ງກ່າວ ແມ່ນ​ສ່ວນ​ໜຶ່ງ​ຂອງ​ຄໍາ​ໝັ້ນ​ສັນຍາ​ເພີ່ມ​ທະວີ​ການ​ພົວພັນ​ດ້ານ​ວິຊາ​ການ​ສຶກສາ​ກັບ​ບັນດາ​ປະເທດ ອາຊີ​ຕາເວັນ​ອອກ ຊຶ່ງ​ທ່ານ​ນາ ຍົກ​ລັດຖະມົນຕີນາ​ເຣນ​ທຣາ ໂມ​ດີ ຂອງ​ອິນ​ເດ​ຍ​ໄດ້​ຍົກ​ອອກ​ມາ​ໃນ​ປີ 2018. ໂຄງການ​ທຶນ​ການ​ສຶກສາ​ດັ່ງ​ກ່າວ​ມີີ​ມູນ​ຄ່າ 40 ລ້ານ​ກວ່າໂດ​ລາ ຊຶ່ງ​ໃນ​ປີ 2019 ມີ 250 ທຶນ, ປີ 2020 ແມ່ນ 300 ທຶນ ແລະ ປີ 2021 ແມ່ນ 450 ທຶນ. ຕາມ​ລັດ ຖະ​ບານ​ອິນ​ເດ​ຍ​ແລ້ວບ້ວງ​ທຶນ​ການ​ສຶກສາ​ດັ່ງກ່າວຈະ​ຈ່າຍ​ຄ່າ​ຮຽນ ແລະ ຄ່າ​ກິນ​ຢູ່​ທັງ​ໝົດ​ໃນ​ໄລຍະ​ຫຼາຍ​ສຸດ​ແມ່ນ 5 ປີ ຂອງ​ຫຼັກສູດ​ຮຽນ​ປະລິນຍາ​ເອກ. ບັນດາ​ນັກ​ສຶກສາ​ຈະ​ລົງທະບຽນ​ຜ່ານ​ປະຕູ​ຖານ​ຂໍ້​ມູນ​​ດຽວ ແລະ ປະຕິບັດ​ຕາມ​ຂັ້ນ​ຕອນລວມ​ເທົ່າ​ນັ້ນ ເພື່ອ​ລົງທະບຽນ​ເຂົ້າ 1 ໃນ​ຈໍາ​ນວນ​ລາຍ​ຊື່ 23 ສະ​ຖາ​ບັນ IIT ຂອງ​ອິນ​ເດ​ຍ.