ທະ­ນາ­ຄານ​ກາງ​ສະ­ຫະ­ລັດ ຫຼຸຸດ​ອັດ­ຕາ​ດອກ​ເບ້ຍ​ເປັນ​ຄັ້ງ​ທີ​ສອງ

23.09.2019 9:14     

   ຂ່າວ​ຕ່າງປະເທດ​ລາຍ​ງານ ທ່ານ ເຈີ​ໂຣມ ພາວ​ເວວ (Jerome Powell) ປະທານ​ ທະນາຄານ​ກາດ​ເຟດ (Fed) ປະກາດ​ໃນ​ວັນ​ທີ 18 ກັນຍາ​ຜ່ານ​ມາ​ວ່າ: ຄະນະ​ກຳມະການ​ນະໂຍບາຍ​ການ​ເງິນ (FOMC) ມີ​ຄະແນນ​ສຽງ​ສ່ວນ​ຫຼາຍ 7 ຕໍ່ 3 ສຽງ ປັບ​ຫຼຸດ​ອັດຕາ​ດອກ​ເບ້ຍ​ນະໂຍບາຍ​ຂອງ​ປະເທດລົງ​ອີກ 0,25% ໃຫ້​ເຫຼືອ​ຢູ່​ລະຫວ່າງ 1,75% ເຖິງ 2% ຖື ເປັນ​ການ​ປັບ​ຫຼຸດ​ອັດຕາ​ດອກ​ເບ້ຍ​ຂັ້ນ​ພື້ນຖານ​ຄັ້ງ​ທີ 2 ໃນ​ປີ​ນີ້, ຕໍ່ ຈາກ ​ທ້າຍ​ເດືອນ​ກໍ​ລະ​ກົດ ຊຶ່ງ FOMC ມີ​ມະ​ຕິສຽງ​ສ່ວນ​ຫຼາຍ ໃຫ້​ປັບ​ຫຼຸດ​ອັດຕາ​ດອກ​ເບ້ຍ​ນະໂຍບາຍ​ລົງ 0,25% ໃຫ້​ຢູ່​ລະ ຫວ່າງ 2,0% ເຖິງ 2,25%.

   ເຟດ ໄດ້​ເພີ່ມ​ອັດຕາ​ດອກ​ເບ້ຍ​ສູງ​ເຖິງ 4 ຄັ້ງ​ໃນ​ປີ​ກາຍ​ນີ້ ແລະ ຈຶ້ງ​ໄວ້​ຢູ່​ທີ່​ລະດັບ 2,25% ເຖິງ 2,50% ຕັ້ງແຕ່​ເດືອນ​ທັນວາ​ທີ່​ຜ່ານ​ມາ. ເຟດ ປັບ​ຫຼຸດ​ອັດຕາ​ດອກ​ເບ້ຍ​ນະໂຍບາຍ​ລົງ​ເຫຼືອ​ເກືອບ 0% ໃນ​ເດືອນ​ທັນວາ​ປີ 2008 ຊຶ່ງ​ໄປ​ໄລຍະ​ວິ​ກິດ​ການ​ການ​ເງິນ​ໂລກ ແລະ ຮັກສາ​ໄວ້​ຈົນ​ຮອດ​ປີ 2015, ຈຶ່ງ​ຄ່ອຍ​ເລີ່ມ​ປັບ​ຂຶ້ນ ໃນ​ສະໄໝ​ຂອງ​ທ່ານ​ ນາງ​ ເຈ​ເນັດ ເຢນ ​ເລັນ (Janet Yellen).
ເຖິງ​ຢ່າງໃດ​ກໍຕາມ, ທ່ານ​ພາວ​ເວ​ວ​ກ່າວ​ວ່າ: ສະຖານະ​ການ​ໃນ​ຕະຫຼາດ​ກອງ​ທຶນ ລວມ​ນັ້ນ "ມີ​ຄວາມ​ເຄັ່ງ​ຕຶງ" ຫຼາຍ​ກ່​ວາ​ທີ່​ເຟດ​ຄາດ​ຄະເນ​ໄວ້ ຈຶ່ງ​ຈຳເປັນ​ຕ້ອງ​ມີ​ການ "ປັບ​ຄວາມ​ສົມ​ດຸນ" ໃຫ້​ກັບ​ຕະຫຼາດ, ສົ່ງ​ສັນຍານ​ວ່າເຟດອາດ​ຈະ​ໃຊ້ "ມາດ​ຕະການ​ບາງ​ຢ່າງ" ໃນ​ອະນາຄົດ​ອັນ​ໃກ້​ນີ້ ນອກ​ເໜືອ​ຈາກ ​ສະຖານະ​ການ​ເສດຖະກິດ​ທັງ​ພາຍ​ໃນ ແລະ ພາຍ​ນອກໃນ​ພາບ​ລວມ​ທີ່ "ບໍ່​ດີ" ແຕ່​ສຳລັບ​ເປົ້າ​ໝາຍ​ເງິນ​ເຟີ້​ນັ້ນ ທ່ານ ພາວ​ເວວ ຄາດ​ຄະເນ​ວ່າ ຈະ​ຍັງ​ຢູ່​ທີ່​ເປົ້າ​ໝາຍ​ຄື​ລະດັບ 2%.