70 ປີ ປະ­ລິ­ມານ​ເສດ­ຖະ­ກິດ​ຈີນ​ເຕີບ​ໂຕ​ຂຶ້ນ​ຫຼາຍກວ່າ 170 ເທົ່າ

24.09.2019 8:50     

   ວິທະຍຸ​ສາກົນ​ແຫ່ງ​ປະ ເທດ​ຈີນ​ລາຍ​ງານ ວັນ​ທີ 22 ກັນ​ຍາ. 70 ປີ, ເປັນ​ພຽງ​ໄລຍະ​ສັ້ນໆ​ໃນ​ປະຫວັດສາດ​ມວນ​ມະນຸດ​ເທົ່າ​ນັ້ນ, ແຕ່​ຈີນ​ພັດ​ໄດ້​ມີ​ການ​ພັດທະນາ​ແບບ​ກ້າວ​ກະ​ໂດດ. ຖ້າ​ຄິດໄລ່​ຕາມ​ລາຄາ​ທີ່​ຄົງ​ຕົວ, ຍອດ​ມູນ​ຄ່າ​ຜະລິດ​ຕະ​ພັນ​ພາຍ​ໃນ​ປະເທດ ຫຼື GDP ຂອງ​ຈີນ​ໃນ​ປີ 2018 ໄດ້​ເພີ່ມ​ຂຶ້ນ 174 ເທົ່າ​ເມື່ອ​ທຽບໃສ່​ປີ 1952, ຈາກ​ປະເທດ​ທີ່​ທຸກ​ຍາກ ແລະ ອ່ອນແອ ພັດທະນາ​ໃຫ້​ກາຍເປັນ​ກຸ່ມ​ເສດຖະກິດ​ໃຫຍ່​ອັນ​ດັບ 2 ຂອງ​ໂລກ, "ຄວາມ​ມະຫັດສະຈັນ​ຈີນ"ໄດ້​ດຶງ​ດູດ​ສາຍຕາ​ຂອງ​ທົ່ວ​ໂລກ.

   ໃນ​ຮອບ 70 ປີ, ເສດຖະກິດ​ຈີນ​ໄດ້​ເຂັ້ມແຂງ​ຂຶ້ນ​ເປັນ​ກ້າວໆ. ເມື່ອ​ປີ 1952, GDP ຂອງ​ຈີນ​ມີ​ພຽງ 67 ຕື້ 900 ລ້ານ​ຢວນ​ເທົ່າ​ນັ້ນ, ແຕ່​ຮອດ​ປີ 2010, ໄດ້​ຫຼາຍ​ກວ່າ​ຍີ່ປຸ່ນ ແລະ ຄອງ​ຖານະ​ອັນ​ດັບ 2 ຂອງ​ໂລກ​ໃນ​ຫຼາຍ​ປີ​ລຽນ​ຕິດ. ໃນ​ຮອບ 70 ປີ, ຈີນ​ໄດ້​ເປີດ​ປະຕູ​ສູ່​ພາຍ​ນອກ​ນັບ​ມື້​ນັບ​ກວ້າງ​ອອກ. ເມື່ອ​ປີ 1950, ມູນ​ຄ່າ​ການ​ຄ້າ​ກັບ​ຕ່າງປະເທດ​ຂອງ​ຈີນ​ມີ​ພຽງ 1 ຕື້ 130 ລ້ານ​ໂດ​ລາ​ເທົ່າ​ນັ້ນ, ແຕ່​ຮອດ​ປີ 2018, ຍອດ​ມູນ​ຄ່າ​ສິນຄ້າ​ຂາ​ເຂົ້າ​-​ຂາ​ອອກ​ໄດ້​ບັນລຸ 4.600 ຕື້​ໂດ​ລາ, ເພີ່ມ​ຂຶ້ນ​ຫຼາຍ​ກວ່າ 4.000 ເທົ່າ.

   ໃນ​ຮອບ 70 ປີ, ການພັດ ທະນາ​ຂອງ​ຈີນ​ໄດ້​ມີ​ຄຸນ​ນະ ​ພາບ​ນັບ​ມື້​ນັບ​ສູງ​ຂຶ້ນ. ເມື່ອ​ປີ 1952, ມູນ​ຄ່າ​ເພີ່ມ​ດ້ານ​ກະ ສິກຳ​ກວມ GDP ຂອງ​ຈີນ​ສູງ​ເຖິງ 50,5%, ແຕ່​ຮອດ​ປີ 2018, ອັດຕາ​ສ່ວນ​ຂອງ​ມູນ​ຄ່າ​ເພີ່ມ​ດ້ານ​ກະສິກຳ​ໄດ້​ຫຼຸດ​ລົງ​ເປັນ 7,2%, ການ​ພັດທະນາ​ຂອງ​ຈີນ​ໄດ້​ຈາກ​ຮູບ​ແບບ​ຖື​ກະສິກຳ​ເປັນ​ຫຼັກ ຫັນ​ເປັນ​ຮູບ​ແບບ 3 ຂະແໜງການ​ໃຫຍ່​ປະສົມ​ປະ ສານ​ກັນ. ກຳລັງ​ເສດຖະກິດ​ຂອງ​ຈີນ​ໄດ້​ເຕີບ​ໂຕ​ຂຶ້ນ​ຢ່າງ​ວ່ອງ​ໄວ. ມາດຕາສ່ວນ​ຂອງ GDP ຈີນ​ໃນ​ເສດຖະກິດ​ໂລກ​ໄດ້​ເພີ່ມ​ຈາກ 1,8% ໃນປີ 1978 ຂຶ້ນ​ເປັນ​ເກືອບ 16% ໃນ​ປີ 2018. ນັບ​ແຕ່​ປີ 2006 ເປັນຕົ້ນ​ມາ, ອັດຕາ​ປະກອບສ່ວນ​ຂອງ​ຈີນ​ທີ່​ມີ​ຕໍ່​ການ​ເຕີບ​ໂຕ​ຂອງ​ເສດຖະກິດ​ໂລກ​ໄດ້​ຄອງ​ຖານະ​ອັນ​ດັບ 1 ຂອງ​ໂລກ ຊຶ່ງ​ເຮັດ​ໃຫ້​ຈີນ​ໄດ້​ກາຍເປັນ​ພະລັງ​ແມ່​ແຮງ​ອັນ​ດັບ 1 ຂອງ​ໂລກ​ທີ່ແທ້​ຈິງ. ຈີນ​ໃນ​ຍຸກ​ປັດຈຸ​ບັນ, ໄດ້​ກາຍເປັນ​ປະເທດ​ອຸດສາຫະກຳ​ໃຫຍ່​ອັນ​ດັບ 1, ປະເທດ​ການ​ຄ້າ​ໃຫຍ່​ອັນ​ດັບ 1, ປະເທດ​ທີ່​ມີ​ຄັງ​ສຳຮອງ​ເງິນຕາ​ຕ່າງປະເທດ​ຫຼາຍ​ທີ່​ສຸດ ແລະ ປະເທດ​ທີ່​ຮັບ​ເອົາ​ທຶນ​ຕ່າງປະເທດ​ຫຼາຍ​ອັນ​ດັບ 2 ຂອງ​ໂລກ.

   ທ່ານ ​ຕີ​ຈາ​ນີ ມູ​ຮາ​ມັດ ບານ ​ເດ ປະທານ​ສະມັດຊາ​ໃຫຍ່​ສະ ຫະ​ປະຊາຊາດ​ກ່າວ​ວ່າ: ໃນ​ຮອບ 70 ປີຜ່ານມາ​ນີ້, ຈີນ​ໄດ້​ພັດທະນາ​ຕົນ​ເອງ​ຈາກ​ປະເທດ​ທີ່​ທຸກ​ຍາກ​ທີ່​ສຸດ​ໃຫ້​ກາຍເປັນ​ປະເທດ​ທີ່​ປະກອບສ່ວນ​ເຂົ້າ​ໃນ​ການ​ບໍລິຫານ​ຂອງ​ໂລກ​ນັບ​ມື້​ນັບ​ຫຼາຍ ແລະ ມີ​ບົດບາດ​ຊຸກຍູ້​ຕໍ່​ເສດຖະກິດ​ໂລກ​ໂດຍ​ສະເພາະ​ແມ່ນ​ປະເທດ​ທີ່​ພວມ​ພັດທະນາ​ນັບ​ມື້​ນັບ​ຫຼາຍ, ນີ້​ເປັນ​ການ​ປະກອບສ່ວນ​ທີ່​ໃຫຍ່​ຫຼວງ​ທີ່​ສຸດ​ຕໍ່​ການ​ພັດທະນາ​ຂອງ​ມວນ​ມະ​ນຸດ. ທົ່ວ​ສັງຄົມ​ຈີນ​ເຕັມ​ໄປ​ດ້ວຍ​ພະລັງ​ຊີວິດ​ຊີວາ, ໂສມ​ໜ້າ​ມີ​ການ​ປ່ຽນແປງ​ໃໝ່​ເລື້ອຍໆ, ການ​ພັດທະນາ​ຂອງ​ຈີນ​ມີ​ອະນາຄົດ​ສົດໃສ​ທີ່​ສະຫວ່າງ​ສະ​ໄຫວ.