ເປີດ​ກອງ​ປະ­ຊຸມ​ເຈ­ລະ­ຈາ​ສັນ­ຍາ RCEP ຄັ້ງ​ທີ 28

25.09.2019 9:21     

   ວິທະຍຸ​ກະຈາຍສຽງຫວຽດ ນາມ​ລາຍ​ງານ: ວັນ​ທີ 23 ກັນ ຍາຜ່ານ​ມາ ຢູ່​ນະຄອນ​ດາໜັງ ​ຂອງ​ຫວຽດນາມ ໄດ້​ຈັດພິທີ ເປີດກອງ​ປະຊຸມ​ເຈລະຈາສັນ ຍາ​ຄູ່​ຮ່ວມ​ມື​ເສດຖະກິດ​ຮອບ ດ້ານ​ພາກ​ພື້ນ (RCEP) ຄັ້ງ​ທີ 28. ນີ້​ແມ່ນ​ສັນຍາ​ການ​ຄ້າ​ເສລີ​ຄຸນ​ນະພາບ ​ສູງມຸ້ງ​ໄປ​ເຖິງ​ເປົ້າໝາຍ ສ້າງຕັ້ງ​ສາຍ​ພົວພັນ​ຄູ່​ຮ່ວມ​ມື​ຮອບດ້ານ​ລະຫວ່າງ ອາ​ຊຽນ ກັບ 6 ປະເທດ ຄູ່ຮ່ວມ​ມື​ ຊຶ່ງ​ລວມ​ມີ ຈີນ, ຍີ່ປຸ່ນ, ສ.ເກົາຫຼີ, ອົສ​ຕຣາ​ລີ, ນິວ​ຊີ​ແລນ, ອິນ​ເດຍ ຫຼື ເອີ້ນ​ວ່າອາ​ຊຽນ + 6.

   ກ່າວ​ຄໍາ​ເຫັນ​ທີ່​ວາລະ​ເປີດ​ກອງ​ປະຊຸມ, ທ່ານ ເຈິ່ນ​ຕ໊ວນ​ແອັງ ລັດຖະມົນຕີ​ກະຊວງ​ອຸດ​ສາ​ຫະ​ກໍາ ແລະ ການຄ້າ​ ຫວຽດນາມ ຕີ​ລາຄາ​ສູງ​ຄວາມ​ມານະ​ພະຍາຍາມ​ຂອງ​ບັນດາ​ຫົວໜ້າ​ຄະນະ ແລະ ນັກ​ເຈ​ລະ ຈາ​ທັງ​ໝົດ​ຂອງ 16 ປະເທດ​ທີ່​ເຂົ້າ​ຮ່ວມ​ກອງ​ປະຊຸມເຈລະຈາ​ສັນຍາ​ສະບັບ​ດັ່ງ​ກ່າວ. ທ່ານ​ ເຈິ່ນ​ຕ໊ວນ ​ແອັງ ຢັ້ງຢືນ​ວ່າ ໂດຍ​ເປັນ​ປະເທດ​ເຈົ້າພາບ​ຈັດ​ກອງ​ປະຊຸມ​ເຈລະ ຈາ​ຄັ້ງ​ນີ້ ແລະ ແມ່ນ​ປະເທດ​ປະທານ​ອາຊຽນ ​ປີ 2020, ຫວຽດນາມ ຈະ​ພະຍາຍາມຈົນ ​ສຸດ​ຄວາມ​ສາມາດ​ຂອງ​ຕົນ ແລະ ສົມທົບ​ກັບ​ບັນດາປະ ເທດ​ທັງ​ໝົດ ສູ້​ຊົນ​ໃຫ້​ບັນລຸ​ເປົ້າ​ໝາຍລົງ​ນາມ​ໃນ​ສັນຍາ RCEP ໃນ​ປີ 2020. ທ່ານ​ກ່າວ​ວ່າ: "ໃນ​ປີ 2019 ພວກ​ເຮົາ​ໄດ້​ເຫັນ​ປະຈັກ​ຕາ​ບັນດາ​ຄວາມ​ມານະ​ພະຍາຍາມ​ທີ່​ໃຫຍ່​ຫຼວງ​ຂອງ​ບັນດາ​ຄະນະ​ເຈລະຈາ ລັດຖະບານ​ກໍ​ຄື ຄະ ນະ​ເຈລະຈາ​ຂອງ​ບັນດາ​ປະ ເທດ​ໃນ​ສັນຍາ RCEP ນີ້. ມາ​ຮອດ​ປັດຈຸບັນ, ພວກ​ເຮົາ​ບັນລຸ​ໄດ້​ຂໍ້​ຕົກລົງ​ສະບັບ​ຕ່າງໆ​ທີ່​ສໍາ​ຄັນຈຳ​ນວນ​ໜຶ່ງ ແລະ ຫວັງ​ວ່າ ໃນ​ໄລຍະ​ຈະ​ມາ​ເຖິງຈະບັນລຸ​ ໄດ້​ບັນດາໝາກຜົນ​ຕັ້ງໜ້າ​ທີ່​ກ່ຽວຂ້ອງ​ເຖິງ​ການ​ຄ້າຂາຍ​ສິນຄ້າ, ການ​ບໍ​ລິການ ແລະ ການ​ລົງທຶນຈະ​ສືບຕໍ່​ສ້າງຄວາມ ​ເຫັນ​ດີ​ເຫັນ​ພ້ອມ​ກັບ​ທຸກ​ປະເທດ​ທີ່​ເຂົ້າ​ຮ່ວມ. ກອງ​ປະຊຸມ​ຄັ້ງ​ທີ 28 ນີ້ ແມ່ນ​ໂອກາດ​ສຸດ​ທ້າຍ​ເພື່ອ​ໃຫ້​ພວກ​ເຮົາ​ສິ້ນ​ສຸດກ່ອນ​ທີ່​ການ​ນໍາ​ບັນດາ​ປະເທດ​ຂອງ​ພວກ​ເຮົາ​ຈະ​ມີ​ການ​ພົບ​ປະ​ໃນ​ຕົ້ນ​ປີ 2020".

   ກອງ​ປະຊຸມ​ເຈລະຈາ​ດັ່ງ ກ່າວ ຈັດ​ຂຶ້ນ​ແຕ່​ວັນ​ທີ 19- 27 ກັນຍາ 2019 ຢູ່​ນະຄອນ​ດາ​ໜັງ. ນີ້​ແມ່ນ​ກອງ​ປະຊຸມ​ເຈ ລະຈາ​ສຸດ​ທ້າຍ​ໃນ​ປີ​ນີ້ ເພື່ອ​ແກ້​ໄຂ​ບັນດາ​ບັນຫາ​ທີ່​ຍັງ​ຄົງ​ຄ້າງ, ມຸ້ງ​ໄປ​ເຖິງ​ເປົ້າ​ໝາຍ​ສິ້ນ​ສຸດ​ການ​ເຈລະຈາ​ສັນຍາ​ຕາມ​ການ​ຊີ້​ນໍາ​ຂອງ​ການ​ນໍາ 16 ປະເທດ RCEP. ສັນຍາ​ສະບັບ​ດັ່ງກ່າວ​ຄາດ​ວ່າ ຈະ​ສ້າງ​ເຂດ​ການ​ຄ້າ​ເສລີ​ໃຫຍ່​ທີ່​ສຸດ​ໃນ​ໂລກ​ກັບ 16 ປະເທດ​ເຂົ້າ​ຮ່ວມ.