ໂລກ​ຮ້ອນ​ທີ່​ສຸດ​ເປັນ​ປະ­ຫວັດ­ສາດ ໃນ​ໄລ­ຍະ 5 ປີ​ທ່ີ​ຜ່ານ​ມາ

25.09.2019 9:29     

   ຂ່າວ​ຕ່າງປະເທດ​ລາຍ​ງານ ຫວ່າງ​ມໍ່ໆ​ມາ​ນີ້, ອົງການ​ອຸຕຸນິຍົມ​ໂລກ (WMO) ເປີດເຜີຍ​ບົດ​ລາຍ​ງານ​ໂດຍລະ ບຸ​ວ່າອຸນຫະພູມ​ສະເລ່ຍ​ທົ່ວ​ໂລກ​ໃນ​ລະຫວ່າງ​ປີ 2015-2019 ແມ່ນ​ໄລຍະ​ເວລາ 5 ປີ​ທີ່​ໂລກ​ຂອງ​ພວກ​ເຮົາຮ້ອນ ​ທີ່​ສຸດ. ນັບ​ຕັ້ງແຕ່​ມີ​ການ​ຮວບຮວມ​ບັນທຶກ​ກັນ​ມາ.

   ໃນ​ໄລຍະ 5 ປີ​ທີ່​ຜ່ານ ມາໂລກ​ຂອງ​ພວກ​ເຮົາ​ຮ້ອນ​ຂຶ້ນ​ເຖິງ 1,1 ອົງສາ​ເມື່ອ​ທຽບ ໃສ່​ກ່ອນ​ການ​ປະຕິວັດ​ອຸດສາ ຫະກຳ (1850-1900) ແລະ ຮ້ອນ​ຂຶ້ນ 0.2 ອົງສາ​ເຊ​ເມື່ອ​ທຽບໃສ່​ກັບ​ໄລຍະ 5 ປີ​ກ່ອນ​ໜ້າ​ນີ້ ຫຼື ລະຫວ່າງ​ປີ 2011-2015 ແລະ ຖ້າ​ນັບ​ໃຫ້​ແຄບ​ລົງ​ເອົາ​ສະເພາະ​ໃນ​ໄລຍະ 4 ປີ​ທີ່​ຜ່ານ​ມາ​ຄື: 2016-2019 ໂລກ​ຮ້ອນ​ຫຼາຍ​ທີ່​ສຸດ​ນັບ​ຕັ້ງແຕ່​ມີ​ການ​ເກັບ​ບັນທຶກ​ໃນ​ຕົ້ນ​ປີ 1850.

   ທ່ານ​ ອັນໂຕ​ນິ​ໂອ ກູ​ເ​ຕີ ເຣສ ເລຂາທິການ​ໃຫຍ່​ສະຫະ​ປະຊາຊາດ ພະຍາຍາມ​ຊຸກຍູ້​ໃຫ້​ບັນດາ​ປະເທດ​ຕ່າງໆ ເພີ່ມ​ເປົ້າ​ໝາຍ​ຫຼຸດ​ອາຍ​ແ​ກັສ​ເຮືອນ​ແກ້ວ ແຕ່​ແທນ​ທີ່​ຈະ​ຫຼຸດ​ລົງ ກາກ​ບອນ​ໄດ​ອ໋ອກ​ໄຊ ​ພັດ​ເພີ່ມ​ຂຶ້ນ 2% ໃນ​ປີ 2018 ສູງ​ເຖິງ​ລະດັບ​ສູງ​ສຸດ​ເປັນ​ປະຫວັດສາດ​ຄື 37.000 ລ້ານ​ໂຕນ ທ່ານ ກູ​ເຕີ​ເຣສ ກ່າວ​ໃນ​ອາທິດ​ທີ່​ຜ່ານ​ມາ​ວ່າ​: ໂລກກຳລັງ​ໄລ​ຕາມ​ການ​ແກ້​ບັນຫາ​ໂລກ​ຮ້ອນ ບໍ່​ທັນ​ເວລາ​ແລ້ວ.

   ອົງການ​ອຸຕຸນິຍົມ​ວິທະຍາ​ໂລກ ຫຼື WMO ແມ່ນ​ອົງການ​ພິເສດ​ຂອງ​ອົງການ ສປຊ ມີໜ້າ​ທີ່​ດ້ານ​ອຸຕຸນິຍົມ​ວິທະຍາ, ອຸ​ທົກ​ກະ​ສາດ ແລະ ພູມ​ສາດ​ກາຍ​ຍະ​ພາບ ຂະແໜງ​ໜຶ່ງ​ທີ່​ກ່ຽວຂ້ອງ ມີ​ສຳນັກງານ​ໃຫຍ່​ຢູ່​ເຈ​ນີ​ວາ​ປະເທດ​ສະ​ວິດ​ເຊີ​ແລນ ແລະ ເປັນ​ສະມາຊິກ​ຂອງ​ກຸ່ມ​ພັດທະນາ​ສະຫະ​ປະຊາຊາດ(United Nations Development Group).