ອິນ​ໂດ​ເນ​ເຊຍ ປະ­ສົບ​ບັນ­ຫາ​ຄວັນ​ໄຟ​ໄໝ້​ປ່າ

30.09.2019 9:49     

   ວິ​ທະ​ຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 25 ກັນຍາ​ຜ່ານ​ມາ, ກອງ​ທຶນ​ສຳລັບ​ເດັກ (Unicef) ຂອງ​ອົງການ​ສະຫະ​ປະຊາຊາດ ໄດ້​ເນັ້ນ​ໜັກ​ວ່າ: ຄວັນ​ໄຟ​ໄໝ້​ປ່າ​ທີ່​ເກີດ​ຂຶ້ນ​ຢູ່​ອິນ​ໂດ​ເນ​ເຊຍ ໄດ້​ສົ່ງ​ຜົນ​ກະ ທົບ​ຕໍ່​ສຸຂະພາບ​ຂອງ​ເດັກ ນ້ອຍ ອິນ​ໂດ​ເນ​ເຊຍ ທີ່​ມີ​ອາຍຸ​ຕາໍ່ກວ່າ
18 ປີ​ລົງ​ມາ​ຫຼາຍ​ກ່​ວາ 10 ລ້ານ​ຄົນ.

   ຂ່າວ​ລະບຸ​ວ່າ: ຕາມ​ໂຕ ເລກສະຖິຕິ​ຂອງ UNICEF ລາຍງານ​ວ່າ: ໃນ​ຈຳນວນ​ເດັກ ນ້ອຍ 10 ລ້ານ​ກ່​ວາ​ຄົນ ທີ່​ຖືກ​ຜົນ​ກະທົບ​ຕໍ່​ສຸຂະພາບ​ຢູ່ ອິນ​ໂດ​ເນ​ເຊຍ, ໃນ​ນັ້ນ ມີ​ເດັກ 2,4 ລ້ານ​ຄົນ​ພວມ​ຢູ່​ໃນ​ເກນ​ອາຍຸ​ປະມານ 1 ປີ, ພວມ​ດໍາ​ລົງ​ຊີວິດ​ຢູ່​ບັນດາ​ເຂດ​ທີ່​ຖືກ​ຜົນ​ກະທົບ​ຢ່າງ​ໜັກໜ່ວງ​ທີ່​ສຸດ​ຈາກ​ເຫດ​ໄຟ​ໄໝ້​ປ່າ. ທ່ານ ນາງ ເດ​ໂບ​ຣາ ໂກ​ມິ​ນິ ຜູ້ຕາງໜ້າ UNICEF ໃຫ້​ຮູ້​ວ່າ: ທຸກ​ປີ ເດັກນ້ອຍ​ຢູ່ ອິນ​ໂດ​ເນ​ເຊຍ ຫຼາຍ​ລ້ານ​ຄົນ​ຕ້ອງ​ສູບ​ເອົາ​ອາກາດ​ເປັນ​ພິດ, ສົ່ງ​ຜົນ​ກະທົບ​ຕໍ່​ສຸຂະພາບ​ຮ່າງກາຍ, ກະທົບ​ເຖິງ​ສະຕິ​ຄວາມ​ຮັບ​ຮູ້​ໃນ​ຕະຫຼອດ​ຊີ​ວິດ.

   ອົງການ UNICEF ສະຫະ​ປະຊາຊາດ ໄດ້​ກ່າວ​ເຕືອນ​ວ່າ: ມົນ​ລະ​ພິດ​ທາງ​ອາກາດອາດ​ຈະ​ສົ່ງ​ຜົນ​ກະທົບ​ຕໍ່​ເດັກນ້ອຍ​ທີ່​ກໍາ​ລັງ​ຢູ່​ໃນ​ທ້ອງແມ່. ພ້ອມ​ກັນ​ນີ້, ອົງການ UNICEF ສະເໜີ​ໃຫ້​ລັດຖະບານອິນ​ໂດ​ ເນ​ເຊຍຄວນ​ຮ່ວມ​ມື​ຢ່າງ​ແໜ້ນ​ ແຟ້ນກັບ​ບັນດາ​ຝ່າຍ​ທີ່​ກ່ຽວຂ້ອງ ເພື່ອ​ສະກັດ​ກັ້ນ​ຄວັນ​ໄຟ ແລະ ຍົກ ຍ້າຍ​ແມ່ ແລະ ເດັກນ້ອຍ​ໄປ​ສູ່​ບ່ອນ​ທີ່​ປອດ​ໄພ.