ຢ້ຽມ​ຊົມ​ອະ­ນຸ­ສອນ​ສະ­ຖານ​ປະ­ທານ ເໝົາ ເຈີ ຕຸງ

01.10.2019 9:14     

ໂດຍ​​ : ​ສ. ສິມ​ມາ​ລາວ​ົງ

   ໃນ​ໂອກາດ​ທີ່​ຄະນະນຳ​ ກະຊວງ​ຖະ​ແຫຼ​ງ​ຂ່າວ, ວັດທະ ນະທຳ ແລະ ທ່ອງ​ທ່ຽວ (ຖວທ) ນຳ​ໂດຍ​ທ່ານ ສະຫວັນ​ຄອນ ຣາ​ຊ​ມຸນ​ຕຣີ ຮອງ​ລັດຖະມົນຕີ​ກະຊວງ ຖວທ ເດີນທາງ​ໄປ​ເຂົ້າ​ຮ່ວມ​ເປີດ​ງານ​ເທດສະການ​ທ່ອງ​ທ່ຽວ ແລະ ວັດທະນະທຳ​ສາກົນ ປະຈຳ​ປີ 2019 ທີ່​ແຂວງ​ຫູ​ໜານ ສປ ຈີນ ລະຫວ່າງ​ວັນ​ທີ 22-23 ກັນຍາ​ຜ່ານ​ມາ. ຄະນະ​ດັ່ງກ່າວ ໄດ້​ໄປ​ຢ້ຽມ​ຊົມ​ອະ​ນຸ ສອນ​ສະຖານ ແລະ ພິ​ພິ​ທະ​ພັນ​ປະທານ ເໝົາ ເຈີ ຕຸງ ອະດີດ​ປະທານ​ປະເທດ​ຜູ້​ທຳອິດ​ຂອງ ສປ ຈີນ, ຜູ້​ກໍ່​ຕັ້ງ​ພັກ​ກອມ​ມູ​ນິດ​ຈີນ ທີ່​ບ້ານ​ເສົາ​ຊານ ແຂວງ​ຫູ​ໜານ ຊຶ່ງ​ເປັນ​ບ້ານ​ເກີດ​ຂອງ ປະທານ ເໝົາ ເຈີ ຕຸ​ງ.
ທີ່​ອະ​ນຸ​ສອນ​ສະຖານ​ປະ ທານ ເໝົາ ເຈີ ຕຸງ, ຄະນະ​ນຳ​ກະຊວງ ຖວທ ໄດ້​ວາງ​ພວງ​ມະ​ລາ​ເພື່ອ​ລະນຶກ​ເຖິງ​ບຸນຄຸນ ແລະ ຄຸນງາມຄວາມດີ​ຂອງ​ປະທານ ເໝົາ ເຈີ ຕຸງ ທີ່​ມີ​ຕໍ່​ປະເທດ​ຊາດ ແລະ ປະຊາຊົນ​ຈີນ, ຈາກ​ນັ້ນ​ກໍ​ໄດ້​ເຂົ້າ​ຢ້ຽມ​ຊົມ​ພິ​ພິ​ທະ​ພັນ​ປະທານ ເໝົາ​ເຈີ​ຕຸງ ຢ້ຽມ​ຊົມ​ບັນດາ​ຮູບ​ພາບ ແລະ ວັດຖຸ​ພັນ ທີ່​ທາງ​ພິ​ພິ​ທະ​ພັນ​ຍັງ​ຄົງ​ຮັກສາ​ເອົາ​ໄວ້​ໃຫ້​ແກ່​ຄົນ​ຮຸ່ນ​ໃໝ່ ໄດ້​ຮຽນ​ຮູ້​ຕາມ​ທິດ​ສັງຄົມ​ນິຍົມ. ໃນ​ການ​ຢ້ຽມ​ຊົມ​ຄັ້ງ​ນີ້, ທາງ​ຄະນະ​ຮັບຜິດຊອບ​ພິ​ພິ​ທະ​ພັນ​ປະທານ ເໝົາ​ເຈີ ຕຸງ ຍັງ​ໄດ້​ລາຍ​ງານ​ໂດຍ​ຫຍໍ້​ກ່ຽວ​ກັບ​ປະຫວັດ​ສ່ວນ​ຕົວ​ຂອງ​ປະທານ ເໝົາ ເຈີ ຕຸງ, ອະດີດ​ປະທານ​ປະເທດ ຜູ້​ກໍ່​ຕັ້ງ​ພັກ​ກອມ​ມູ​ນິດ​ຈີນ. ປະທານ​ເໝົາ ເຈີ ຕຸງ ເປັນ​ບຸກຄົນ​ທີ່​ທຸ້ມ​ເທ​ເວລາ​ໃຫ້​ແກ່​ການ​ອ່ານ ໜັງສື,ເປັນ​ຜູ້​ທີ່​ມັກ​ຊອກ​ຮູ້ຮາໍ່ ຮຽນ. ໃນ​ປີ 1910 ສະໄໝ​ຮຽນ​ຢູ່​ວິທະຍາໄລ​ຄູ ທີ່​ຫູ​ໜານ ເພິ່ນ​ມີ​ຄວາມ​ສົນໃຈ​ສຶກສາ​ແນວຄິດ ​ກອມ​ມູ​ນິດ​ຂອງ​ທ່ານ ກາກ​ມາກ, ປະທານ​ເໝົາ​ເຈີ​ຕຸງເປັນ​ນັກ​ສຶກສາ​ທີ່​ໜຸ່ມ​ນ້ອຍ​ມຸ່ງ​ໝັ້ນ​ໃນ​ການ​ພັດທະນາ​ປະເທດ ແລະ ໄດ້​ຮວບຮວມ​ຫຼາຍໆ​ບຸກ ຄົນ​ທີ່​ມີ​ຈິດໃຈ​ຮັກ​ຊາດ ກໍ່​ຕັ້ງ​ພັກ​ກອມ​ມູ​ນິດ​ຈີນ ໃນ​ປີ 1921 ແລະ ປີ​ດຽວ​ກັນ ປະທານ​ເໝົາ​ເຈີ​ຕຸງ ໄດ້​ເປັນ​ແກນ​ນຳ​ໃນ​ການ​ປະ​ທ້ວງ​ຢຸດ​ການ​ເຮັດ​ວຽກ​ຂອງ​ກຳມະກອນ​ບໍ່​ແຮ່​ທີ່​ອັນ​ຢວນ, ກໍ່​ຕັ້ງ​ກອງທັບ​ແດງ​ກຳມະກອນ ແລະ ຊາວນາ, ສ້າງຕັ້ງ​ກອງທັບ​ປົດແອກ​ປະຊາຊົນ​ປະຕິວັດ​ມີ​ຊື່ວ່າ; "ປ່າ​ລ້ອມ​ເມືອງ" ຈົນ​ໄດ້​ຮັບ​ໄຊຊະນະ​ຈາກ​ຈຽງ​ໄຄ​ເຊັກ, ປະທານ​ເໝົາ​ເຈີ​ຕຸງຂຶ້ນ​ກຳ​ອຳນາດ​ເດັດຂາດ ແລະ ສະຖາປະນາ ສປ ຈີນ ໃນ​ວັນທີ 1/10/1949 ແລະ ດໍາ​ລົງ​ຕໍາ ແໜ່ງເປັນ​ປະທານ​ປະ​ເທດ.

   ຈາກ​ນັ້ນ​ຄະນະ​ຜູ້​ແທນ, ຍັງ​ໄດ້​ໄປ​ຢ້ຽມຢາມ​ບ້ານ​ເກີດ​ຂອງ​ປະທານ ເໝົາ ເຈີ ຕຸງ ທີ່​ ບ້ານເສົາ​ຊານ ​ຊຶ່ງເປັນໜູ່ບ້ານ ​ນ້ອຍໆ ໃນ​ເຂດ​ຊົນນະບົດທາງ ​ພາກ​ກາງຂອງ​ແຂວງ​ຫູ​ໜານ, ຫ່າງ​ຈາກ​ເມືອງ​ຊາງ​ຊາ ທີ່​ເປັນ ນະຄອນ​ເອກ​ຂອງ​ແຂວງ​ ຫູໜານ ໄປ​ທາງ​ທິດຕາເວັນຕົກ​ສ່ຽງ​ໃຕ້​ປະມານ 100 ກມ. ເຂດດັ່ງ ກ່າວ, ເປັນ​ເຂດ​ພູ ແລະ ພູ​ພຽງ​ສະຫຼັບ​ກັນ, ປະທານ ເໝົາ ເຈີ ຕຸງ ເກີດ​ເມື່ອ​ວັນ​ທີ 26 ທັນວາ 1893, ພໍ່​ຂອງ​ເພິ່ນຊື່ເໝົາ ​ອີ໋​ຊາງ ແລະ ແມ່​ຊື່ ເຫ​ວີ​ນ​ ຊູ່​ສີນ, ປະທານ​ເໝົາ ເກີດ​ໃນ​ ຄອບຄົວ​ຊາວນາ, ອາ​ໄສ​ຢູ່​ເຂດ​ຊົນນະບົດ​ບ້ານ​ເສົາ​ຊານ ແຂວງ​ຫູ​ໜານ, ປະທານ​ເໝົາ ເຈີ​ຕຸງ ມີ​ອ້າຍ 2 ຄົນ, ນ້ອງ​ຊາຍ 2 ຄົນ ແລະ ນ້ອງ​ສາວ 1 ຄົນ. ບ້ານ​ເກີດ​ຂອງ​ປະທານ​ເໝົາ ຖື​ໄດ້​ວ່າ​ເປັນ​ບ້ານ​ຊາວນາ​ຂະໜາດ​ໃຫຍ່ ມີ​ເນື້ອ​ທີ່​ນໍາ​ໃຊ້​ປະມານ 470 ຕາ​ແມັດ, ດ້ານ​ຫຼັງ​ຂອງ​ເຮືອນ​ແມ່ນ​ຕິດ​ກັບ​ພູ.

   ໃນ​ປີ 2018, ບ້ານ​ເສົາ​ຊານ ຖື​ເປັນ​ຈຸດໝາຍ​ສຳຄັນ​ຂອງ​ນັກ​ທ່ອງ​ທ່ຽວ​ຈີນ ໃນ​ຖາ ນະ​ເປັນ​ເຂດ​ທ່ອງ​ທ່ຽວ​ແດງ (Red tourism) ມີ​ຄວາມ​ໝາຍວ່າ: ການທ່ອງທ່ຽວ​ຕາມ​ຮອຍ​ສະຖານທີ່​ສຳຄັນ​ທີ່​ມີ​ປະ ຫວັດສາດ​ຂອງ​ພັກ​ກອມ​ມູ​ນິດ​ຈີນ ຊຶ່ງ​ສ່ວນ​ຫຼາຍ​ແມ່ນນັກ​ທ່ອງ​ທ່ຽວ​ພາຍ​ໃນ ກວມ 90% ແລະ ທ່ອງ​ທ່ຽວ​ຕ່າງປະເທດ ກວມ 10%. ສັງເກດ​ເຫັນ​ວ່າ, ປ້າຍ​ຊີ້​ບອກ​ທາງ​ຕ່າງໆ​ຢູ່​ຕາມ​ບ້ານ​ເສົາ​ຊານ ມີ​ທັງ​ພາສາ​ຈີນ, ອັງກິດ, ຝຣັ່ງ ແລະ ຣັດ​ເຊຍ.

   ສຳລັບ​ບ້ານ​ເກີດ​ຂອງ​ປະ ທານ ເໝົາ ເຈີ ຕຸງ ມີ​ອາຍຸຫຼາຍ​ ກວ່າ​ຮ້ອຍ​ປີ ຈຶ່ງ​ຊຸດໂຊມ​ໄປ​ ຕາມ​ການ​ເວ​ລາ. ພາຍຫຼັງ​ທີ່​ ພັກ​ກອມ​ມູ​ນິດ​ຈີນ ໄດ້​ຮັບ​ໄຊ ຊະນະ ໃນ​ປີ 1949 ຈຶ່ງ​ໄດ້​ຮັບ​ການ​ສ້ອມແປງ ແລະ ປັບປຸງ​ໃໝ່ ແຕ່​ຍັງ​ຄົງ​ຮັກສາ​ໂຄງ​ສ້າງ​ເດີມ, ຊົງ​ເຮືອນ​ເປັນ​ເຮືອນ​ດິນ​ສີ​ນໍ້າ​ຕານ​ອ່ອນ, ສ່ວນ​ຫຼັງຄາ​ມຸ່ງ​ດ້ວຍ​ກະເບື້ອງ​ສີ​ເຂັ້ມ. ພາຍ​ໃນ​ບ້ານນອກ​ຈາກ​ຢູ່​ອາ​​ໄສ​ເປັນ​ຄອບຄົວ​ໃຫຍ່, ມີ​ຫ້ອງ​ຮັບແຂກ ແລະ ພາກສ່ວນ​ທາງ​ກາງ​ເຮືອນ ແມ່ນ​ເຮັດ​ໄວ້​ສຳລັບ​ເກັບ​ມ້ຽນ​ການ​ກະເສດ​ເຊັ່ນ: ເລົ້າ​ເຂົ້າ, ຄອກ​ໝູ, ຫ້ອງ​ມ້ຽນ​ຟືນ, ນອກ​ນັ້ນ​ອ້ອມ​ຮອບ​ເຮືອນ​ຍັງ​ມີ​ສວນ​ຜັກ, ທົ່ງ​ນາ ແລະ ມີ​ໜອງ​ນໍ້າ​ຂະໜາດ​ໃຫຍ່.

   ເຖິງ​ແມ່ນ​ວ່າການ​ຢ້ຽມ​ຊົມ​ອະນຸ​ສອນ​ສະຖານ ແລະ ພິ​ພິ​ທະ​ພັນ​ປະທານ ເໝົາ ເຈີ ຕຸງ ຈະ​ໃຊ້​ເວລາ​ພຽງ​ສັ້ນໆ ແຕ່​ກໍສາມາດ​ຕີ​ລາຄາ​ໄດ້​ວ່າ: ພັກ, ລັດ ແລະ ປວງ​ຊົນ​ຊາວ​ຈີນ ທົ່ວ​ປະເທດ ຍາມ​ໃດ​ກໍ່​ຈົດ​ຈໍາ​ຄຸນ​ງາມ ຄວາມ​ດີ​ຂອງ​ປະທານ ເໝົາ ເຈີ ຕຸງ ຕະຫຼອດ​ໄປ, ຍ້ອນ​ມີ​ເພິ່ນ ແລະ ນັກ​ຮັກ​ຊາດ​ຈີນ ໃນ​ວັນ​ນັ້ນ ຈິ່ງ​ມີ ສປ ຈີນ ໃນ​ມື້​ນີ້.