GDP ອາ​ເມ​ຣິ​ກາ​ໄຕ​ມາດ 2 ຂະ­ຫຍາຍ­ຕົວ 2%

01.10.2019 9:16     

   ຂ່າວ​ຕ່າງປະເທດ​ລາຍ​ງານ​ວ່າ: ທ້າຍ​ອາທິດ​ຜ່ານ​ມາ, ກະຊວງ​ການ​ຄ້າ​ອາ​ເມ​ຣິ​ກາ ໄດ້​ເປີດເຜີຍ​ການ​ຄາດ​ຄະເນ​ຄັ້ງ​ທີ 3 ສຳລັບ​ການ​ຂະຫຍາຍຕົວ​ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ໃນ​ໄຕ​ມາດ​ທີ 2 ປີ 2019 ຢູ່​ໃນ​ລະດັບ 2%, ສອດຄ່ອງ​ກັບ​ໂຕ​ເລກ​ທີ່​ຄາດ​ຄະເນ​ຄັ້ງ​ທີ 2, ຫຼັງ​ຈາກ​ທີ່​ເສດຖະກິດ​ຂະຫຍາຍຕົວ 3,1% ໃນ​ໄຕ​ມາດ​ທຳອິດ ແລະ 2,6% ໃນ 6 ເດືອນ​ຕົ້ນ​ປີ​ນີ້.

   ນັກ​ວິເຄາະ​ຄາດ​ຄະເນ​ວ່າ: ເສດຖະກິດ​ອາ​ເມ​ຣິ​ກາ ຈະ​ຂະຫຍາຍຕົວ 2,5% ໃນ​ປີ​ນີ້ ຊຶ່ງ​ຕໍ່າກວ່າ​ຄາດໝາຍ ທີ່ ທ່ານ ໂດ​ໂນ ທຣຳ ປະທານາທິບໍດີ​ອາ​ເມ​ຣິ​ກາ ຕັ້ງ​ໄວ້​ໃນ​ລະດັບ 3%. ເສດຖະກິດ​ອາ​ເມ​ຣິ​ກາ ມີ​ການ​ຂະຫຍາຍຕົວ​ຕິດຕໍ່​ກັນ​ເປັນ​ປີ​ທີ 11. ຢ່າງໃດ​ກໍ​ຕາມ ການ​ເຮັດ​ສົງຄາມ​ການ​ຄ້າ ລະຫວ່າງ ອາ​ເມ​ຣິ​ກາ ແລະ ຈີນ ໄດ້​ສົ່ງ​ຜົນ​ກະທົບ​ຕໍ່​ການ​ລົງທຶນ ແລະ ການ​ຜະລິດ​ຂອງ​ພາກ​ທຸລະ​ກິດ, ເຖິງ​ວ່າການ​ຊົມໃຊ້​ເພີ່ມ​ຂຶ້ນ, ການ​ໃຊ້​ຈ່າຍ​ຂອງ​ຜູ້​ບໍລິໂພກ​ເພີ່ມ​ຂຶ້ນ 4,6% ໃນ​ໄຕ​ມາດ​ທີ 2 ຊຶ່ງ​ເປັນ​ລະດັບ​ສູງ​ທີ່​ສຸດ​ນັບ​ຕັ້ງແຕ່​ໄຕ​ມາດ​ທີ 4 ຂອງ​ປີ 2014, ແຕ່​ຫຼຸດ​ລົງ​ເລັກ​​ໜ້ອຍ​ຈາກ​ໂຕ​ເລກ​ການ​ຄາດ​ຄະເນ​ຄັ້ງ​ທີ​ສອງ 4,7% ຊຶ່ງ​ໄດ້​ຮັບ​ແຮງ​ໜູນ​ຈາກ​ຕະຫຼາດ​ແຮງ​ງານ​ທີ່​ເຂັ້ມ​ແຂງ.

   ຂ່າວ​ລະບຸ​ວ່າ: ການ​ລົງທຶນ​ໃນ​ຂະແໜງ​ທຸລະ​ກິດ​ຫຼຸດ​ລົງ 1% ໃນ​ໄຕ​ມາດ​ທີ 2 ຊຶ່ງ​ຮ້າຍ​ແຮງ​ກວ່າ​ການ​ຄາດ​ຄະເນ​ຄັ້ງທີ​ ສອງ ຫຼຸດ​ລົງ 0,6%, ເປັນ​ການ​ປັບ​ໂຕ​ຫຼຸດ​ລົງ​ຄັ້ງ​ທຳອິດ ນັບ​ຕັ້ງແຕ່​ໄຕ​ມາດ​ທຳອິດ​ຂອງປີ 2016 ແລະ ເປັນ​ການ​ຫຼຸດ​ລົງ ​ຫຼາຍ​ທີ່​ສຸດ​ນັບ​ຕັ້ງແຕ່​ໄຕ​ມາດ ​ທີ 4 ຂອງ​ປີ 2015. ການ​ລົງ ທຶນ​ຂອງ​ລັດຖະບານ​ເພີ່ມ​ຂຶ້ນ​ຫຼາຍ​ກວ່າ ທີ່​ມີ​ການ​ລາຍ​ງານ​ໂຕ​ເລກ​ການ​ຄາດ​ຄະເນ​ຄັ້ງ​ທີ​ສອງ. ສ່ວນ​ການ​ໃຊ້​ຈ່າຍ​ໃນ​ການ​ກໍ່ສ້າງ​ເຮືອນ​ຫຼຸດ​ລົງ​ຕິດຕໍ່​ກັນ​ເປັນ​ໄຕ​ມາດ​ທີ 6 ຊຶ່ງ​ເປັນ​ໄລຍະ​ທີ່​ຍາວ​ທີ່​ສຸດ ນັບ​ຕັ້ງແຕ່​ທີ່​ເກີດ​ສະພາບ​ເສດຖະກິດ​ຕົກ​ຕໍ່າ​ຄັ້ງ​ໃຫຍ່.

   ນອກຈາກ​ນັ້ນ, ອາ​ເມ​ຣິ​ກາ ຂາດດູນ​ການ​ຄ້າ​ເພີ່ມ​ຂຶ້ນ​ສູ່​ລະດັບ 9.807 ຕື້​ໂດ​ລາ ໃນ​ໄຕ​ມາດ​ທີ 2, ແຕ່​ຫຼຸດ​ລົງ​ຈາກ​ໂຕ​ເລກ​ຄາດ​ຄະເນ​ຄັ້ງ​ທີ​ສອງ ທີ່​ບັນລຸ 9.825 ຕື້​ໂດ​ລາ.