ສະ­ໜາມ​ບິນ​ແ​ອັສ​ປາຍ ຈະ​ນຳ​ໃຊ້​ພະ­ລັງ­ງານ​ແສງ­ຕາ​ເວັນ​ໃຫ້​ໄດ້ 70%

 

 

11.10.2019 9:08     

(ເນື່ອງ​ໃນ​ໂອກາດ​ວັນຊາດ ແອັ​ສ​ປາຍ 12 ຕຸ​ລາ)

ຮຽບຮຽງ​ໂດຍ​​ : ລຸ້ງ​ດາວ

   ການ​ປ່ຽນແປງ​ຂອງ​ດິນ​ຟ້າ​ອາກາດ​ກາຍເປັນ​ບັນຫາ​ທົ່ວ​ໂລກ​ທີ່​ຫຼາຍ​ອົງການ​ຈັດ​ຕັ້ງ​ທັງ​ພາກ​ລັດ​ ແລະ ເອກະ​ຊົນ ໄດ້​ອອກ​ມາດ​ຕະການ​ເພື່ອ​ແກ້​ໄຂ​ບັນຫາ​ດັ່ງ​ກ່າວ. ໃນ​ທ້າຍ​ເດືອນ​ກຸມພາ​ຜ່ານ​ມາ, Aena (ລັດ​ວິ​ສາ​ຫະ​ກິດ​ຄຸ້ມ​ຄອງ​ສະໜາມ​ບິນ 46 ແຫ່ງ ໃນ​ປະ​ເທດ​ແ​ອັສ​ປາຍ) ໄດ້​ອະນຸມັດ​ແຜນການ​ໂຟ​ໂຕ​ໂວ​ລ​ຕາ​ອິ​ໂກ (Fotovoltaico) ຫຼື ການ​ຕິດ​ຕັ້ງ​ແຜງ​ພະລັງງານ​ແສງຕາ​ເວັນ (Solarcell) ເພື່ອ​ຜະລິດ​ໄຟຟ້າ​ຈາກ​ພະລັງງານ​ແສງຕາ​ເວັນ ໃຫ້​ໄດ້ 70% ຂອງ​ ການ​ນຳ​ໃຊ້​ ໄຟຟ້າ​ທັງ​ໝົດ​ພາຍ​ໃນ ປີ 2026. ແຜນການ​ດັ່ງກ່າວ, ສະທ້ອນ​ໃຫ້​ເຫັນ​ເຖິງ​ຄວາມ​ມຸ້ງ​ໝັ້ນ​ຂອງ​ບໍລິສັດ​ທີ່​ສອດຄ່ອງ​ກັບ​ນະໂຍບາຍ​ຂອງ​ລັດ​ຖະ​ບານ​ແ​ອັສ​ປາຍ ໃນ​ການ​ຮັບ​ມື​ກັບ​ບັນຫາ​ການ​ປ່ຽນແປງ​ຂອງ​ສະພາບ​ດິນ​ຟ້າ​ອາກາດ ລວມ​ເຖິງ​ການ​ດຳເນີນ​ງານ​ຂອງ EU ເລື່ອງ​ການ​ສ້າງ​ຄວາມ​ເປັນກາງ​ດ້ານ​ກາກ​ບອນ (carbon neutral) ພາຍ​ໃນ​ປີ 2030.

   Aena ມີ​ຈຸດປະສົງ​ໃນ​ການ​ຕິດ​ຕັ້ງ​ແຜງ Solarcell ໃນ​ສະໜາມ​ບິນ​ຫຼາຍ​ກວ່າ 20 ແຫ່ງ​ໃນ​ປະເທດ ໂດຍ​ຈະ​ໃຊ້​ງົບປະມານ 250 ລ້ານ​ເອີ​ໂຣ ໂດຍ​ຄາດ​ວ່າ: ການ​ຕິດ​ຕັ້ງ Solarcell ຕາມ​ແຜນການ​ຈະ​ຊ່ວຍ​ປະຢັດ​ໄຟຟ້າ​ຢູ່​ສະໜາມ​ບິນ​ໄດ້​ເຖິງ 70% ຂອງ​ຄ່າ​ໄຟຟ້າ ທີ່​ຈ່າຍ​ໃນ​ແຕ່​ລະ​ປີ ຊຶ່ງ​ສູງ​ກວ່າ 75 ລ້ານ​ເອີ​ໂຣ ແລະ ຊ່ວຍ​ຫຼຸດຜ່ອນ​ການ​ປ່ອຍ​ອາຍ​ກາ​ກາກ​ບອນ​ໄດ​ອອກ​ໄຊ ໄດ້​ເຖິງ 167.000 ໂຕນ ຫຼື ປະມານ 40% ພາຍ​ໃນ​ປີ 2025. ການ​ຫຼຸດ​ຄ່າ​ໄຟຟ້າ​ຂອງ Aena ຈະ​ເປັນ​ປະໂຫຍດ​ຕໍ່​ການ​ຄິດໄລ່​ອັດຕາ​ພາສີ​ສະໜາມ​ບິນ ໃນ​ລາຄາ​ທີ່​ຕ່ຳ​ລົງ. ຜູ້ໂດຍສານ​ທີ່​ເດີນທາງ​ໂດຍ​ໃຊ້​ສະໜາມ​ບິນ​ທີ່​ຕິດ​ຕັ້ງ​ແຜງ Solarcell ເຫຼົ່າ​ນີ້ ຈະ​ໄດ້​ຮັບ​ຜົນ​ປະໂຫຍດ​ເຊັ່ນ​ກັນ.

   ນອກຈາກ​ນັ້ນ, ການ​ນຳ​ໂຄງການ​ຕິດ​ຕັ້ງ​ແຜງ Solarcell ມາ​ໃຊ້​ຈະ​ເຮັດ​ໃຫ້ Aena ເປັນ​ຜູ້ນຳ ຂອງ​ເອີ​ຣົບ ດ້ານ​ການ​ຜະລິດ​ພະລັງງານ​ທົດ​ແທນ​ໃນ​ສະໜາມ​ບິນສາມາດ​ຜະລິດ ກະ ແສ​ໄຟຟ້າ​ໄດ້ 650 ກິ​ກາ​ວັດ (gigawat/h) ຕໍ່​ຊົ່ວໂມງ ແລະ ຈະ​ເຮັດ​ໃຫ້​ສະໜາມ​ບິນ​ຫຼັກ ສອງ​ແຫ່ງ​ຄື: ສະໜາມ​ບິນ Adolfo Suarez Madrid Barajas ໃນ​ນະຄອນຫຼວງ​ມາດ​ຣິດ ແລະ ສະໜາມ​ບິນ Barcelona - El Prat ໃນ​ບາ​ເຊ​ໂລ​ນາ ບັນລຸ​ເປົ້າ​ໝາຍ​ການ​ມີຄ່າ​ຄວາມ​ເປັນກາງ​ດ້ານ​ກາກ​ບອນ (carbon neutral) ພາຍ​ໃນ​ປີ 2030 ອີກ​ດ້ວຍ. ສຳລັບ​ສະໜາມ​ບິນ Adolfo Suarez Madrid Barajas, ບໍລິສັດ Aena ມີ​ແຜນ​ຈະ​ສ້າງ​ໂຮງງານ​ຜະລິດ​ໄຟຟ້າ​ພະລັງງານ​ແສງ ຕາ ​ເວັນ(Solar cell) ໃນ​ເນື້ອທີ່ 22 ເຮັກຕາ ແລະ ໄດ້​ເປີດ​ການ​ປະມູນ​ການ​ກໍ່ສ້າງ​ໂຮງ​ໄຟຟ້າ​ພະລັງງານ​ແສງຕາ​ເວັນ ທີ່​ມີ​ກຳລັງ​ການ​ຜະລິດ 7,5 ເມ​ກາ​ວັດ ເມື່ອ​ຕົ້ນ​ເດືອນ​ມີນາ​ທີ່​ຜ່ານ​ມາ. ງົບປະມານ​ສຳລັບ​ໂຄງ ການ​ນີ້ ແມ່ນ 13 ລ້ານ​ເອີ​ໂຣ.

   ແ​ອັສ​ປາຍ ເປັນ​ປະເທດ​ທີ່​ມີ​ຄວາມ​ກ້າວໜ້າ​ດ້ານ​ພະລັງ ງານ​ທົດ​ແທນ​ທີ່​ຫຼາກ​ຫຼາຍ. ຖ້າ​ເຈາະ​ເລິກ​ກ່ຽວ​ກັບ​ການ​ຜະລິດ​ ກະແສ​ໄຟຟ້າ​ຈາກ​ແຜງ​ພະລັງ ງານ​ແສງຕາ​ເວັນ (SolarCell ຫຼື Solar Photovoltaics), ແ​ອັສ​ປາຍ ມີ​ຈຳນວນ​ການ​ຕິດ​ຕັ້ງ​ແຜງ Solarcell ຫຼາຍ​ເປັນ​ອັນ​ດັບ​ທີ 5 ຂອງ​ເອີ​ຣົບ ລວມ 5,6 ກິ​ກະ​ວັດ ຫຼື ຄິດ​ເປັນ​ອັດຕາ​ສ່ວນ 4,9% ຂອງ​ພາກ​ພື້ນ. ນອກຈາກ​ນີ້, ແ​ອັສ​ປາຍ ຍັງ​ມີ​ການ​ຕິດ​ຕັ້ງ​ເຕັກ​ໂນ​ໂລ​ຊີ ຈາກ​ຄວາມ​ຮ້ອນ​ຂອງ​ແສງຕາ​ເວັນ (Solar Thermal Electricity: STE) ຫຼາຍ​ທີ່​ສຸດ​ໃນ​ໂລກ ລວມ​ທັງ​ໝົດ 2,87 ກິ​ກະ​ວັດ ແລະ ທີ່​ສຳຄັນ 78% ຂອງ​ໂຄງການ​ຜະລິດ​ໄຟຟ້າ​ຄວາມ​ຮ້ອນ​ຈາກ​ແສງຕາ​ເວັນ​ຂອງ​ໂລກດຳເນີນ​ງານ​ໂດຍ​ບໍລິສັດ​ແ​ອັສ​ປາຍ. ໃນ​ເລື່ອງ​ນີ້, ບໍລິສັດ ແ​ອັສ​ປາຍ ມີ​ຄວາມ​ຊ່ຽວຊານ​ດ້ານ​ການ​ຜະລິດ​ໄຟຟ້າ​ ຈາກ​ພະລັງງານ​ແສງຕາ​ເວັນ​ທີ່​ມີ​ຊື່​ສຽງ ແລະ ມີ​ຜົນງານ​ຢູ່​ຕ່າງປະເທດ​ຫຼາຍ​ບໍລິສັດ​ເຊັ່ນ: ບໍລິສັດ Isolux Corsan, ບໍລິ​ສັດ Abengoa, ບໍລິສັດ Grupo Cobra, ບໍລິສັດ, Acciona Energía ອື່ນໆ. ການ​ນຳ​ພະລັງງານແສງຕາ​ເວັນ​ມາ​ໃຊ້​ໃຫ້​ເກີດ​ປະໂຫຍດ ຈຶ່ງ​ເປັນ​ໜຶ່ງ​ຕົວຢ່າງ​ຂອງ ​ການ​ຮັບ​ມື​ກັບ​ບັນຫາ​ການ​ປ່ຽນແປງ​ຂອງ​ດິນ​ຟ້າ​ອາກາດ ແລະ ສົ່ງເສີມ​ການ​ພັດທະນາ​ແບບ​ຍືນ​ຍົງ​ຕາມ​ວິທີ​ຂອງ​ແ​ອັສ​ປາຍ.